Omukalo gwaJehova gwokupangela ogwa yukipalithwa
“Kalunga gwokombandambanda oku na oonkondo okupangela uukwaniilwa auhe wopantu kombanda yevi.”—Dan. 4:17.
1, 2. Omolwomatompelo gamwe geni okupangela kwopantu inaaku shi pondola?
KAPU na omalimbililo kutya okupangela kwopantu inaku shi pondola. Etompelo lya simanenena kutya omolwashike inaaku shi pondola olyo molwaashoka aapangeli yopantu kaye na uunongo wokupangela nawa. Okwaahe shi pondola mokupangela kwopantu okwi iwetikile kunena unene tuu maapangeli mboka ‘yi ihole yo yene, ye hole eliko, aasheki, aainomi, aakaanuudhiginini, aayoni yeuvaneno, haalundilathana, aakaaneidhiliko, aakwanyanya, aatondi yuuwanawa, aakotokeli noye hole uuntsa.’—2 Tim. 3:2-4.
2 Nalenale aavali yetu yotango oya li ye ekelehi okupangelwa kuKalunga. Sho ye shi ningi otashi vulika ya li taya dhiladhila kutya oya hogolola okukala ya manguluka. Ihe muushili wo wene, oya li yi igandja kepangelo lyaSatana. Okupangela nayi kwopantu uule womayovimimvo gahamano hoka kwa nwethwa mo noonkondo ‘komupangeli gwuuyuni mbuno,’ Satana, okwe tu etele omathimbo omadhigu mondjokonona yopantu. (Joh. 12:31) O-The Oxford History of the Twentieth Century oya popi kombinga yonkalo ndjoka aantu ye li muyo kunena ya ti kutya kashi na ekwatho lyasha “okukonga uuyuni wa gwanenena.” Oya yelitha tayi ti: “Kashi shi owala kutya ita wu vulu okumonika, ihe okukambadhala okukala muuyuni wa gwanenena ohaku eta owala oshiponga oshinene, omapangelo guukayamukulwa niita.” Kashi shi tuu shoshili okupopya kutya okupangela kwopantu inaku pondola sha!
3. Otatu vulu okutya shike kombinga yomukalo moka Kalunga a li ta ka pangela ando Adam naEva oya li inaaya ya yona?
3 Kashi shi tuu shinikitha oluhodhi sho aavali yetu yotango ye ekelehi okupangelwa kepangelo lyaKalunga ndyoka olyo awike tali longo! Dhoshili, katu shi shi lela kutya Jehova okwa li ta ka pangela momukalo gwa tya ngiini ombanda yevi ando Adam naEva oya kalele aadhiginini kuye. Ihe nonando ongaaka, otatu vulu okukala nuushili kutya andola aantu oya taambele epangelo lyopaKalunga, ando olya kala lyopahole nokaa li na okayoya. (Iil. 10:34; 1 Joh. 4:8) Mokutala kuunongo waKalunga mboka itaawu vulu okuyelekwa nasha, otatu vulu wo okukala nuushili kutya ando aantu oya kalele kohi yepangelo lyaKalunga, ando omapuko agehe ngono ga ningwa kaapangeli yopantu ando inaga ningwa. Okupangela kwaKalunga pauteokratika, andola okwe shi pondola ‘mokukutitha iinamwenyo ayihe.’ (Eps. 145:16) Oku shi popya paufupi, ando epangelo lyaKalunga olya kala lya gwanenena. (Deut. 32:4) Kashi nikitha tuu oluhodhi noonkondo sho aantu ye ekelehi epangelo ndyoka!
4. Satana okwa pitikwa a pangele shi thike peni?
4 Natango, oshi li nawa okudhimbulukwa kutya nonando Jehova okwe etha aantu yi ipangele yo yene, ine etha po nando uuthemba we wokupangela iishitwa ye. Nokuli nomukwaniilwa gwaBabilonia hugunina okwa li i inyengithwa a mone kutya “Kalunga gwokombandambanda oku na oonkondo okupangela uukwaniilwa auhe wopantu kombanda yevi.” (Dan. 4:17) Lwahugunina, Uukwaniilwa waKalunga otawu ka ningitha ehalo lye li gwanithwe. (Mat. 6:10) Dhoshili, Jehova okwe etha Satana a pangele uule wethimbo efupi e li “kalunga komuuyuni mbuka,” opo a gandje eyamukulo lya yela kompata ndjoka ya li ye etwa po komupataneki ngoka. (2 Kor. 4:4; 1 Joh. 5:19) Kakele kaashono, Satana ina vula nando okuninga shi vulithe pwaashoka Jehova e mu pitika a ninge. (2 Ondjal. 20:6, yelekanitha Job 1:11, 12; 2:3-6.) Okuza nale opwa kala oohandimwe mboka ya hogolola okupangelwa kuKalunga, nonando oye li muuyuni tawu pangelwa kOmutondi omunene gwaKalunga.
Nkene Kalunga a pangele Aaisraeli
5. Israeli okwa li a ningi egano lyashike kuKalunga?
5 Okuza pethimbo lyaAbel sigo opethimbo lyookukulululwa, oohandimwe oyendji aadhiginini oya kala nokulongela Jehova nokuvulika kiipango ye. (Heb. 11:4-22) Pethimbo lyaMoses, Jehova okwa li a ningi ehangano noluvalo lwatatekululuwa Jakob nokuza mpono olwa ningi oshigwana shaIsraeli. Mo 1513 K.E.N., Aaisraeli noluvalo lwawo oya li yi igandja ya taambe ko Jehova e li omupangeli gwawo ya popi taya ti: “Otatu gwanitha ashihe shoka OMUWA a popi.”—Eks. 19:8.
6, 7. Kalunga okwa li a pangele ngiini oshigwana shaIsraeli?
6 Jehova okwa li e na elalakano sho a hogolola Aaisraeli ya ninge oshigwana she. (Lesha Deuteronomium 7:7, 8.) Ehogololo ndika olya li lya kwatela mo oshindji kaashi shi owala onkalonawa yAaisraeli. Edhina lyaKalunga nuunamapangelo owa li wo wa kwatelwa mo, naashoka osho sha li sha simanenena. Aaisaraeli oya li ye na okugandja uunzapo wu na ko nasha nuushili kutya Jehova oye awike Kalunga kashili. (Jes. 43:10; 44:6-8) Onkee ano, Jehova okwa li a lombwele oshigwana shoka a ti: “One oshigwana oshiyapuki, aantu yOMUWA Kalunga keni: okwe mú hogolola mu ninge ye mwene mokati kiigwana ayihe kombanda yevi.”—Deut. 14:2.
7 Omukalo gwaKalunga gwokupangela Aaisraeli ogwa li tagu ulike kutya oku shi shi kutya inaya gwanenena. Pethimbo opo tuu mpoka, oompango dhe odha li dha gwanenena nodha li tadhi ulike uukwatya wOmugandji gwadho. Iipango yaJehova mbyoka a li a gandja okupitila muMoses, oyu ulike sha yela uuyapuki we, okuhola kwe uuyuuki, okukala e na ehalo okudhimina po aantu nosho wo eidhidhimiko lye. Pethimbo lyaJosua oshigwana osha li sha vulika kiipango yaJehova nosha li sha nyanyukilwa ombili nomalaleko nuuyamba gopambepo. (Jos. 24:21, 22, 31) Ethimbo ndyoka lyondjokonona yAaisraeli olya li lyu ulike kutya okupangela kwaJehova okwa pondola.
Epangelo lyopantu olya li tali ke ya etela iilanduliko
8, 9. Aaisraeli oya li yi indile ya pewe shike shoka kaasha li mondjila nosha li she ye etele oshizemo shashike?
8 Olundji, Aaisraeli oya kala nokupilamena epangelo lyaKalunga noya li ya mono iihuna molwaashoka ka li te ya gamene. Konima yethimbo, Israeli osha li sha pula shi pewe omupangeli gwopantu okupitila momupolofeti Samuel. Jehova okwa li a lombwele Samuel a gwanithe po shoka oshigwana tashi pula. Onkee ano, Jehova okwa gwedha ko ta ti: “Hangoye ya tindi; ongame ya tindi, ndaa kale we omukwaniilwa gwawo.” (1 Sam. 8:7) Nonando Jehova okwa li a pitika Israeli shi pewe omukwaniilwa gwopantu, okwa li e shi londodha kutya okupangelwa kaantu otaku ke shi etela iilanduliko.—Lesha 1 Samuel 8:9-18.
9 Ondjokonona oyu ulike uushili womalondodho gaJehova. Okupangelwa komukwaniilwa gwopantu okwa li kwe etele oshigwana shaIsraeli uupyakadhi wa kwata miiti, unene tuu sho omukwaniilwa a kala kee shi we omudhiginini. Ngele otwa tala koshiholelwa shoka shAaisraeli, itashi kumitha sho momukokomoko gwoomvula epangelo ndyoka li li momake gaantu mboka kaaye shi Jehova inaaye shi pondola mokweetela aantu uuwanawa tawu kalelele. Dhoshili, aanapolotika yamwe ohaya kongo okulalekwa nuuyamba kuKalunga moonkambadhala dhawo dhokukonga ombili negameno, ihe ongiini Kalunga ta ka laleka nuuyamba mboka inaaya taamba ko omukalo gwe gwokupangela?—Eps. 2:10-12.
Oshigwana oshipe tashi pangelwa kepangelo lyaKalunga
10. Omolwashike Israeli oshigwana shaKalunga oshihogololwa sha li sha pingenwa po?
10 Oshigwana shaIsraeli osha li kaashi na ehalo okulongela Jehova nuudhiginini. Lwahugunina, kasha li sha taamba Jesus e li Mesiasa omuhogololwa, na Jehova okwa li wo e shi etha po e te shi pingena po noshigwana shaantu shoka sha ka ninga po oshigwana oshipe. Oshilanduliko, mo 33 E.N., egongalo lyopaKriste lyaalongeli yaJehova aagwayekwa olya li lya totwa. Muushili wo wene, egongalo ndyoka, olya li lya ningi oshigwana oshipe tashi pangelwa kuJehova. Paulus okwa popi kombinga yalyo li li ‘Israeli yaKalunga.’—Gal. 6:16, OB-1954.
11, 12. Omafaathano geni ge na ko nasha nokutonatela ge li pokati kaIsraeli shonale ‘naIsrael yaKalunga’?
11 Pokati koshigwana shaIsraeli shonale noshigwana oshipe ‘Israeli yaKalunga,’ opu na omayooloko nosho wo omafaathano. Egongalo lyopaKriste kali na omukwaniilwa gwopantu ngaashi Israeli shonale niishewe inali pumbwa okugandja omayambo giinamwenyo omolwaayoni. Efaathano limwe ndyoka li li pokati koshigwana shaIsraeli negongalo lyopaKriste olyo elongekidho lyaawiliki nenge aakuluntugongalo. (Eks. 19:3-8) Aakuluntu yegongalo mboka ihaya pangele oshigunda. Pehala lyaashono, ohaya litha egongalo lyopaKriste noku li kwatela komeho nehalo ewanawa. Ohayu ungaunga noohandimwe ayehe megongalo nohole nonesimaneko.—2 Kor. 1:24; 1 Pet. 5:2, 3.
12 Mokutedhatedha kombinga yankene Jehova a li u ungaunga nAaisraeli, niilyo yoshigwana ‘shaIsraeli yaKalunga’ nosho wo ‘noonzi dhilwe,’ omuntu oha kala e na olupandu lwokupandula Jehova nosho wo omukalo gwe gwokupangela. (Joh. 10:16) Pashiholelwa, ondjokonona oyu ulike kutya aapangeli yopantu mboka ya li ya pangele Israeli oya li ya nwetha mo aapangelwa yawo, kutya nduno onawa nenge onayi. Uushili mboka otawu kwathele mboka taya kwatele komeho megongalo, kutya nonando kaye shi aapangeli ngaashi aakwaniilwa mbeyaka yonale, oye na aluhe okutulila po aakwanegongalo oshiholelwa oshiwanawa sheitaalo.—Heb. 13:7.
Nkene Jehova ha pangele kunena
13. Oshinima sha simanenena shini sha li sha ningwa mo 1914?
13 Aakriste kunena ohaya uvithile aantu ayehe muuyuni kutya omapangelo gopantu oge li pokuhula po. Mo 1914, Jehova okwa li a dhike po Uukwaniilwa we megulu wu na Jesus Kristus ngoka a langeka po e li Omukwaniilwa gwawo. Pethimbo mpoka okwa li a pe Jesus oonkondopangelo “a ka sindane, oshoka oye omusindani.” (Eh. 6:2) Omukwaniilwa omupe ngoka a langekwa po okwa li a lombwelwa taku ti: ‘Pangela mokati kaatondi yoye.’ (Eps. 110:2) Shinikitha oluhodhi, iigwana oya kala nokutinda okupangelwa kepangelo lyaJehova. Oya tsikile nokwiihumbata ya fa yi wete ‘kaaku na Kalunga.’—Eps. 14:1.
14, 15. (a) Uukwaniilwa waKalunga otawu tu pangele ngiini kunena, nomokutala kwaashika, omapulo geni tu na okwiipula? (b) Omukalo gwaKalunga gwa dhenga mbanda gwokupangela ogwi iwetikile ngiini nokunena?
14 Iilyo iishona yaagwayekwa ‘yaIsraeli yaKalunga’ oko yi li natango, yi li aamwahe yaJesus, otayi tsikile okulonga yi li “aatumwa yaKristus.” (2 Kor. 5:20) Oya langekwa po yi li ongundu yomupiya omudhiginini nomunandunge okusila oshimpwiyu nokugandja iikulya yopambepo kaagwayekwa nokongundu yAakriste tayi indjipala ndjoka ya thikama po ngashingeyi maantu omamiliyona ye na etegameno lyokukala nomwenyo sigo aluhe kombanda yevi. (Mat. 24:45-47, KB; Eh. 7:9-15) Jehova okwa laleka nuuyamba elongekidho ndyoka, naashoka oshi iwetikile mehepuluko lyopambepo ndyoka tali nyanyukilwa kaalongelikalunga yashili kunena.
15 Kehe gumwe gwomutse oku na okwiipula mwene ta ti: “Mbela ondi shi ngaa lela iinakugwanithwa mbyoka ndi na megongalo lyopaKriste? Mbela ohandi ambidhidha ngaa nawa omukalo gwaJehova gwokupangela? Mbela ondi uvite uuntsa sho ndi li omupangelwa gwepangelo lyUukwaniilwa waJehova? Mbela onda tokola toko okutsikila okulombwela yalwe kombinga yUukwaniilwa waKalunga ngaashi tashi vulika? Tu li ongundu, ohatu vulika nehalo ewanawa kewiliko ndyoka tatu pewa kOlutuwiliki nohatu longele kumwe naakuluntugongalo mboka ya langekwa po momagongalo. Momikalo ndhika, ohatu ulike kutya otwa taamba ko omukalo gwaKalunga gwokupangela. (Lesha Aahebeli 13:17.) Okuvulika nehalo ewanawa ohaku eta uukumwe muuyuni auhe mboka wa topauka noonkondo. Ohaku eta wo ombili nuuyuuki nohaku simanekitha Jehova, shoka tashi ulike kutya omukalo gwe gwokupangela ogwo dhingi.
Epangelo lyaJehova otali ka sindana
16. Kehe gumwe oku na okuninga etokolo lini kunena?
16 Ethimbo lyokukandula po ompata ndjoka ya li ya penduthwa muEden otali hedha popepi neendelelo. Onkee ano, ngashingeyi olyo ethimbo aantu ya ninge etokolo. Omuntu kehe pauhandimwe oku na okutokola ngele ota hogolola omukalo gwaJehova gwokupangela nenge ota kala a kakatela kepangelo lyopantu. Oshi li uuthembahenda kutse okukwathela aaifupipiki ya ninge etokolo lyu uka. Masiku, puHarmagedon, epangelo lyaJehova otali ka pingena po sigo aluhe omapangelo gopantu ngoka ga nwethwa mo kuSatana. (Dan. 2:44; Eh. 16:16) Omapangelo gopantu otaga ka hula po, Uukwaniilwa waKalunga otawu ka pangela ombanda yevi ayihe. Omukalo gwaJehova gwokupangela otagu ka yukipalithwa meityo lyolela.—Lesha Ehololo 21:3-5.
17. Iinima yini tayi kwathele aaifupipiki ya ninge etokolo ewanawa shi na ko nasha nepangelo?
17 Mboka inaaya tokola natango thiluthilu okuyambidhidha uunamapangelo waJehova oye na okudhiladhila pamwe negalikano kombinga yomauwanawa ngoka epangelo lyaJehova tali ke etela aantu. Omapangelo gopantu oga nyengwa okukandula po omiyonena mwa kwatelwa uukulo. Epangelo lyaKalunga otali ka kutha po uukolokoshi auhe kombanda yevi. (Eps. 37:1, 2, 9) Okupangela kwopantu okweetitha iita kaayi na ehulilo, ihe epangelo lyaKalunga otali ka “hulitha po omalugodhi kombanda yevi alihe.” (Eps. 46:9) Epangelo lyaKalunga itali ka eta tuu ombili nokuli pokati kaantu niinamwenyo! (Jes. 11:6-9) Oluhepo nondjala oya kala yi iwetikile aluhe mepangelo lyopantu, ihe epangelo lyaKalunga otali ke yi kutha po. Nokuli aapangeli yopantu mboka ye na omalalakano omawanawa oya nyengwa okukutha po uuwehame neso, ihe mepangelo lyaKalunga, aakulupe naamboka taye ehama otaya ka kala ya nyanyukwa sho taya ka galulilwa oonkondo dhawo dhuugundjuka. (Job 33:25; Jes. 35:5, 6) Dhoshili, evi otali ka ninga oparadisa moka aasi taya ka yumudhwa nokuli.—Luk. 23:43; Iil. 24:15.
18. Ongiini tatu vulu okuulika kutya otwi itaala kutya omukalo gwaKalunga gwokupangela ogwa dhenga mbanda?
18 Eeno, epangelo lyaKalunga otali ka kutha po uuwehame auhe mboka we etithwa kuSatana sho a pukitha aavali yetu yotango ya pilamene Omushiti gwawo. Dhiladhila kwaashika, Satana okwa kala nokweetitha iiponga uule woomvula 6 000, ihe Kalunga ota ka kutha po uuwehame auhe mboka okupitila muKristus meni lyoomvula 1 000. Omukalo gwaJehova gwokupangela inagu dhenga mbanda tuu! Tu li Oonzapo dhaKalunga ketu, otwe mu taamba ko e li Omupangeli gwetu. Onkee ano, esiku kehe nowili kehe yokukalamwenyo kwetu, natu ulikeni kutya otu li aalongeli yaJehova, tu li aapangelwa yUukwaniilwa we, notu uvite uuntsa sho tu li Oonzapo dhe. Natu longitheni ompito kehe tu lombwele aantu mboka taya pulakene kombinga yepangelo lyaJehova lya dhenga mbanda.
Otwi ilonga shike kombinga yepangelo lyaKalunga sho twa lesha . . .
• Deuteronomium 7:7, 8?
• 1 Samuel 8:9-18?
• Aahebeli 13:17?
• Ehololo 21:3-5?
[Omathano pepandja 29]
Jehova oye omupangeli gwaaluhe
[Ethano pepandja 31]
Okuvulika nehalo ewanawa komukalo gwaJehova gwokupangela okwe etitha uukumwe muuyuni auhe