घोषणाहरू

▪ डिसेम्बर-मा प्रस्तुत गरिने साहित्य: नयाँ विश्‍व अनुवाद र ज्ञान जसले अनन्त जीवनतर्फ डोऱ्‍याउँछ। जनवरी: मण्डलीको स्टकमा भएका कुनै पनि पुराना १९२ पृष्ठे पुस्तक। त्यस्ता पुस्तकहरू स्टकमा नभएको मण्डलीले जीवन—कसरी सुरु भयो? विकासवादबाट वा सृष्टिबाट? अथवा पार्थिव प्रमोदवनमा तपाईं सधैंभरि बाँच्न सक्नु हुन्छ जस्ता पुस्तकहरू प्रस्तुत गर्न सक्छन्‌। फेब्रुअरी: पारिवारिक आनन्दको रहस्य। मार्च: ज्ञान जसले अनन्त जीवनतर्फ डोऱ्‍याउँछ। गृह बाइबल अध्ययन सुरु गर्न विशेष प्रयास गर्नेछौं।

▪ अध्यक्ष वा उनले खटाएको कसैले डिसेम्बर १ वा त्यसको तत्कालैपछि मण्डलीको लेखा परीक्षण गर्नुपर्छ। परीक्षण गर्न सिद्धयाएर अर्को लेखा रिपोर्ट पढी सकेपछि मण्डलीमा घोषणा गर्नुहोस्‌।

▪ सन्‌ २००१ मा आइतबार, अप्रिल ८ को दिन सूर्यास्तपश्‍चात्‌ स्मरणार्थ उत्सव मनाइनेछ। थुप्रै मण्डलीले एउटै राज्यभवन चलाउँछन्‌ भने भाइहरूले उपलब्ध भवनहरू पहिल्यै रिजर्भ गर्न सकून्‌ र अन्य सुविधाहरूको प्रबन्ध गर्न सकून्‌ भनेर यो सूचना अहिल्यै दिएको हो। स्मरणार्थ उत्सव शान्तिपूर्ण र व्यवस्थित ढंगमा होस्‌ भन्‍नाखातिर भवनमा हुने अरू गतिविधिहरूले गर्दा होहल्ला नहोस्‌ भनेर प्राचीनहरूले भवनको व्यवस्थापकसित पहिल्यै कुरा मिलाएको हुनुपर्छ। यो एकदमै महत्त्वपूर्ण उत्सव भएकोले प्राचीनहरूको निकायले स्मरणार्थको वक्‍ताको रूपमा भाइहरूलाई पालैपालो छान्‍नु वा हरेक वर्ष एउटै भाइलाई भाषण दिन लाउनुको सट्टा योग्य प्राचीनलाई खटाउनुपर्छ। तर भाषण दिनसक्ने योग्य अभिषिक्‍त भाइ छन्‌ भने तिनले नै दिनेछन्‌।

▪ भारतमा अगस्त १९९९ मा प्रकाशकहरूको नयाँ शिखर संख्या पुगेको हेर्न पाउनु एकदमै आनन्दको कुरा हो। प्रकाशकहरूले क्षेत्र सेवकाईको रिपोर्ट खसाल्न ढिला-सुस्ती नगरेको हुँदा यसो भएको छ। साथै, पुस्तक अध्ययन सञ्चालक र मण्डलीका सचिवहरूले मण्डलीहरूको रिपोर्ट जम्मा गरेर सोसाइटीमा पठाउन प्रयास गरेकोले पनि यसो भएको छ। हामी सबैको सराहना गर्छौं र हरेक महिना यस्तै होस्‌ भन्‍ने आशा राख्छौं।

सन्‌ २००० को लागि ईश्‍वरतान्त्रिक सेवकाई स्कूल

^१ यहोवाका जनहरूको लागि ईश्‍वरतान्त्रिक सेवकाई स्कूल ठूलो आशिष्‌ साबित भएको छ। विगत ५० वर्षदेखि यसले लाखौंलाई जन वक्‍ता र बाइबल सत्यका शिक्षकहरूको हैसियतमा आफ्नो योग्यता विकास गर्न मदत गरेको छ। (भज. १४५:१०-१२; मत्ती २८:१९, २०) यो स्कूलले तपाईंलाई कसरी मदत गरेको छ? यसमा तपाईंले पूर्णतया भाग लिनुभएर दिइएका सुझावहरू लागू गर्नुभएमा सन्‌ २००० भरि पनि यसले तपाईंलाई लाभ पुऱ्‍याउनेछ।

^२ सन्‌ २००० को स्कूल तालिकाको पहिलो पृष्ठमा असाइनमेन्टबारे निर्देशन र चलाइने प्रकाशनहरू सूचीबद्ध गरिएको छ। हरेक भागको लागि छुट्ट्याइएको समय, विषयवस्तु, त्यसलाई कसरी प्रस्तुत गर्ने र अन्य जानकारीहरू पनि दिइएको छ। कृपया, ध्यान दिएर निर्देशन पढ्‌न समय निकाल्नुहोस्‌ र त्यसलाई लागू गर्नुहोस्‌।

^३ साप्ताहिक बाइबल पढाइ: स्कूल तालिकामा साप्ताहिक बाइबल पढाइको लागि दुइटा छुट्टा छुट्टै कार्यक्रम छन्‌। एउटाचाहिं सधैंजसो पढिने कार्यक्रम हो, जसअनुसार बाइबलको पाँच पाना जति पढिन्छ। बाइबलका विशेषताहरू यसैमा आधारित हुन्छन्‌। अर्कोचाहिं बाइबल पढाइको थप कार्यक्रम हो जसअनुसार अघिल्लो तालिकाभन्दा दोबर पढिन्छ। यस कार्यक्रमअनुरूप तीन वर्षमा सम्पूर्ण बाइबल पढाइ पूरा गर्न सकिन्छ। कसैकसैले थप कार्यक्रमको तालिकामा दिइएकोभन्दा बढी पढ्‌न रुचाउलान्‌ अनि कसैले त्यसो गर्न नसक्लान्‌। आफूलाई अरूसित तुलना गर्नुको सट्टा तपाईंले जति गर्न सक्नुहुन्छ, त्यसैमा आनन्दित हुनुहोस्‌। (गला. ६:४) मुख्य कुरा, परमेश्‍वरको वचन दिनहुँ पढ्‌नु हो।—भज. १:१-३.

^४ ईश्‍वरतान्त्रिक सेवकाई स्कूलमा भाग लिन तपाईंले स्कूल निरीक्षकसित कुरा गर्नुपर्छ। कृपया आफ्नो असाइनमेन्टलाई गम्भीरतापूर्वक लिनुहोस्‌ र बिना कारण रद्द नगर्नुहोस्‌। स्कूलको प्रबन्ध गर्ने यहोवा नै हुनुहुन्छ भन्‍ने बुझेर त्यसको मूल्यांकन गर्नुहोस्‌। यस अनुपम स्कूलबाट पूर्ण लाभ उठाउन राम्रो तयारी गर्नुहोस्‌, अह्राइएको विषयवस्तुसित राम्ररी परिचित हुनुहोस्‌ र भित्री हृदयबाट व्यक्‍त गर्नुहोस्‌।