के तपाईं हृदयदेखि यहोवाका आशिष्हरूको मूल्यांकन गर्नुहुन्छ?
हलका रुघाखोकी लागेकोले, केनेची भन्ने अधबैंसे भद्रपुरुष औषधी किन्न पसलतिर गए। औषधी खाएपछि त उल्टै एलर्जी भएर जीउभरि असाध्यै चिलाउने घमौरो र पानीफोका पो निस्क्यो। स्वाभाविकै हो, कतै पसलेले वास्तै नगरी औषधी दियो कि भनेर केनेचीलाई शंका लाग्यो।
केनेचीले औषधी पसलेलाई शंका गरेजस्तै कसै कसैले परमेश्वरलाई शंका गर्नसक्छ। सर्वशक्तिमान् परमेश्वर यहोवा हाम्रो व्यक्तिगत चासो राख्नुहुन्न भनेर तिनीहरू शंका गर्छन्। परमेश्वर असल हुनुहुन्छ भनी तिनीहरू मान्न त मान्छन् तर व्यक्तिगत रूपमा हाम्रो फिक्री गर्नुहुन्छ भन्ने कुराप्रति भने विश्वस्त छैनन्। विशेषगरि आफूले भनेजस्तो नभइदिंदा वा बाइबलका सिद्धान्तहरू पछ्याउँदा पछ्याउँदै पनि कठिन समस्याहरू आइपर्दा मानिसहरू परमेश्वरलाई त्यसरी शंका गर्छन्। समझशक्तिको कमीले गर्दा तिनीहरू आफ्ना समस्याहरूलाई केनेचीको जीउमा अप्रत्याशित ढंगमा निस्केका असाध्यै चिलाउने घमौरो र पानीफोकाझैं ठान्छन्, मानौं अरू कोही नभई परमेश्वर नै त्यसको दोषी हुनुहुन्छ।—हितोपदेश १९:३.
यहोवालाई असिद्ध मानिसहरूसँग तुलना गर्न पटक्कै मिल्दैन। मानिसहरूको ज्ञान तथा योग्यता सीमित छ। औषधी पसलेले केनेचीको आवश्यकता बुझ्न नसकेझैं मानिसहरू अरूका वास्तविक आवश्यकताहरू बुझ्न सक्दैनन्। यसको विपरीत, यहोवाको नजरबाट कुनै कुरा लुक्दैन। हामीलाई यो कुरा यादै नहोला वा बुझ्दै नबुझेका होऔंला तैपनि अक्सर यहोवा हामीलाई मदत गर्नुहुन्छ। किनकि आफूसँग नभएका कुरामा मन घुमाउने अनि आफूले पाएका थुप्रै आशिष्हरूलाई चाहिं बेवास्ता गर्ने हाम्रो झुकाउ हुन्छ। हामीले भोग्नुपरेका समस्याहरूको दोष हत्त न पत्त यहोवालाई लगाउनुको साटो उहाँबाट पाएका आशिष्हरूमा मन लगाउने प्रयास गर्नुपर्छ।
वेब्सटर्स नाइन्थ न्यु कलेजिएट डिक्शनेरी-अनुसार “आशिष्[लाई]” “आनन्दित तुल्याउने वा हित गर्ने कुरा” भनेर परिभाषित गर्न सकिन्छ। खासगरि यहोवाले दिनुहुने आशिष्हरू त्यस्ता हुन्छन् भनेर के तपाईं मानिलिनुहुन्छ?
अतुलनीय दाता
आफ्ना पति असल दाता हुनुहुन्छ भनी पत्नीले भन्नुको तात्पर्य पतिले परिवारको आवश्यकताप्रति राम्रो हेरविचार गर्छन् भन्ने हो। तिनले परिवारको आनन्द र हितको निम्ति प्रशस्त भोजन, राम्रो आवास र लुगाफाटाको प्रबन्ध मिलाउँछन्। हाम्रा दाताको हैसियतमा यहोवा कत्तिको असल हुनुहुन्छ त? पृथ्वी अर्थात् मानिसजातिको बासस्थानलाई राम्ररी विचार गर्नुहोस्। सूर्यदेखि १५,००,००,००० किलोमिटरको दूरीमा पृथ्वी अवस्थित छ र यो दूरी पृथ्वीमा जीवन सम्भव पार्न चाहिने तापक्रमको निम्ति ठिक्क छ। हाम्रो भूमण्डल २३.५ डिग्रीमा ढल्केको छ र यो ढल्काइ एकदम अनुकूल छ। यसैले गर्दा ऋतुहरू परिवर्तन हुन्छन् र प्रशस्त अन्नबाली उम्रन्छन्। फलस्वरूप, पृथ्वीले पाँच अरबभन्दा बढी मानिसहरूको जीवन धान्ने खाद्यान्न उत्पादन गर्छ। साँच्चै यहोवा कत्ति अद्भुत दाता हुनुहुन्छ!
यसबाहेक, यहोवाले व्यक्तिगत रूपमा हामी तथा हाम्रो हितबारे गहिरो चासो राख्नुहुन्छ भनेर बाइबलले आश्वासन दिन्छ। यसो विचार गर्नुहोस् त, यहोवाले अरबौं ताराहरूको एक एक नाउँ जान्नुहुन्छ अनि एउटै भँगेरा पनि उहाँले पत्तै नपाई भुइँमा खसेको छैन। (यशैया ४०:२६; मत्ती १०:२९-३१) उहाँलाई प्रेम गर्ने तथा उहाँका प्रिय पुत्र येशू ख्रीष्टको अनमोल रगतले किनिएका मानिसहरूको झन् उहाँ कत्ति फिक्री गर्नुहुन्छ! (प्रेरित २०:२८) त्यसैकारण, बुद्धिमान् मानिसले यस्तो उपयुक्त घोषणा गरे: “परमप्रभुको आशिष्ले धन-सम्पत्ति ल्याउँछ, उहाँले तीसित दुःख पठाउनुहुन्न।”—हितोपदेश १०:२२.
हामीलाई धनी बनाउने आशिष्हरू
हामीसँग बहुमूल्य धनसम्पत्ति छ र त्यसप्रति हामी धेरै कृतज्ञ हुनुपर्छ। त्यो के हो? त्यसबारे बाइबल यसो भन्छ: “तपाईंको मुखबाट निस्केको व्यवस्था मेरो निम्ति हजारौं सुन र चाँदीभन्दा असल छ।” (भजन ११९:७२; हितोपदेश ८:१०) निखुर सुन बहुमूल्य होला तर यहोवाको व्यवस्था त त्यो भन्दा झनै बहुमूल्य छन्। यहोवाको व्यवस्थाको सही ज्ञानको साथसाथै सत्य खोज्ने इमानदार व्यक्तिहरूलाई उहाँले दिनुहुने अन्तरदृष्टि र समझशक्ति बहुमूल्य कुरा हुन्। त्यसले आफ्नो सुरक्षा गर्न, कठिन परिस्थितिहरूको सामना गर्न र समस्याहरू राम्ररी सुल्झाउन सुसज्जित पार्छ। फलतः त्यसले सन्तुष्ट तथा आनन्द दिन्छ।
उक्त कुरा साना केटाकेटीको जीवनमा पनि सत्य साबित हुन्छ। एउटी सानी केटीले यहोवाको व्यवस्था पछ्याएर आफ्ना समस्याहरू कसरी सुल्झाइन्, यसो विचार गर्नुहोस्। एकीमा नामक उक्त केटी टोकियो शहर नजिकै बस्छिन्। आमाबाबुले बाइबल सिद्धान्तहरू चलाएर उनलाई प्रशिक्षण दिए, साथै यहोवा र छिमेकीप्रति प्रेम बढाउन परमेश्वरको वचन तथा उदाहरणद्वारा मदत पनि गरे। उनले स्कूलमा सामना गर्नुपर्ने समस्याहरूलाई पूर्वविचार गरेर आमाबाबुले यथासम्भव राम्रो प्रशिक्षण दिए। तथापि, माध्यमिक विद्यालयमा अध्ययन गर्न थालेपछि केही सहपाठीहरूले उनलाई “भिन्नै” दृष्टिकोणले हेर्न थाले। किनकि उनी खाना खानुअघि प्रार्थना गर्थिन् र गैरधर्मशास्त्रीय क्रियाकलापहरूबाट अलग बस्न होसियार रहन्थीन्। दुई चार दिन नबित्दै हुल्याहा विद्यार्थीहरूको समूहले उसको हाँसो उडाउन र आलोचना गर्नथाले। स्कूल छुट्टी भएपछि तिनीहरू उनलाई घेरेर थप्पड हान्थे, पाखुरा बटार्थे र खिल्ली उडाउँथे।
सानी एकीमीले न साटो फेरिन् न त आफूलाई सताउनेहरूसँग नै डराइन्। बरु, आफूले सिकेका कुराहरू व्यवहारमा उतार्ने प्रयास गरिन्। उनको असल व्यवहार र साहसले गर्दा उनलाई थुप्रै सहपाठीहरूले आदर गर्नथाले। उनको समस्या ती सहपाठीहरूले शिक्षकलाई बताए। त्यस दिनदेखि एकीमीले स्कूलमा कहिल्यै दुर्व्यवहार सहनुपरेन।
सफलतापूर्वक कठिन परिस्थितिको सामना गर्न एकीमीलाई कुन कुराले मदत गऱ्यो? उनको आमाबाबुले सिकाएका यहोवाको सही ज्ञान, अन्तरदृष्टि र बुद्धिले। येशूको सहनशीलताबारे परिचित भएकोले उहाँको उदाहरण पछ्याउन उनी प्रेरित भइन्। कुनै कुनै व्यक्तिले अज्ञानतावश खराब काम गर्छ भनेर बाइबलले उनलाई बुझ्ने मदत दियो। फलतः तिनले व्यक्तिलाई नभई तिनीहरूको खराब कार्यलाई घृणा गर्ने प्रोत्साहन पाइन्।—लूका २३:३४; रोमी १२:९, १७-२१.
निस्सन्देह, कुनै पनि आमाबाबुले आफ्नो बच्चा हाँसो र दुर्व्यवहारको पात्र बनेको चाहँदैनन्। तैपनि, आफ्नी छोरीले सामना गर्न सकेका सबै कुराहरू सुनेर एकीमीका आमाबाबु कति खुशी भए, तपाईं अनुमान गर्न सक्नुहुन्छ। त्यस्ता बच्चाहरू साँच्चै यहोवाका आशिष् हुन्।—भजन १२७:३; १ पत्रुस १:६, ७.
धीरजी भएर यहोवालाई पर्खने
यद्यपि, यहोवाको आशिष् पाउनुअघि कहिलेकाहीं उहाँको समय नआउञ्जेल पर्खनैपर्ने हुन्छ। यहोवा तपाईंको परिस्थिति जान्नुहुन्छ र तपाईंका आवश्यकताहरू कुन बेला पूरा गरे धेरै लाभ हुन्छ, सो ध्यानमा राख्नुहुन्छ। (भजन १४५:१६; उपदेशक ३:१; याकूब १:१७) तपाईंलाई फलफूल खूब मीठो लाग्छ होला, तर कसैले काँचै फलफूल दियो भने कस्तो लाग्छ? स्याउ, सुन्तला वा अरू फलफूल नै किन नहोस्, मजाले पाकेको, रसिलो र मीठो भएको तपाईं मन पराउनुहुन्छ, होइन त? त्यसैगरि, यहोवाले तपाईंका आवश्यकताहरू ठीक समयमा पूरा गर्नुहुन्छ—धेरै छिट्टो पनि होइन साह्रै ढिलो पनि होइन।
यूसुफको अनुभवलाई विचार गर्नुहोस् त। आफ्नो कुनै कसूरै नभए तापनि तिनी मिश्रको कालकोठरीमा थुनिए। रिहाइ हुने आशा गरिएको सँगी कैदी अर्थात् फिरऊनको मुख्य पियाउनेले रिहाइ भएपछि यूसुफको विषयमा फिरऊनसँग कुरा गर्ने वाचा गरेको थियो। तर रिहाइपश्चात् उसले यूसुफलाई चटक्कै बिर्स्यो। यूसुफ त्यागीएझैं देखिन्थे। तथापि, पूरा दुई वर्षपछि तिनको रिहाइ भयो र अन्ततः तिनलाई मिश्रको दोस्रो शासक नियुक्त गरियो। अधीर नभई यूसुफले यहोवालाई पर्खे। फलतः तिनले आशिष् पाए र त्यही आशिष्ले गर्दा इस्राएली र मिश्रीहरूको जीवन बच्यो।—उत्पत्ति ३९:१–४१:५७.
मासाही उत्तरी जापानको मण्डलीमा प्राचीनको हैसियतले सेवा गर्थे। युसूफजस्तो तिनी कालकोठरीमा त थिएनन् र पनि यहोवालाई पर्खनुपऱ्यो। किन? जापानमा मिनिस्टेरियल ट्रेनिङ स्कूल अर्थात् योग्य मसीही सेवकहरूलाई प्रशिक्षण दिने पाठशाला सञ्चालन भएदेखि पाठशालामा उपस्थित हुने तिनको उत्कट लक्ष्य थियो। उक्त विशेषाधिकार पाउन सकूँ भनेर तिनले खूब प्रार्थना गरे। तिनका अग्रगामी साथीलाई चाहिं आमन्त्रित गरियो। तर उत्कट इच्छाको बावजूद तिनलाई भने आमन्त्रित गरिएन। तिनी हुनसम्म निराश भए।
यद्यपि, तिनले आफ्नो मनमा रुमलिएका भावनाहरू सामना गर्न कदम चाले। नम्र हुने तथा भावनात्मक कुराहरूलाई नियन्त्रण गर्ने विषयहरूमा ध्यान लगाएर तिनले बाइबल र वाच टावर सोसाइटीद्वारा प्रकाशित प्रकाशनहरू अध्ययन गरे। तिनले आफ्नो सोचाइ काँटछाँट गरे। फलतः आफ्नो कार्यभारबाट धेरै सन्तुष्टि पाउनसके। पछि, सोच्दै नसोचेको समयमा तिनले पाठशालामा उपस्थित हुने निमन्त्रणा पाए।
सहनशीलता र नम्रताजस्ता असल गुनहरू विकास गरेका हुनाले तिनले पाठशालाबाट प्रशस्त फाइदा उठाउनसके। पछि, परिभ्रमण निरीक्षकको हैसियतमा आफ्ना भाइहरूको सेवा गर्ने कार्यभार पाए। हो, यहोवाले मासाहीको आवश्यकता जान्नुहुन्थ्यो र धेरैभन्दा धेरै फाइदा हुनसक्ने समयमा त्यसलाई ठ्याक्क पूरा गर्नुभयो।
उहाँका आशिष्हरू खोज्नुहोस्
तसर्थ, यहोवा औषधी पसलेजस्तो हुनुहुन्न। यहोवाले गर्नुहुने फिक्री तथा चिन्ताहरू हामीले बुझ्न नसकौंला तर समयको अन्तरालमा हामीलाई धेरैभन्दा धेरै फाइदा हुनसक्ने गरी विभिन्न तरिकाहरूद्वारा उहाँ दया देखाउनुहुन्छ। अतः लगातार उहाँका आशिष्हरू खोज्नुहोस्। नबिर्सनुहोस्, कृतज्ञ हुनुपर्ने थुप्रै कारणहरू त तपाईंसँग छँदैछ। जीवन धान्न चाहिने आधारभूत आवश्यकताहरूदेखि तपाईं वञ्चित हुनुपरेको छैन। यहोवाको ज्ञान तथा उहाँका सिद्ध मार्गहरू पाउनुभएको छ। तपाईंलाई अन्तरदृष्टि दिइएको छ। अनि समझशक्ति प्राप्त गर्नुभएको छ। यी सबै कुराहरूले गर्दा तपाईं सकुशल र आनन्दित हुनुहुन्छ।
यहोवाका अझ थुप्रै आशिष्हरू अनुभव गर्न बाइबल अध्ययन गरिरहनुहोस्। यहोवाको वचनमा पाइने रत्नझैं बहुमूल्य शिक्षाहरू बुझ्न र जीवनमा उतार्न प्रार्थनाद्वारा उहाँसँग मदत माग्नुहोस्। त्यसले तपाईंलाई आध्यात्मिक तवरमा साँच्चै धनी तुल्याउनेछ र तपाईंमा कुनै कुराको कमी हुनेछैन। हो, ती कुराहरू प्राप्त गर्नुको अर्थ अहिले आनन्द तथा सन्तुष्टि र आउनेवाला नयाँ संसारमा चाहिं प्रशस्त जीवन हुनेछ।—यूहन्ना १०:१०; १ तिमोथी ४:८, ९.
[पृष्ठ २३-मा भएको चित्र]
यहोवाको आशिष् सुनभन्दा बहुमूल्य छ