Yotango kAakorinto

15 Aamwatate, onda hala oku mú dhimbulukitha kombinga yonkundana ombwanawa, ndjoka nde mú uvithile, ndjono nane wo mwa taamba ko, nomwe yi dhiginina. 2 Ngele omwa dhiginine onkundana ombwanawa, ndjoka nde mú uvithile, otamu ka hupithwa wo okupitila muyo, ihe ngele inamu yi dhiginina, nena eitaalo lyeni osima yowala.

3 Onde mú lombwela iinima yotango yomwaambyoka ya simana, mbyono nangame wo nda lombwelwa, kutya Kristus okwa sa omolwoondjo dhetu, ngaashi omanyolo ge shi popya; 4 nokwa fumvikwa e ta yumudhwa mesiku etitatu, ngaashi omanyolo ge shi popya; 5 Opo nduno okwa ihololele Kefas,* nokonima, aayapostoli 12. 6 Okuza mpono okwa ihololele aamwatate ye vulithe pomathele gatano poshikando, mboka oyendji yomuyo ye li natango natse, omanga yamwe ya sa nale. 7 Konima, okwa ihololele Jakob, opo nduno aayapostoli ayehe. 8 Ihe hugunina okwa ihololele ndje wo, ngame ngoka nda fa okanona ka valwa inaaka adha.

9 Oshoka ngame ondi vulike kaayapostoli ayehe, noinandi gwana okwiithanwa omuyapostoli, molwaashoka onda li handi hepeke egongalo lyaKalunga. 10 Ihe omolwuuwanawahenda waKalunga, ondi li omuyapostoli. Uuwanawahenda waKalunga kungame kawu shi osima yowala, ihe onda longo ndi ya vule ayehe; hakoonkondo dhandje mwene, ihe omolwuuwanawahenda waKalunga. 11 Kutya nduno ongame, nenge oyo, nguka ogwo omukalo moka hatu uvitha, nogwo wo omukalo mwa itaala.

12 Ihe ngele ohatu uvitha kutya Kristus okwa yumudhwa kuusi, ongiini ano sho yamwe yomune tamu ti kutya kaku na eyumuko lyaasi? 13 Odhoshili kutya ngele kaku na eyumuko lyaasi, nena naKristus ina yumudhwa. 14 Ihe ngele Kristus ina yumudhwa kuusi, nena okuuvitha kwetu kaku na shoka taku ti, neitaalo lyeni kali na shoka tali ti. 15 Kakele kaashono, ngele oonakusa itaya ka yumudhwa shili, osha yela kutya Kalunga ina yumudha Kristus, notatu lundile Kalunga nani, sho hatu ti kutya okwe mu yumudha. 16 Oshoka ngele aasi itaya ka yumudhwa, naKristus ina yumudhwa. 17 Shimwe ishewe, ngele Kristus ina yumudhwa, nena eitaalo lyeni kali na shoka tali ti; otamu tsikile okukala muulunde weni. 18 Nena kungawo, mboka ya sa muukumwe naKristus oya sa sigo aluhe.* 19 Ngele otwa inekela muKristus monkalamwenyo ndjika owala, otatu etitha ohenda unene tu vule aantu ayehe.

20 Ihe ngashingeyi, Kristus okwa yumudhwa kuusi, e li omuyumudhwa gwotango* gwomwaamboka ya sa. 21 Oshoka ngaashi owala eso lye ya po okupitila momuntu gumwe, neyumuko lyaasi olye ya po wo okupitila momuntu gumwe. 22 Oshoka ngaashi owala aantu ayehe haya si omolwaAdam, ayehe otaya vulu wo okukala nomwenyo okupitila muKristus. 23 Ihe kehe gumwe ota yumudhwa palufo lwe: tango oKristus, nokonima, oomboka yaKristus, mboka taya ka yumudhwa pokukala po kwe. 24 Hugunina, ehulilo otali ya. Opo nduno Kristus ota ka shunitha Uukwaniilwa kuKalunga ke, ngoka e li He, konima ngele a hulitha po omapangelo agehe, naayehe mboka ye na oonkondopangelo. 25 Oshoka oku na okupangela e li omukwaniilwa, sigo Kalunga a tula aatondi ye ayehe kohi yoompadhi dhe; 26 nomutondi gwahugunina, ano eso, ota ka hanagulwa po. 27 Oshoka Kalunga “okwa tula iinima ayihe kohi yoompadhi dhe.” Ihe sho ta ti kutya ‘iinima ayihe oya tulwa kohi yoompadhi dhe,’ osha yela kutya Ngoka e yi tula ko, ina kwatelwa mo. 28 Ihe uuna iinima ayihe ya tulwa mepangelo lye, Omwana naye ota ka igandja kuKalunga, ngoka e mu pa iinima ayihe, opo Kalunga oye a kale omupangeli gwiinima ayihe.

29 Ngele oonakusa itaya ka yumudhwa, ongiini kombinga yaamboka ya ninginithwa neninginitho tali ya fala meso? Nongele oonakusa itaya ka yumudhwa, omolwashike ya ninginithwa neninginitho lya tya ngaaka? 30 Omolwashike wo hatu tula oomwenyo dhetu moshiponga ethimbo kehe? 31 Esiku kehe, ohandi kala nda taalela eso. Aamwatate, ondi uvite uuntsa omolweni, sho mu li aalongwa yaKristus Jesus, Omuwa gwetu. 32 Ngele onda kondja niilikama muEfeso, ngaashi aalumentu yalwe ya li ya ningi, otashi kwatha ndje shike? Ngele oonakusa itaya ka yumudhwa, “natu lyeni nokunwa, oshoka ngula otatu si.” 33 Inamu pukithwa. Ookuume aawinayi ohaya yono po omikalo omiwanawa.* 34 Ningeni oondunge, nokulonga shoka sha uka, ihe haulunde, oshoka yamwe yomune inamu tseya Kalunga. Otandi popi ngawo, opo mu kale mwa sa ohoni.

35 Nonando ongawo, gumwe otashi vulika a tye: “Aasi otaya ka yumudhwa ngiini? Mbela otaya ka yumudhwa ye na omalutu ga tya ngiini?” 36 Egoya ngoye! Shoka ho kunu ohashi sile mo tango, opo shi mene nawa. 37 Ngele to kunu, iho kunu omuno gwo gwene, ihe ombuto, kutya nduno oyiilya, nenge oyoludhi lulwe. 38 Ihe Kalunga oha pe ombuto kehe omuno gwayo, ngaashi a hala. 39 Omalutu inaga faathana; olutu lwomuntu olwi ili, lwoongombe olwi ili, lwuudhila olwi ili, nolwoohi olwi ili. 40 Opu na omalutu gomegulu, nomalutu gokombanda yevi; ihe eadhimo lyomalutu gomegulu oli ili, neadhimo lyomalutu gokombanda yevi oli ili. 41 Eadhimo lyetango oli ili, eadhimo lyomwedhi oli ili, neadhimo lyoonyothi oli ili; ihe onyothi kehe oyi na eadhimo lyayo li ili.

42 Shoka osho tashi ka ningwa, sho aasi taya ka yumudhwa. Omalutu, ngoka ga sa, otaga yonuka po, ihe aantu otaya ka yumudhwa nomalutu, ngoka ihaaga yonuka. 43 Ngele omudhimba tagu fumvikwa,* inagu simana, ihe ngele omuntu a yumudhwa, oha simanekwa. Omudhimba ohagu fumvikwa muunkundi, ihe omuntu oha yumudhwa e na oonkondo. 44 Mevi ohamu fumvikwa olutu lwopanyama e tamu yumudhwa olutu lwopambepo. Ngele oku na olutu lwopanyama, oku na wo ndwoka lwopambepo. 45 Oshoka okwa nyolwa taku ti: “Omulumentu gwotango, Adam, okwa ningi omuntu omunamwenyo.”* Adam gwahugunina okwa ningi ombepo, ndjoka tayi gandja omwenyo. 46 Ihe nonando ongawo, shoka shopambepo hasho she ya tango. Shono shopanyama osho she ya tango, taku landula nduno shoka shopambepo. 47 Omuntu gwotango ogwokevi, nokwa shitwa montsi yevi; omuntu omutiyali ogwomegulu. 48 Aantu, mboka ya shitwa montsi yevi, oya fa ngoka Kalunga a shita tango okuza montsi yevi, naamboka yomegulu oya fa ngoka a zile megulu. 49 Ngaashi owala twa shitwa oshifetha shaangoka a za montsi yevi, otu li wo oshifetha shaangoka a za megulu.

50 Ihe aamwatate, otandi mú lombwele kutya onyama nombinzi itayi vulu okuthigulula Uukwaniilwa waKalunga, naashoka sha yonuka itashi thigulula shoka ihaashi yonuka. 51 Taleni, otandi mú lombwele oshiholekwa oshiyapuki: Haatuhe tatu ka sa, ihe atuhe otatu ka shitululwa 52 mepathimo lyeho, pehiko lyenkuma lyahugunina. Oshoka enkuma otali ka hikwa, naasi otaya ka yumudhwa ye na omalutu ihaaga yonuka, notatu ka shitululwa. 53 Oshoka shono hashi yonuka oshi na okuzala shoka ihaashi yonuka, naashoka hashi si oshi na okuzala shoka ihaashi si. 54 Ihe uuna shoka hashi yonuka sha zala shoka ihaashi yonuka, naashoka hashi si, sha zala shoka ihaashi si, nena oohapu, ndhoka dha nyolwa taku ti: “Eso otali ka ninagulwa po* sigo aluhe,” otadhi ka gwanithwa. 55 “Eso ngoye, esindano lyoye oli li peni? Eso ngoye, ongona yoye oyi li peni?” 56 Ongona, ndjoka hayi etitha eso, uulunde; nOmpango oyo oonkondo dhuulunde.* 57 Ihe Kalunga na pandulwe, oshoka ohe tu pe esindano okupitila mOmuwa gwetu, Jesus Kristus!

58 Onkee ano, aamwatate aaholike, kaleni mwa kolelela, itaamu tengauka; kaleni aluhe mu na oshindji okulonga miilonga yOmuwa, mu shi shi kutya iilonga yeni, mbyoka tamu longele Omuwa, otayi ti sha.*