Aakuluntugongalo, mbela otamu ka talaleka ngaa “omwenyo gwa loloka”?

Angela,a omumwameme inaa hokanwa ngoka e na oomvula 30 nasha, okwa tila kashona. Okwa tegelela aakuluntugongalo. Otaye ya ya popye naye shike? Eeno shili, okwa faula okugongala lwiikando oshoka oha kala a lolodhwa kiilonga yesiku yokutonatela aakulupe. Kakele komaipulo ge gakwalukehe, oha kala ti ipula noonkondo nuukolele wameme gwe.

Mbela ando owu talele po Angela, ando oto ka ladhipika ngiini ‘omwenyo nguka gwa loloka’? (Jer. 31:25, OB-1954) Oshinima shotango, oto ki ilongekidha ngiini mbela opo wu ka ninge etalelopo lyuusita tali talaleke?

DHILADHILA KOONKALO DHOMUMWAHO

Omathimbo gamwe, atuheni ohatu loloka omolwiilonga yetu yokwiikongela omboloto nenge molwiinakugwanithwa yopakalunga. Pashiholelwa, omupolofeti Daniel okwa li a “tyololoka” sho a mono emoniko ndyoka a li kuu uvite ko. (Dan. 8:27) Okwa li a kwathelwa sho omuyengeli Gabriel e mu ihololele. Omutumwa gwaKalunga okwa li e mu kwatha u uve ko omahunganeko, e mu shilipaleke kutya Jehova oku uva omagalikano ge, nokwe mu lombwele kutya ‘oku holike’ natango. (Dan. 9:21-23) Pompito yilwe, oohapu oombwanawa dha hogololekekeka dha tya ngaaka dha popiwa komuyengeli gulwe odha li dha nkondopaleke omupolofeti ngoka a loloka. — Dan. 10:19.

Sha faathana, manga inoo ka talela po omwiitaali omukweni ngoka tashi vulika a loloka nenge a teka omukumo, kutha ethimbo wu dhiladhile kombinga yoonkalo dhe. Oku na omaupyakadhi gashike? Omaupyakadhi ngoka otashi vulika tage mu lolodha shi thike peni? Oku na iikala iiwanawa yini? Omumwatate Richard ngoka a kala omukuluntugongalo uule woomvula dhi vulithe po 20 okwa ti: “Ohandi gandja aluhe eitulomo kwaashoka omumwatate ha vulu okuninga.” Okwa gwedha ko a ti: “Mokukonakona nuukeka oonkalo dhawo manga inaandi ke ya talela po ohashi ningile ndje oshipu ndi mone nkene tandi ke ya pa eladhipiko ndyoka lya pamba onkalo yawo ndjoka.” Ngele omukuluntugongalo gulwe ota yi pamwe nangoye, omolwashike itaa mu kundathana pamwe onkalo yomumwatate ngoka?

SHI NINGA OSHIPU KOMUMWAHO A KALE A MANGULUKA

Otashi vulika to shi zimine kutya okulombwela gulwe omaiyuvo goye otaku vulu oku ku ningitha wu kale wa sa ohoni. Pashiholelwa, omumwaho otashi vulika a kale e wete oshidhigu okupopya a mangulukila aakuluntugongalo mboka taye mu talela po. Ongiini nduno to vulu okusinda uumbanda wokutameka oonkundathana? Okwiimemeha noku mu shilipaleka otaku vulu okweeta iizemo iiwanawa. Omumwatate Michael ngoka a kala omukuluntugongalo uule woomvula dhi vulithe po 40, olundji oha tameke etalelopo lye noohapu ndhika ta ti: “Owu wete, shimwe shomuuthembahenda uuwanaweelela womukuluntugongalo osho okutalela po aamwatate momagumbo gawo noku ya tseya nawa. Onkee ano, onda kala nda tegelela nondjuulukwe oku ku talela po esiku ndika lyonena.”

Oto vulu okuhogolola wu tameke negalikano petameko lyetalelopo. Momagalikano ge, omuyapostoli Paulus okwa li ha dhimbulukwa aluhe eitaalo, ohole, neidhidhimiko lyaamwahe. (1 Tes. 1:2, 3) Mokupopya nkene wu uvitile uukwatya uuwanawa womumwaho, oto longekidha omutima gwoye nogwe opo mu ka kale mu na oonkundathana tadhi tungu. Oohapu dhoye otadhi vulu wo okwaaludha omutima. Ray omukuluntugongalo a pyokoka okwa ti: “Omathimbo gamwe, atuhe ohatu dhimbwa iilonga iiwanawa mbyoka twa ninga. Onkee ano, uuna gumwe e tu dhimbulukitha shoka twa ninga, ohashi talaleke oomwenyo dhetu.”

GANDJA OMAGANO GOPAMBEPO

Ngaashi Paulus, oto vulu okugandja ‘omagano gopambepo’ mokutopolelathana nayalwe shoka shi li mOmanyolo, nokuli nando ovelise yimwe ayike. (Rom. 1:11) Pashiholelwa, omumwatate ngoka a polimana otashi vulika a kale u uvite kee na oshilonga, ngaashi omupisalomi ngoka a li i iyeleke ‘nompunda yomaviinu ya kukuta yi li molwithi.’ (Eps. 119:83, 176) Konima ngele wa yelitha paufupi shi na ko nasha naashoka, oto vulu nduno okuulika kutya owu na einekelo kutya omumwaho ‘ina dhimbwa’ iipango yaKalunga.

Sha faathana, mbela eyele lyoshimaliwa shimwe oshisiliveli shoka sha kana itali vulu okukwathela omumwameme ngoka a za mo megongalo nenge ta shongola? (Luk. 15:8-10) Oshimaliwa shoka sha kana otashi vulika shi kale oshitopolwa shokalyenge komothingo kondilo hoka ka ningwa niimaliwa iisiliveli oyindji. Mokukundathana naye eyele ndyoka, ota vulu okukwathelwa a mone kutya oku li oshilyo shegongalo lyopaKriste shi na ongushu. Konima yokukundathana oshinima shoka, oto vulu okutsa omuthindo nkene Jehova e na ko nasha naye e li kamwe komuunzi we.

Olundji ooitaali ooyakwetu ohaya nyanyukilwa okupopya nkene yu uvite kombinga yaashoka Ombiimbeli tayi ti. Ano ino kala owala ongoye to popi. Ngele wa lesha enyolo ndyoka lya pambathana nonkalo ndjoka Omukriste e li, oto vulu okutotha mo iitya nenge iintokotumbulo mbyoka ya simanenena ngoye to pula a ninge etyokosha kuyo. Pashiholelwa, ngele mwa lesha 2 Aakorinto 4:16, omukuluntugongalo ota vulu okupula ta ti: “Mbela owa mona paumwene nkene Jehova ha ningi omuntu gwoye gwomeni omupe?” Okuninga oonkundathana momukalo nguka otaku vulu oku mu ningitha mu ‘tsaathane omukumo’ shili. — Rom. 1:12.

Otashi vulika wo wu talaleke omwiitaali omukweni mokukundathana kombinga yagumwe ngoka a popiwa mOmbiimbeli ngoka a li monkalo ya fa ye. Omuntu ngoka e wete a fa kee na etegameno lyasha ota vulu okukala monkalo ya fa ndjoka mwa li Hanna nenge Epafroditus mboka omathimbo gamwe ya li ya polimana ihe oya kala ye na ongushu momeho gaKalunga. (1 Sam. 1:9-11, 20; Fil. 2:25-30) Omolwashike itaamu kundathana iiholelwa yimwe iiwanawa yopaMbiimbeli uuna onkalo tayi shi pitike?

TSIKILA OKUKALA WU NA OHOKWE MUYE

Oto vulu okuulika kutya owu na ko nasha shili nomumwaho nosho wo nomumwanyoko mokutsikila okukala wu na ohokwe muye konima yetalelopo. (Iil. 15:36) Sho to hulitha etalelopo lyoye, oto vulu wu ninge oshilage wu ka longe naye muukalele. Uuna omumwatate Bernard, omukuluntugongalo a pyokoka, a tsakanene ishewe nomumwatate nenge nomumwameme ngoka opo a li a talele po, ohashi vulika a pule nekotoko kombinga yomayele ngoka e mu pele ta ti: “Te tii, oshe enda ngaa nawa?” Mokuulika kutya owu na ohokwe, oto ka vula okumona ngele okwa pumbwa ekwatho lya gwedhwa po.

Shi vulithe nale, aamwatate naamwameme oya pumbwa okukala yu uvite kutya oye niwe nayo, oyu uvitikiwe ko noye holike. (1 Tes. 5:11) Onkee ano, manga inoo ninga etalelopo lyuusita, kutha ethimbo wu dhiladhile konkalo yomumwaho. Onkalo ndjoka yi kaleka momagalikano. Hogolola omanyolo ngoka taga opalele. Opo nduno oto ka mona oohapu tadhi opalele ndhoka tadhi talaleke “omwenyo gwa loloka”!