एउटा लोभरहित संसारको कल्पना गर्नुहोस्
के तपाईं एउटा यस प्रकारको संसारको कल्पना गर्न सक्नु हुन्छ, जहाँ मानिसहरू प्रतियोगितात्मक भावना राख्नको सट्टा आपसमा सहयोग गर्दछन्—जहाँ मानिसहरू एक-अर्कासँग त्यस प्रकारको व्यवहार गर्छन् जुन प्रकारको व्यवहार तिनीहरू अरूहरूबाट चाहन्छन्? लोभ रहित संसारका यी केही लक्षणहरू हुन्। साँच्चैनै, त्यो कस्तो वेग्लै प्रकारको संसार हुनेछ! के त्यो कहिले आउला र? हो, आउनेछ। तर मानिसहरूमा यति गहिरो गरी जरो लागेर बसेको लोभ कसरी हटाउन सकिन्छ र?
जवाफको निम्ति हामीलाई सर्वप्रथम लोभको सुरूआत बुझ्नु खाँचो छ। बाइबल सङ्केत गर्दछ कि लोभ मानव जातिको स्वभावमा सुरू देखि नै थिएन। लोभ रहित सृष्टिकर्ताको सिद्ध सृष्टि, प्रथम पुरूषमा लोभ जस्तो कुनै त्रुटि थिएन भनेर अगमवक्ता मोशाले हामीलाई यी शब्दहरूमा याद दिलाउँछन्: “उहाँनै चटान हुनुहुन्छ। उहाँको काम सिद्ध छ, किनकि उहाँका सबै काम न्याय सँगत छन्।” तेसो हो भने, लोभ कहाँबाट आयो त? प्रथम मानव दम्पतीले आफूमा लोभको वृद्धि हुन दियो—हव्वाले परमेश्वरबाट निषेध गरिएको फल खाएर हासिल गर्न सक्ने कुराको लोभपूर्ण आशा गरी र आदमले चाहिं आफ्नी सुन्दरी पत्नी हराउने लोभ गर्यो। मोशाले लेखेका बाँकी शब्दहरू पनि आदम र हव्वामा प्रयोग हुन सक्छन्: “तिनीहरूले उहाँसँग भ्रष्ट व्यवहार गरे, तिनीहरूको खोटको कारणले तिनीहरू उहाँको सन्तान हुनसक्तैनन्।”—व्यवस्था ३२:४,५; १ तिमोथी २:१४.
नूहको पालोको जलप्रलयको बेलासम्म लोभ र कामुकता यति साह्रो बढ़ी सकेको थियो कि “पृथ्वीमा मानिसहरूको दुष्टता” बढ़ेर “तिनीहरूको हृदयको विचारको जुनसुकै पनि भावना निरन्तर खराबै मात्र” थियो।—उप्तत्ति ६:५.
मानिसमा यो प्रचलित लोभी प्रवृत्ति आजसम्म छ र वर्तमान अकृतज्ञ र लोभी समाजमा यो त्यसको शिखरमा पुगेको जस्तो छ।
शिक्षा द्वारा लोभ मेटाउने
मानिस जातिमा लोभ जसरी वृद्धि हुँदै आएको छ, त्यसैगरी मानिसमा लोभ घट्दै पनि जानु सक्छ। लोभ निश्चय नै हटाइन सकिन्छ। तर यसको निम्ति, कड़ा मार्ग-दर्शकहरू अथवा दैनिक व्यवहारलाई नियन्त्रणमा राख्ने नियमहरू पालन गर्नाका साथै, उचित शिक्षा र प्रशिक्षण आवश्यक हुनेछ। सुन्नमा यो प्रणाली सम्भव लागेता पनि, त्यस प्रकारको शिक्षा कसले दिन सक्नेछ र सिकेका कुराहरू प्रयोगमा ल्याउन सबैलाई अह्राउने अख्तियार को सँग छ?
यस प्रकारको शिक्षाको स्रोत स्वयं लोभबाट मुक्त हुनु पर्छ। यस प्रकारको प्रशिक्षण दिनेले कुनै कुरा पाउने आशा अथवा कुनै लुकेको नियतको पूर्ति राख्नु हुँदैन। यसका साथ साथै, निस्वार्थताको ठूलो मूल्य र व्यावहारिकता बारे शिक्षा दिन बाहेक, यो गुण प्रदर्शन गरेर पनि देखाउन सक्नु पर्छ। शिक्षा लिने व्यक्तिमा पनि यो दृढ़ विश्वास हुनु पर्छ कि यस प्रकारको जीवन शैली सम्भव हुन बाहेक यो आफूले रूचाएको मार्ग हो र यो मार्ग स्वयंको निम्ति र आफ्नो वरिपरि हुनेहरूका निम्ति लाभदायक छ।
स्वर्गका परमेश्वरले मात्र यस प्रकारको शिक्षा प्रदान गर्न सक्नु हुन्छ। किनभने यस प्रकारको शिक्षा दिने योग्यता र अनुभव, पृथ्वीको कुन मानिस अथवा सङ्गठनसँग होला र? सबै मानिस बाइबलको यो सच्चाइको आधारमा अयोग्य ठहरिन्छन्: “सबैले पाप गरेका छन् र परमेश्वरको महिमा रहित हुनगएका छन्।”—रोमी ३:२३.
तथापि, स्वर्गका परमेश्वर यहोवाले यस प्रकारको शिक्षा उहाँको लिखित वचन, पवित्र बाइबलमा दिनु भएको छ भनेर हामी खुसी मान्न सक्छौं। उहाँको पुत्र, येशू ख्रीष्टले पनि उहाँ पृथ्वीमा हुनु हुँदा, यस प्रकारको शिक्षा दिने कामलाई प्राथमिकता दिनु भयो। येशूको सुप्रसिद्ध डाँड़ाको उपदेशमा, आफ्ना धेरै जसो स्रोताहरूलाई विचित्र लाग्ने एउटा यस्तो जीवन शैलीबारे उहाँले कुरा गर्नु भयो, जसमा आफ्ना शत्रुहरू अथवा विरोधीहरू प्रति पनि मानिसले निस्वार्थता दर्साउन आवश्यक पर्दथियो। येशूले भन्नुभयो: “आफ्ना शत्रुहरूलाई प्रेम गर, औ तिमीहरूलाई खेदो गर्नेहरूका निम्ति प्रार्थना गर। र तिमीहरू तिमीहरूका स्वर्गका पिताका सन्तान हुनसक्नेछौ। किनभने उहाँले दुष्ट र सज्जन दुवैका निम्ति घाम लगाइदिनुहुन्छ, र धर्मी र पापी दुवैमाथि वृष्टि दिनुहुन्छ।” किनभने तिमीहरूसँग प्रेम गर्नेहरूलाई मात्र प्रेम गर्दछौ भने, तिमीहरूलाई के इनाम छ? के महसूल उठाउनेहरूले पनि त्यसै गर्दैन र?”—मत्ती ५:४४-४६.
निस्वार्थ शिक्षकहरूलाई प्रशिक्षण दिन पनि येशूको पार्थिव सेवकाईको एउटा भाग थियो जसबाट ती शिक्षकहरूले फेरि अरूहरूलाई पनि यो लोभ रहित जीवन शैलीबारे शिक्षा दिन सक्ने थिए। येशूको मृत्यु र पुनरुत्थानको केही समय पश्चात्, प्रेरित् पावल यस प्रकारको एउटा शिक्षक हुन सके। ईश्वरीय प्रेरणा द्वारा लेखिएका आफ्ना धेरै पत्रहरूमा, पावलले लोभ हटाउने प्रोत्साहन दिए। उदाहरणको निम्ति, उनले एफिसीहरूलाई यस प्रकार लेखेर पठाए: “तर व्यभिचार र सारा अशुद्धता अथवा लोभको नाउँसमेत पनि तिमीहरूबाट नलिइओस्, जस्तो कि पवित्र जनहरूलाई उचित हुन्छ।”—एफिसी ५:३.
यस्तै गरी, आज यहोवाका साक्षीहरूले दुवै लोग्ने मानिस र स्वास्नी मानिसहरूलाई लोभी विचारधारा दबाउने शिक्षा दिइरहेकाछन्। समयमा, ती लोग्ने मानिसहरू र स्वास्नी मानिसहरू पनि अरूहरूलाई यी ईश्वरीय मार्गहरू बारे शिक्षा दिने योग्यका हुन्छन्।
बाइबलका शिक्षाहरू सक्रिय छन्
तर तपाईं सोधनु होला: ‘के असिद्ध मानिसहरूले आफूमा जरो गाडेर बसेको लोभलाई वास्तवमा आफ्ना व्यक्तित्वबाट उखेलेर फाल्न सक्लान् र?’ हो, फाल्न सक्ने छन्। सम्पूर्ण रूपले गर्न न सकेता पनि, धेरै मात्रामा गर्न सक्छन् र यसबाट तपाईं अवश्य प्रभावित् हुनु हुनेछ। यसको एउटा उदाहरणबारे विचार गरौं।
स्पेनमा सबैले चिनेको एउटा चोर थियो। उसको घर भरि अरूहरूबाट चोरेर ल्याइएका सामानहरू थिए। तर उसले यहोवाका साक्षीहरूसँग बाइबल अध्ययन गर्न थाल्यो। फलःस्वरूप उसको अन्तस्करणले उसलाई पिरोलनु थाल्यो। उसले चोरेका सामानहरू तिनीहरूका मालिकहरूकहाँ फर्काइ दिने फैसला गर्यो। उ पहिले जागिर खाने ठाउँको आफ्नो मालिककहाँ गयो र त्यहाँबाट लुगा धुने नया यन्त्र चोरेको थियो भनेर उसले स्वीकार गर्यो। उसको यो नया प्रवृत्ति देखेर मालिक यति प्रभावित भए कि तिनले प्रहरीलाई खबर न दिने फैसला गरे र त्यो पहिलेको चोरलाई यन्त्रको दाम मात्र तिर्न लगाए।
यस पछि, यो सुधार भएको चोरले आफूलाई याद भएका सबै मानिसहरूकहाँ गएर तिनीहरूबाट चोरेका सामानहरू फर्काई दिने अठोट गर्यो। बाइबलका सिद्धान्तहरू प्रयोगमा ल्याएका हुनाकारण उसको सारा प्रवृत्तिमा यति ठूलो परिवर्तन हुन सक्यो भनेर उ जस-जसकहाँ गयो, सबैले नै आश्चर्य प्रकट गरे।
अब उसको सामुन्ने एउटा वास्तविक कठिनाइ खड़ा भयो। उ सँग अझ कति सामानहरू थिए जसका धनीहरू उ चिन्दैन थियो। यसकारण, यहोवा परमेश्वरसँग प्रार्थना गरे पछि, उ प्रहरी मुख्यालयमा गयो, साथमा विभिन्न मोटरहरूबाट चोरेको ६ वटा कार-स्टीरियो रेडियो लिएर। प्रहरीहरू छक्क परे किनभने उसको विषयमा तिनीहरूसँग कुनै पनि खराब रिकर्ड थिएन। तिनीहरूले उसलाई छोटो समयका लागि जेल बस्न जरिमाना तिर्न मात्र लगाए।
अपराध र लोभको जीवन त्यागेर, यहोवाका साक्षीहरूको विश्वव्यापी मण्डलीमा शामिल भएको हुनाकारण, यो पहिलेको चोरको आज सफा अन्तस्करण छ।
यस प्रकारका हजारौं उदाहरणहरू, एउटा पछि एक, दिन सकिन्छन्। तथापि आफ्नो जीवनमा यस प्रकारका परिवर्तनहरू ल्याउने मानिसहरू पृथ्वीका बासिन्दाहरूको एउटा सानो भाग मात्र भएतापनि, बाइबलका सिद्धान्तहरू सिकेर प्रयोगमा ल्याउनाले, असल गर्ने शक्ति उत्पन्न हुँदोरहेछ भन्ने कुरा प्रदर्शित हुन्छ।
प्रत्यक साल, मानिसहरूको बढ़दो सङ्ख्याले यस प्रकारको जीवन शैली अपनाइरहेछन्। पृथ्वीभरि, यहोवाका साक्षीहरूको ६०,००० भन्दा बढ़ी मण्डलीहरूमा बाइबलमा आधारित शिक्षा दिने काम भइ रहेछ। साक्षीहरूले आज सम्पूर्ण संसारमा परिवर्तन ल्याउन र आजका हजारौं लाखौं मानिसहरूबाट लोभ मेटाउने प्रतीक्षा गर्दैनन्। तापनि, चाँड़ै नै लोभ रहित जीवन शैली पृथ्वीभरि कायम हुनेछ भनेर बाइबलको अगमवाणीले सङ्केत गर्दछ!
एउटा लोभ रहित नया संसार
आउने नया संसारमा लोभ र स्वार्थ जस्ता कुराले ठाउँ पाउने छैन। धार्मिकता “नया स्वर्गको” मात्र होइन, तर “नया पृथ्वीको” पनि चिनो हुनेछ भनेर प्रेरित पत्रुसले विश्वास दिलाउँदछन्। (२ पत्रुस ३:१३) रोग, मानसिक वेदना र मृत्युका साथ साथै, लोभ पनि “बितिसकेका कुराहरू” मध्य हुनेछ।—प्रकाश २१:४.
यसकारण, हाम्रो वरिपरि लोभ र स्वार्थ तीव्रता साथ बढ़ेको देख्नु भएर, तपाईं विचलित हुनु भएको छ भने, ढाडस बाँधनु होस्! आज देखि नै आउँदो नया संसारको लागि बाँच्नु होस् किनभने त्यो नया संसार चाँड़ै नै एउटा वास्तविकता हुनेछ। परमेश्वरको सहायता द्वारा आफ्नै जीवनबाट लोभ हटाउने जोड सित प्रयास गर्नुहोस्। मसीही जीवन आज पनि लाभ-प्रद छ भनेर अरूहरूलाई देखाउने काममा भाग लिनु होस्। चाँड़ैनै लोभ ती अन्य खराब कुराहरू मध्य हुनेछन् जसको “सम्झना हुनेछैन, नता ती स्मरणमा आउनेछन्” भनेर यहोवा परमेश्वरले गर्नु भएको प्रतिज्ञामाथि विश्वास र भरोसा गर्नु होस्।—यशैया ६५:१७. (w90 2/15)
[पृष्ठ ५-मा भएको चित्र]
लोभ होइन, निस्वार्थतालाई प्राथमिकता दिने जीवन शैलीबारे येशूले कुरा गर्नु भएको थियो
[पृष्ठ ७-मा भएको चित्र]
चाँड़ै नै—लोभ रहित संसार