Uukwaniilwa waKalunga owo shike?

OSHIKE sha li enenedhiladhilo lyeuvitho lyaJesus? Pakupopya kwaJesus mwene, olya li Uukwaniilwa waKalunga. (Lukas 4:43, KB) Sho aantu ya li taya pulakene kuye, oya li yu uvu lela nkene ta popi olundji kombinga yUukwaniilwa mboka. Mbela osha li she ya limbilika nenge she ya ngwangwaneka? Mbela oya li ye mu pula kutya Uukwaniilwa mboka oshike? Aawe. MOmavaangeli inamu nyolwa omapulo ga tya ngaaka. Mbela Uukwaniilwa waKalunga owa li oshinima sha tseyika kaantu mboka?

Oshoshili kutya Omanyolo gonale ngoka Aajuda ya li ya tala ko ge li omayapuki oga hokolola Uukwaniilwa mboka nogu ulike momautumbulilo gi iwetikile noge li paushili kutya owo shike notawu ka ninga shike. Kunena otatu vulu okwiilonga nokuli oshindji kombinga yUukwaniilwa komukalo gwa faathana, sha hala okutya, mokulongitha Ombiimbeli. Natu taleni iinima iheyali mbyoka Ombiimbeli tayi tu longo kombinga yUukwaniilwa. Yotango ine oya li tayi vulu okumonika kAajuda yopethimbo lyaJesus noyopethimbo lyonale. Iyali ya landula ko oya li ya hololwa kuKristus nenge kaayapostoli ye methelemumvo lyotango. Shahugunina oshi li shi iwetikile nawa methimbo lyetu.

1. Uukwaniilwa waKalunga owo epangelo lyolela ndyoka tali kala sigo aluhe. Ehunganeko lyotango lyOmbiimbeli otali popi kutya Kalunga ota ka tuma omuhupithi a hupithe aantu mboka aadhiginini. Omuhupithi ngoka hi ithanwa “oluvalo,” ota ka kutha po omaupyakadhi agehe ngoka ga tameke okuza puunashipotha waAdam, Eva nosho wo Satana. (Genesis 3:15) Konima yethimbo ele, omukwaniilwa omudhiginini David okwa li a lombwelwa sha shinyanyudha shi na ko nasha ‘noluvalo’ ndoka, sha hala okutya, Mesiasa. Ota ka kala omukwaniilwa gwUukwaniilwa waKalunga. Uukwaniilwa mboka otawu ka kala inaawu fa omaukwaniilwa galwe. Otawu ka kala sigo aluhe.—2 Samuel 7:12-14.

2. Uukwaniilwa waKalunga otawu ka hulitha po omapangelo agehe gopantu. Omuprofeti Daniel okwa li a mono memoniko nkene omapangelo omanankondo guuyuni ga landulathana okuza pethimbo lye sigo opethimbo lyetu. Tala kwaashoka shinyanyudha noonkondo sha li tashi ka ningwa pehulilo lyemoniko ndyoka. Ombiimbeli otayi ti: “Pomasiku gaakwaniilwa mbeyaka [yahugunina yopantu] Kalunga nguka komegulu ota ka dhika uukwaniilwa itaawu ka teka po sigo aluhe, nepangelo lyawo itali ka gandjwa koshigwana shilwe. Ihe owo otawu ka nyanyagula notawu ka teyagula omaukwaniilwa agehe noku ga hulitha po, ihe wo wene tawu ka kala sigo aluhe.” Onkee ano omaukwaniilwa agehe nenge omapangelo guuyuni mbuka otaga ka hanagulwa po sigo aluhe pamwe nokuhinga iita kwago, okuthininika aantu kwago nokuyonuka kwago. Ngaashi ehunganeko lyaDaniel tali ulike, masiku Uukwaniilwa waKalunga otawu ka pangela ombanda yevi alihe. (Daniel 2:44, 45, KB) Oshili yo yene oyo kutya otawu ka kala owo awike epangelo ndyoka tali ka kala kombanda yevi.a

3. Uukwaniilwa waKalunga otawu ka hulitha po iita, omikithi, ondjala neso nokuli. Omahunganeko gOmbiimbeli gatuntula otagu ulike shoka Uukwaniilwa waKalunga tawu ka ninga huka kombanda yevi. Epangelo ndyoka otali ka ninga shoka omapangelo gopantu inaaga vula okuninga nando nenge itaaga vulu oku ka ninga monakuyiwa. Dhiladhila owala iikondjitho ayihe yomiita ya hanagulwa po sigo aluhe! Episalomi 46:9 otali ti: “Ota hulitha po omalugodhi kombanda yevi alihe.” Oondohotola, iipangelo nomikithi itayi ka kala po we. Jesaja 33:24 ota ti: “Kape na nando ogumwe muSion ta ka tya: ‘Otandi ehama.’” Itapu ka kala we ondjala, ompumbwe yiikulya nomanyutu. Episalomi 72:16 otali ti: “Moshilongo namu kale eloolo lyiilya.” Itapu ka kala we omafumviko, okulala omitanda, omayendo, ookila dhomidhimba nenge okunika oluhodhi hoka haku endele pamwe niinima mbyoka. Eso ndyoka li li omutondi gwetu omunene otali ka hulithwa po lwahugunina. Kalunga “ota ka hanagula po eso sigo aluhe. Ota ka theta po omahodhi momeho gaayehe.”—Jesaja 25:8.

4. Uukwaniilwa waKalunga owu na Omupangeli ngoka a hogololwa kuKalunga. Mesiasa ini ilangeka po ye mwene a kale omupangeli noina hogololwa kaantu inaaya gwanenena. Okwa hogololwa kuJehova Kalunga mwene. Omadhinasimaneko Mesiasa naKristus otaga ti kutya okwa hogololwa kuKalunga. Go agehe gaali otaga ti kutya “Omugwayekwa.” Onkee ano Omukwaniilwa nguka okwa gwayekwa kuJehova nenge oshilonga she shi ikalekelwa okwe shi pewa kuYe. Kombinga ye Kalunga ota ti: “Omupiya gwandje oye nguka, ngoka tandi mu nkondopaleke—oye tuu ngoka nde mu hogolola, omuntu nde mu hokwa. Onde mu udhitha ombepo yandje oye ota ka uthila iigwana ayihe nuuyuuki.” (Jesaja 42:1; Mateus 12:17, 18) Mbela opu na gumwe a tseya nawa e vule Omushiti gwetu kutya otwa pumbwa Omupangeli a tya ngiini?

5. Omupangeli gwUukwaniilwa waKalunga okwe shi ulika montaneho yaantu ayehe kutya okwa gwana okupangela. Jesus Omunasaret oye Mesiasa omuuvanekwa. Okwa li a valwa mezimo ndyoka Kalunga a hogolola. (Genesis 22:18; 1 Ondjalulo 17:11; Mateus 1:1) Sho a li kombanda yevi, okwa li a gwanitha omahunganeko ogendji kombinga yaMesiasa ngoka ga li ga nyolwa omathelemimvo ga piti. Okwa li wo a popiwa okuza megulu kutya oye Mesiasa. Ngiini mbela? Kalunga okwa li e shi popi okuza megulu kutya oye Omwana; aayengeli oya li yu ulike kutya oye Mesiasa omuuvanekwa; nokwa li a longo iikumithalonga mbyoka sha yela kutya okwa li e yi longo koonkondo dhaKalunga. Olundji iikumithalonga mbyoka okwa li e yi longo nokuli montaneho yoonzapo omathele nenge omayovi.b Jesus okwa li e shi ulike iikando niikando kutya ota ka kala Omuleli a tya ngiini. Ka li owala e na oonkondo dhokukwathela aantu, ihe okwa li wo e na ehalo oku shi ninga. (Mateus 8:1-3) Kakwa li i ihole ye mwene, okwa li e na ondjaalela, omulaadhi nomwiifupipiki. Ondjokonona yonkalamwenyo ye yokombanda yevi omo yi li mOmbiimbeli opo aantu ayehe ye yi leshe.

6. Aantu ye li 144 000 otaya ka pangela pamwe naKristus mUukwaniilwa waKalunga. Jesus okwa li a popi kutya opu na yalwe mboka taya ka pangela pamwe naye megulu, mwa kwatelwa aayapostoli ye. Ongundu ndjoka okwa li e yi ithana “oshigunda oshishona.” (Lukas 12:32) Konima yethimbo, omuyapostoli Johannes okwa li a lombwelwa kutya oshigunda shoka oshishona otashi ka kala sha thikama po maantu ye li 144 000. Otaya ka kala ye na iilonga yinyanyudha megulu yokupangela pamwe naKristus ye li aakwaniilwa naasaaseri.—Ehololo 5:9, 10; 14:1, 3.

7. Uukwaniilwa waKalunga mboka tawu pangele ngashingeyi megulu, owi ilongekidha okupangela ombanda yevi ayihe. Oshili ndjika ontiheyali oyo yimwe yinyanyudha noonkondo ndjoka tatu vulu okwiilonga kombinga yayo. Ombiimbeli otayi gandja omauliko ogendji kutya Jesus okwa pewa oonkondopangelo a kale Omukwaniilwa megulu. Ngashingeyi omo e li ta pangele, nota ka tameka masiku okupangela ombanda yevi ayihe nokugwanitha omahunganeko ga dhenga mbanda ngoka twa tumbula metetekelo. Ihe ongiini tatu vulu okukala nuushili kutya Uukwaniilwa waKalunga otawu pangele ngashingeyi? Nuunake tawu ka tameka okupangela kombanda yevi?

[Omanyolo gopevi]