KAaefeso
3 Ngame Paulus, onda tulwa mondholongo, molwaashoka nde mú uvithile ndi li omulanduli gwaKristus Jesus, ne aantu yomiigwana. 2 Omwa uva shili kutya onda pewa oshinakugwanithwa shoku mú kwathela, mu mone mo uuwanawa muuwanawahenda waKalunga, 3 ano kutya onda hololelwa oshiholekwa oshiyapuki, ngaashi nde mú nyolela nale paufupi. 4 Onkee ano sho tamu lesha kombinga yasho, otamu ka mona kutya ondi na ontseyo kombinga yoshiholekwa oshiyapuki shi na ko nasha naKristus. 5 Kalunga ka li a hololele omapipi gonale oshiholekwa shoka, ngaashi e shi hololele aayapostoli naahunganeki ye aayapuki okupitila mombepo ondjapuki, 6 ano kutya, aantu yomiigwana, mboka ye li muukumwe naKristus Jesus okupitila monkundana ombwanawa, otaya ka ninga aathigululi pamwe naKristus, notaya ka ninga iilyo yolutu lumwe, notaya ka gwanithilwa euvaneko pamwe natse. 7 Onda ningi omuyakuli gwoshiholekwa shoka oshiyapuki omolwomagano guuwanawahenda waKalunga, ngoka a pe ndje okupitila moonkondo dhe.
8 Ngame, ngoka ndi vulike kaayapuki ayehe, onda ulukilwa uuwanawahenda, ndi uvithile iigwana onkundana ombwanawa kombinga yomalalekonuuyamba gaKristus kaage shi okuyelekwa nasha, 9 nondi kwathele kehe gumwe, a mone nkene Kalunga, ngoka a shita iinima ayihe, a holola oshiholekwa oshiyapuki, shoka a kala a holeka uule wethimbo. 10 Shoka osha ningwa, opo oonkondopangelo nomapangelo gomegulu ga tseye nkene uunongo waKalunga wa hololwa momikalo odhindji dha yoolokathana okupitila megongalo. 11 Shoka oshi li metsokumwe nelalakano lyaKalunga lyaaluhe, ndyoka a tula po okupitila muKristus Jesus, Omuwa gwetu, 12 ngoka okupitila muye, tu na emanguluko ndika lyokupopya, notatu vulu okugalikana twa manguluka tu na einekelo omolweitaalo muye. 13 Onkee ano otandi mú indile kaamu teke omukumo omolwomaudhigu, ngoka tandi piti mugo omolweni, molwaashoka shono otashi mú etele esimano.
14 Omolwetompelo ndyono, otandi galikana Tate nda tsa oongolo, 15 ngoka uukwanegumbo* kehe kombanda yevi nomegulu wu li po omolwe. 16 Otandi galikana Kalunga, ngoka e na eadhimo enene, e mú pe oonkondo okupitila mombepo ye ondjapuki, 17 nokupitila meitaalo lyeni, mu kale mu na Kristus momitima dheni, nomu kale mu hole aantu ooyakweni. Kaleni mwa tsama,* nomwa kolelela kekankameno, 18 opo ne pamwe naayapuki ayehe mu tseye nawa omutamo, uule womutaandelo, uule wopombanda nuule wokuya mevi wiinima yopakalunga, 19 nomu tseye ohole yaKristus, ndjoka yi vule ontseyo, opo Kalunga e mú kwathele mu kale mu na thiluthilu omaukwatya ga fa ge.
20 Omolwoonkondo dhaKalunga, ndhoka tadhi longo mutse, ote ke tu pa oshindji lela noonkondo shi vulithe pwaashoka hatu pula, nenge hatu dhiladhila. 21 Onkee ano Kalunga okwa gwana okutangwa sigo aluhe komapipi agehe omolwegongalo lye nomolwaKristus Jesus. Amen.