पाठ १५
अरूलाई परमेश्वरको इच्छा पूरा गर्न मदत दिने
आफूले सिकिरहेको कुरा अरूलाई किन बताउनुपर्छ? (१)
तपाईं क-कससित सुसमाचार बाँड्न सक्नुहुन्छ? (२)
तपाईंको बानीबेहोराले अरूमाथि कस्तो असर पार्नसक्छ? (२)
तपाईंले मण्डलीसित मिलेर कहिले प्रचार गर्न सक्नुहुन्छ? (३)
१. अब त तपाईंले बाइबलबाट थुप्रै असल कुराहरू सिकिसक्नुभएको छ। आफूले सिकेको ज्ञानले तपाईंलाई मसीही व्यक्तित्व खेती गर्न मदत गर्नुपर्ने हो। (एफिसी ४:२२-२४) अनन्त जीवन प्राप्त गर्न त्यस्तो ज्ञान अत्यन्तै आवश्यक छ। (यूहन्ना १७:३) तथापि, अरूले पनि त्यो सुसमाचार सुन्नु आवश्यक छ। किनभने तब मात्र तिनीहरूलाई बचाउन सकिन्छ। सबै साँचो मसीहीहरूले अरूलाई साक्षी दिनैपर्छ। त्यो परमेश्वरको आज्ञा हो।—रोमी १०:१०; १ कोरिन्थी ९:१६; १ तिमोथी ४:१६.
२. वरपरका मानिसहरूलाई आफूले सिकिरहेको असल कुराहरू बताएर तपाईं साक्षी दिने कार्य सुरु गर्न सक्नुहुन्छ। आफ्नो परिवार, मित्र, स्कूलका साथीहरू र सहकर्मीहरूलाई ती कुराहरू बताउनुहोस्। तिनीहरूलाई सुनाउँदा दयालु अनि धीरजी हुनुहोस्। (२ तिमोथी २:२४, २५) मानिसहरू प्रायजसो अरूको कुरा सुन्नअघि उसको बानीबेहोरालाई विचार गर्छन् भन्ने कुरा नबिर्सनुहोस्। त्यसकारण, तपाईंको असल बानीबेहोराले अरूलाई तपाईंको समाचार सुन्न आकर्षित गर्नसक्छ।—मत्ती ५:१६; १ पत्रुस ३:१, २, १६.
३. समय बित्दै जाँदा तपाईं यहोवाका साक्षीहरूको स्थानीय मण्डलीसित प्रचार गर्न योग्य हुन सक्नुहुन्छ। तपाईंले गर्नसक्ने प्रगतिको एउटा महत्त्वपूर्ण कदम यो पनि हो। (मत्ती २४:१४) तपाईंले अर्को व्यक्तिलाई यहोवाको सेवक बन्न र अनन्त जीवन पाउन मदत गर्न सक्नुभयो भने साँच्चै कति आनन्दको कुरा हुनेछ!—१ थिस्सलोनिकी २:१९, २०.