Uuna kuume koye kopandjokana a ya pondje

Maria gwokoSpania okwa ti: “Onda li nda hala okusa sho omusamane gwandje a lombwele ndje kutya ota thigi ndje po, oshoka okwa mona po omukiintu gumwe omugundjuka. Onda li ndi wete kutya shoka ta ningi kashi li pauyuuki, unene tuu ngele tandi dhiladhila komaiyambo agehe ngoka nde mu ningila.”

Bill gwokoSpania okwa ti: “Sho omukulukadhi gwandje a etha ndje, onda li ndi uvite nda fa nda sa uukangambungu. Ashihe shoka twa li twa lalakanena, twa tegamena notwa pangela okuninga kasha li we tashi ka ningwa. Omathimbo gamwe onda li ngaa handi kala itaandi ipula unene kombinga yasho, ihe onda li handi iyadha ishewe nda polimana.”

NGELE kuume kopandjokana a yi pondje, ohashi ehameke noonkondo. Ookuume kopandjokana yamwe ohaya tokola ya dhimine po kuume kawo kopandjokana ngoka i iyela ombedhi e taya kala ishewe ye na ekwatathano ewanawa.a Kutya nduno ondjokana oya teka nenge inayi teka, mboka ye na ookuume kawo kopandjokana ya ya pondje ohashi ya ehameke noonkondo. Ongiini mboka ye shi ningilwa taya vulu okwiidhidhimikila onkalo ndjoka yi ehameka?

OMANYOLO NGOKA TAGA VULU OKU KU KWATHELA

Ookuume kopandjokana oyendji mboka kaaye na ondjo ohaya hekelekwa komanyolo, nonando oya kale ya yemata noonkondo. Oya mona kutya Kalunga oku wete omahodhi gawo noku yu uvitile uukwawo wanankali.— Maleaki 2:13-16.

“Uuna nda tila nonda sa iimpwiyu, oto hekeleke ndje e to nyanyudha ndje.”— Episalomi 94:19.

Bill okwa ti: “Uuna tandi lesha omanyolo, ohandi kala ndi wete Jehova ta hekeleke ndje, a fa tate omunalukeno.”

“Ongoye omwiinekelwa mokukalathana naamboka ye ku inekela.”— Episalomi 18:25.

Carmen ngoka omusamane gwe a kala ha yi pondje uule woomwedhi dhontumba, okwa ti: “Omusamane gwandje ka li omudhiginini kungame. Ihe onda li ndi na einekelo kutya Jehova ota ka kala omudhiginini kungame. Ke na siku a ka yemateke ndje.”

“Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni.”— Aafilippi 4:6, 7.

Sasha okwa ti: “Oovelise ndhoka onde dhi lesha lwiikando. Sho nda kala nokugalikana olwindji, Kalunga okwa pe ndje ombili monkalamwenyo.”

Ayehe mboka ya popiwa metetekelo, omathimbo gamwe oya li haya kala ya hala okusholola. Ihe oya kala yi inekela muJehova Kalunga noya lesha Oohapu dhe ndhoka dhe ya tsu omukumo. Bill okwa ti: “Eitaalo olya kwathele ndje ndi kale nonkalamwenyo tayi ti sha, nonando iinima kaya li tayi ende nawa. Nonando uule wethimbo onda li ‘nde ende mesilu lyomilema thokothoko,’ Kalunga okwa li pamwe nangame.”— Episalomi 23:4.

a Opo wu mone uuyelele wu na ko nasha nangele owu na okudhimina po kuume ngoka a ya pondje nenge aawe, lesha iitopolwa yi na oshipalanyolo “Uuna kuume kopandjokana a yi pondje,” mo-Awake! yomasiku 22 Apilili 1999.

Shoka sha kwathela yamwe yi idhidhimike

Tedhatedha komanyolo ngoka taga vulu oku ku hekeleka.

Bill okwa ti: “Tango onda lesha embo lyaJob, opo ihe Omapisalomi, nonda ndhindhilike oovelise adhihe ndhoka ndi wete tadhi opalele onkalo yandje. Onda li nda mono kutya aanyoli yOmbiimbeli mbaka oya li ye na uuwehame niimpwiyu ngaashi ngame.”

Mona ehekeleko mokupulakena komusika.

Carmen okwa ti: “Uuna nda londokwa koomposi, onda li handi pulakene komusika. Oya li hayi hekeleke ndje lela.” Ye Daniel okwa ti: “Onda li ndi ilongo okudhenga oshiketala nomusika oya li hayi kwathele ndje ndi kale ndu uvite ombili.”

Lombwela yalwe nkene wu uvite.

Daniel okwa ti: “Kanda li ndi igilila okulombwela yalwe omaiyuvo gandje. Ihe onda li ndi na ookuume aawanawa mboka nda li handi popi nayo esiku kehe. Onda li handi ya lombwele nkene ndi uvite, kutya nduno omoontumwafo nenge opakana. Shoka osha li sha kwathela ndje tuu shili.” Sasha okwa ti: “Ekwatho ndyoka nda pewa kuyaandjetu olya li lya kwathela ndje lela. Meme okwa li i ilongekidha aluhe okukwathela ndje. Uuna nda hala oku mu lombwela sha, okwa li aluhe ha pulakene. Tate naye okwa li a ningitha ndje ndi kale ndu uvite ohole nonda gamenwa. Okwa li a kwathele ndje ndi tye po hwepo nethimbo lyandje.”

Galikana aluhe.

Carmen okwa ti: “Onda li handi galikana ndaa na ezimbuko. Onda li handi kala ndi uvite Kalunga e li popepi nangame, ta pulakene ndje nota kwathele ndje. Sho nda li muudhigu, onda hedha popepi naye.”