Elongo eti-2: Aalunde otaya ka pya moheli

Mbela elongo ndika olya tamekela peni? “Plato oye gumwe gwomaafilosofi yOshigreka yonale ngoka a li e na enwethomo enene ngele tashi ya pelongo lyoheli.”—Embo Histoire des enfers (Ondjokonona yOheli), kuGeorges Minois, epandja 50.

“Aakriste yamwe mboka ya longwa uufilosofi wOshigreka pokati kethelemumvo eti-2 AD, oya li taya dhiladhila kutya oye na okuulika eitaalo lya fa lyaafilosofi mboka ye ya longa . . . Oya li ya hokwa unene uufilosofi waPlato [omalongo ge].”—Embo eti-25 lyo-The New Encyclopædia Britannica (1988), epandja 890.

“Elongo lyOngeleka olya li lya koleke kutya oheli oko yi li notayi kala ko sigo aluhe. Oomwenyo dhaantu mboka ya sila muulunde wo wenewene ohadhi umbilwa moheli moka hadhi kala tadhi hepekwa ‘momulilo sigo aluhe.’ Oshiwinayi unene kombinga yegeelo lyoheli osho kutya oto ka kala wa topoka ko kuKalunga sigo aluhe.”—Embo Catechism of the Catholic Church, lya nyolwa 1994, epandja 270.

Ombiimbeli otayi ti ngiini? ‘Aanamwenyo oya tseya kutya oye na okusa, ihe aasi inaaya tseya sha nando, oshoka kaku na iilonga, ompangela, uunongo nenge owino moshaasi, moka to ka ya.’—Omuuvithi 9:5, 10.

Oshitya shOshihebeli Sheol, shoka tashi ulike “ehala lyaasi,” osha tolokwa “oheli” momalundululo gamwe gOmbiimbeli. Enyolo lyOmuuvithi otali holola shike kombinga yonkalo yoonakusa? Mbela otaya mono iihuna moheli omolwomayono gawo? Aawe, molwaashoka inaaya “tseya sha nando.” Sho tatekulululwa Job a li ta mono iihuna komukithi gunyanyalitha ngoka a li te ehama, okwa pula Kalunga a ti: “Andola wu langeke ndje ashike muusi [mOshihebeli, Sheol].” (Job 14:13) Okwa li ti indile shike, ngele Sheol ehala moka aantu taya hepekwa sigo aluhe? PaMbiimbeli, oheli ombila yaantu ayehe moka kaamu na iilonga yasha.

Mbela efatululo ndika kombinga yoheli kali li pandunge nometsokumwe nOmanyolo? Mbela Kalunga omunahole ota vulu ngaa okuhepeka omuntu sigo aluhe molwaashoka a longa iilonga iiwinayi noyinyanyalitha? (1 Johannes 4:8) Ihe ngele elongo lyoheli kali shi lyoshili, ongiini kombinga yomwenyo gwomegulu?

Yelekanitha oovelise dhOmbiimbeli ndhika: Episalomi 146:3, 4; Iilonga 2:25-27; Aaroma 6:7, 23

OSHILI OYO:

Kalunga iha geele aantu nomulilo gwoheli

[Ethano pepandja 5]]

[Uuyelele wu na sha nethano pepandja 5]

Barrators—Giampolo/The Doré Illustrations For Dante’s Divine Comedy/Dover Publications Inc.