बाइबलका प्रार्थनाहरू गहिरिएर केलाउन योग्य छन्
एउटी चिन्तित स्त्री, राजा र परमेश्वरको आफ्नै पुत्रले गरेका प्रार्थनाहरूलाई अब हामी गहिरिएर ध्यान दिनेछौं। प्रत्येक प्रार्थना बेग्लाबेग्लै परिस्थितिले गर्दा उत्प्रेरित भएको थियो। यद्यपि, त्यस्ता परिस्थितिहरूले आज हामीलाई असर गर्नसक्छ। यी उदाहरणहरूबाट हामी के सिक्न सक्छौं?
‘तपाईंको दासीको दुःख बुझ्नुहोस्’
आफूलाई पिरोलिरहेको समस्या विरुद्ध के तपाईंले संघर्ष गरिरहनुभएको छ? वा के तपाईं चिन्ताग्रस्त हुनुभएको छ? त्यसोभए तपाईंको अवस्था हन्नाले आफ्नो जेठो छोरा, शमूएल जन्माउनुअघिको अवस्थाजस्तै छ। उनी बाँझी थिइन् र अर्की स्त्रीले उनलाई जिस्क्याउँथिन्। वास्तवमा भन्ने हो भने, त्यो परिस्थितिले हन्नालाई असाध्यै व्याकुल र चिन्तित तुल्याएकोले उनले खान समेत इन्कार गरिन्। (१ शमूएल १:२-८, १५, १६) उनले परमेश्वरसित बिन्ती गरिन् र निम्न अन्तरबिन्ती चढाइन्:
“हे सेनाहरूका परमप्रभु, यदि तपाईंले मेरो दुःख बुझेर ममाथि कृपा-दृष्टि गर्नुभयो र मलाई सम्झनुभयो, औ यदि तपाईंले मलाई भुल्नुभएन, र एउटा बालक दिनुभयो भने, म त्यस बालकलाई त्यसको जीवनपर्यन्त परमप्रभुमा समर्पण गर्नेछु, औ त्यसको कपालमा कहिल्यै छुरा लाग्नेछैन।”—१ शमूएल १:११.
याद गर्नुहोस्, हन्नाले सामान्य कुराहरू मात्र भनिरहेकी थिइनन्। हन्नाले यहोवासित (छोरा पाउने) निर्दिष्ट आग्रह गर्नुको साथै (तिनलाई परमेश्वरको सेवामा चढाउने) दृढ संकल्प गरिन्। यो प्रार्थनाले हामीलाई के सिकाउँछ?
कठिनाइ आइपर्दा प्रार्थनामा तपाईंको समस्या तोकेर उल्लेख गर्नुहोस्। घरायसी परिस्थिति, एकाकीपन वा अस्वस्थता, जस्तोसुकै समस्या भए तापनि त्यसबारे यहोवालाई प्रार्थना गर्नुहोस्। तपाईंको समस्या वास्तवमा के हो र तपाईंलाई कस्तो लागिरहेछ भनी उहाँलाई वर्णन गर्नुहोस्। लुइस नाम गरेकी विधवा यसो भन्छिन्: “हर साँझ म आफ्ना सारा समस्याहरू यहोवालाई पोख्छु। कहिलेकाहीं त थुप्रै समस्याहरू हुन्छन् तर म एक एक गरेर उहाँलाई सबै उल्लेख गर्छु।”
यहोवालाई निर्दिष्ट विषयवस्तुबारे बताउँदा लाभहरू प्राप्त हुन्छन्। त्यसो गर्दा हाम्रा समस्याहरू राम्ररी बुझ्न हामीलाई मदत मिल्छ र फलतः त्यो त्यतिको गाह्रो देखिंदैन। निर्दिष्ट प्रार्थनाहरूले हामीलाई चिन्तामुक्त बनाउँछ। आफ्ना प्रार्थनाहरूको जवाफ पाउनुअघि नै हन्नाले आश्वासन प्राप्त गरिन् र “तिनी फेरि उदास भइनन्।” (१ शमूएल १:१८) यसबाहेक, प्रार्थना गर्दा निर्दिष्ट भयौं भने त्यसको जवाफ पत्ता लगाउन हामी चनाखो हुन्छौं। जर्मनीका एक मसीही, बर्नाड यसो भन्छन्: “म जति बढी स्पष्टसित प्रार्थना गर्छु, जवाफहरू उति नै स्पष्ट हुन्छन्।”
“म सानै बालक मात्र . . . छु”
तर कुनै कार्यभारको लागि आफू अयोग्य छु भन्ने महसुस हुँदा एक व्यक्तिलाई बेग्लै प्रकारको चिन्ताले सताउन सक्छ। यहोवाले तपाईंलाई दिनुभएका जिम्मेवारीहरूको कारण के तपाईं कहिलेकाहीं भाव विह्वल हुनुभएको छ? वा त्यो कार्यभारको लागि तपाईं अयोग्य हुनुहुन्छ भनी कसै कसैले ठान्छन्? इस्राएलको राजा अभिषिक्त हुँदा जवान सुलेमान त्यस्तै अवस्थामा थिए। सिंहासनमा अरू कोही बसेको केही प्रतिष्ठित व्यक्तिहरू रुचाउँथे। (१ राजा १:५-७, ४१-४६; २:१३-२२) आफ्नो शासनकालको थालनीमै सुलेमानले प्रार्थनामा यस्तो आग्रह गरे:
“हे परमप्रभु मेरा परमेश्वर, तपाईंले म सानै बालक मात्र र अगुवाइ गर्नमा निपुण नभए तापनि आफ्नो दासलाई . . . राजा तुल्याउनुभयो। . . . यसकारण तपाईंको प्रजालाई ठीकसित शासन गर्नलाई बुझ्ने मन दिनुहोस्, र त्यसले असल र खराबको भेद छुट्याउनसकोस्।”—१ राजा ३:७-९.
यहोवासित आफ्नो सम्बन्ध, आफूलाई दिइएको सुअवसर र त्यस कार्यभार निभाउने आफ्नो क्षमतामाथि सुलेमानले आफ्नो प्रार्थना केन्द्रित गरे। त्यस्तैगरि आफ्नो क्षमताले भ्याउन नसकिने जिम्मेवारी दिइएको जस्तो महसुस हुँदा उक्त काममा सक्षम बन्न सकोस् भनेर हामीले यहोवालाई बिन्ती गर्नुपर्छ। निम्न अनुभवहरू ध्यान दिनुहोस्:
युजिन बताउँछन्: “वाच टावर सोसाइटीको शाखा कार्यालयमा थप जिम्मेवारीहरू मलाई सुम्पिंदा मैले पूर्णतया अपुग महसुस गरें। मभन्दा बढी दक्ष र अनुभवी व्यक्तिहरू अरू पनि थिए। त्यसपछिका दुई रात मलाई राम्ररी निद्रा लागेन र प्रार्थना गर्न मैले धेरै समय बिताएँ। त्यसले मलाई बल तथा आवश्यक आश्वासन प्रदान गऱ्यो।”
असाध्यै लोकप्रिय जवान मित्रको अकस्मात् दुःखद निधन भएपछि अन्त्येष्टि भाषण दिन रोयलाई आग्रह गरिएको थियो। सयौं व्यक्तिहरू त्यहाँ उपस्थित हुने निश्चित थियो। रोयले के गरे? “सही शब्दहरू भेट्टाउन, उत्थानदायी विचारहरू व्यक्त गर्न र सान्त्वना प्रदान गर्न बल तथा क्षमताको लागि मैले अहिलेजति विरलै प्रार्थना गरें होला।”
सृष्टिकर्त्ताले ‘काम द्रूत गतिमा’ बढाउनुहुँदा र उहाँको संगठन विस्तार हुँदा उहाँका अधिकांश सेवकहरूलाई जिम्मेवारी सुम्पनु स्वभाविक परिणाम हो। (यशैया ६०:२२) थप जिम्मेवारी वहन गर्न तपाईंलाई आग्रह गर्दा अनुभव, प्रशिक्षण वा क्षमताको अभाव भए तापनि यहोवाले क्षतिपूर्ति गर्नसक्नुहुन्छ भनी ढुक्क हुनुहोस्। सुलेमानले जस्तै परमेश्वरलाई पुकार्नुहोस् र कार्यभार सँभाल्न उहाँले तपाईंलाई सुसज्जित गर्नुहुनेछ।
“तिनीहरू सबै एक होऊन्”
आज सामना गर्नुपर्ने तेस्रो परिस्थिति, समूहको लागि प्रार्थना गर्नुपर्दा हुनसक्छ। अरूको लागि प्रार्थना गर्न आग्रह गरिंदा हामी कुन कुराको निम्ति प्रार्थना गर्न सक्छौं? यूहन्ना १७ अध्यायमा लिपिबद्ध येशूको प्रार्थनालाई विचार गर्नुहोस्। मानिसको रूपमा अन्तिम साँझ आफ्ना प्रेरितहरूसमक्ष येशूले यो प्रार्थना गर्नुभएको थियो। स्वर्गमा हुनुहुने आफ्नो पितालाई उहाँले कस्तो बिन्ती गर्नुभयो?
उपस्थित व्यक्तिहरूको साझा लक्ष्य र आशामाथि येशूले जोड दिनुभयो। यहोवा परमेश्वरको नाउँको महिमा र राज्यबारे अरूलाई थाहा दिने कुरा उहाँले उल्लेख गर्नुभयो। पिता र पुत्रसित शास्त्रको ज्ञानमा आधारित व्यक्तिगत सम्बन्ध राख्नुको महत्त्वमाथि येशूले जोड दिनुभयो। आफ्ना अनुयायीहरूलाई विरोधको निम्ति तयार गर्न उहाँले संसारबाट अलग हुनुपर्ने कुरा बताउनुभयो। आफ्ना प्रेरितहरूलाई सुरक्षित र साँचो उपासनामा एकत्रित पार्न पनि ख्रीष्टले पितालाई अनुरोध गर्नुभयो।
हो, येशूले एकतामाथि जोड दिनुभयो। (यूहन्ना १७:२०, २१) त्यही साँझ चेलाहरूले अपरिपक्व बहस गरेका थिए। (लूका २२:२४-२७) तथापि, प्रार्थना गर्दा ख्रीष्टले आलोचना गर्नुभन्दा एकत्रित पार्न खोज्नुभयो। त्यस्तैगरि, परिवार तथा मण्डलीमा गरिने प्रार्थनाहरू प्रेम बढाउने र व्यक्तिहरूबीच तनाव कम गर्ने खालको हुनुपर्छ। प्रतिनिधित्व गरिएका व्यक्तिहरू एकतामा बाँधिनु पर्छ।—भजनसंग्रह १३३:१-३.
श्रोताहरूले अन्तमा “आमिन” भन्दा एकता प्रकट हुन्छ, जसको अर्थ हो, “यसै होस्।” यो सम्भव पार्न तिनीहरूले बुझ्न र भनिएका सबै कुराहरूमा सहमत हुनुपर्छ। त्यसकारण उपस्थित केही व्यक्तिहरूलाई थाहै नभएको विषयवस्तु प्रार्थनामा उल्लेख गर्नु उपयुक्त हुनेछैन। उदाहरणको लागि, मण्डलीको प्रतिनिधित्व गर्ने प्राचीनले गम्भीर बिरामी भएको आध्यात्मिक भाइ वा बहिनीमाथि यहोवाको आशिष्को लागि प्रार्थना गर्न खोज्लान्। तर त्यहाँ उपस्थित बहुसंख्यकले त्यस व्यक्तिलाई चिनेका छन् र बिरामीबारे सुनेका छन् भने मात्र प्रार्थनामा उल्लेख गर्नु बेस हुनेछ।
यो पनि याद गर्नुहोस्, समूहका प्रत्येक व्यक्तिविशेषका आवश्यकताहरूको येशूले लामो विवरण दिनुभएन। त्यसो गर्दा केही व्यक्तिहरूलाई मात्र थाहा भएको व्यक्तिगत कुराहरू पनि उल्लेख गर्नुपर्ने हुन्छ। व्यक्तिगत चासोका कुराहरू निजी प्रार्थनामा पोख्नु सबैभन्दा उपयुक्त हुन्छ, जुन आफूले चाहेजति विस्तृत र व्यक्तिगत पार्न सकिन्छ।
प्रार्थनामा उपासकहरूको ठूलो भीड प्रतिनिधित्व गर्नुपर्दा एक व्यक्तिले कसरी तयारी गर्नुपर्छ? एक अनुभवी मसीही यसरी बताउँछन्: “कुन कुराको लागि धन्यवाद दिने, भाइहरूका कस्ता आग्रहहरू होलान् र तिनीहरूको खातिर मैले कस्ता बिन्तीहरू गर्न सक्छु भनी म पूर्वतयारी गर्छु। प्रशंसाका अभिव्यक्तिहरू लगायत मेरा विचारधाराहरूलाई मनमा तयार गर्छु। सार्वजनिक प्रार्थना भन्नुअघि सम्मानित ढंगमा भाइहरूको प्रतिनिधित्व गर्ने मदत माग्दै मनमनै प्रार्थना गर्छु।”
तपाईंको परिस्थिति जस्तोसुकै भए तापनि सम्भवतः तपाईंको जस्तै परिस्थितिमा कसैले गरेको प्रार्थना बाइबलमा पाउनुहुनेछ। शास्त्रमा उल्लिखित विविध प्रार्थनाहरू परमेश्वरको करुणाको प्रमाण हो। यी प्रार्थनाहरू पढ्दा र त्यसलाई मनन गर्दा तपाईंका प्रार्थनाहरूको गुणस्तर बढाउन मदत मिल्नेछ।
[पृष्ठ ५-मा भएको पेटी]
बाइबलका उल्लेखनीय प्रार्थनाहरू
यहोवाका सेवकहरूले बेग्लाबेग्लै परिस्थितिहरूमा प्रार्थना गरे। निम्नमध्ये कुनै एक या सोभन्दा धेरै परिस्थिति के तपाईंलाई आफ्नै अवस्था जस्तो लाग्छ?
एलीएजरलाई जस्तै के तपाईंलाई परमेश्वरको डोऱ्याइ चाहिएको छ?—उत्पत्ति २४:१२-१४.
याकूबजस्तै के तपाईं सन्निकट खतरामा पर्नुभएको छ?—उत्पत्ति ३२:९-१२.
मोशाले जस्तै के तपाईं परमेश्वरलाई अझ राम्ररी चिन्न चाहनुहुन्छ?—प्रस्थान ३३:१२-१७.
एलियालाई जस्तै के तपाईंलाई विरोधीहरूले आक्रमण गरेका छन्?—१ राजा १८:३६, ३७.
यर्मियालाई जस्तै के तपाईंलाई प्रचार गर्न गाह्रो लाग्छ?—यर्मिया २०:७-१२.
दानियललाई जस्तै के तपाईंलाई पाप स्वीकार्न र क्षमा माग्न खाँचो परेको छ?—दानियल ९:३-१९.
येशूका चेलाहरूले जस्तै के तपाईं सतावटको सामना गर्नुहुन्छ?—प्रेरित ४:२४-३१.
मत्ती ६:९-१३; यूहन्ना १७:१-२६; फिलिप्पी ४:६, ७; याकूब ५:१६ पनि हेर्नुहोस्।
[पृष्ठ ६-मा भएको पेटी]
अन्तर्निहित बानी विरुद्ध संघर्ष गर्दा कुन कुराको लागि प्रार्थना गर्ने
पटक पटक देखा परिरहने कमजोरी विरुद्ध के तपाईंले संघर्ष गरिरहनुभएको छ? बाइबलमा लिपिबद्ध प्रार्थनाहरू कसरी लाभकारी हुन सक्छन्? आफ्नै कमजोरीहरूका लागि पटक पटक प्रार्थना गर्ने दाऊदबाट सिक्नुहोस्।
दाऊदले यसप्रकार गाए: “हे परमेश्वर मलाई जाँच्नुहोस्, र मेरो हृदय बुझ्नुहोस्, मलाई खार्नुहोस्, र मेरा विचारहरू जान्नुहोस्।” (भजनसंग्रह १३९:२३) अनुचित इच्छा, भावना वा प्रवृत्तिहरू यहोवा परमेश्वरले जाँच्नुभएको दाऊद इच्छा गर्थे। अर्को शब्दमा भन्ने हो भने, पाप गर्नदेखि जोगिन दाऊदले यहोवाको मदत मागे।
तर दाऊदका कमजोरीहरूले तिनलाई परास्त गरे र तिनले गम्भीर पाप गरे। यहाँ फेरि प्रार्थनाले तिनलाई परमेश्वरसित आफ्नो सम्बन्ध पुनर्स्थापित गर्न मदत गऱ्यो। भजनसंग्रह ५१:२ अनुसार दाऊदले यसप्रकार बिन्ती गरे: “मेरो अधर्मबाट मलाई सफासँग धुनुहोस्, र मेरो पापबाट मलाई शुद्ध गर्नुहोस्।”
गलत प्रवृत्तिहरू वशमा राख्ने मदतको लागि हामी पनि यहोवालाई नम्रतापूर्वक प्रार्थना गर्न सक्छौं। यसले हामीलाई अन्तर्निहित कमजोरीमाथि विजय प्राप्त गर्न बलियो र पाप गर्नदेखि जोगिन मदत पुऱ्याउन सक्छ। पापमा पुनः फँसे तापनि संघर्षरत हुन यहोवाको मदतको लागि उहाँलाई फेरि बिन्ती गर्नुपर्छ।
[पृष्ठ ७-मा भएका चित्रहरू]
समूहको खातिर गरिने प्रार्थनाहरू शास्त्रीय आशा र साझा आध्यात्मिक लक्ष्यहरूमाथि जोड दिने खालको हुनुपर्छ