अध्याय ११२
येशूले मनाउनुहुने अन्तिम निस्तार-चाड नजिक छ
मङ्गलबार नीसान ११ को दिन जसै समाप्त हुन्छ, येशूले जैतुन डाँडामा बसेर प्रेषितहरूलाई शिक्षा दिने काम पनि सिध्याउनुहुन्छ। यो कस्तो व्यस्त र थकाइलाग्दो दिन रह्यो! अब सायद रात बिताउन बेथानी फर्कंदा येशू आफ्ना प्रेषितहरूलाई भन्नुहुन्छ: “तिमीहरूलाई थाहै छ, अबको दुई दिनपछि निस्तार-चाड मनाइनेछ अनि तिनीहरूले मानिसको छोरालाई टाँग्नको लागि शत्रुहरूको हातमा सुम्पिनेछन्।”
भोलिपल्ट, बुधबार नीसान १२ का दिन येशू आफ्ना प्रेषितहरूसँग आरामसित बिताउनुहुन्छ। एक दिनअघि उहाँले धर्म-गुरुहरूलाई बेसरी खुल्लमखुल्ला हप्काउनुभएको थियो र तिनीहरू उहाँलाई मार्न खोजिरहेका छन् भनी येशूले बुझ्नुभएको छ। अतः बुधबारका दिन उहाँ बाहिर निस्कनु हुन्न किनभने भोलिपल्ट बेलुकी आफ्ना प्रेषितहरूसँग निस्तार-चाड मनाउन कुनै कुराले बाधा नपुऱ्याओस् भनी उहाँ चाहनुहुन्छ।
यसै बीच, मुख्य पुजारीहरू र धर्म-गुरुहरू कैयाफा भन्ने प्रधान पुजारीको चोकमा भेला भएका छन्। अघिल्लो दिनमा येशूले गर्नुभएको आक्रमणको तीक्ष्ण वेदना अझ पनि अनुभव गर्दै तिनीहरू कुनै चतुर चाल चलेर उहाँलाई पक्रने र मार्ने योजना बनाउँदैछन्। तापनि तिनीहरू यसो भनिरहन्छन्: “चाडको बेलामा त होइन नत्र मानिसहरूले हूलदङ्गा गर्नेछन्।” येशूलाई मानिसहरूले मन पराएकाले तिनीहरू मानिसहरूसित डराउँछन्।
येशूलाई मार्ने दुष्ट षड्यन्त्र धर्म-गुरुहरूले गरिरहेकै बेलामा एक जना तिनीहरूलाई भेट्न आउँछ। तिनीहरू छक्क पर्छन् किनकि त्यो व्यक्ति यहूदा इस्करियोत हो जो येशूकै प्रेषित हो। तर त्यसको मनमा सैतानले आफ्ना मालिकलाई धोका दिने तुच्छ विचार हालिदिएको छ! तिनीहरू कत्ति खुसी हुन्छन् जब यहूदाले तिनीहरूलाई यो प्रश्न गर्छ: “मैले उहाँलाई धोका दिएर तपाईंहरूको हातमा सुम्पें भने तपाईंहरू मलाई के दिनुहुन्छ?” तिनीहरू त्यसलाई मोशाको व्यवस्थाको करारअनुसार एक जना दासको मोल बराबर ३० टुक्रा चाँदी तिर्न खुसीसाथ राजी हुन्छन्। त्यसबेलादेखि येशूलाई धोका दिन यहूदा उहाँको वरिपरि भीड नभएको मौकाको खोजीमा रहन्छ।
बुधबार सूर्यास्तपछि नीसान १३ सुरु हुन्छ। यरिहोबाट येशू शुक्रबार आउनुभएको थियो। त्यसकारण बेथानीमा उहाँले बिताउनुभएको यो छैटौं र अन्तिम रात हो। अर्को दिन, बिहीबारको सूर्यास्तपछि सुरु हुने निस्तार-चाडका लागि अन्तिम तयारीहरू गर्न आवश्यक पर्नेछ। त्यसै बेला निस्तार-चाडको भेडालाई मार्नुपर्छ र त्यसलाई सिङ्गै पोल्नुपर्छ। यो चाड उहाँहरूले कहाँ मनाउनुहुनेछ र त्यसको तयारी कसले गर्नेछ?
येशूले यसबारे कुनै विस्तृत विवरण दिनुभएको छैन किनभने सम्भवतः यहूदाले त्यसको सूचना मुख्य पुजारीहरूलाई दिएर तिनीहरूले येशूलाई निस्तार-चाड मनाइरहेको बेलामा आएर पक्रिने मौका नपाऊन् भनेर हुन सक्छ। तर अब बिहीबार दिउँसो, येशूले पत्रुस र यूहन्नालाई बेथानीबाट यसो भनेर पठाउनुहुन्छ: “जाओ र हाम्रो लागि निस्तार-चाडको भोज तयार पार।”
तिनीहरू सोध्छन्: “हामीले कहाँ तयार पारेको तपाईं चाहनुहुन्छ?”
येशू व्याख्या गर्नुहुन्छ: “जब तिमीहरू सहरभित्र पस्छौ, तब घैंटोमा पानी बोकेको मानिससित तिमीहरूको भेट हुनेछ। उसको पछि-पछि लाग र ऊ जुन घरभित्र जान्छ, त्यसैभित्र पस। अनि तिमीहरूले त्यस घरको धनीलाई यसो भन्नू: ‘गुरुज्यूले सोध्नुभएको छ: “मैले आफ्ना चेलाहरूसित निस्तार-चाडको भोज खाने पाहुना-कोठा कहाँ छ?” ’ तब उसले तिमीहरूलाई माथिल्लो तलामा सजिसजाउ गरेर ठिक्क पारिराखेको ठूलो कोठा देखाउनेछ। तिमीहरूले त्यहीं तयार पार।”
निस्सन्देह, त्यो घरधनी येशूको एक जना चेला हुनुपर्छ। यस विशेष अवसरमा उसको घर प्रयोग गर्न येशूले अनुरोध गर्नुहुनेछ भनी उसले सम्भवतः आशा गरेको हुन सक्छ। जे भए तापनि पत्रुस र यूहन्ना यरूशलेममा आउँदा येशूले भनेजस्तै सबै थोक भेट्टाउँछन्। अतः ती दुई जना अब थुमा तयार पार्न अनि येशू र १२ जना प्रेषितलगायत जम्मा १३ जनाका लागि निस्तार-चाड मनाउन चाहिने सबै कुराहरूको व्यवस्था मिलाउने तरखरमा लाग्छन्। मत्ती २६:१-५, १४-१९; मर्कूस १४:१, २, १०-१६; लूका २२:१-१३; प्रस्थान २१:३२.
▪ बुधबारको दिन येशू के गर्दै हुनुहुन्छ र किन?
▪ प्रधान पुजारीको घरमा कस्तो सभा चलिरहेको छ र धर्म-गुरुहरूलाई यहूदा किन भेट्न जान्छ?
▪ येशूले बिहीबारको दिन यरूशलेममा कसलाई पठाउनुहुन्छ र कुन कामका लागि?
▪ यी पठाइएकाहरूले के कुरा भेट्टाउँछन् जसबाट येशूको चमत्कार गर्ने शक्ति फेरि पनि प्रकट हुन्छ?