Yotango kAakorinto
9 Mbela inandi manguluka? Mbela kandi shi omuyapostoli? Mbela inandi mona Jesus Omuwa gwetu? Mbela ne kamu shi oshilonga shandje mOmuwa? 2 Nokuli nonando yalwe inaya tala ndje ko ndi li omuyapostoli, ne omwa tala ndje ko ndi li shili omuyapostoli. Oshoka one mwa ulika kutya ngame omuyapostoli mOmuwa.
3 Eipopilo lyandje kumboka taya konakona ndje oli li ngaashi tali landula: 4 Mbela katu na uuthemba wokulya nokunwa? 5 Mbela katu na uuthemba wokweenda pamwe naakulukadhi ooitaali,* ngaashi aayapostoli ayehe, naamwahe yOmuwa nosho wo Kefas?* 6 Nenge ngame naBarnabas otse owala tu na okulonga, tu isile oshimpwiyu? 7 Mbela opu na omukwiita ha futu iipumbiwa ye mwene? Mbela opu na ngoka ha tsike oshikunino shomandjembele e ta kala inaa lya iiyimati yamo? Nenge mbela opu na aasita yiimuna ihaaya li omahini giimuna, mbyoka haya litha?
8 Mbela otandi popi iinima mbika pataloko lyopantu? Nenge nOmpango wo itayi popi iinima mbika? 9 MOmpango yaMoses omwa nyolwa taku ti: “Ino manga okana kontsezi tayi yungula iilya polupale.” Mbela Kalunga oontsezi odho e na oshimpwiyu nadho? 10 Nenge oshinima shoka okwe shi popya omolwetu? Osha nyolwa lela omolwetu, molwaashoka omulumentu, ngoka ta pulula, naangoka ta yungula, ohaye shi ningi ye na etegameno kutya otaya ka mona oshitopolwa miilya mbyoka.
11 Ngele otwa kuna iinima yopambepo mokati keni, mbela osha puka oku mú pula mu tu pe iipumbiwa yopalutu? 12 Ngele yalwe oye na uuthemba woku mú pula iipumbiwa yopalutu, mbela tse katu wu na tu ya vule? Nonando uuthemba mbono otu wu na, inatu wu longitha, ihe otwa idhidhimikile iinima ayihe, opo onkundana ombwanawa kombinga yaKristus kaayi yiwe moshipala. 13 Mbela kamu shi shi kutya aalumentu, mboka haya longo iilonga iiyapuki, ohaya li iikulya yomotempeli, naamboka haya yakula pandjigilile koshiyambelo ohaya mono oshitopolwa kiinima mbyoka ya yambwa koshiyambelo? 14 Sha faathana wo, Omuwa okwa gandja elombwelo, opo mboka haya uvitha onkundana ombwanawa ya kale haya silwa oshimpwiyu okupitila monkundana ombwanawa.
15 Ihe ngame inandi longitha nando olimwe lyomomasiloshimpwiyu ngaka. Inandi mú nyolela nokuli kombinga yiinima mbyono, opo ndi yi ningilwe, oshoka oshi li hwepo kungame okusa, shi vulithe okukuthwa uuthemba wandje wokwiitanga. 16 Kandi na etompelo lyokwiitanga, sho tandi uvitha onkundana ombwanawa, oshoka oshilonga shika onde shi inekelelwa. Ihe yayee ngame, ngele itandi uvitha onkundana ombwanawa! 17 Ngele ohandi uvitha nehalo ewanawa, otandi ka mona ondjambi; ihe nokuli nonando oshilonga shika itandi shi longo pahalo lyandje, ondi na oku shi longa, molwaashoka onde shi inekelelwa kuKalunga. 18 Otandi ka pewa nduno ondjambi yashike? Ondjambi yandje oyo okuuvitha onkundana ombwanawa oshali, opo ndi yande okulongitha nayi uuthemba, mboka ndi na, sho tandi uvitha onkundana ombwanawa.
19 Oshoka nonando kandi shi omupika gwaantu ayehe, onda ininga omupika gwaayehe, opo ndi likole aantu oyendji ngaashi tashi vulika. 20 KAajuda, onda kala onga Omujuda, opo ndi likole Aajuda; kwaamboka ye li kohi yompango, onda kala onga ndi li kohi yompango, nonando ngame kandi li kohi yompango, opo ndi likole mboka ye li kohi yompango. 21 Kumboka kaaye na ompango, onda kala onga ngoka kee na ompango, nonando ondi na ompango yaKalunga, nohandi vulika kompango yaKristus, opo ndi likole mboka kaaye na ompango. 22 Kwaamboka aankundi, onda kala omunkundi, opo ndi likole mboka aankundi. Onda kala iinima ayihe kaantu yomaludhi agehe, opo ndi vule okuhupitha yamwe, ngele otashi vulika. 23 Ihe otandi ningi iinima ayihe omolwonkundana ombwanawa, opo ndi yi uvithile yalwe.
24 Mbela kamu shi shi kutya aamatuki ayehe ohaya kutha ombinga methigathano, ihe gumwe owala ha mono ondjambi? Matukeni mwa mana mo, opo mu sindane. 25 Kehe ngoka ta kutha ombinga methigathano* oha kala e na eipangelo miinima ayihe. Odhoshili kutya ohaye shi ningi, ya mone oshishani, shoka hashi vulu okuhula po, ihe tse otu mone shoka itaashi hulu po. 26 Onkee ano itandi matuka kaandi na elalakano lyasha; ihandi palutha mokuumba oongonyo, opo kaandi kale nda fa tandi dhenge mombepo; 27 ihe ohandi dhenge* olutu lwandje noku lu ninga olupika, opo konima ngele nda uvithile yalwe, kaandi kale inaandi hokiwa kuKalunga.*