Oohapu dhaJehova odhi na omwenyo

Omanenedhiladhilo okuza membo lyAatokolihapu

MBELA Jehova okwa li hi inyenge ngiini ngele oshigwana she she mu pilamene e tashi tameke okulongela iikalunga? Ongiini ngele sha li sha tindi lwiikando niikando okuvulika kuye e tashi mu pula owala ekwatho ngele shi li muudhigu? Nokuli nando ongaaka, mbela Jehova okwa li ngaa he shi hupitha? Embo lyAatokolihapu otali yamukula omapulo ngaka nosho wo galwe ga simanenena. Olya manwa okunyolwa komuprofeti Samuel oomvula 1100 K.E.N. lwaampono, nolya kwatela mo iiningwanima mbyoka ya li ya kutha uule woomvula 330, okuza keso lyaJosua sigo okokulangekwa po kwomukwaniilwa gwotango gwaIsrael.

Li li oshitopolwa shoohapu dhaKalunga dhi na oonkondo nenge etumwalaka lye, embo lyAatokolihapu oli na ongushu onene kutse. (Aaheberi 4:12) Omahokololo ga hokitha ga nyolwa mulyo otage tu pe euvoko okuuva ko uukwatya waKalunga. Iiyilongomwa mbyoka tatu ilongo mugo otayi koleke eitaalo lyetu notayi tu kwathele tu dhame “omwenyo gwashili,” omwenyo gwaaluhe muuyuni uupe mboka wu uvanekwa kuKalunga. (1 Timoteus 6:12, 19; 2 Petrus 3:13) Iilonga yehupitho mbyoka Jehova a longa molwoshigwana she otayi gandja euliko lyehupitho enene okuhupithwa monakuyiwa kOmwana, Jesus Kristus.

OMOLWASHIKE AATOKOLIHAPU YA LI YA PUMBIWA?

(Aatokolihapu 1:1–3:6)

Konima sho aakwaniilwa yoshilongo shaKanaan ya li ya sindwa kohi yewiliko lyaJosua, kehe ezimo lyaIsrael olya li lya mono uuthiga walyo nolya li lya pewa oshilongo. Ihe Aaisrael kaya li ya tidha mo aakalimo yomoshilongo. Okwaahe shi ninga huka okwa li lela omwigo kuIsrael.

Oluvalo ndoka lwa li lwe ya po konima yethimbo lyaJosua ‘kalwa li lwa tseya Omuwa niilonga kwe yi monithile Israel.’ (Aatokolihapu 2:10) Kakele kaashono, aantu oya li ya tsikile nokuhokana Aakanaani nosho wo okulongela iikalunga yawo. Onkee ano Jehova okwa li a gandja Aaisrael miikaha yaatondi yawo. Ihe sho omathininiko ga dhigupala, oyanamati yaIsrael oya li ya pula ekwatho kuKalunga kashili. Monkalo ndjika yopalongelokalunga, yopaulipamwe noyopapolotika otamu hokololwa ehokololo ndika li na ko nasha naapanguli mboka Jehova a li e eta po ya hupithe oshigwana she kaatondi yasho.

Omapulo gopamanyolo taga yamukulwa:

1:2, 4—Omolwashike ezimo lyaJuda lya li lya langekwa po okukala olyo ezimo lyotango tali lala oshilongo shoka lya pewa? Shito, uuthembahenda mboka owa li wa pewa ezimo lyaRuben, osheeli shaJakob. Ihe mehunganeko lye ndika ndyoka a li a hunganeke sho e li pokusa, Jakob okwa li a hunganeke kutya Ruben ka li ta kala oye gwotango, oshoka okwa li a kanitha uuthemba we wuusheeli. Simeon naLevi, mboka ya li ya katuka oonkatu dhonyanya, oya li ye na okuhalakanithwa naIsrael. (Genesis 49:3-5, 7) Onkee ano ngoka a li pondondo yokupewa uuthemba mboka, okwa li Juda, omwanamati omutine gwaJakob. Simeon, ngoka a li a yi pamwe naJuda, okwa li a pewa iitopolwa iishona yevi mbyoka ya li yi ihanena oshitopolwa ashihe oshinene shaJuda.a—Josua 19:9.

1:6, 7—Mbela omolwashike ominwe ominene dhokiikaha nodhokoompadhi dhomukwaniilwa ngoka a sindika dha li dha tetwa ko? Osha yela kutya omuntu ngoka kee na we ominwe ominene dhokiikaha nodhokoompadhi ka li ha vulu okuya kiita. Ngele omukwiita ke na ominwe ominene dhokiikaha, mbela ongiini a li ta vulu okulongitha egongamwele nenge egonga? Nokukala kee na ominwe ominene dhokoompadhi okwa li taku ke mu ningitha a kale itaa vulu okuthikama nawa.

Iiyilongomwa kutse:

2:10-12. Otu na okukala tu na elandulathano lyekonakonombimbeli ihaali faula opo ‘kaatu dhimbwe uuwanawa washa mboka Jehova e tu ningila.’ (Epsalmi 103:2) Aavali oya pumbwa okuthindila oshili yOohapu dhaKalunga momitima dhaanona yawo.—Deuteronomium 6:6-9.

2:14, 21, 22. Jehova okwa li e etha iinima iiwinayi yi ningilwe oshigwana she ihaashi vulika, nelalakano oku shi geyela, oku shi pukulula noku shi inyengitha shi galukile kuye.

JEHOVA OKWA TULA PO AATOKOLIHAPU

(Aatokolihapu 3:7–16:31)

Ehokololo lihokitha lyiilonga yaatokolihapu olya li lya tameke nokuhulitha po kwaOtniel okupangelwa kwaIsrael kwuule woomvula hetatu komukwaniilwa gwaMesopotamia. Molwokulongitha ompangela ye kee na uumbanda, omupanguli Ehud okwa li a dhipaga Eglon, omukwaniilwa Omumoab o ondoka. Ependa Samgar olya li lya dhipaga olyo alike Aafilisti 600 mokulongitha ondhimbo yoongombe. Mokutsuwa omukumo kuDebora, ngoka a li ta longo e li omuprofeti omukiintu, nokekwatho lyaJehova, Barak netanga lye inaali homata nokomayego lyaalumentu omayovi omulongo oya li ya sindi etanga enankondo lyaSisera. Jehova okwa li a tula po Gideon nokwa li e mu pe nosho wo aalumentu ye 300 esindano okusinda Aamidian.

Okupitila muJefta, Jehova okwa li a hupitha Israel kAayamoni. Toola, Jair, Ibsan, Elon naAbdon nayo oya li wo yamwe yomaalumentu 12 mboka ya li aatokolihapu yaIsrael. Ethimbo lyAatokolihapu olya hulile muSimson, ngoka a li a kondjo nAafilisti.

Omapulo gopamanyolo taga yamukulwa:

4:8—Mbela omolwashike Barak a li a pula ta tsitsimike opo omuprofeti omukiintu Debora a ye pamwe naye kelondo lyiita? Osha yela kutya Barak okwa li e uvite inaa gwana okuya oye awike a ka kondje netanga lyaSisera. Ngele omuprofeti omukiintu e li pamwe naye osha li she mu shilipalekulula nosho wo aalumentu ye kutya Kalunga oye a li te ya wilike nosha li tashi ke ya pa einekelo. Ano okupula kwaBarak ta tsitsimike opo Debora a ye pamwe naye, kakwa li taku ulike uunkundi, ihe eitaalo lya kola.

5:20—Oonyothi odha li dha kondjo ngiini megulu molwaBarak? Ombimbeli itayi popi ngele shoka osha li sha kwatela mo ekwatho lyaayengeli, okukoloka kwoonyothi pombanda hoka kwa li kwa talika ko ku li endhindhiliko lyoshiponga kaanandunge yaSisera, nenge tashi vulika omahunganeko ngoka ga li ga hunganekelwa Sisera kaayanekelinyothi ngoka ga li giifundja. Ihe kapu na omalimbililo kutya Kalunga oye a li e ya katukile oonkatu yontumba.

7:1-3; 8:10—Mbela omolwashike Jehova a li a ti kutya aalumentu yaGideon 32 000 oya li oyendji noonkondo moku ka kondjitha etanga lyaatondi ye li 135 000? Shoka osha li molwaashoka Jehova okwa li a pe Gideon naantu ye esindano. Kalunga ka li a hala ya dhiladhile kutya oya sindi Aamidian koonkondo dhawo yene.

11:30, 31—Jefta sho a ningi euvaneko lye, okwa li ta dhiladhila mbela eyambo lyomuntu? Omadhiladhilo ga tya ngaaka oga li kokule nomadhiladhilo gaJefta, molwashoka Ompango oya ti: “Mwaa monikile mungoye nando omuntu, te endithile momulilo omwana omumati nenge omukadhona.” (Deuteronomium 18:10) Ihe Jefta okwa li ta popi omuntu hashinamwenyo. Iinamwenyo mbyoka tayi opalele okuyambwa otashi vulika ya li ihaayi kala momagumbo gAaisrael. Okuyamba eyambo lyoshinamwenyo kakwa li taku ka kala oshinima inaashi ningwa nale. Jefta okwa li a tseya kutya ngoka ta zi megumbo lye e mu tsakaneke otashi vulika a kale omwanakadhona. Ngoka ta zi mo tango okwa li e na okuyambwa po ‘omayambo’ nomuntu ngoka okwa li e na okwiigandja mokulongela Jehova awike metsali lye.

Iiyilongomwa kutse:

3:10. Okupondola mokulalakanena iinima yopambepo inaku ikolelela kuunongo wopantu, ihe okombepo yaJehova.—Epsalmi 127:1.

3:21. Ehud okwa li a longitha egonga nuukeka nosho wo nuulaadhi. Otu na okukala tu na uunkulungu mokulongitha ‘egongamwele lyombepo nokutya, oohapu dhaKalunga.’ Shoka otashi ti kutya otu na okulongitha Omanyolo nuulaadhi muukalele wetu.—Aaefeso 6:17; 2 Timoteus 2:15.

6:11-15; 8:1-3, 22, 23. Eishonopeko lyaGideon otali tu longo iiyilongomwa itatu ya simana: (1) Uuna tatu pewa uuthembahenda wiilonga yontumba, otu na okuukitha eitulomo lyetu koshinakugwanithwa shoka sha kwatelwa mo muyo, pehala lyokudhiladhila etumbalo nenge ondondo ya simana ndjoka to vulu okupewa omolwiilonga mbyoka. (2) Ngele u li pamwe naamboka ye hole okutamanana, oshi li pandunge okuulika eishonopeko. (3) Eishonopeko otali tu gamene kaatu kale tatu ipula unene noondondo.

6:17-22, 36-40. Tse wo otu na okukala twa kotoka notwaa ‘itaale shaa oohapu dha nwethwa mo.’ Pehala lyaashono, otwa pumbwa ‘okukonakona oohapu dha nwethwa mo ngele odha za muKalunga.’ (1 Johannes 4:1, NW) Omukuluntugongalo omupe Omukriste ota ningi nawa ngele ta pula omayele komukuluntugongalo ngoka e na owino oundji, opo a kale nuushili kutya omayele ngoka a hala okugandja oga kankamena lelalela kOohapu dhaKalunga.

6:25-27. Gideon okwa kala a kotoka opo kaa geyithe mboka taye mu pataneke. Uuna tatu uvitha onkundana ombwanawa, otu na okukala twa kotoka kaatu uvithe nayi yalwe inaashi pumbiwa okupitila momukalo moka tatu popi.

7:6. Shi na ko nasha nokulongela Jehova, otwa pumbwa okukala twa fa aalumentu yaGideon 300, twa tonata notwa kotoka.

9:8-15. Inashi nika tuu uugoya okukatuka nuuntsa nosho wo okukala wa hala ondondo ya simana nenge oonkondopangelo!

11:35-37. Nopwaahe na omalimbililo, oshiholelwa oshiwanawa shaJefta osha li oshinima shoka sha kwathele omwanakadhona a kale e na eitaalo lya kola nosho wo ombepo yeiyambo. Aavali nena otaya vulu okutulila po aanona yawo oshiholelwa sha tya ngaaka.

11:40. Okupandula gumwe ngoka e na ombepo yokulonga nehalo ewanawa miilonga yaJehova otaku mu tsu omukumo.

13:8. Mokulonga aanona yawo, aavali oye na okugalikana Jehova omolwewiliko nokulandula omalombwelo ge.—2 Timoteus 3:16.

14:16, 17; 16:16. Okuthininika gumwe mokulila nokutsitsimika otaku vulu okuyona po ekwatathano.—Omayeletumbulo 19:13; 21:19.

OMAPUKO GALWE MUISRAEL

(Aatokolihapu 17:1–21:25)

Oshitopolwa shahugunina shembo lyAatokolihapu oshi na omahokololo gaali ga tongomana. Lyotango oli na ko nasha nomulumentu gwedhina Mika, ngoka a li i ihongele oshikalunga megumbo lye nokwa li a tula miilonga Omulevi a kale omusaaseri gwe. Konima yokuhanagula po oshilando Lais, nenge Lesem, Aadan oya tungu oshilando shawo noye shi luku Dan. Mokulongitha oshikalunga shaMika nomusaaseri gwe, oya toto po elongelokalunga lilwe lyi ili muDan. Osha yela kutya Lais osha li sha kwatwa ko manga Josua inaa sa.—Josua 19:47.

Oshiningwanima oshitiyali osha li sha ningwa nziya konima yeso lyaJosua. Eyono enene li na ko nasha nomilalo ndyoka lya li lya ningwa kaalumentu Aabenjamin moshilando shaGibea konyala olya li lya fala mehanagulo lyothiluthilu lyezimo lyaBenjamin, nopwa li pwa hupu owala aalumentu 600. Ihe elongekidho tali longo olya li lye ya pe ompito okwiikongela aakiintu, nomwaalu gwawo ogwa li gwi indjipala gu thike konyala paakwiita 60 000 pethimbo lyepangelo lyaDavid.—1 Ondjalulahokololo 7:6-11.

Omapulo gopamanyolo taga yamukulwa:

17:6; 21:25—Ngele ‘kehe gumwe okwa li a longo shoka she mu opalela,’ mbela shoka osha li sha humitha komeho uukakombwiilitha? Hasho, molwaashoka Jehova okwa li a ningi po omasiloshimpwiyu ga gwanenena okuwilika oshigwana she. Okwa li e shi pe Ompango naasaaseri oku shi longa oondjila dhe. Okupitila muUrim naTummim, omusaaseri omukuluntu okwa li a vulu okupula omayele kuKalunga shi na ko nasha niinima ya simana. (Eksodus 28:30) Oshilando kehe osha li shi na wo aalumentu aakuluntu ya gwana okugandja omayele omawanawa. Uuna Omuisrael a longitha omasiloshimpwiyu ngoka, oga li ga wilike nawa omaiyuvo ge. Okulonga kwe “shoka she mu opalela” momukalo ngoka okwa li kwe eta uuwanawa. Mepingathano naashoka, ngele omuntu i ipwililikile Ompango e ta ningi omatokolo ge mwene ge na ko nasha neihumbato nosho wo nelongelokalunga, oshilanduliko osha li oshiwinayi.

20:17-48—Omolwashike Jehova a li e etha Aabenjamin ya sinde omazimo galwe lwaali nonando Aabenjamin oyo ya li ye na okugeelwa? Mokweetha omazimo omadhiginini ogo ga hepekwe tango unene, Jehova okwa li e ya makele okumona ngele oya tokola toko okukutha po thiluthilu uuwinayi muIsrael.

Iiyilongomwa kutse:

19:14, 15. Okwaahe na ehalo kwAagibea okuyakula aayenda okwa li taku ulike kutya kaya li ye na omikalo. Aakriste otaya kumagidhwa ye ‘edhilile oondjendi.’—Aaroma 12:13.

Ehupitho oli li pokuya

Masiku, Uukwaniilwa waKalunga u na Kristus Jesus oye omupangeli otau ka hanagula po uuyuni mbuka wa kolokosha nokweetela aayuuki naakaanambudhi ehupitho enene. (Omayeletumbulo 2:21, 22; Daniel 2:44, KB) ‘Aatondi yaJehova ayehe ye na okuteka po. Oonaku mu hola oyo ya fa okusha kwetango, uuyelele walyo.’ (Aatokolihapu 5:31) Natu kale ano yamwe yomwaamboka ye hole Jehova mokutula miilonga shoka twi ilonga membo lyAatokolihapu.

Oshili ya simana ndjoka yu ulikwa iikando niikando momahokololo gAatokolihapu oyo ndjika: Okuvulika kuJehova ohaku eta omalaleko nuuyamba ogendji, omanga okwaavulika haku eta iilanduliko ya nika oshiponga. (Deuteronomium 11:26-28) Inashi simana tuu tu ‘vulike noomwenyo dhetu’ kehalo lyaKalunga lya hololwa!—Aaroma 6:17; 1 Johannes 2:17.

[Enyolo lyopevi]

[Okaalita pepandja 9]

(Opo wu mone nkene uuyelele wu unganekwa, tala oshileshomwa)

‘Omuwa sho a tula po oonakutokola yoohapu, oyo noye ya yuululula momayugo gaayugi.’—Aatokolihapu 2:16

AATOKOLIHAPU

1. Otniel (gwomezimo lyaManasse)

2. Ehud (gwomezimo lyaJuda)

3. Samgar (gwomezimo lyaJuda)

4. Barak (gwomezimo lyaNaftali)

5. Gideon (gwomezimo lyaIsaskar)

6. Toola (gwomezimo lyaManasse)

7. Jair (gwomezimo lyaManasse)

8. Jefta (gwomezimo lyaGad)

9. Ibsan (gwomezimo lyaAsser)

10. Elon (gwomezimo lyaSebulon)

11. Abdon (gwomezimo lyaEfraim)

12. Simson (gwomezimo lyaJuda)

DAN

MANASSE

NAFTALI

ASSER

SEBULON

ISASKAR

MANASSE

GAD

EFRAIM

DAN

BENJAMIN

RUBEN

JUDA

[Ethano pepandja 10]

Oshiilongomwa shini wi ilongo mokupula kwaBarak ta tsitsimike opo Debora a ye pamwe naye kelondo lyiita?