अचानक आइपर्ने स्वास्थ्य समस्याको कसरी सामना गर्ने?
के तपाईँको स्वास्थ्य अचानक बिग्रिएको छ? छ भने स्वास्थ्य समस्याले मानसिक, भावनात्मक र आर्थिक रूपमा कत्ति गाह्रो बनाउँछ भनेर तपाईँले महसुस गर्नुभएको होला। तपाईँ कसरी यस्तो अवस्थाको सामना गर्न सक्नुहुन्छ? स्वास्थ्य समस्यासँग जुझिरहेको आफ्नो साथी वा परिवारको सदस्यलाई तपाईँ कसरी मदत दिन सक्नुहुन्छ? हुनत बाइबल स्वास्थ्यसम्बन्धी किताब होइन तर यसमा पाइने व्यवहारिक सिद्धान्तहरूले तपाईँलाई गाह्रो अवस्थाको सामना गर्न मदत गर्छ।
स्वास्थ्य समस्याको सामना गर्न मदत दिने सुझावहरू
डाक्टरको मदत लिनुहोस्
बाइबल के भन्छ? “निरोगीहरूलाई होइन तर रोगीहरूलाई वैद्यको खाँचो पर्छ।”—मत्ति ९:१२.
यो कुरा कसरी लागू हुन्छ? आवश्यक पर्दा डाक्टरहरूको मदत लिनुहोस्।
यसो गरे कसो होला? आफूले लिन सक्ने सबैभन्दा राम्रो उपचार लिनुहोस्। कुनै-कुनै अवस्थामा एकभन्दा बढी डाक्टरहरूसँग सरसल्लाह लिनु बुद्धिमानी हुन्छ। (हितोपदेश १४:१५) डाक्टरहरूसित खुलस्त कुराकानी गर्नुहोस्। तिनीहरूको कुरा राम्ररी बुझ्ने कोसिस गर्नुहोस् र तिनीहरूले तपाईँको रोगका लक्षणहरूबारे राम्ररी बुझे कि बुझेनन्, त्यो पनि पक्का गर्नुहोस्। (हितोपदेश १५:२२) आफ्नो रोगबारे थाह पाउनुको साथै स्वास्थ्य उपचारका सबै विकल्पहरूबारे पनि जान्नुहोस्। आफ्नो स्वास्थ्य अवस्थाबारे राम्ररी थाह पाएपछि आउन सक्ने परिस्थितिहरूको लागि तपाईँ भावनात्मक रूपमा तयार हुन र आफ्नो स्वास्थ्यको ख्याल राख्न सक्नुहुनेछ।
स्वस्थकर आनीबानी कायम गर्नुहोस्
बाइबल के भन्छ? “शारीरिक तालिमबाट केही फाइदा त हुन्छ।”—१ तिमोथि ४:८.
यो कुरा कसरी लागू हुन्छ? नियमित रूपमा व्यायाम गर्ने जस्ता स्वस्थकर आनीबानीले तपाईँलाई फाइदा गर्छ।
यसो गरे कसो होला? नियमित रूपमा व्यायाम गर्नुहोस्, स्वस्थकर खाना खाने गर्नुहोस् र प्रशस्त सुत्नुहोस्। तपाईँले हालसालै कुनै स्वास्थ्य समस्याको सामना गर्दै हुनुहुन्छ भने पनि स्वस्थकर आनीबानी कायम गर्न समय र शक्ति खर्च गर्नुहोस्। यसले राम्रो नतिजा ल्याउँछ भनेर विशेषज्ञहरूले मानिलिएका छन्। तर तपाईँको स्वास्थ्यमा र तपाईँले लिइरहनुभएको उपचारमा कुनै हानि नपुऱ्याउने कुराहरू मात्र गर्नुहोस्।
अरूको मदत स्विकार्नुहोस्
बाइबल के भन्छ? “साँचो मित्रले सधैँ माया गर्छ अनि ऊ दुःखमा साथ दिन जन्मेको दाजुभाइजस्तै हुन्छ।”—हितोपदेश १७:१७.
यो कुरा कसरी लागू हुन्छ? तपाईँका साथीहरूले तपाईँलाई गाह्रो अवस्थाको सामना गर्न मदत दिन सक्छन्।
यसो गरे कसो होला? आफ्नो मनको कुरा खुलेर बताउन सकिने भरोसायोग्य साथीसित कुरा गर्नुहोस्। यसो गर्दा स्वास्थ्य समस्याको कारण भइरहेको तनाव कम गर्न र मन हल्का बनाउन मदत पाउनुहुनेछ। तपाईँको परिवार र साथीहरू तपाईँलाई मदत गर्न चाहन्छन् होला। तर कसरी मदत गर्ने भनेर तिनीहरूलाई थाह नहुन सक्छ। त्यसैले तपाईँलाई मदत गर्न तिनीहरू के गर्न सक्छन् भनेर स्पष्टसित बताउनुहोस्। तिनीहरूले गर्न सक्ने भन्दा बढी आशा नगर्नुहोस्। बरु तिनीहरूले दिएको मदतको लागि सधैँ कृतज्ञ हुनुहोस्। हुनत तपाईँका साथीहरू तपाईँलाई मदत गर्न चाहन्छन्। तर तिनीहरूले गरेको कुराले तपाईँलाई गाह्रो बनाउन पनि सक्छ। त्यसैले केही सीमा तोक्नु राम्रो हुन्छ। जस्तै, तिनीहरूलाई कत्तिको भेट्न बोलाउने र भेट्न आएकाहरूलाई कति समय बस्न दिने।
सकारात्मक हुनुहोस्
बाइबल के भन्छ? “आनन्दित हृदय रोग निको पार्ने औषधीजस्तै हो तर दुःखी हृदयले शरीरलाई कमजोर बनाउँछ।”—हितोपदेश १७:२२.
यो कुरा कसरी लागू हुन्छ? सकारात्मक र आशावादी हुँदा हामी भावनात्मक तवरमा स्थिर रहन सक्छौँ र यसले तनावपूर्ण स्वास्थ्य समस्याको सामना गर्न मदत गर्छ।
यसो गरे कसो होला? स्वास्थ्य समस्याको कारण अवस्था परिवर्तन हुँदा आफूले गर्न सक्ने कुराहरूमा ध्यान दिनुहोस्, आफ्नो नियन्त्रणमा नभएका कुराहरूमा होइन। आफूलाई अरूसित तुलना नगर्नुहोस् अथवा अहिलेको अवस्थालाई आफू बिरामी हुनुअघिको अवस्थासित तुलना नगर्नुहोस्। (गलाती ६:४) बरु आफूले पूरा गर्न सक्ने लक्ष्य राख्नुहोस्। यसले तपाईँलाई सकारात्मक हुन मदत गर्नेछ। (हितोपदेश २४:१०) आफ्नो अवस्थाले दिएसम्म अरूको लागि पनि केही गर्नुहोस्। अरूलाई दिँदा पाइने आनन्दले तपाईँलाई नकारात्मक सोचाइ कम गर्न मदत गर्नेछ।—प्रेषित २०:३५.
के ईश्वरले तपाईँलाई स्वास्थ्य समस्याको सामना गर्न मदत गर्नुहुनेछ?
यहोवा परमेश्वरa मानिसलाई स्वास्थ्य समस्याको सामना गर्न मदत दिन सक्नुहुन्छ भनेर बाइबल बताउँछ। हुनत हामी चमत्कारपूर्ण तरिकामा निको हुने आशा गर्न सक्दैनौँ। तर परमेश्वरको उपासना गर्नेहरूले निम्न तरिकामा उहाँबाट मदत पाउँछन्:
शान्ति। यहोवा हामीलाई ‘उहाँको शान्ति दिनुहुन्छ, जुन मानिसको समझभन्दा बाहिरको छ।’ (फिलिप्पी ४:६, ७) यस्तो शान्तिले हामीलाई अचाक्ली चिन्ता नगर्न मदत गर्छ। परमेश्वरलाई प्रार्थना गर्ने र उहाँलाई आफ्नो चिन्ता-फिक्री व्यक्त गर्नेहरूलाई नै उहाँ यस्तो शान्ति दिनुहुन्छ।—१ पत्रुस ५:७.
बुद्धि। यहोवा हामीलाई सही निर्णयहरू गर्नको लागि बुद्धि दिनुहुन्छ। (याकुब १:५) सधैँ उपयोगी हुने बाइबलका सिद्धान्तहरू बुझेर अनि लागू गरेर हामी त्यस्तो बुद्धि प्राप्त गर्न सक्छौँ।
भविष्यको लागि सान्त्वनादायी आशा। यहोवाले भविष्यको लागि यस्तो प्रतिज्ञा गर्नुभएको छ: “कुनै बासिन्दाले यसो भन्नेछैन: ‘म बिरामी छु।’” (यसैया ३३:२४) यस्तो आशाले अहिले गम्भीर स्वास्थ्य समस्याको सामना गरिरहेका थुप्रैलाई सकारात्मक भइरहन मदत गर्छ।—यर्मिया २९:११, १२.