प्रचारकार्यमा अझै उन्‍नति गर्ने—इन्टरकममार्फत प्रचार गर्नुहोस्‌

यसो गर्नु किन महत्त्वपूर्ण छ: इन्टरकममार्फतa प्रचार गर्न हामीलाई डर लाग्न सक्छ। यस्तो चुनौतीले हाम्रो असल कामप्रतिको जोसलाई कम गर्न नदिन के गर्न सक्छौं? कोही-कोही मानिसलाई सुसमाचार सुनाउने एक मात्र माध्यम इन्टरकम हुन सक्छ। (रोमी १०:१४) इन्टरकममार्फत राम्रो साक्षी दिन सकिन्छ भनेर थुप्रै अनुभवहरूले देखाएको छ। (वार्षिक पुस्तक २०११, पृ. ६५-६६ र वार्षिक पुस्तक २०००, पृ. ५४, अनु. ३ हेर्नुहोस्‌।) निम्न सुझावहरूलाई ध्यान दिनुहोस्‌।

हामी कसरी यसो गर्न सक्छौं?

छोटो प्रस्तुति तयार गर्नुहोस्‌। इन्टरकममार्फत प्रचार गर्दा घरधनीलाई सीधै पढेर सुनाउन आफ्नो प्रस्तुति लेख्नुहोस्‌। यसो गर्नुभयो भने तपाईं निर्धक्क भएर बोल्न सक्नुहुन्छ। तपाईं आउनुको कारण सुरुमै बताउनुहोस्‌। घरधनीको नाम उपलब्ध छ भने तिनलाई नामले नै सम्बोधन गर्नुहोस्‌। थप जानकारी दिने कुनै पर्चा वा पत्रिका पछि ल्याइदिनेछु वा तिनको ढोकामा छोडिदिनेछु भनेर कुराकानी टुङ्‌ग्याउनुहोस्‌।
सकारात्मक हुनुहोस्‌। घरधनीसँग कुराकानी गर्दा आमनेसामने कुरा गरेजस्तै हँसिलो हुँदै इशारा गर्नुहोस्‌।
नआतिकन कुराकानी गरिने शैलीमा बोल्नुहोस्‌। ठिक्क आवाजमा स्पष्टसित बोल्नुहोस्‌। अनावश्‍यक तवरमा रोकिने वा छिटो-छिटो बोल्ने नगर्नुहोस्‌।
सुझबुझ चलाउनुहोस्‌। ठूलठूला घरहरूमा धेरै वटा इन्टरकम हुन सक्छन्‌। त्यस्तो अवस्थामा ३/४ जना घरधनीसँग मात्र इन्टरकममार्फत कुरा गर्नु राम्रो हो। अनि कुन कुन घरधनीसँग कुरा गरियो, नोट गरेपछि त्यस ठाउँबाट जानुहोस्‌। हामीले इन्टरकममार्फत सबै मानिसहरूको घरमा फोन गर्न थाल्यौं भने घरका मानिसहरूलाई अप्ठ्‌यारो लाग्न सक्छ वा तिनीहरूले हामीलाई शङ्‌कालु नजरले हेर्न सक्छन्‌।

यो महिना यसो गरे कसो होला?

पारिवारिक उपासनाको बेला इन्टरकममार्फत प्रचार गरेको अभिनय गर्नुहोस्‌।

a ढोकामा राखिने टेलिफोन जस्तै उपकरण जसबाट घरभित्रका मानिसहरूसित कुरा गर्न सकिन्छ।