Ontiyali kAakorinto
4 Onkee ano molwaashoka Kalunga okwe tu pa oshilongayakulo shika omolwohenda ye, itatu sholola. 2 Ihe otwa etha po iilonga tayi sitha ohoni noyomeholamo, katu na omakoto, noihatu pengitha oohapu dhaKalunga; ihe ohatu popi oshili, opo tu mbilipaleke eiyuvo lyomuntu kehe koshipala shaKalunga. 3 Odhoshili kutya ngele onkundana ombwanawa, ndjoka tatu uvitha oya holekwa,* nena oya holekwa mboka taya ka hanagulwa po 4 naamboka inaaya itaala, oshoka omadhiladhilo gawo oga posipalekwa kukalunga kuuyuni mbuka,* opo uuyelele weadhimo lyonkundana ombwanawa kombinga yaKristus, ngoka e li oshifetha shaKalunga, kaawu vule oku ya minikila. 5 Oshoka itatu uvitha kombinga yetu yene, ihe okombinga yaJesus Kristus e li Omuwa, notu li aapiya yeni omolwaJesus. 6 Oshoka Kalunga oye a tile: “Uuyelele nawu minikile momilema,” nokwa minikile momitima dhetu nuuyelele, mboka tawu gandja ontseyo onkumithi kombinga ye, okupitila moshipala shaKristus.
7 Nonando otwa fa iiyuma yeloya,* otwa humbata eliko ndika, opo oonkondo ndhoka dhi vule dhopaunshitwe dhi vule okuza kuKalunga, ihe hakutse yene. 8 Ohatu tsakaneke omaupyakadhi gi ili nogi ili, ihe ihatu sholola; ohatu kala twa ngwangwana, ihe itashi ti kutya katu na etegameno lyasha. 9 Otatu hepekwa, ihe inatu ekelwahi; otwa hatwa pevi, ihe inatu hanagulwa po. 10 Aluhe ohatu kala twa taalela eso ngaashi Jesus, opo onkalamwenyo yaJesus yi vule wo okukala yi iwetikile mutse. 11 Oshoka tse, mboka tu li momwenyo, otwa taalela eso ethimbo kehe omolwaJesus, opo onkalamwenyo yaJesus yi vule wo okukala yi iwetikile momalutu getu, ngoka haga si. 12 Onkee ano tse otwa taalela aluhe eso omolwiilonga yetu yokuuvitha, ihe ne otamu ka mona omwenyo omolwayo.
13 Ihe molwaashoka otu na ombepo ya faathana yeitaalo, ngaashi kwa nyolwa taku ti: “Onda ulike kutya ondi na eitaalo, onkee ano onda popi”; natse ohatu ulike kutya otu na eitaalo, onkee otatu popi, 14 tu shi kutya ngoka a yumudha Jesus ote ke tu yumudha wo pamwe naJesus, notatu ka kala pamwe naye. 15 Oshoka iinima ayihe mbika oya ningwa omolweni, opo uuwanawahenda wu indjipale shi vulithe nale, molwaashoka aantu oyendji otaya pandula Kalunga, shono tashi humitha komeho eadhimo lye.
16 Onkee ano itatu sholola, nokuli nonando omuntu gwetu gwokombanda ota yonuka po, omuntu gwetu gwomeni ota ningwa omupe esiku nesiku. 17 Nonando omaudhigu ngoka twa taalela ogopakathimbo noinaga kwata miiti, otage tu etele esimano enene nosho wo omwenyo gwaaluhe. 18 Ihatu kala tatu gandja eitulomo kiinima, mbyoka yi wetike, ihe okiinima, mbyoka kaayi wetike. Oshoka iinima, mbyoka yi wetike, oyopakathimbo, ihe iinima, mbyoka kaayi wetike, oyaaluhe.