Ontiyali kAakorinto

12 Ondi na okwiitanga, nonando itashi kwatha sha. Ihe otandi tameke okupopya kombinga yomamoniko nosho wo yaashoka nda hololelwa kOmuwa. 2 Ondi shi omulumentu gwontumba, ngoka e li muukumwe naKristus, nokwa falelwe megulu etitatu omimvo 14 dha ka pita; kutya nduno okwa falelwe mo e li molutu lwopanyama, nenge hasho, ngame kandi shi wo; Kalunga oye e shi shi. 3 Eeno, omulumentu a tya ngaaka ondi mu shi. Okwa li a falwa moparadisa, kutya nduno okwa falwa mo nolutu lwopanyama, nenge omomukalo gumwe gwi ili, ngame kandi shi wo, Kalunga oye e shi shi. 4 Ihe manga a li moparadisa, okwa uvu oohapu kaadhi na okupopiwa, noinadhi pitikwa pampango okupopiwa kaantu. 5 Otandi itanga omolwomulumentu ngoka, ihe itandi itanga kombinga yandje mwene, kakele kombinga yuunkundi wandje. 6 Oshoka nokuli nonando onda hala okwiitanga, nena kandi shi egoya, oshoka otandi popi oshili. Ihe inandi hala okwiitanga, opo kaapu kale nando ogumwe ta dhiladhilile ndje pombanda kombinga yaashoka e wete mungame, nokwa uva kungame, 7 molwaashoka owala nda hololelwa iinima iikumithi.

Opo kaandi inenepeke unene, onda pewa okwega monyama, ano omuyengeli gwaSatana, a kale ta dhenge ndje nomankawa, opo kaandi kale tandi inenepeke unene. 8 Iikando ayihe itatu, onda indile Omuwa kombinga yoshinima shika, opo e shi kuthe ndje. 9 Ihe okwa ti owala kungame: “Uuwanawahenda wandje owe ku gwanena, oshoka oonkondo dhandje ohadhi ulikwa pakuudha,* uuna wa nkundipala.” Onkee ano ngame onda nyanyukwa, notandi itangele uunkundi wandje, opo oonkondo dhaKristus dhi vule okukala egameno lyandje, ngaashi etsali. 10 Onkee ano ohandi kala nda nyanyukwa nuuna ndi na uunkundi, tandi tukwa, tandi hepekwa, ndi li moluhepo nosho wo momaudhigu omolwaKristus. Oshoka uuna ndi na uunkundi, nena ondi na oonkondo.

11 Omwa ningi ndje ndi kale nda fa egoya, nonando omwa li mu na okupopila ndje. Oshoka inandi ulika kutya ondi vulike nando omoshinima shimwe kaayapostoli yeni, mboka haya iningitha ya fa haya longo uuwanawa, nokuli nonando ngame omuntu gwowala. 12 Iilonga, mbyoka tayi ulike kutya ngame omuyapostoli, onde yi longo mokati keni neidhidhimiko enene, ngaashi omandhindhiliko, iikumithalonga nosho wo iilongankondo. 13 Molwaashoka inandi mú tsika nando omutenge gwasha, shoka osho she mú ningitha mu kale mwa yooloka ko komagongalo galwe, ihe mbela ngawo onda ninga epuko? Ngele osho, dhiminii ndje po.

14 Taleni! shika oshikando oshititatu nda ilongekidha okuya kune, ihe itandi ka kala omutenge kune. Oshoka hamaliko geni nda hala, ihe one; oshoka aanona inaya tegelelwa ya pungulile aavali yawo omaliko, ihe aavali oyo ye na okupungulila oyana. 15 Ngame otandi ka gandja ashihe shoka ndi na nenyanyu, nokwiigandja omolweni.* Ihe ngele ondi mú hole unene, mbela ngame ondi na okukala ndi holike kashona? 16 Ihe nonando inandi mú ekelahi, otamu ti kutya onde mú “kengelela,” nonde mú yula “nomakoto.” 17 Mbela onde mú kengelela okupitila maalumentu, mboka nda tumu kune? 18 Onda kumagidha Titus e ye kune pamwe nomumwatate gumwe. Mbela Titus okwa li e mú kengelela? Mbela inatu longela kumwe nayo? Mbela inatu landula oshinkoti shimwe?

19 Mbela omwa kala tamu dhiladhila kutya otwa kala tatu ipopile? Otatu ipopile koshipala shaKalunga muukumwe naKristus. Ihe ookuume aaholike, kehe shoka tatu ningi, otatu shi ningi, opo tu mú tunge. 20 Oshoka onda tila kutya pamwe sho tandi ke ya kune, otandi ka adha eihumbato lyeni lya lunduluka, neihumbato lyandje itali ka kala ngaashi mwa tegelela, ihe otashi vulika mokati keni mu kale mu na oontamanana, ondumbo, ongeyo ya pitilila, etopoko, ondjego, oluhoko, einenepeko nosho wo evundakano. 21 Uuna tandi ke ya kune ishewe, Kalunga ota ka fupipika ndje montaneho yeni, notandi ka lila omolwoyendji, mboka ya li ya yono monakuziwa, ihe inaya itedhulula, ya ethe po iilonga yawo ya nyata, omilalo dha nyata* nosho wo okuyona pwaa na uuhwenge.*