Odho oolye?
Oonzapo dhaJehova odha halelela u tseyathane nawa nadho. Otashi vulika we dhi tsakaneka dhi li aashiinda shoye nodhi li aaniilonga pamwe nangoye nenge momaipyakidhilo galwe gesiku kehe gomonkalamwenyo. Otashi vulika we dhi mona momapandaanda, tadhi gandja iifo yadho kaaendipo. Nenge tashi vulika wa popya nadho paufupi pontu yoye.
Dhoshili, Oonzapo dhaJehova odhi na ko nasha nangoye nosho wo onkalonawa yoye. Odha hala dhi kale ookuume koye nodhi ku lombwele oshindji kombinga yadho, omalongo gadho, ehangano lyadho nonkene dhi uvite kombinga yaantu nuuyuni moka tseni atuhe tu li. Opo dhi shi ninge, odhe ku longekidhila po oshileshomwa shika.
Momikalo odhindji Oonzapo dhaJehova odha faathana nakehe gumwe i ili. Odhi na omaupyakadhi gesiku kehe—pamahupilo, panyama nopamaiyuvo. Ohadhi ningi omapuko omathimbo gamwe, molwashoka inadhi gwanenena. Ihe ohadhi kambadhala okwiilonga sha miimoniwa yadho nohadhi konakona Ombimbeli nuudhiginini opo dhi ninge omalunduluko ga pumbiwa. Odhi iyapulila Kalunga okulonga ehalo lye, nohadhi itula mo dho dhene okugwanitha eiyapulo ndika. Miilonga yadho ayihe ohadhi kongo ewiliko mOohapu dhaKalunga nokombepo ye ondjapuki.
Osha simanenena kudho opo omalongo gadho ga kale ga kankamena kOmbimbeli, hakomambeleko gopantu owala nenge komahempululo geitaalo. Odhi uvite ngaashi omuyapostoli Paulus sho ta popi mokunwethwa mo kuKalunga ta ti: “Kalunga na kale omunashili, nomuntu kehe omufundja.” (Aaroma 3:4) Shi na ko nasha nomalongo ngoka ga gandjwa ge li oshili yOmbimbeli, Oonzapo ohadhi kambadhala shili okulandula oshiholelwa shAaberea sho ya li ya pulakene komuyapostoli Paulus tu uvitha ta ti: “Oya taamba oohapu noku dhi hokwa noya konakona mooraamata omasiku agehe, ya tale, mbyoka ye yi lombwelwa, ngele oyo tuu.” (Iilonga 17:11) Oonzapo dhaJehova odhi itaala kutya omalongo agehe gopalongelokalunga oge na okukonakonwa komukalo ngoka okumona ngele otaga tsu kumwe nOmanyolo ga nwethwa mo, kutya nduno elongo ndyoka otali gandjwa kudho nenge okuyalwe yi ili. Otadhi ku hiya notadhi ku ladhipike nokuli u shi ninge moonkundathana dhoye pamwe nadho.
Okutala kwaashika osha yela kutya Oonzapo dhaJehova odhi itaala kutya Ombimbeli oyi li Oohapu dhaKalunga. Odha tala ko omambo gayo 66 ge li ga nwethwa mo nosho wo ondjokonona ndjoka tayi popiwa mo oyi li mondjila. Shoka hashi ithanwa apuhe Etestamendi Epe dho ohadhi shi ithana Omanyolo gopaKriste gOshigreka, nEtestamendi Ekulu ohadhi li ithana Omanyolo gOshiheberi. Odhi inekela mugo agehe gaali, Omanyolo gOshigreka nogOshiheberi, nodhi itaala kutya shoka taga popi oshi li naanaa ngaashi shi li kakele mpoka oohapu dhago tadhi ulike shi iwetikile kutya odhopathaneko. Dho odhi uvite ko kutya ogendji gomomahunganeko gOmbimbeli oga gwanithwa nale, galwe ogi ipyakidhila okugwanithwa nagalwe oge na natango okugwanithwa.
EDHINA LYADHO
Oonzapo dhaJehova? Eeno, nguka ogo omukalo hadhi iyithana. Olyo edhina tali dhi tongonona notali ulike kutya dho otadhi gandja uunzapo u na ko nasha naJehova, Uukalunga we nomalalakano ge. “Kalunga,” “Omuwa,” na “Omushiti”—ngaashi “Omupresidende,” “Omukwaniilwa,” na “Ondjayi”—ogo omadhina gesimaneko notashi vulika ge eleka kaantu yi ili noyi ili. Ihe “Jehova” olyo edhina lyopaumwene notali ulike kuKalunga omunankondoadhihe nOmushiti gweshito alihe. Shika oshu ulikwa muEksodus 15:3: “Jehova Ofule; edhina lye Jehova.”
Edhina Jehova (nenge Yahweh, ngaashi oJerusalem Bible yaKatoolika kaRoma nosho wo aalongwantu yalwe osho ye hole okutya) otali holoka konyala lwiikando 7 000 mOmanyolo gOshiheberi gopetameko. Oombimbeli odhindji ihadhi li longitha ihe pehala lyalyo ohadhi tula po “Kalunga” nenge “Omuwa.” Ihe nokuli mOombimbeli ndhika, omuntu ota vulu okumona mpoka enyolo lyOshiheberi lyopetameko tali longitha Jehova molwashoka pomahala ngono iitya mbyoka ye li pingena po oya nyolwa noondanda oonene, ngaashi: KALUNGA, OMUWA. Opu na omatoloko gontumba gonena ngoka haga longitha edhina Jehova nenge Yahweh. Onkee ano oNew World Translation tayi ti muJesaja 42:8: “Ongame Jehova. Olyo edhina lyandje.”
Ehokololo lyopamanyolo moka Oonzapo dhaJehova dha kutha edhina lyadho oli li montopolwa onti-43 yaJesaja. Moka onkalo yuuyuni oya talika ko yi li oshinyandwa shomompangu: Ookalunga yiigwana ohaya pulwa ye ete oonzapo dhawo dhi gandje uunzapo shi na ko nasha nomaipopilo gawo kutya oye li pauyuuki nenge okupulakena koonzapo dhokombinga yaJehova nokuzimina oshili. Moka Jehova ota popi koshigwana she ta ti: “One oonzapo dhandje, [Jehova, NW] ta ti; nomupiya gwandje, ngo nde mu hogolola, opo mu tseye ndje, ne mu itaale ndje, ne mu tseye kutya, Ongame tuu ngu. Kapu na kalunga a shitwa, nde mu landula, nokaku na gulwe ta landula ndje. Ongame, Ongame [Jehova, NW], nokapu na omuhupithi gulwe, Ongame awike.”—Jesaja 43:10, 11, KB.
Jehova Kalunga okwa kala e na oonzapo kombanda yevi pethimbo lyoomvula omayuvi manga Jesus inaa valwa. Konima sho Aaheberi ontopolwa 11 ya tumbula yamwe yomaalumentu mboka ya li ye na eitaalo, Aaheberi 12:1 otaya ti: “Onkee ano, sho tu na oshikogo shi thike mpa shoonzapo she tu kundukidha, natse wo tu ihuleni shaa shoka tashi tu thindi pohi, nuulunde ihau lwedha oku tu idhingila, tse tu matuke nokudhiginina methigathanopo li li komeho getu.” Jesus okwa popi koshipala shaPontius Pilatus a ti: “Onkee nda valwa nonkee nde ya muuyuni, ndi hokolole oshili.” Okwi ithanwa “onzapo ondhiginini nomunashili.” (Johannes 18:37; Ehololo 3:14, NW) Jesus okwa lombwele aalongwa ye ta ti: “One tamu pewa oonkondo, Ombepo Ondjapuki ngele te ya mune, one notamu ka ninga oonzapo dhandje omuJerusalem nomuJudea nomuSamaria nosigo okooha dhuuyuni.”—Iilonga 1:8.
Onkee ano aantu 6 000 000 lwaampono nena mboka taya hokolola onkundana ombwanawa yUukwaniilwa waJehova miikaha yaKristus Jesus miilongo yi vulithe 230 oye uvite kutya yo otayi ipopi yo yene she eleka kutya yo Oonzapo dhaJehova.
[Oohapu dha simana pepandja 4]
Odhi iyapulila Kalunga okulonga ehalo lye
[Oohapu dha simana pepandja 4]
Odhi itaala Ombimbeli yi li Oohapu dhaKalunga
[Oohapu dha simana pepandja 5]
Edhina ndika oli na ko nasha noshinyandwa shomompangu
[Oohapu dha simana pepandja 5]
Oonzapo 6 000 000 lwaampono miilongo yi vulithe 230
[Ethano pepandja 3]
Odhi na ko nasha nangoye
[Ethano pepandja 4]
Edhina lyaKalunga lyopaumwene mOshiheberi shonale