Tate gwomegulu owu mu shi?

TATE gwoye owu mu shi nawa ngiini? Epulo ndika otashi vulika wu kale wu uvite itaali vulu okupulwa ngele owa putukila muukwanegumbo mu na ohole. Otashi vulika wu yamukule to ti: ‘Ondi mu shi nawa lela.’ Eeno, omuntu kehe oku shi shoka he e hole naashoka e yele, nkene hi inyenge moonkalo dhontumba nonkene ha sile oshimpwiyu uukwanegumbo we.

Ihe nonando ongaaka, otashi vulika pwa li ethimbo limwe ndyoka tate gwoye a li monkalo ndjoka inoo tegelela. Pashiholelwa, omwanamati otashi vulika a kale a tala ko he e li omumweni nomunambili. Ihe ngele opwa holoka oshiponga ombadhilila ota mono kutya nani he ota vulu okugamena uukwanegumbo we.

Ongiini kombinga yOmushiti gwetu? Otatu lombwelwa shi na ko nasha naye taku ti: “Muye tse otu na omwenyo, tatu inyenge notu li po.” (Iilonga 17:28) Okwe tu pa omwenyo, molwaashoka oye He yaanamwenyo ayehe. (Jesaja 64:8) Otashi vulika nangoye osho wu uvite ngaaka kombinga yaKalunga shoka shi li nawa noshu uka. Ihe opu na oshindji shoka tu na okutseya nokwiilonga kombinga ye shoka tashi tu etele uuwanawa nosho wo enyanyu.

Ngele owu shi nawa tate gwoye oho kala wu na ko nasha naye noho mu simaneke. Sha faathana, shi thike mpoka wu shi nawa Kalunga, opo pu thike okukala wu na ekwatathano lyopothingo naye. Kalunga ota vulu oku ku kwathela wu idhidhimikile omaupyakadhi monkalamwenyo, ngele we mu tseya nawa nokukala to longo ehalo lye.

Kalunga omuntu a tya ngiini? Ongiini omaukwatya ge ge na okunwetha mo omaiyuvo goye shi na ko nasha naye? Mbela oku mu tseya otashi ti owu na iinakugwanithwa yasha? Oshitopolwa tashi landula ko otashi yamukula omapulo ngaka.

[Oohapu dha simana pepandja 3]

Omaiyuvo goye kombinga yayalwe ohaga nwethwa mo kunkene wu ya shi nawa