Masiku evi otali ningi oparadisa

“Tate yetu, ngu u li megulu: Edhina lyoye nali yapulwe, [uukwaniilwa woye nawu ye, KB], ehalo lyoye nali gwanithwe kombanda yevi wo ngaashi megulu.”—Mateus 6:9, 10.

EGALIKANO ndika lya tseyika nawa koyendji olyo Tate Yetu nenge Egalikano lyOmuwa gwetu, otali pe aantu etegameno. Ngiini?

Ngaashi Egalikano lyOmuwa tali shi ulike, Uukwaniilwa waKalunga otawu ka ningitha ehalo lyaKalunga li gwanithwe kombanda yevi ngaashi megulu. Ehalo lyaKalunga olyo okuninga ishewe evi Oparadisa. (Ehololo 21:1-5) Uukwaniilwa waKalunga owo naanaa shike, nongiini tawu ka ninga ishewe evi Oparadisa?

Epangelo lyolela

Uukwaniilwa waKalunga owo epangelo lyolela. Opo epangelo kehe li ye miilonga, olya pumbwa okukala li na aapangeli, oompango naalelwa. Mbela Uukwaniilwa waKalunga owa gwanitha po iitegelelwa mbika? Tala nkene Ombiimbeli tayi yamukula omapulo gatatu taga landula:

Oolye aapangeli mUukwaniilwa waKalunga? (Jesaja 33:22, OB-1954) Jehova Kalunga okwa langeka po Omwana, Jesus Kristus, a kale omupangeli gUukwaniilwa mboka. (Mateus 28:18) Kohi yewiliko lyaJehova, Jesus okwa hogolola omwaalu gwa ngambekwa gwaantu okuza “momaludhi agehe, momalaka agehe, miigwana ayihe nomomihoko adhihe” mboka taya ka pangela pamwe naye “ombanda yevi” ye li aakwaniilwa.—Ehololo 5:9, 10, yelekanitha NW.

Oompango dhini Uukwaniilwa waKalunga wa tulila po aalelwa yawo ya vulike kudho? Dhimwe dhomoompango nenge iipango otayi pula aalelwa yawo ya katuke oonkatu dhokondandalunde. Jesus okwa li a popi oshipango shimwe shomuyo shoka sha simana noonkondo a ti: “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango. Oshitiyali shi thike pusho osho shika: ‘Hola mukweni ngaashi ngoye wi ihole mwene.’”—Mateus 22:37-39.

Iipango yimwe otayi pula opo aalelwa yUukwaniilwa waKalunga yaaha ninge iinima yontumba. Pashiholelwa, Ombiimbeli otayi popi oohapu ndhika dha yela tadhi ti: “Inamu ipukitha. Aantu mboka aaholume, aasimaneki yiimenka, aahondeli, omashenge naakali nomashenge, aafuthi aanalwiho, oonkolwi, aasheki naayugi, kaku na nando ogumwe gwomaantu ya tya ngeyi ta ka ya [muukwaniilwa waKalunga, KB].”—1 Aakorinto 6:9, 10.

Oolye aalelwa yUukwaniilwa waKalunga? Jesus okwa li a faathanitha aalelwa yUukwaniilwa waKalunga noonzi a ti: “Odho notadhi ka uva ewi lyandje e tadhi ka ninga oshigunda shimwe nodhi na omusita gumwe.” (Johannes 10:16) Opo omuntu a kale omulelwa gUukwaniilwa waKalunga, ke na owala okupopya kutya ota landula Omusita Omwaanawa, Jesus, ihe oku na wo okulonga shoka te mu lombwele. Jesus okwa ti: “Hakehe ngoka ti ithana ndje ‘Omuwa, Omuwa’, ta yi [muukwaniilwa womegulu, KB], aawe, oye tuu ngoka ta gwanitha ehalo lyaTate yomegulu.”—Mateus 7:21.

Onkee ano, mboka ye li aalelwa yUukwaniilwa waKalunga ohaya longitha nohaya simaneke edhina lyaKalunga, Jehova, ngaashi naanaa Jesus a ningi. (Johannes 17:26) Ohaya vulika kelombwelo lyaJesus lyokulonga aantu shi na ko nasha ‘nevaangeli lyuukwaniilwa.’ (Mateus 24:14, KB; 28:19, 20) Ohayu ulukilathana ohole yashili.—Johannes 13:35.

Otawu ka ‘hanagula po mboka taa yonagula po evi’

Oonkalo dhuuyuni kunena otadhi ulike kutya Uukwaniilwa waKalunga masiku otawu ke eta omalunduluko omanene kombanda yevi. Otu shi shi ngiini? Oomvula omayuvi gaali dha piti, Jesus okwa hokolola endhindhiliko lya kwatela mo iinima oyindji mbyoka tayi ulike kutya “uukwaniilwa waKalunga owu li popepi.” (Lukas 21:31, KB) Ngaashi shu ulikwa moshitopolwa sha tetekele, iinima yomendhindhiliko ndyoka oyi iwetikile ngashingeyi muuyuni auhe.

Oshike tashi landula ko? Jesus okwa li a yamukula a ti: “Otaku kala uudhigu uunene inaau kala ko nale okuza ketameko lyuuyuni sigo ongashingeyi, nongaashi itau ya we.” (Mateus 24:21) Uudhigu mboka itawu ke etithwa kaantu. Pehala lyaashono, Kalunga oye ta ka katuka onkatu ‘okuhanagula po mboka taa yonagula po evi.’ (Ehololo 11:18) Aakolokoshi mboka iilonga yawo yokwiihola konyala ya yona po evi, “otaa ka kombwa mo moshilongo.” Ihe aakaanashipwe mboka taya longele Kalunga momukalo ngoka a hokwa, ‘otaa thigala mo.’—Omayeletumbulo 2:21, 22.

Jehova Kalunga oku na etompelo lya kola lyokukatuka onkatu ya tya ngaaka. Omolwashike? Tala eudhi ndika: Natu tye owu na ehala hamu kala aantu haye ku futu. Yamwe yomoonakukalamo ohayi ihumbata nawa naanambili; ohaye ku futu nohaye li sile oshimpwiyu. Ihe yalwe yomoonakukalamo ihayi ihumbata nawa noyi ihole, ohaya tindi oku ku futa nohaya teyagula iinima mehala moka. Nonando owu ya londodhe lwiikando, otaya tsikile owala nokwiihumbata nayi. Oto ka ninga po shike? Wu li mwene gwalyo, oto ka tidha mo oonakukalamo mboka hayi ihumbata nayi.

Sha faathana, Jehova Kalunga, Omushiti gwevi nogwiinima ayihe yi li ko, oku na uuthemba okutokola kutya oolye ta ka pitika ya kale ko. (Ehololo 4:11) Jehova okwa popya kutya elalakano lye olyo okuhanagula po aakolokoshi kombanda yevi ndika mboka tayi ipwililike okulonga ehalo lye notayi idhopo miinima yayalwe.—Episalomi 37:9-11.

Oparadisa ya tungululwa

Masiku Uukwaniilwa waKalunga mewiliko lyaJesus Kristus otawu ka pangela kombanda yevi. Jesus okwi ithana etameko ndika epe kutya olyo ‘uuyuni uupe.’ (Mateus 19:28) Oonkalo otadhi ka kala ngiini? Tala omauvaneko gOmbiimbeli taga landula:

Episalomi 46:9. ‘Ota hulitha po omalugodhi kombanda yevi alihe.’

Jesaja 35:1. ‘Ombuga nomalondo otaga ka nyanyukwa, ontale otayi ka tundulukwa nokutemuna oongala.’

Jesaja 65:21-23. ‘Aahogololwa yandje otaya ka kala ko olule nokunyanyukilwa iilonga yiikaha yawo yene. Itaa ki ihepeka owala, noyana itaye ke ya valela omupya.’

Johannes 5:28, 29. ‘Ethimbo otali ya, uuna oonakusa ayehe mboka ye li moombila, taa ka uva ewi [lyaJesus]. Oyo notaa ka za mo.’

Ehololo 21:4. ‘[Kalunga] ota ka theta po omahodhi agehe momeho gawo. Oko noitaku kala we eso, oluhodhi, [elilo] nenge uuwehame.’

Omatompelo ge shi okwiitaalwa

Mbela owi itaala ngaa omauvaneko gOmbiimbeli? Ombiimbeli oya hunganeka kutya oyendji itaye ke gi itaala tayi ti: “Pomasiku gopehulilo otaku ka holoka [aasheki, OB-1954] taa endithwa kuuhalu wawo . . . taa ti: ‘Oye oku uvaneke tuu, ta ka galuka? Oku li peni? Ootate oya sa nale, ihe iinima ayihe oyi li, ngaashi ya kala shito okuza keshito lyuuyuni.’” (2 Petrus 3:3, 4) Ihe aasheki mboka oya puka thiluthilu. Tala owala omatompelo gane kutya molwashike to vulu okwiitaala shoka sha popiwa kOmbiimbeli:

(1) Nale Kalunga okwa katukilile onkatu aakolokoshi kombanda yevi. Eyelu lyopethimbo lyaNoowa oli li oshiholelwa shimwe sha tongomana.—2 Petrus 3:5-7.

(2) Oohapu dhaKalunga odha hunganeka naanaa oonkalo ndhoka dhi li kombanda yevi kunena.

(3) Iinima ayihe kayi li “ngaashi ya kala shito okuza keshito lyuuyuni.” Evi otali mono iihuna momukalo inaagu monika nando onale, pankalathano, pamikalo nopamudhingoloko.

(4) ‘Evaangeli lyuukwaniilwa’ otali uvithwa ngashingeyi muuyuni auhe, shoka tashi ulike kutya masiku ‘ehulilo otali ya.’—Mateus 24:14, KB.

Oonzapo dhaJehova otadhi ku pula wu konakone Oohapu dhaKalunga, Ombiimbeli, pamwe nadho opo wi ilonge oshindji kombinga yetegameno lyomwenyo gwaaluhe kohi yepangelo lyUukwaniilwa waKalunga. (Johannes 17:3) Aantu oya tegelela lela onakuyiwa ombwanawa. Ethimbo ewanawa oli li pokuya. Mbela omo to ka kala?

[Oohapu dha simana pepandja 7]

Mboka taya ti kutya iinima otayi ka kala yi li ngaashi ya kala shito oya puka thiluthilu

[Ethano pepandja 8]

Mbela omo to ka kala?