Ehumokomeho nosho wo ekoko lyadho nena
ONDJOKONONA yonena yOonzapo dhaJehova oya tameke oomvula dhi vulithe pethele dha piti. Momumvo 1870 nasha lwaampono, opwa li pwa tamekwa ongundu yekonakonombimbeli onshona muAllegheny, Pennsylvania, U.S.A., shono ngashingeyi shi li oshitopolwa shaPittsburgh. Charles Taze Russell oye kwa li omukwatelikomeho gwongundu ndjoka. Oshifo shotango Zion’s Watch Tower and Herald of Christ’s Presence osha li sha holoka po muJuli 1879. Mo 1880 omagongalo ogendji oga li ga totwa miitopolwa yopopepi okuza mongundu yekonakonombimbeli ndjoka yimwe ayike. Mo 1881 Zion’s Watch Tower Tract Society olya totwa po, nomo 1884 olya li lya ningi ehangano lyopaveta, li na Russell e li omupresidende. Konima yethimbo, edhina lyEhangano olya li lya lunduluka lya ningi Watch Tower Bible and Tract Society. Oyendji oya li ya gandja uunzapo egumbo negumbo taya gandja iileshomwa yOmbimbeli. Aantu 50 oya li ye shi ningi ethimbo lyu udha mo 1888—nena uupokati waalongi yethimbo lyu udha muuyuni auhe ou thike 700 000 lwaampono.
Mo 1909 iilonga oya li ya tameke okukala yi li yopaigwana, nombelewa onene yEhangano oya li ya tembudhilwa pehala mpoka yi li ngashingeyi moBrooklyn, New York. Omauvitho oga li ga gandjwa ga nyanyangidhwa miifokundaneki, nomo 1913 oga li ga nyanyangidhwa momalaka gane miifokundaneki omayuvi mIilongohangano, Kanada naEuropa. Omambo, uumbo nuufo omamiliyona omathele oya li ya taandelekwa.
Mo 1912 oya li ya tameke nokuninga ‘oPhoto-Drama of Creation.’ Oya li yu ulike okupitila momathano ihaagi inyenge nosho wo ookino dhi na omawi, iiningwanima okuza keshito lyuuyuni sigo okehulilo lyElelo lyOomvula Eyuvi lyaKristus. Omauliko oga li ga tameke mo 1914, noga li ga talika kaantu 35 000 esiku kehe. Okino ndjika oya li yimwe yomookino dhotango ndhoka dhu ulikwa dhi na omawi.
OMUMVO 1914
Ethimbo lya simanenena olya li lya hedha popepi. Mo 1876 omukonakonimbimbeli Charles Taze Russell okwa li a nyola oshitopolwa “Omathimbo gAapagani: Uunake taga hulu po?” moBible Examiner, sha nyanyangidhwa moBrooklyn, New York, ndjoka ya popi pepandja 27 lyoshifo shayo shaOktoba ya ti: “Omathimbo gaheyali otaga ka hula po mo A.D. 1914.” Omathimbo gAapagani ogo ethimbo lya popiwa metoloko lilwe lyOmbimbeli ge li “omauthwathimbo giigwana.” (Lukas 21:24, NW) Haayihe mbyoka ya li ya tegelelwa yi ningwe mo 1914 ya ningwa, ihe omumvo ngono ogwa li gwa ndhindhilikitha ehulilo lyOmathimbo gAapagani nogwa li omumvo gu na eityo lyi ikalekelwa. Aanandjokonona naafatululi oyendji oye shi zimina kutya mondjokonona yaantu omwa li elunduluko enene mo 1914. Iitothwamo tayi landula otayi shi ulike:
“Omumvo gwahugunina ngoka gwa li ‘gwa fa omikwawo’ mondjokonona ogwa li 1913, omumvo manga Iita yoTango yUuyuni inaayi tameka.”—Oshinyolwa moTimes-Herald, Washington, D.C., 13 Marsa 1949.
“Ethimbo lyoomvula 75 okuza mo 1914 sigo omo 1989, moka mwa luwa iita iyali yuuyuni nosho wo iita iitalala, olya li lya talika ko kaanandjokonona li li olyo alike ethimbo lyi ikalekelwa li li shimwe shi ili moka oshitopolwa oshinene shuuyuni sha li tashi lu iita, sha adhika opo sha lwile iita nenge shi ilongekidhila iita.”—The New York Times, 7 Mai 1995.
“Muushili wo wene, uuyuni auhe owa li wa ndwafuka pethimbo lyIita yoTango yUuyuni nokatu shi shi natango kutya omolwashike. Manga inaashi ningwa, aantu oya li taya dhiladhila kutya ethimbo ewanawa noonkondo oli li popepipepi. Opwa li ombili nehepuluko. Opo nduno kehe shimwe osha ndwafuka. Okuza ethimbo ndyono otwa kala monkalo yokukala itaatu vulu we okwiinyenga twa fa twa sa . . . Aantu oyendji oya li ya dhipagwa methelemumvo ndika ye vulithe yomondjokonona ayihe.”—Dr. Walker Percy, American Medical News, 21 Novomba 1977.
Oomvula dhi vulithe 50 konima yo 1914, omukwanepangelo Omundowishi Konrad Adenauer okwa nyola ta ti: “Egameno nevululuko oya kana mo monkalamwenyo yaantu okuza mo 1914.”—The West Parker, Cleveland, Ohio, 20 Januali 1966.
Omupresidende gwotango gwEhangano, C. T. Russell, okwa si mo 1916 nokwa li a landulwa momvula ya landula ko kuJoseph F. Rutherford. Opwa li pwa ningwa omalunduluko ogendji. Oshifo hashi endele pamwe noThe Watchtower (Oshungonangelo), sha li shi ithanwa The Golden Age, osha li sha holoka po. (Ngashingeyi ohashi ithanwa Awake!, nohapu nyanyangidhwa iifo yi vulithe 20 000 000 momalaka ge vulithe 80.) Okugandja uunzapo egumbo negumbo okwa li kwa tsuwa omuthindo omunene. Opo ya kale ya yooloka ko koongeleka dhUukwakriste, mo 1931 Aakriste mbaka oya taamba ko edhina Oonzapo dhaJehova. Edhina ndika olya kankamena kuJesaja 43:10-12.—NW.
Oradio oya li ya longithwa unene methimbo lyoomvula 1920 sigo 1939 lwaampono. Mo 1933 Ehangano olya li lya longitha oositaasi dhoradio 403 okutuma mombepo iipopiwa yOmbimbeli. Konima yethimbo, okulongitha oradio okwa li kwa pingenwa po unene kokutalelwa po okundji egumbo negumbo kOonzapo dhi na oongalamafona dha humbatwa tadhi dhana uungalo wiipopiwa yOmbimbeli mbyoka dha kwata. Omakonakonombimbeli gopegumbo oga li ga tamekwa nakehe gumwe ngoka e na ohokwe moshili yOmbimbeli.
OMASINDANO MOMPANGU
Pethimbo lyoomvula 1930 sigo 1949 lwaampono, Oonzapo odhindji odha li dha kwatwa molwashoka tadhi longo iilonga mbika, niikoya yopampangu oya li ya ningwa opo ku dhigininwe emanguluko lyokupopya, lyokunyanyangidha, lyokugongala nolyokulongela Kalunga. MIilongohangano, omatsikilithompangu okuza moompangu dhopevi oga ningitha opo Oonzapo dhi sindane miikoya 43 mbyoka ya falwa kOmpangu yoPombanda yIilongohangano. Sha faathana, omapangulo ge li nawa oga li ga ningwa moompangu dhopombanda miilongo yilwe. Shi na ko nasha nomasindano ngaka moompangu, Omuprofesoli C. S. Braden, membo lye These Also Believe, okwa popi kombinga yOonzapo a ti: “Odha kwathela uudemokoli momukalo omundhindhilikwedhi mokukondja kwadho okudhiginina omauthemba gadho guukwashigwana, molwashoka mokukondja kwadho odha li dha ningi oshindji okugamena omauthemba ngono mongundu kehe yaantu aashona muAmerika.”
OOPROGRAMA DHOKUDHEULA DHI IKALEKELWA
J. F. Rutherford okwa si mo 1942 nokwa li a landulwa ku N. H. Knorr e li omupresidende. Oprograma ya longekidhwa nawa yokudheula oya li ya tamekwa. Mo 1943 opwa li pwa totwa osikola yi ikalekelwa yokudheula aatumwa, yi ithanwa Osikola yOmbimbeli yoWatchtower yaGilead. Okuza ethimbo ndyono wu uka komeho, mboka ya pita mosikola ndjika oya li ya tumwa kiilongo muuyuni auhe. Omagongalo omape oga li ga totwa miilongo moka kaaga li nale, nopu na ngashingeyi iitayimbelewa yi vulithe 100 muuyuni auhe. Omathimbo nomathimbo, opwa li pwa ningwa ookersesa dhi ikalekelwa okudheula aakuluntugongalo, aalongi yehalo ewanawa miitayimbelewa nosho wo mboka ya li ya longo miilonga yokugandja uunzapo ethimbo lyu udha (ye li aakokolindjila). Oosikola dhontumba dhelongo lyi ikalekelwa lyomaludhi gi ili nogi ili odha li dha ningwa posentruma yelongo ndjoka yi li muPatterson, New York.
N. H. Knorr okwa si mo 1977. Limwe lyomomalunduluko gahugunina gopaunganeko moka a li a kutha ombinga manga inaa sa, olya li enenepeko lyOlutuwiliki, ndjoka lya li tali longo mombelewa onene muuyuni moBrooklyn. Mo 1976 iinakugwanithwa yopalelo oya li ya topolwa noya pewa ookomitiye dhi ili nodhi ili dha thikama po miilyo yOlutuwiliki, mbyoka ayihe ya li aakalele ye na owino woomvula omilongo odhindji.
IINYANYANGIDHO TAYI TAMUNUNWA MO
Ondjokonona yOonzapo dhaJehova methimbo lyonena oyu udha iiningwanima yituntula. Okuza mongundu yekonakonombimbeli limwe alike eshona muPennsylvania mo 1870, Oonzapo odhi indjipala sigo opomagongalo 90 000 lwaampono muuyuni auhe momumvo 2000. Iileshomwa ayihe tango oya li ya nyanyangidhwa koofeema dhomapindiko; opo nduno mo 1920, Oonzapo odha li dha nyanyangidhile iileshomwa yadho yimwe momatungo gokunyanyangidhila ga hehelwa. Ihe okuza mo 1927 wu uka komeho, iileshomwa oyindji noonkondo oya li ya nyanyangidhwa metungo lyokunyanyangidhila lyomala gahetatu moBrooklyn, New York, ndyoka lya li lyoWatchtower Bible and Tract Society of New York, Inc. Ndika ngashingeyi olya tamununwa mo nomatungo galwe gokunyanyangidhila nosho wo etungo mono mu na oombelewa. Opu na omatungo galwe ge li popepi moBrooklyn moka hamu kala aakalele mboka yi igandja nehalo ewanawa okulonga momahala gokunyanyangidha. Kakele kaashono, popepi naWallkill, kuumbangalantu woshitopolwa shaNew York, oku na ofaalama noshinyanyangidho yi li mehala limwe alike. Ohamu nyanyangidhwa iifo yoThe Watchtower noAwake! nohamu kunwa iikulya yimwe yaakalele mboka taya longo momahala ngoka gi ili nogi ili. Omulongi kehe gwehalo ewanawa oha mono okamaliwa okashona komwedhi opo a fute oompumbwe dhe.
IIGONGI YOPAIGWANA
Mo 1893 oshigongi shotango oshinene osha li sha ningwa muChicago, Illinois, U.S.A. Osha li sha kalwa kaantu ye thike 360, naape 70 oya li ya ninginithwa. Oshigongi shopaigwana shahugunina oshinene shimwe ashike osha li sha ningwa mOshilando New York mo 1958. Osha li sha longitha Okapale Yankee nosho wo Ehala Polo ndyoka lya li po ethimbo ndyono. Oshitsa shopombanda shaakalipo osha li 253 922; aape mbono ya li ya ninginithwa oya li 7 136. Okuza ethimbo ndyono iigongi yopaigwana oya li ya ningwa ya landulathana miilongo oyindji. Omalandulathano giigongi ga tya ngaaka oga li taga vulu okukala ga kwatela mo iigongi eyuvi limwe miilongo yomuuyuni auhe.
[Oohapu dha simana pepandja 8]
Iilonga iindhindhilikwedhi yi na ko nasha nemanguluko lyaakwashigwana
[Ethano pepandja 6]
“Oshungonangelo” oyi indjipala okuza sho pwa nyanyangidhwa iifo 6 000 melaka limwe alike sigo tayi kondo 22 000 000 momalaka ge vulithe 132
[Ethano pepandja 7]
Elunduluko enene mondjokonona yaantu
[Ethano pepandja 10 alihe]