Omukalo gwaSatana gwokupangela kagu na siku gu shi pondole nandonando
“Omulunde ita kala nawa.”—OMUUV. 8:13.
1. Omolwashike okupangulwa kwaakolokoshi hoka ku li pokuningwa ku li oshinima tashi hekeleke?
MASIKU nenge konima yethimbo aakolokoshi otaya ka katukilwa onkatu. Otaya ka mona iilanduliko yiilonga yawo. (Omayel. 5:22; Omuuv. 8:12, 13) Ndjika oyo onkundana tayi hekeleke, unene tuu kwaamboka ye hole uuyuuki naamboka taya mono iihuna kaashi li pauyuuki notaya ningwa nayi kaakolokoshi. Satana Ondiaboli, he yuukolokoshi, oye omukolokoshi a shiga ko ngoka ta ka pangulwa pauyuuki.—Joh. 8:44.
2. Omolwashike pwa li pwa pumbiwa ethimbo opo ompata ndjoka ya li ya penduthwa muEden yi kandulwe po?
2 Nale muEden, Satana okwa li a kokeke omaiyuvo gokukala a simana e ta ningitha aantu ye ekelehi omukalo gwaKalunga gwokupangela. Oshilanduliko, aavali yetu yotango oya li yi imbwanga mumwe naSatana mokushonga uuthemba waJehova wokupangela wu li pauyuuki noya ningi aalunde koshipala she. (Rom. 5:12-14) Dhoshili, Jehova okwa li e shi kutya okwaahe na esimaneko kwawo nuunashipotha wawo otaku ke ye etela iilanduliko. Ihe nonando ongaaka, iilanduliko mbyoka itaayi vulu okuyandwa oya li yi na okukala yi iwetikile kiishitwa ayihe iinandunge. Onkee ano, opwa li pwa pumbiwa ethimbo opo ompata ndjoka yi kandulwe po nokuulika sha yela kutya aanashipotha mboka oya puka lela.
3. Otu na okutala ko ngiini omapangelo gopantu?
3 Molwaashoka aantu oye ekelehi omukalo gwaJehova gwokupangela, oya li ye na okutota po omukalo gwawo gwokupangela. Sho omuyapostoli Paulus a nyolele ooitaali ooyakwawo muRoma, okwa li a popi kombinga yomapangelo gopantu ga tya ngaaka, ta longitha uutumbulilo “aapangeli.” Pethimbo lyaPaulus, uutumbulilo aapangeli owa li unene tawu ulike kepangelo lyaRoma ndyoka lya li miikaha yomupangeli Nero, ngoka a li a pangele okuza mo 54-68 E.N. Paulus okwa ti kutya aapangeli mboka “oya tulwa po kuKalunga.” (Lesha Aaroma 13:1, 2.) Mbela shoka osha hala okutya Paulus okwa li ta ti kutya okupangela kwopantu oku vule kwaKalunga? Hasho nandonando. Pehala lyaashono, okwa li owala ta ti kutya molwaashoka Jehova oye e etha aantu ya kale taya pangele, Aakriste oye na okusimaneka “eutho lyaKalunga” nokutaamba ko aapangeli mboka.
Satana okwa katuka onkatu tayi fala moshiponga
4. Yelitha kutya omolwashike aapangeli yopantu ihaaye shi pondola.
4 Nonando ongaaka, osha yela kutya omapangelo gopantu ngoka ga nwethwa mo kuSatana kage na siku ge shi pondole. Omolwashike? Etompelo limwe, omolwaashoka inaga kankamena kuunongo wopakalunga. Jehova oye awike e na uunongo wa gwanenena. Onkee ano, oye awike omuwiliki e shi okwiinekelwa ta vulu okupangela nomupondo. (Jer. 8:9; Rom. 16:27) Jehova ina fa aantu mboka olundji hayi ilongo sha okupitila mokuninga omapuko nomokuhepekwa, oku shi aluhe omukalo dhingi moka ta vulu okukatuka onkatu. Elongekidho kehe lyopapangelo ndyoka ihaali landula ewiliko lye, ihali pondola sha aluhe. Molwetompelo ndika nosho wo kutya Satana oku na omainyengotompelo gokwiihola mwene, otu shi shi kutya omukalo gwe gwokupangela okupitila maapangeli yopantu, kagwa li tagu ka pondola okuza petameko.
5, 6. Oshike tashi vulika sha li sha ningitha Satana a pataneke Jehova?
5 Omuntu omunandunge olundji ohi idhilike okutameka oonkambadhala ndhoka itaadhi shi pondola. Ngele okwa kondjitha okutsikila noonkambadhala dhe, ota ka dhimbulula kutya okwa puka. Ondjokonona oye shi ulika lwiikando oyindji kutya itashi kwatha sha okupataneka Omushiti omunankondoadhihe. (Lesha Omayeletumbulo 21:30.) Ihe Satana okwa posipalekwa komaiyuvo gokukala a simana nosho wo uuntsa e ta pilamene Jehova. Kungawo, Ondiaboli oya hogolola owina onkatu ndjoka tayi fala owala moshiponga oshinene.
6 Iikala yaSatana yeinenepeko konima yethimbo oya ka holelwa komupangeli gwaBabilonia ngoka a li itadha a ti: “Otandi ka londa kegulu, otandi ka thikameka oshipangelapundi shandje pombanda handiya yoonyothi dhaKalunga. Otandi ka kuutumba koshipangelapundi kondundu yokugongalela ookalunga, mookapyololela kondundu yiiholekwa.” (Jes. 14:13-15) Iilonga yomupangeli ngoka ya nika uusama inayi pondola sha, nezimo lyaakwaniilwa yaBabilonia olya hulu po momukalo gusitha ohoni. Sha faathana, Satana nuuyuni we masiku otaya ka sindika thiluthilu.
Omolwashike Kalunga e etha aantu ya kale ya manguluka ko kepangelo lye?
7, 8. Omauwanawa gamwe geni okweetha kwaJehova uukolokoshi wu kale po uule wokathimbo kwe etele aantu?
7 Aantu yamwe otashi vulika yi ipule kutya omolwashike Jehova inaa keelela aantu kaaya game kombinga yaSatana noku yi indika kaaya landule omukalo gumwe gwokupangela ngoka itaagu shi pondola. Molwaashoka Kalunga omunankondoadhihe, okwa li ta vulu lela oku shi ninga. (Eks. 6:3) Ihe nonando ongaaka, ine shi ninga. Uunongo we owa li we mu ningitha a mone kutya okwaakutha ombinga muunashipotha waantu uule wokathimbo otaku ke eta iizemo iiwanawa. Lwahugunina, Jehova ota ka tumbalekwa e li Omupangeli omuyuuki nomunahole, naantu aadhiginini otaya ka mona uuwanawa metokolo lye.
8 Aantu ando oya tindile okaheka kaSatana nokuyanda okukala ya manguluka ko kepangelo lyaKalunga, ando inaya yanda tuu iilanduliko mbika yinikitha oluhodhi! Ihe etokolo lyaJehova okweetha aantu yi ipangele yo yene uule wethimbo olye eta uuwanawa. Shoka osha kwathela noonkondo mboka ye na omitima omiwanawa ya mone kutya oshi li pandunge okupulakena kuKalunga nokukala ye mu inekela. Omathelemimvo ga piti, aantu oya kala nokutula po omapangelo ogendji gi ili nogi ili, ihe kapu na li mwe lyomugo lya li lye shi pondola. Uushili mboka owa koleke aalongeli yaKalunga ya kale nuushili kutya omukalo gwaJehova gwokupangela ogu li lela dhingi. Dhoshili, okweetha kwaJehova epangelo ewinayi lyaSatana li kale po okwe etele aantu omahepeko, mwa kwatelwa mboka haya longele Kalunga nuudhiginini. Natango, okweetha pakathimbo uukolokoshi wu kale po, okwe etele wo uuwanawa aalongelikalunga mboka aadhiginini.
Uunashipotha mboka tawu simanekitha Jehova
9, 10. Yelitha nkene omukalo gwaSatana gwokupangela gwa simanekitha Jehova.
9 Okweetha aantu ya nwethwe mo kuSatana nokwiipangela kuyo yene inaku guma nando omukalo gwaJehova gwokupangela. Mepingathano naashoka, ondjokonona otayi ulike kutya oohapu dhaJeremia dha nwethwa mo ndhoka a popi kutya aantu itaya vulu okwiipangela yo yene, odhi li mondjila. (Lesha Jeremia 10:23.) Kakele kaashono, uunashipotha waSatana owa pe Jehova ompito u ulike omaukwatya ge omawanawa momukalo gwa dhenga mbanda noonkondo. Ngiini?
10 Nonando omukalo gwaSatana gwokupangela ogwe etitha iilanduliko yinikitha oluhodhi, shoka osha ningitha omaukwatya gaJehova ga gwanenena ga kale gi iwetikile momukalo omundhindhilikwedhi noonkondo. Komukalo nguka, Jehova okwa kala nokusimanekwa montaneho yaamboka ye mu hole. Eeno, nonando otashi monika sha fa itaashi wapa, muushili wo wene, omukalo gwaSatana gwokupangela ogwa simanekitha Kalunga. Ogwa tsu omuthindo omukalo gwa dhenga mbanda moka Jehova u ungaunga neshongo ndyoka li na ko nasha nuunamapangelo we. Opo tu koleke uushili mboka, natu ka tale paufupi gamwe gomomaukwatya gaJehova nokumona nkene omukalo omwiinayi gwaSatana gwokupangela gwi inyengitha Jehova u ulike omaukwatya ge momikalo dha gwedhwa po.
11. Ongiini ohole yaJehova ya li yu ulikwa?
11 Ohole. Omanyolo otage tu lombwele kutya “Kalunga oye ohole.” (1 Joh. 4:8) Kalunga oku ulike ohole ye sho a shiti aantu. Niishewe, omukalo omukumithi moka twa shitwa otagu ulike kutya Kalunga oku tu hole. Jehova oku ulike wo ohole ye sho a pe aantu ehala ewanawa li na kehe shimwe ya pumbwa opo ya kale ya nyanyukwa. (Gen. 1:29-31; 2:8, 9; Eps. 139:14-16) Ihe sho uukolokoshi we ya maantu, Jehova okwa li u ulike ohole ye momikalo omipe. Ngiini? Omuyapostoli Johannes okwa popi kombinga yaJesus a ti. ‘Kalunga okwa kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.’ (Joh. 3:16) Mbela Kalunga okwa li ta vulu okuulika ohole ye kaantu momukalo omundhindhilikwedhi kaagu shi okutuma Omwana awike kombanda yevi opo a kulile aalunde? (Joh. 15:13) Okuulika ohole kwaKalunga momukalo gwa tongomana gwa tya ngaaka okwa tulila po aantu oshiholelwa, notaku ya pe ompito okutedhatedha ohole yaKalunga yokwaaihola mwene esiku kehe monkalamwenyo yawo, nokuli ngaashi Jesus a li a ningi.—Joh. 17:25, 26.
12. Omomukalo guni Jehova u ulike oonkondo dhe?
12 Oonkondo. “Kalunga Omunankondoadhihe,” oye awike e na oonkondo okushita iishitwa yi na omwenyo. (Eh. 11:17; Eps. 36:9) Oku shi popya pathaneko, omuntu pevalo oha kala a fa ombapila inaayi nyolwa sha. Peso, ombapila ndjoka omuntu ohe yi udhitha omatokolo, iilonga mbyoka a longa niimoniwa yomonkalamwenyo mbyoka hayi zula uuntu we nomaukwatya ge. Jehova ota vulu okupungula uuyelele mboka medhimbuluko lye, nopethimbo lyo opala, ota ka vula okuyumudha omuntu ngoka e li naanaa ngaashi a li nale. (Joh. 5:28, 29) Onkee ano, nonando kalya li elalakano lyaKalunga lyopetameko aantu ya kale haya si, eso olya pe Jehova Kalunga ompito u ulike kutya oku na oonkondo okuyumudha aantu. Dhoshili, Jehova oye “Kalunga Omunankondoadhihe.”
13. Eyambo lyaJesus olyu ulike ngiini kutya Jehova omuyuuki momukalo gwa gwanenena?
13 Uuyuuki. Jehova iha fundju noiha longo iilonga kaayi li pauyuuki. (Deut. 32:4; Tit. 1:2) Oha kala aluhe a dhiginina omithikampango dhe dha dhenga mbanda dhoshili nodhuuyuuki, nokuli nonando haye lela ta mono uuwanawa. (Rom. 8:32) Kasha li tuu shi ehama kuJehova okutala Omwana omuholike, Jesus, ta si komuti gwomahepeko a fa omuntu ngoka ha sheke Kalunga! Niishewe, molwohole ye yokuhola aantu inaaya gwanenena, Jehova okwa li e na ehalo okweetha oshiningwanima shika shiehameka shi ningwe opo a kaleke po omuthikampango gwe gwa gwanenena gwuuyuuki. (Lesha Aaroma 5:18-21.) Uuyuni mbuka wu udha okwaahe na uuyuuki owa pe Jehova ompito u ulike kutya oku na uuyuuki wa dhenga mbanda.
14, 15. Omomikalo dhimwe dhini Jehova u ulike uunongo wa dhenga mbanda neidhidhimiko?
14 Uunongo. Nziya konima sho Adam naEva ya yono, Jehova okwa li a holola kutya ota ka ninga po shike opo a hulithe po iilanduliko ayihe iiwinayi mbyoka ye etithwa kuunashipotha wawo. (Gen. 3:15) Okukatuka onkatu kwaJehova nziya kwa tya ngaaka nosho wo okuhololela aapiya ye kashona nakashona uuyelele wu na ko nasha nelalakano lye, oku ulike kutya oku na uunongo wa dhenga mbanda. (Rom. 11:33) Kapu na shoka tashi vulu okwiimba Kalunga u ungaunge niinima nomupondo. Muuyuni wu udha oluhondelo, iita, okwaahe na ondjele, okwaanevuliko, okwaanohenda, okatongotongo nuufudhime, Jehova oku na ompito ombwanawa okuulukila iishitwa ye kutya uunongo owo naanaa shike. Omulongwa Jakob okwa ti: “Uunongo wokombanda tango owa yogoka, ou na wo ombili, olukeno nuukuume. Ou udha ohenda niilonga iiwanawa nokau na omalimbililo nuufudhime.”—Jak. 3:17.
15 Ontalanteni neidhidhimiko. Uukwatya waJehova weidhidhimiko nontalanteni ando inawu imonikila noonkondo ando kali tu ungaunga nokwaagwanenena nosho wo nomayono gaantu. Ihe sho Jehova a kala ti idhidhimike notu ulike ontalanteni uule woomvula omayuvi otashi ulike kutya oku na omaukwatya ngaka omakumithi momukalo gwa gwanenena, notu na okukala tu na olupandu olunene lwaashoka. Omuyapostoli Petrus okwa popi shi li mondjila kutya otu na ‘okutala ko ontalanteni yOmuwa gwetu oyo ompito yetu yokuhupithwa.’—2 Pet. 3:9, 15.
16. Omolwashike hatu kala twa nyanyukwa noonkondo sho Jehova he tu dhimine po nehalo ewanawa?
16 Jehova oha dhimine po aantu nehalo ewanawa. Atuheni aalunde nohatu puka olwindji. (Jak. 3:2; 1 Joh. 1:8, 9) Inatu pandula tuu sho Jehova he tu dhimine po oondjo dhetu “odhindji!” (Jes. 55:7) Tala wo oshinima shika: Molwaashoka otwa valwa aalunde inaatu gwanenena, otwa nyanyukwa noonkondo sho Kalunga he tu dhimine po omayono getu. (Eps. 51:5, 9, 17) Okuulukilwa uukwatya uuwanawa waJehova wa tya ngaaka pauhandimwe otaku tu kwathele tu kale tu mu hole nomutima aguhe notaku tu tsu omukumo tu landule oshiholelwa she mokuungaunga nayalwe.—Lesha Aakolossa 3:13.
Etompelo molwaashoka uuyuni wa yonuka noonkondo
17, 18. Omomikalo dhini omukalo gwaSatana gwokupangela inaagu shi pondola?
17 Onkalelo ayihe yuuyuni waSatana ndjoka ye etithwa po komukalo gwe gwokupangela, oya kala ihaayi shi pondola lwiikando momukokomoko gwomathelemimvo. Mo 1991 oshifokundaneki The European osha ti: “Ano uuyuni owa yonuka? Eeno, owa yonuka lela, ihe hamolwiilonga [yontumba] yaKalunga, okuyonuka kwawo okwe etithwa kaantu yo yene.” Shika kashi shi tuu shoshili! Aavali yetu yotango oya nwethwa mo kuSatana ya hogolole okupangelwa kaantu pehala lyokupangelwa kuJehova. Mokuninga ngawo, oya toto po omukalo gwokupangela ngoka inaagu shi pondola. Uuwehame noluhodhi olunene ndoka lu niwe kaantu muuyuni auhe olu li endhindhiliko kutya okupangela kwopantu okwa yonana.
18 Omukalo gwaSatana gwokupangela ohagu humitha komeho iikala yokwiihola mwene. Ihe nonando ongaaka, iikala yokwiihola mwene kayi na siku yi sinde ohole, hoka kwa kankamena omukalo gwaJehova gwokupangela. Omukalo gwaSatana gwokupangela ogwa nyengwa okweetela aantu onkalo ombwanawa, enyanyu nosho wo egameno. Ihe omukalo gwaJehova gwokupangela ogwa yukipalithwa. Mbela opu na sha tashi shi ulike kunena? Eeno, ngaashi tatu ke shi mona moshitopolwa tashi landula.
Oshike twi ilonga kombinga yokupangela mokulesha . . .
• Omayeletumbulo 21:30?
• Jeremia 10:23?
[Omathano pepandja 25]
Okupangela kwaSatana inaku etela nando aantu uuwanawa washa
[Edhina lyomuthaneki]
U.S. Army photo
WHO photo by P. Almasy
[Ethano pepandja 26]
Oonkondo dhaJehova otadhi ka sinda eso
[Ethano pepandja 27]
Jehova oku ulike ohole ye nuuyuuki we sho a yamba po Omwana