3 Nkene tu na okwiidhidhimikila omaupyakadhi

Opu na omaupyakadhi gamwe mongashingeyi itaaga vulu okuyandwa nenge okukandulwa po. Pashiholelwa, ngele owa silwa nenge wu na uuvu woshinamenena, owu na owala okwiidhidhimika, oshoka ku na sho to vulu okuninga po. Mbela Ombiimbeli otayi vulu oku ku kwathela moonkalo ndhoka oondhigu?

UUVU WOSHINAMENENA

Rose ota ti: “Ondi na omukithi ngoka nda thigulula pevalo, hagu etele ndje aluhe uuwehame uunene. Onkalamwenyo yandje kayi na we oshilonga.” Oshinima shimwe shoka a kala hi ipula nasho unene osho kutya omathimbo gamwe ka li ha vulu okugandja eitulomo sho ta konakona Ombiimbeli niinima yilwe yopambepo. Ihe okwa kwathelwa lela koohapu dhaJesus dhi li muMateus 19:26 tadhi ti: “Kalunga iha nyengwa kusha.” Rose okwa tseya kutya opu na omikalo odhindji dhokukonakona. Molwaashoka uuwehame owa li hawu shi ningi oshidhigu kuye okulesha, okwa tameke okupulakena kiikwamawi yOmbiimbeli noyiileshomwa yopaMbiimbeli.a Ota ti: “Ando iikwamawi mbyoka kaya li po, ando kandi shi kutya ekwatathano lyandje naKalunga olya tya ngiini.”

Uuna Rose a yemata, molwaashoka itaa vulu we okuninga iinima ngaashi nale, oha hekelekwa koohapu dhi li mAakorinto aatiyali 8:12 tadhi ti: “Ngele omu na ehalo ewanawa lyokugandja, nena Kalunga ota taamba omagano ngoka tamu gandja pamuthika mpoka mu thike, haampoka mwaa thike.” Oohapu ndhoka ohadhi dhimbulukitha Rose kutya Kalunga okwa hokwa shoka ta ningi, oshoka ota ningi shi thike pokuvula kwe.

OLUHODHI

Delphine ngoka a popiwa metetekelo ota ti: “Sho omumwandjekadhona gwomimvo 18 a mana oondjenda, osha li she ehameka ndje noonkondo, nokanda li we ndi wete tandi vulu okukala nomwenyo. Onkalamwenyo yandje itayi ka kala we ngaashi ya li.” Nonando ongaaka, okwa hekelekwa koohapu dhEpisalomi 94:19, moka omupisalomi a lombwele Kalunga a ti: “Uuna nda tila nonda sa iimpwiyu, oto hekeleke ndje e to nyanyudha ndje.” Delphine ota ti: “Onda galikana Jehova a kwathele ndje ndi ninge iinima mbyoka tayi vulu okuhekeleka ndje.”

Okwa kala i ipyakidhila niilonga yokwiiyamba. Mokweendela ko kwethimbo, okwi ifaathanitha noopena dhaanona dhokumbapeka ndhoka dha teka, ihe otadhi vulu okulongithwa natango. Sha faathana, nonando okwa li a teka omukumo, okwa mono kutya ota vulu natango okukwathela yalwe. Okwa ti: “Onda mono kutya uuna tandi longitha omakotampango gOmbiimbeli nomanyolo galwe ndi hekeleke mboka handi konakona nayo Ombiimbeli, Jehova oha talaleke ndje noha hekeleke ndje komukalo ngoka.” Okwa nyola omadhina gaamboka ya popiwa mOmbiimbeli ya pita moonkalo oondhigu dhinikitha oluhodhi. Okwa ti: “Onda mono kutya nayo oya li haya galikana.” Okwi ilongo wo kutya “oto vulu owala okwiidhidhimika ngele to lesha Ombiimbeli.”

Okukonakona Ombiimbeli okwa longa Delphine oshinima shilwe ishewe kutya oku na okugandja eitulomo konakuyiwa, ihe hakonakuziwa. Etegameno ndyoka lya popiwa mIilonga 24:15 ohali mu hekeleke. Otali ti: “Kalunga ota ka yumudha aantu ayehe kuusi, naawanawa naawinayi.” Mbela oku na ngaa uushili kutya Jehova ota ka yumudha omwanakadhona? Ota yamukula ta ti: “Ohandi kala nda fa ndi wete omumwandje monakuyiwa. Esiku ndyoka tatu ki imona olya longekidhwa nale, oshoka Tate okwe li nyola mokalindeli ke. Ondi iwete tu li pamwe moshikunino shetu, ndi mu wete nondi mu hole naanaa ngaashi sha li esiku a valwa.”

a Iikwamawi oyindji mbyoka, otayi adhika kepandja lyokointaneta, jw.org.

Ombiimbeli otayi vulu oku ku hekeleka nomomathimbo omadhigu

KALUNGA OHE TU KWATHELE NGIINI?

Ombiimbeli otayi yamukula sha yela tayi ti: “Omuwa oku li popepi naayehe mboka taye mu ithana, naamboka taye mu galikana moshili. Mboka haye mu simaneke, ote ya pe ashihe shoka ye shi pumbwa, notu uvu omaindilo gawo e te ya hupitha.” (Episalomi 145:18, 19) Oohapu ndhika itadhi nyanyudha tuu omutima! Mbela Kalunga oha yamukula ngiini omagalikano gaamboka haya kongo ewiliko kuye?

OMOKU TU PA OONKONDO:

Olundji omaupyakadhi ohage tu teya omukumo noku tu lolodha palutu, pamadhiladhilo nopambepo. (Omayeletumbulo 24:10) Ihe Jehova ota “tsu omukumo oonakuvulwa naamboka yaa na oonkondo, oonkondo dhawo ote dhi indjipaleke odhindji.” (Jesaja 40:29) Omuyapostoli Paulus ngoka a li i idhidhimikile omahepeko ga kwata miiti, okwa ti: “Ngame otandi vulu shaa shoka, oshoka [Kalunga] ota koleke ndje.” (Aafilippi 4:13) Paulus okwa li a nkondopalekwa kombepo ondjapuki yaKalunga. Nangoye oto vulu okupula Kalunga e yi ku pe. — Lukas 11:13.

OMOKU TU PA OONDUNGE:

Ongiini ngele owa pumbwa ekwatho wu uve ko omayele gOmbiimbeli nowu ga tule miilonga? Omulongwa Jakob okwa nyola a ti: “Ngele oku na gumwe gwomune a pumbwa oondunge, ne dhi indile kuKalunga, oye note dhi mu pe. Oshoka Kalunga ke shi omundalapata, ihe oha pe ayehe nopwaa na omanyenyeto.” (Jakob 1:5) Oto vulu okukala metsokumwe nomagalikano goye mokulesha Ombiimbeli nomokutula miilonga shoka tayi longo. (Jakob 1:23-25) Ngele owe shi ningi, oto ka mona kutya omayele gayo ogopandunge.

OMOKU TU PA OMBILI:

Jehova ota vulu oku ku kwathela wu kale wa ngungumana, nokuli nuuna wu na oshimpwiyu sha pitilila. Oohapu dhe otadhi ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.” (Aafilippi 4:6, 7) Omolwashike itoo pula Jehova e ku kwathele wu kale wu na ombili?

Ongiini ngele omaupyakadhi goye inaga kandulwa po nziya? Ino thika pehulithodhiladhilo kutya Kalunga okwe ku thiga po. Ota vulu oku ku pa uulaadhi noonkondo wu idhidhimike, nokuli nonando omaupyakadhi otaga tsikile. (1 Aakorinto 10:13) Ombiimbeli oyu uvaneka wo kutya ethimbo otali ke ya uuna omaupyakadhi getu agehe taga ka kandulwa po sigo aluhe.