Uuna pwa holoka iiponga yopaunshitwe
NGELE owa hupile nale moshiponga shopaunshitwe, otashi vulika wu uvite ko nkene mboka haya hupu mo haya kala yu uvite. Ohaya kala ya haluka, itaaye shi itaale, ya ngwangwana, ya gwililwa po nohaya ningi omayambandjodhi. Oyendji ohaya kala ya teka omukumo noya vulwa noihaya kala we ye uvite taya vulu okuninga sha.
Ngele nangoye owa kanithila iinima yoye ayihe moshiponga shopaunshitwe, otashi vulika wu uvite itoo vulu we okwiidhidhimikila onkalo ndjoka nowu uvite ye ku gwilila po. Otashi vulika nokuli wu tameke okudhiladhila kutya onkalamwenyo yoye kayi na we eityo. Ihe nando ongawo, Ombiimbeli otayi yelitha kutya onkalamwenyo yoye oyi na oshilonga nonokutya oto vulu okukala wu na etegameno kutya monakuyiwa oto ka kala nonkalamwenyo ombwanawa.
OSHILI YOMBIIMBELI OHAYI TU PE ETEGAMENO
Omuuvithi 7:8 otayi ti: “Ehulilo lyoshinima oli vule etameko lyasho.” Ngele opo wa zi moshiponga shopaunshitwe, oho kala wa teka omukumo. Ihe ngele owa longo nuudhiginini, onkalamwenyo yoye otayi ke enda tayi hwepopala.
Ombiimbeli oya hunganeka ethimbo uuna ‘itaapu ka kala we elilagano nenge ewi lyonkugo.’ (Jesaja 65:19) Shika otashi ka ningwa shili sho evi tali ka ninga oparadisa kohi yUukwaniilwa waKalunga. (Episalomi 37:11, 29) Itapu ka kala we iiponga yopaunshitwe. Aantu itaya ka dhiladhila we kiinima iinyanyalithi mbyoka ya li ya ningilwa, molwaashoka Kalunga Omunankondoadhihe oku uvaneka kutya “iiningwanima yonale otayi ka dhimbiwa thiluthilu.”— Jesaja 65:17.
Dhiladhila owala kutya Omushiti okwe tu uvanekela ‘oku tu pa onakuyiwa netegameno,’ ano onkalamwenyo yombili kohi yUukwaniilwa we. (Jeremia 29:11) Ngele owu shi oshili ndjika, otayi vulu lela oku ku kwathela wu kale wu na onkalamwenyo tayi ti sha. Sally ngoka a popiwa moshitopolwa sha zi ko, ota ti: “Okudhiladhila kombinga yiinima ayihe iiwanawa mbyoka Uukwaniilwa waKalunga tawu ke tu ningila monakuyiwa, otaku tu kwathele kaatu kale we tatu dhiladhila unene kiinima iiwinayi mbyoka ya ningwa po notu vule okwiidhidhimikila oonkalo ndhoka tu li mudho.”
Mbela ino hala okwiilonga oshindji kombinga yaashoka Uukwaniilwa waKalunga tawu ka ningila aantu masiku? Ngele owe shi ningi, oto vulu okukala wu na einekelo kutya, nonando owa mona iihuna omolwiiponga yopaunshitwe, oto vulu okukala wu na onkalamwenyo tayi ti sha ngashingeyi, manga wa tegelela nondjuulukwe onakuyiwa kaayi na iiponga yopaunshitwe. Ombiimbeli otayi gandja omayele omawanawa ngoka tage ku kwathele wu idhidhimikile iilanduliko mbyoka hayi etithwa kiiponga yopaunshitwe ngashingeyi. Natu tale kiiholelwa yimwepo.