Otu li momathimbo omadhigu ngashingeyi
OMBIIMBELI oya hunganeka nale kutya aantu otaya ka kala ‘momathimbo omadhigu.’ Otayi hokolola ethimbo ndyoka kutya olyo “omasiku omahugunina.” (2 Timoteus 3:1-5, OB-1954; 2 Petrus 3:3-7) Jesus Kristus okwa li a popi ethimbo lya faathana naandyoka sho a li a pulwa kaalongwa ye shi na ko nasha “nehulilo lyuuyuni.” (Mateus 24:3) Mbela otu li ngashingeyi momasiku gahugunina? Yelekanitha shoka Ombiimbeli ya hunganeka naashoka sha kundanekwa oomvula opo dha zi ko tashi landula e to ya pehulithodhiladhilo kungoye mwene.
Shoka sha hunganekwa kOmbiimbeli: iita muuyuni auhe—Lukas 21:10; Ehololo 6:4.
Shoka sha kundanekwa oomvula opo dha zi ko: “Omaso ngoka ge etithwa kiita methelemumvo eti-20 oga li ogendji lwiikando itatu ge vule gomomathelemimvo agehe ga tetekele okuza pethimbo lyevalo lyaKristus.”—Worldwatch Institute.
Shoka sha hunganekwa kOmbiimbeli: ondjala nomikithi—Lukas 21:11; Ehololo 6:5-8.
Shoka sha kundanekwa oomvula opo dha zi ko: Mo 2004 opwa li pwa tengenekwa kutya aantu omamiliyona 863 kombanda yevi oya li taya si ondjala, ye vulithe po nomamiliyona 7 pwaamboka ya li ya sa ondjala mo 2003.—Ehangano lyIigwanahangano lyiikulya nolyuunamapya nuuniimuna.
Aantu ye thike pomamiliyona eyuvi lwaampono ohaya kala moombashu, omamiliyona omayuvi 2,6 kaye na uundjugo hawu pombwa noondoloma dhiiyagaya nomamiliyona eyuvi 1,1 kaye na omeya ga yela gokunwa.—Worldwatch Institute.
Mo 2005 aantu omamiliyona 500 oya li ya kwatwa komalaria, omamiliyona 40 oya li ya kwatwa ko-HIV-AIDS naantu emiliyona 1,6 oya li ya si ko-TB.—Ehangano lyuundjolowele lyuuyuni.
Shoka sha hunganekwa kOmbiimbeli: okuyonagula evi—Ehololo 11:18.
Shoka sha kundanekwa oomvula opo dha zi ko: “Shono sha ningwa kaantu osha ningitha iinamwenyo niimeno yomaludhi ogendji gi ili nogi ili yi kale yi li pokuhula po.” “Konyala iititatu iyali [66%] yiinima mbyoka hayi ningwa paunshitwe okukaleka po onkalamwenyo yaantu otayi ende tayi shonopala muuyuni auhe.”—Millennium Ecosystem Assessment.
“Oohasa ndhoka dhe etithwa kiilonga yaantu odha ningitha onkalo yombepo yi kale ya pupyala noonkondo shoka tashi ka kala shi na iilanduliko ya nika oshiponga.”—NASA, Goddard Institute for Space Studies.
Shoka sha hunganekwa kOmbiimbeli: evaangeli lyUukwaniilwa waKalunga otali uvithwa muuyuni auhe—Mateus 24:14, KB; Ehololo 14:6, 7.
Shoka sha kundanekwa oomvula opo dha zi ko: Mo 2007, Oonzapo dhaJehova 6 957-854 odha li dha longitha oowili dhi vulithe pomamiliyona eyuvi 1,4 okuuvitha onkundana ombwanawa yUukwaniilwa waKalunga miilongo 236.—2008 Yearbook of Jehovah’s Witnesses.
Ngaashi sha popiwa metetekelo, Ombiimbeli oya hunganeka kutya nonando opu na oonkundana odhindji oombwinayi, opu na wo omatompelo gokukala netaloko li li nawa. Jesus okwa popya kombinga ‘yonkundana ombwanawa’ yUukwaniilwa waKalunga. Uukwaniilwa waKalunga oshike? Omolwashike tawu ningitha aantu ya kale ye na etegameno kutya otapu ka kala onakuyiwa ombwanawa? Uukwaniilwa waKalunga otawu ka lundulula ngiini onkalamwenyo yoye?
[Oohapu dha simana pepandja 5]
Ombiimbeli oya hunganeka nale oonkalo dhuuyuni ndhoka tu wete kunena