Okugongala hoka kwa li kwa ningwa muukumwe notaku nyanyudha

OKUGONGALA kwokomumvo hoka haku ningwa ko-Watch Tower Bible and Tract Society of Pennsylvania ohaku kala aluhe kunyanyudha. Okugongala okuti-127 hoka kwa li kwa ningwa mOlyomakaya ye 1 Kotoba 2011, okwa li taku shambula. Aahiywa ayehe okuza kooha nooha dhuuyuni, oya li ya gongala mOshinyanga shIigongi shOonzapo dhaJehova shi li moNew Jersey, moAmerika.

Omumwatate Gerrit Lösch, oshilyo shOlutuwiliki, oye a li a hambelele engathithi lyaakalipo ya nyanyukwa. Okwa lombwele aakalipo okuza kiilongo 85 lwaampono kutya tse otatu tyapula ombili nuukumwe wopaigwana. Uukumwe mboka otawu gandja uunzapo uuwanawa notawu simanekitha Jehova. Aapopi oya li taya tsu omuthindo uukumwe pokugongala hoka.

OLOPOTA TAYI NYANYUDHA KOMBINGA YAMEKSIKO

Omupopi gwotango, omumwatate Baltasar Perla, okwa li a gandja iiholelwa yankene oshigwana shaJehova shi li muukumwe. Okwa li a pulapula aamwatate yatatu ya za koBetel yaMeksiko, hoka naye ha longo shi na ko nasha nokuhengumukila mumwe koBetel yaMeksiko niitayimbelewa ihamano yomiilongo yaAmerika lyoPokati. Sho oBetel yaMeksiko ya hengumukile mumwe nooBetel dhiilongo yaAmerika lyoPokati, muyo omwe ya aantu yomihoko dhi ili nodhi ili noyomiigwana ya yoolokathana. Ihe nonando ongaaka, aamwatate naamwameme ohaya tsaathana omukumo. Omuntu oto hala okutya, Kalunga okwa kutha okadhimitho okanene e ta dhimi po oongamba pokati kiilongo mbyoka.

Aauvithi oya li ye na okukwathelwa kaaya mone ya fa ya topolwa ko kehangano lyaJehova, sho moshilongo shawo kaamu na we iitayimbelewa. Opo ondunge ndjoka yi pondole, megongalo kehe omwa li mwa tulwa omakwatathano gopaintaneta ge li nawa, opo mboka ye li kiitopolwa yokokule ya vule okukwatathana shu ukilila noshitayimbelewa okupitila mo-e-mail.

OONKUNDANA KOMBINGA YAJAPANI

Omumwatate James Linton, ngoka a za koshitayimbelewa shaJapani, okwa hokolola nkene oshilongo shoka sha li sha dhengwa kekakamo lyevi nokoshikungulu muMaalitsa 2011. Oonzapo odhindji odha li dha kanitha aaholike nosho wo iiniwe yadho. Oonzapo ndhoka dhi li miitopolwa mbyoka inaayi gumwa kiiponga odha tungile aamwatate omagumbo 3 100 noku ya pa iihauto omathele ogendji. Aaiyambi mboka haya longo pamwe nOkomitiye yOkutunga yOmoshitopolwa oya li taya longo nopwaa na oluthuwo ya longulule omagumbo gaamwatate. Opwa li pwa pumbiwa aaiyambi ye vulithe 1 700. Ongundu yaaiyambi 575 oya li ya kwathele mokutungulula Iinyanga yUukwaniilwa, muyo omwa li mwa kwatelwa aamwatate yamwe ya za kIilongo ya Hangana.

Mboka ya gumwa kiiponga oya li wo ya hekelekwa pambepo nokukwathelwa ya kale ye na eitaalo lya kola. Aakuluntugongalo ye vulithe 400 oya li ya talele po mboka ya ninga iihakanwa. Olutuwiliki olwa li lwa tumu aataleli yiitayimbelewa yaali, okuza kombelewa onene ya ka tse omukumo aamwatate kiitopolwa mbyoka ya dhengwa kiiponga. Uukwawo wanankali mboka Oonzapo dhaJehova dhu ulike muuyuni auhe owa li wa hekeleke aamwatate moJapani.

INADHI MONIKA ONDJO

Aakalipo oya li ya pulakene nawa komumwatate Stephen Hardy, ngoka a za koBetel yaBritania, sho ta hokolola iipotha yopampangu moka Oonzapo inaadhi monika ondjo. Pashiholelwa, epangelo lyaFulaanisa olya li lya thiminike ehangano lyetu moFulaanisa li fute iifendela yi thike poodola dhaNamibia omamiliyona 626. Oshipotha osha li sha kandulwa po kOmpangu yUuthemba wOmuntu yaEuropa. Ompangu oya li ya lombwele epangelo lyaFulaanisa kutya olya yona Okatendo oka-9 hoka taka popile uuthemba wemanguluko lyopalongelokalunga. Etokolo ndyoka lya ningwa olya li lya kankamena kokatendo hoka taka ti: “Okukala wa dhina eitaalo lyontumba, nenge wa hala oku li hulitha po nosho wo oku li popila muuwinayi oshi li eyono lyuuthemba wopalongelokalunga mboka wu li mOkatendo oka-9 kOmpangu yUuthemba wOmuntu yaEuropa.”

Ompangu ndjoka oya li wo ya tokola kutya Oonzapo muArmenia kadhi na ondjo yasha. Okuza mo 1965 Ompangu ndjoka kaya li hayi popile aantu mboka inaaya hala okuya miita. Ihe Omutumba gwoPombanda gwompangu ndjoka ogwa li gwa tokola kutya “omuntu ngoka ta tindi okuya miita omolwomatompelo ge na ko nasha nelongelokalunga,” oku na uuthemba woku shi ninga. Etokolo ndika oli inyegitha epangelo lyaArmenia, lyaAzerbaijan nolyaTuriki ga simaneke uuthemba mboka.

IILONGA YOKUTUNGA

Omumwatate Guy Pierce, oshilyo shOlutuwiliki, oye a li a landula ko. Okwa ti kutya oku shi kutya aakalipo ayehe oya halelela okuuva kombinga yiilonga yokutunga mbyoka tayi longwa moNew York. Okwe yu ulukile okavidio kutya oshike sha ningwa po naashoka tashi ka ningwa po mondoolopa yaWallkill, Patterson. Okwe yu ulukile wo omahala omape ngoka ge li mondoolopa yaWarwick noyaTuxedo moNew York mpoka tapu ka tungwa. Etungo ndyoka li li muWallkill, hoka taku gwedhelwa oondunda dhokukala dhi vulithe 300, olya tengenekwa lyi ka pwe mo 2014.

Ehangano olya mona ehala li na uunene woohekta 100 mondoolopa yaWarwick moka lya hala okutunga. Omumwatate Pierce okwa ti: “Nonando katu shi natango kutya elalakano lyaJehova olini, otatu ilongekidha oku ka tunga moWarwick, molwaashoka otwa hala oombelewa oonene dhOonzapo dhaJehova dhi ka kale moka.” Otwa dhiladhila oku ka longitha oohekta 20 ndhoka dhi li ookilometa 10 kuumbangalantu waWarwick tu tunge ko omatungo moka tamu ka kala omashina nosho wo iilongitho yokutunga. Omumwatate Pierce okwa ti kutya “ngele otwa pewa epitikilo lyokutunga, otwa tengeneka oku ka mana iilonga mbyoka meni lyoomvula ne lwaampono. Ngele ya pu, omatungo ngoka ge li moBrooklyn otaga ka landithwa po.”

Omumwatate Pierce okwa pula a ti: “Mbela Olutuwiliki olwa dhimbwa kutya uudhigu uunene owu li popepi? Okwa yamukula a ti: “Hasho nando. Ngele uudhigu uunene owe ya manga twi ipyakidhila niilonga, shoka otashi ka kala shi li nawa thiluthilu.”

KOTOKELENI SATANA NGOKA TA NDUNDUMA A FA ONIME

Omumwatate Stephen Lett, oshilyo shilwe shOlutuwiliki, oye a li a landula ko. Okwa li a kundathana Petrus gwotango 5:8 ngoka ta ti: “Kotokeni ne mu tonate! Oshoka omutondi gweni Satana ohe mú kundukidha, ta ndunduma a fa onime, ta kongo omuntu gwontumba, e mu ketsule po.” Omumwatate Lett okwa ti kutya Ondiaboli oyi na iikala ya fa yonime ngaashi owala tashi popiwa muPetrus.

Onime oyi na oonkondo nondapo yi vule aantu. Satana naye oku na oonkondo nondapo e tu vule, onkee ano, katu na okukambadhala oku mu kondjitha kutse yene. Otwa pumbwa ekwatho lyaJehova. (Jes. 40:31) Ngele onime ya hala okukwata oshinamwenyo, ohayi shi hundjuunine, natse katu na okwiiyethela momilema dhopambepo moka Satana ha kala ta kongo iihakanwa ye. Ngaashi owala onime hayi dhipaga uumpugulugona nenge uungologona ngele wa kotha, Satana naye wo ke na ohenda natse nokwa hala e tu dhipage. Konima ngele onime ya kuta, olundji shoka ya li tayi li ihashi dhimbululwa naanaa nuupu. Osha faathana wo nomuntu ngoka a ninga oshihakanwa shaSatana, “ohugunina” ye ohayi ‘ningi ombwinayi yi vule yopetameko.’ (2 Pet. 2:20) Onkee ano, otwa pumbwa okukondjitha Satana nokudhiginina omakotampango gOmbiimbeli ngoka twi ilonga.—1 Pet. 5:9.

KALA WU NA OLUPANDU SHO WU NA EHALA MEGUMBO LYAJEHOVA

Omumwatate Samuel Herd, oshilyo shOlutuwiliki, oye a li omupopi a landula ko. Okwa ti: “Kehe gumwe gwomutse oku na ehala megumbo lyaJehova.” Aakriste ayehe mboka yi itaala mekuliloyambo lyaJesus oye na ehala “mongulu” nenge megumbo lyaKalunga ndyoka li li otempeli ye yopambepo. Otu na okukala twa lenga ehala ndyoka, molwaashoka oli li uuthembahenda wa simana. Otu na okukala ngaashi David twa hala “okukala mongulu yOMUWA okukalamwenyo [kwetu] akuhe.”—Eps. 27:4.

Omumwatate Herd okwa li u ukitha eitulomo kEpisalomi 92:12-14 e ta pula ta ti: “Jehova ote tu kwathele ngiini tu kale twa ziza?” Okwa yamukula ta ladhipike aakalipo a ti: “Moparadisa yopambepo, Kalunga ote tu kwathele tu pondole monkalamwenyo, ote tu gamene note tu talaleke nomeya goshili. Onkee ano, natu mu panduleni omolwoshinima shoka. Natu kaleni twa gwanenwa kokukala megumbo lyaJehova sigo aluhe, ihe haule wokathimbo kowala.”

AAKRISTE OYA SIMANEKA OOHAPU DHAKALUNGA

Omumwatate David Splane, oshilyo shOlutuwiliki, oye a landula ko ta yelitha moshipopiwa she kutya Aakriste yashili oya kala aluhe ya simaneka Oohapu dhaKalunga. Oya li ye dhi inekela, nodha li dhe ya kwathele ya kandule po uupyakadhi wepitotanda omimvo 2000 nasha dha pita. (Iil. 15:16, 17) Ihe omimvo 1900 nasha dha pita, yamwe mboka hayi iti Aakriste, mboka ya longwa uufilosofi wOshigreka oya li ya tameka okukala ya lenga unene elongo ndyoka, shi vulithe Ombiimbeli. Konima yethimbo, yamwe yomuyo oya pingene po elongo lyOmbiimbeli nomalongo giifundja ngoka ya longwa kaasita yoongeleka nokaapangeli Aaroma. Shoka osha humitha komeho omalongo ogendji giifundja.

Omumwatate Splane okwa yelitha kutya kombanda yevi otaku ka kala aluhe Aakriste yashili aagwayekwa, taya popile oshili ngaashi sha popiwa meyele lyaJesus. (Mat. 13:24-30) Itatu vulu lela okutya oolye. Ihe omimvo omayuvi dha pita opwa kala aantu oyendji mboka ye li ompinge nomaitaalo nosho wo nomalongo ngoka kaage li paMbiimbeli. Yamwe yomuyo, ongaashi Omubisofi omukuluntu, Agobard gwokuFulaanisa, a li ko momumvo 779-840, Peter gwokuBruys, Henry gwokuLausanne, Valdès (nenge Waldo) ngoka a li ko omimvo 900 nasha dha pita, John Wycliffe a li ko lwomo 1330-1384, William Tyndale a li ko lwomo 1494-1536, Henry Grew a li ko 1781-1862 naGeorge Storrs a li ko 1796-1879. Sigo okunena Oonzapo dhaJehova odha lenga omithikampango dhOmbiimbeli nodhe yi tala ko yi li onzo yoshili. Onkee ano, Olutuwiliki olwa hogolola oohapu dhaJesus ndhoka tadhi ti: “Oohapu dhoye odho oshili” dhi kale enyolo lyomumvo 2012.

OMALUNDULUKO OMAWANAWA NGOKA GA NINGWA MOSIKOLA YOPAMBIIMBELI

Omumwatate Anthony Morris, oshilyo shOlutuwiliki, okwa li a tseyitha omalunduluko ngoka ga ningwa mosikola yokudheula aatumwa naakokolindjila yi ikalekelwa. Okutameka muSeptemba 2012, otapu ka hogololwa iilongo yontumba moka tamu kala hamu ningilwa Osikola yOmbiimbeli yOkudheula Aaihokani Aakriste. Opwa ningwa omalunduluko mOsikola yaGilead. Okutameka muKotoba gwomumvo gwa yi, ayehe mboka ya li nale koGilead, oya li nale miilonga yontumba yi ikalekelwa yethimbo lyu udha, yamwe oya li aatumwa nonando kaya li kosikola yaGilead, aakokolindjila yi ikalekelwa, aatonateli aayendi nenge Aabetel. Mboka ya mana osikola otaya ka longithwa okukala taya tsu omukumo nokuladhipika ooitaali ooyakwawo nosho wo okutalela po iitayimbelewa. Yamwe otaya ka ninga aatonateli aayendi nenge ya ka tumwe miilando moka mu na aantu oyendji, opo ya ladhipike omagongalo ga kale taga uvitha nuulaadhi.

Otapu ka kala wo aakokolindjila yi ikalekelwa yopokathimbo notaya ka longa miitopolwa yokuushayi naambyoka yi ilile. Okutameka me 1 Januali 2012, mboka ya mana Osikola yOmbiimbeli yOkudheula Aamwatate Inaaya Hokana nosho wo Osikola yOmbiimbeli yOkudheula Aaihokani Aakriste oya langekwa po ye li aakokolindjila yi ikalekelwa yopokathimbo ya longe nokutamununa mo uukalele miitopolwa yokuushayi. Otaya vulu okukala aakokolindjila yi ikalekelwa uule womumvo gumwe sigo omimvo ndatu. Mboka taye shi enditha nawa otaya vulu okulangekwa po ye li aakokolindjila yi ikalekelwa taya kalelele.

Okugongala kwokomumvo hoka kwa ningwa mo 2011, okwa li ku tuntula. Jehova ota ka yambeka iilonga yokuuvitha nuulaadhi mbyoka tayi simanekitha edhina lye noku mu tanga. Ota humitha wo komeho uukumwe woshigwana she.

[oshimpungu/Omathano pepandja 18, 19]

OSHO TWE YA TSEYA NAWA

Pokugongala mpoka opwa li wo aaselekadhi omugoyi, mboka aasamane yawo ya li iilyo yOlutuwiliki nayatano yomuyo oya li ya pulwapulwa. Aamwameme oyo Marina Sydlik, Edith Suiter, Melita Jaracz, Melba Barry naSydney Barber. Oya li ya hokolola nkene yi ilongo oshili nonkene ya yi miilonga yethimbo lyu udha. Kehe gumwe okwa li a hokolola iinima iiwanawa mbyoka a ninga, mbyoka ya ningwa komusamane gwe nosho wo omalaleko nuuyamba ngoka ya mona pamwe naasamane yawo. Konima yomapulapulo, aakalipo oya li yi imbi eimbilo 86, li na oshipalanyolo: “Ovakainhu ovadiinini, ovamwameme Ovakriste.”

[omathano]

(Pombanda) Tate Daniel nameeMarina Sydlik; tate Grant nameeEdith Suiter; tate Theodore nameeMelita Jaracz

(Pevi) Tate Lloyd nameeMelba Barry; tate Carey nameeSydney Barber

[Okaalita pepandja 16]

(Opo wu mone nkene uuyelele wu unganekwa, tala oshileshomwa)

Iitayimbelewa ihamano mbyoka ya hengumukile mumwe noshitayimbelewa shaMeksiko

MEKSIKO

GUATEMALA

HONDURAS

EL SALVADOR

NICARAGUA

KOSTA RIKA

PANAMA

[Ethano pepandja 17]

Oombelewa oonene dhOonzapo dhaJehova moWarwick, New York osho dha thanekwa dhi ka kale ngaaka