पर्चाहरू–सुसमाचार प्रस्तुत गर्ने सरल तथा प्रभावकारी तरिका
१ यहोवाका जनहरूले सन् १८८१ देखि अहिलेसम्म आफ्नो सेवकाईमा पर्चाहरू प्रयोग गरिरहेका छन्। भाइ चार्ल्स टेज रसललाई यी पर्चाहरूको महत्त्व राम्ररी थाह थियो। त्यसैकारण हाम्रो दर्ता गरिएको पहिलो संस्थानको नाउँ नै जायन्स वाच टावर बाइबल एण्ड ट्राक्ट सोसाइटी रहन गयो। तर हामी नि? के पर्चा हाम्रो सेवकाईको महत्त्वपूर्ण भाग हो?
२ विशेषतः, १९८७ देखि सोसाइटीले पर्चाहरूको प्रयोग गर्न जोड दिंदै आएको छ र विभिन्न परिस्थितिहरूको सामना गर्न विभिन्न विषयका पर्चाहरू प्रकाशित गरेको छ। उदाहरणका लागि, बाइबल, परिवार, अहिले हामी बाँचिरहेको समय, मृत्यु अनि पुनरुत्थान, मानिसको भविष्य अनि त्यस्तै अन्य विषयहरूमा आधारित पर्चाहरू हामीसित छन्।
३ हामीमध्ये थुप्रैलाई ती पर्चाहरूमा भएका कुरा थाह छ र हामीले ती पर्चाहरू प्रभावकारी ढंगमा प्रयोग पनि गरेका छौं। उपयुक्त पर्चा चलाएर घरधनीसित कुरा थाल्नु कत्ति सजिलो छ, त्यो हामीले बुझेका छौं। त्यसमाथि पनि अझ भर्खरै सेवकाईमा जान थालेका नयाँ प्रकाशकहरूलाई। आफ्ना आमाबाबुसित क्षेत्र सेवकाईमा जाने स-साना केटाकेटीहरू पनि पर्चा दिन पाउँदा रमाउँछन्।
४ आज पर्चाहरू थुप्रै भाषाहरूमा भएको हुँदा हामी करोडौं मानिसहरूसम्म पुग्न सकिरहेका छौं। प्रत्येक साक्षर देशवासीले आफ्नै भाषामा हाम्रो कुनै एउटा पर्चा पढ्न पाए कत्ति असल हुनेथियो। पर्चाहरूको कुनै शुल्क नलाग्ने भएकोले गरिबहरूले समेत यसबाट फाइदा उठाउनसक्छन्। विभिन्न भाषाका यी विभिन्न पर्चाहरू हामी हर समय आफूसित राख्नसक्छौं।
मे–पर्चाहरूको महिना
५ यो महिनामा पर्चाहरूको राष्ट्रव्यापी अभियान थाल्ने योजना गरिएको छ। मे महिनामा वर्षेनी भारतमा दुई थोक हुन्छन्: १) यो महिना केटाकेटीहरूको स्कूलमा गर्मीको बिदा हुन्छ र २) थुप्रै प्रकाशहरूले सहायक अग्रगामी गरेर आनन्द उठाउँछन्। यो अभियानले हामी सबैलाई थुप्रै तरिकामा फाइदा गर्ने मात्र होइन, हाम्रा छिमेकीहरूलाई पनि आध्यात्मिक फाइदा पुऱ्याउनेछ। ‘विश्वासी र बुद्धिमान् दासको’ निर्देशनअनुसार विश्वभरि हाम्रा भाइबहिनीहरू मानिसहरू जहाँ जहाँ भेटिन्छन्, त्यहीं त्यहीं गइरहेका छन्। (मत्ती २४:४५-४७) भारतमा जतासुकै मानिसहरू भेटिने भएकोले यस्तो इलाकामा हुनपाउनु कति राम्रो सुअवसर हो। त्यसकारण, पर्चा दिन हरबखत जागरूक भएर अनि हर समय ती प्रयोग गरेर पर्चाहरूको पूरापूर सदुपयोग गरौं। यसको अर्थ, भिन्नाभिन्नै विषयमा विभिन्न पर्चाहरू राख्नु अनि मानिसहरूसित कुरा गर्न थरिथरिका प्रस्तुतिहरू तयार पार्नु आवश्यक छ।
६ हाल केही भाइबहिनीहरूले घर-घरको सेवकाई, सडकहरू र बस बिसौनीमा पर्चाहरूको सदुपयोग गरेका छन्। यात्रा गर्दा तिनीहरूले सहयात्रुहरूलाई मात्र होइन, बस ड्राइभर, टेम्पो तथा ट्याक्सी ड्राइभर आदिलाई पनि पर्चा दिन्छन्। केही समयअघिको कुरा हो, भारतमा बस यात्रा गरिरहेकी एउटी बहिनीले सहयात्रुसित कुराकानी थालिन्। कुरैकुरामा उक्त महिलाले आफ्नी बहिनीप्रति भएको अन्यायबारे बताइन्। फलतः हाम्री बहिनीले परमेश्वरको राज्यबारे बताउने मौका छोपिन् र शान्तिमय प्रमोदवनमा जीवन नामक पर्चा त्यस महिलालाई दिइन्। त्यसपछि तिनले पर्चामा उल्लिखित प्रकाश २१:३-५ तर्फ उनको ध्यान खिंचिन्। उक्त महिलाले सुनाइएको सन्देशप्रति निकै चाह देखाइन् र आफ्नो नाउँ तथा ठेगाना दिनुका साथै आफूलाई भेट्न आउने आग्रह गरिन्। थुप्रै प्रकाशकहरूले आफ्ना सहकर्मीहरूलाई छोट्करीमा साक्षी दिन पर्चाहरू निकै प्रभावकारी भएको पाएका छन्। हो, पर्चाहरू सानो भए तापनि त्यसमा भएका छोटो सन्देशले धार्मिक झुकाउ भएका र अनन्त जीवनका लागि योग्य व्यक्तिहरूलाई चिन्न महत्त्वपूर्ण भूमिका निर्वाह गरिरहेका छन्।
प्रस्तुतिहरूलाई निखार्न पर्चाहरूको प्रयोग
७ यसरी पर्चाहरू प्रयोग गर्दा थुप्रै मानिसहरूलाई भेट्न सकिने मात्र होइन, थुप्रै विषयहरूमा छोटो, मीठो, सुस्पष्ट र वार्तालापपूर्ण ढंगमा सुसमाचार प्रस्तुत गर्ने तालिम पनि दिन्छ। त्यसकारण, मे महिनामा पर्चाहरू प्रयोग गरेर थुप्रै मानिसहरूलाई सुसमाचार प्रस्तुत गर्ने कोसिस गर्दै माथि भनेझैं गर्न विशेष प्रयास गरौं। हामीले आफ्ना श्रोताहरूको मन छुने किसिमले कुरा गर्न सिक्नु आवश्यक छ। हामी विभिन्न पृष्ठभूमि तथा विश्वास भएका मानिसहरूलाई भेट्छौं। त्यसैकारण, तिनीहरूसित “अनुग्रहका वचन” प्रयोग गरेर कसरी कुराकानी गर्ने त्यो सिक्नु पनि जरुरी छ। (लूका ४:२२) मानिसहरूलाई जबरजस्ती सुन्न बाध्य बनाउनुहुँदैन बरु आशा प्रदान गर्नुपर्छ। प्रेरित पावलले भनेजस्तै हामी “सबैका निम्ति . . . सबै कुरा” हुन खोज्नुपर्छ।—१ कोरिन्थी ९:२२.
८ हर समय एउटै तरिकामा प्रचार गर्ने बानी परिसकेको छ भने, भनिरहेको कुरा हाम्रो मनबाटै निस्किरहेको हुँदैन। घरधनीले सबै प्रकाशकहरूको मुखबाट जहिले पनि एउटै सन्देश सुनिरहनुपऱ्यो भने उनीहरूलाई दिक्क लाग्नसक्छ। फलतः तिनीहरूले विरोध वा अभद्र व्यवहारसमेत गर्नसक्छन्। घरमा कसैले दिनभरि एउटै गीत गुनगुनाइरह्यो अथवा हाम्रो छिमेकीले एउटै गीत बजाएको बजाएकै गरिरह्यो भने हामीलाई कस्तो लाग्छ? अथवा, हामीले चिनेजानेका मान्छेले जतिखेर पनि एउटै कथा दोहऱ्याएको दोहऱ्याइ गरिरह्यो भने त्यतिखेर हामी के भन्छौं होला? त्यसै गरी हाम्रो इलाकाका मानिसहरूले पनि जहिले पनि एकैनासको प्रस्तुति सुनिरहनुपऱ्यो भने यहोवा परमेश्वर र उहाँको वचन बाइबलबारे तिनीहरू कस्तो निष्कर्षमा पुग्लान्?
९ यो महिना पर्चाहरूको अभियानमा पूर्णतया भाग लियौं भने यस सम्बन्धमा हामी सबैलाई लाभ हुनेछ। तपाईं भर्खरै प्रकाशक हुनुभएको हो भने, अध्ययन सञ्चालकसित मिलेर यी पर्चाहरू पढ्नुहोस् र आफ्नो इलाकामा त्यसमा भएका जानकारीहरूलाई कसरी प्रयोग गर्नसकिन्छ, छलफल गर्नुहोस्। यदि तपाईंले ‘अग्रगामी अरूलाई मदत गर्छन्’ कार्यक्रमअन्तर्गत कुनै एक अग्रगामीको सहयोग पाइरहनुभएको छ भने पर्चाहरू प्रयोग गर्न पनि मदत मागे कसो होला? तपाईंलाई सहयोग गर्ने अग्रगामीसित सुसमाचार प्रभावकारी ढंगमा प्रस्तुत गर्न पर्चाहरू प्रयोग गर्ने तरिका अभ्यास गर्न सक्नुहुन्छ। आमाबाबु हो, तपाईंहरू यसलाई पारिवारिक योजना बनाउने कार्यमा समावेश गर्न सक्नुहुन्छ। क्षेत्र सेवकाईमा जाँदा तपाईं र तपाईंका छोराछोरीले प्रत्येक पर्चा कसरी प्रयोग गर्ने, त्यो तपाईंहरूले मिलाउन सक्नुहुन्छ। वास्तवमा सबै प्रकाशकहरूले पर्चाहरू अझ प्रभावकारी ढंगमा प्रस्तुत गर्न विशेष प्रयत्न गर्नसक्छन्। हाम्रो इलाकाको लागि उपयुक्त हुने खालको प्रस्तुती बनाउन तर्क (अङ्ग्रेजी) पुस्तकले राम्ररी सघाउनसक्छ। यसबाहेक पर्चाहरूसम्बन्धी लेख भएका पुराना हाम्रो राज्य सेवकाई पनि हेर्नसक्छौं। अगस्त १९९३ पृ ३-४; फेब्रुअरी १९९१ पृ ४; फेब्रुअरी १९९० पृ ४ हेर्न सक्नुहुन्छ।
१० यी केही पर्चाहरू कसरी प्रस्तुत गर्न सकिन्छ, केही सुझाउ:
तपाई किन बाइबलमा विश्वास गर्न सकनु हुन्छ
अभिवादन गरिसकेपछि तपाईं यसो भन्न सक्नुहुन्छ, “अहिले बाइबल दुई हजारभन्दा धेरै भाषाहरूमा पाउन सकिने भए तापनि किन थोरै मानिसहरूले मात्र यसमा चासो राखेका होलान्? तपाईंको के विचार छ? [जवाफ दिने मौका दिनुहोस्।] त्यसपछि यसो भन्नुहोस्, “इतिहासभरि यो किताबलाई गलत दृष्टिले हेरिएको रहेछ भनेर हामीले बाइबल अध्ययन गरेर थाह पाएका छौं। म तपाईंलाई बाइबलले सबै मानिसहरूलाई दिने सन्देश एउटा सानो पर्चाबाट देखाऊँ?” त्यसपछि पृष्ठ ४ को “भविष्यको बारेमा पूर्व बताउँनु” उपशीर्षकतिर घरधनीको ध्यान खिंच्नुहोस्। अनि पर्चाको पृष्ठ ५ र ६ मा भएका अन्तिम चार अनुच्छेदहरू विचार गर्नुहोस्। छोटो कुराकानीपछि कुनै एक पत्रिका वा चाहनुहुन्छ पुस्तिका प्रस्तुत गर्न सकिन्छ।
यहोवा का साक्षीहरू के विस्वास गर्छन?
अभिवादन गरिसकेपछि यो पर्चा देखाउँदै यसरी कुराकानी थाल्न सक्नुहुन्छ, “तपाईंको विचारमा हाम्रो समाजका मानिसहरूलाई शान्तसित मिलेर बस्न कुन कुराले मदत गर्छ होला?” [जवाफ दिने मौका दिनुहोस्।] त्यसपछि हामी यसो भन्नसक्छौं, “हामी यहोवाका साक्षीहरू एकअर्काको धार्मिक आस्था र जीवनशैलीसित परिचित भएर एकअर्कालाई राम्ररी बुझ्न सकिन्छ भनेर विश्वास गर्छौं। यस सम्बन्धमा तपाईंको के राय छ? [जवाफ दिने मौका दिनुहोस्।] तपाईं अझै यसो भन्न सक्नुहुन्छ: “हामी पनि यही समाजका मानिसहरू भएकाले र थोरै व्यक्तिहरूले मात्र हाम्रो विषयमा जानेबुझेको हुनाले हामीले यो पर्चा तयार पारेका हौं। हामी को हौं, र हाम्रो आस्था के हो, त्यो तपाईंलाई पनि थाह होस् भनेर हामी यो पर्चा दिन चाहन्छौं।” त्यसपछि तपाईंले उक्त पर्चाबाट कुनै विशेष बुँदा देखाउन सक्नुहुन्छ वा फेरि अर्को पटक आएर अझ बढी कुरा बताउन समय मिलाउन सक्नुहुन्छ।
शान्तिमय नयाँ संसारमा जीवन
अभिवादन गरिसकेपछि तपाईं यसो भन्न सक्नुहुन्छ, “हामी आज यो इलाकाका सबै जनालाई भेट्ने प्रयास गरिरहेका छौं र तपाईंलाई घरैमा भेट्न पाउँदा मलाई साह्रै खुसी लाग्यो। हामी एउटा प्रश्न सोद्धै थियौं र त्यसबारे तपाईंको राय बुझ्न पाए राम्रो हुन्थ्यो। हाम्रा वरपरका मानिसहरू थुप्रै देवीदेवताहरूको पूजा गर्छन्। तैपनि तिनीहरू सारा जीवित प्राणीहरूमा जीवन शक्ति राख्नुहुने एक जना सर्वोच्च व्यक्ति हुनुहुन्छ भन्ने विचार व्यक्त गर्छन्। के तपाईंलाई पनि त्यस्तै लाग्छ?” [जवाफ दिने मौका दिनुहोस्।] त्यसपछि तपाईं यसो भन्न सक्नुहुन्छ, “यो सर्वोच्च व्यक्तिले पृथ्वी र यसमा भएका सारा वस्तुहरू बनाउनुको उद्देश्य के होला?” त्यसपछि पर्चाबाट पृथ्वी मानिसको लागि र मानिस सधैंभरि यस पृथ्वीमा बस्नको लागि बनाइएको हो भनेर देखाउन सकिन्छ। सुरुका तीन अनुच्छेदहरू पढिसकेपछि यो छलफल जारी राख्न फेरी भेट्ने प्रबन्ध मिलाउनुहोस्।
के आशा छ मरिगएका प्रिय जनहरूको निम्ति?
तपाईं यसरी कुरा थाल्न सक्नुहुन्छ: “हुन त, सबै जना एक न एक दिन मर्नैपर्छ, तैपनि के मृत्यु हुनैपर्ने हो त?” [जवाफ दिने मौका दिनुहोस्।] त्यसपछि यसो भन्नुहोस्, “मृत्यु हुनैपर्ने होइन, त्यसैले त हामी मर्न चाहँदैनौं, हैन र? कुनै व्यक्ति मर्दा मानिसहरू शोक गर्ने मात्र होइनन् तर अन्त कतै जीवितै छन् कि भनेर आशा पनि गर्छन्। यस सम्बन्धमा थुप्रै शिक्षाहरू छन्। हामी आफ्ना प्रियजनहरूलाई फेरि भेट्नसक्छौं वा सक्दैनौं के यस विषयमा तपाईंले कहिल्यै सोच्नुभएको छ?” त्यसपछि पृष्ठ २ को अनुच्छेद १-३ देखाउनुहोस्। अन्तमा पुनरुत्थानको आशा उल्लेख गर्नुहोस्। पुनरुत्थानको आशाबारे छलफल गर्न फेरि भेट्ने योजना बनाउनुहोस्।
तपाईं सोझै निश्शुल्क गृह बाइबल अध्ययन गर्ने प्रस्ताव पनि राख्न सक्नुहुन्छ र त्यो कसरी गर्न सकिन्छ, कुनै एउटा पर्चा प्रयोग गरेर देखाउनुहोस्।
जीवन बचाउने वार्तालापहरू
११ निस्सन्देह, यो अभियानले थुप्रैलाई जीवनको मार्ग पक्रन मदत गर्नेछ। साथै थुप्रै मानिसहरूसित चाखलाग्दो वार्तालाप गर्ने मौका पनि पाउनेछौं। हामीले भेट्नेजति सबै जना हाम्रोनिम्ति घरधनीहरू हुन् तर तिनीहरूको लागि त हामी अपरिचित व्यक्ति हौं भनेर हामीले बिर्सनुहुँदैन। त्यसकारण, तिनीहरूको चित्त दुख्ने तरिकाले कुरा गर्नदेखि हामी सचेत हुनुपर्छ। तसर्थ, कुरा थाल्नुअघि हामीले निकै होस पुऱ्याउनुपर्छ र स्थानीय आवश्यकताअनुसार मात्र होइन तर इलाकाको अवस्थाअनुसार काँटछाँट गर्न पनि सचेत हुनुपर्छ। उदाहरणका लागि, हाम्रो बोली र व्यवहारद्वारा हामी मसीहीजगत्का मानिसहरूभन्दा फरक छैनौं भन्ने छनक दिइरहेका छौं वा हामी यहोवाका साक्षीहरू भिन्नै छौं भनेर प्रस्टै देखाइरहेका छौं? हाम्रो प्रस्तुतिले हामी कुनै राजनैतिक पार्टीका विरोधी हौं भन्ने भान पो पार्छ कि? अथवा हामी असाध्यै तटस्थ रहने अनि यहोवाले अनुमति दिइरहनुभएको उच्च अख्तियारवालाको सापेक्षिक अधीनमा बस्ने खालका मानिसहरू हौं भनेर प्रस्टै देखाइरहेका छौं?
१२ विश्वभरि यहोवाका जनहरू बाइबलको सिद्धान्त पालन गर्ने, इमानदार, मेहनती र उच्च नैतिक स्तर कायम गर्ने व्यक्तिहरूको रूपमा चिनिन्छन्। कहिलेकाहीं गलत धारणाहरूले गर्दा कसै कसैले गलत आरोप लगाउँछन्। यस्तो गलत विचारधारालाई सुधार्न हामीले पनि येशू ख्रीष्टले प्रथम शताब्दीका मानिसहरूसित जसरी कुराकानी गर्नुभयो, दया अनि चतुऱ्याइँ देखाउनुभयो त्यस्तै कुराकानी, दया र कुशलता देखाउनुपर्छ। यो महिना मानिसहरूसित पर्चा चलाएर कुरा गरेर हामी यस्ता गलत धारणाहरू हटाउनसक्छौं।