Okukonga oshili
Okutseya oshili otaku vulu okuhupitha oomwenyo dhetu. Pashiholelwa, tala nkene onkalamwenyo yetu ya gumwa sho aantu ya mono eyamukulo kepulo ndika: Omikithi dhomukwawu ohadhi taandele ngiini?
Muule womimvo omayovi dha ka pita, kapu na ngoka a li e shi eyamukulo kepulo ndyoka. Onkee ano, omikithi ndhoka hadhi taandele meendelelo odha faalele oomwenyo dhaantu omamiliyona. Mokweendela ko kwethimbo, aanongononi oya ka mona oshili kutya omikithi ndhoka olundji ohadhi etwa koombuto dhuuvu oonshuunshuuka ngaashi oombakiteli. Oshili ndjoka oya kwathela aantu ya keelele nokupanga omikithi odhindji, shoka sha ningitha aantu omabiliyona ya kale nomwenyo ethimbo ele noye na uukolele.
Ongiini kombinga yomapulo galwe ga simana? Sho to dhiladhila, oshili kombinga yomapulo ngano otayi vulu oku ku kwathela ngiini?
Kalunga oye lye?
Jesus Kristus oye lye?
Oshilongo shaKalunga oshike?
Onakuyiwa otayi ka kala ya tya ngiini?
Aantu omamiliyona oya mona omayamukulo komapulo ngono noonkalamwenyo dhawo odha hwepopala. Nangoye oto vulu okumona mo uuwanawa momayamukulo ngoka.
OSHILI OTO VULU NGAA OKU YI MONA?
Otashi vulika wi ipule kutya, ‘Omuntu ota vulu ngaa okumona oshili kombinga yoshinima kehe?’ Okumona oshili kombinga yiinima oyindji, otaku ende taku dhigupala noonkondo. Omolwashike mbela?
Aantu oyendji inaya inekela omapangelo, oongeshefa, nenge iikundaneki yi ya lombwele oshili. Oshidhigu kuyo okuyoolola pokati koshili nomataloko gowala, oshili inayi ihwapo nosho wo iifundja iitokole mbyoka hayi popiwa ya fa uuyelele wu shi okwiinekelwa. Molwaashono aantu inaya inekelathana nosho wo kutya uuyelele owundji owiifundja, aantu ihaya itaale iinima mbyoka yoshili lela nankene oshili ndjoka tayi vulu oku ya kwathela.
Nonando opu na omashongo ngono, aantu otaya vulu okumona omayamukulo komapulo ga simanenena kombinga yonkalamwenyo. Ngiini mbela? Omokuninga iinima mbyoka ho ningi, opo wu mone omayamukulo komapulo galwe ngoka inaaga simana lela.
UUNA TO KONGO OSHILI
Poompito dhimwe, oho kongo oshili esiku kehe. Natu taleni koshiholelwa shaJessica. Okwa ti: “Okamwandjekadhona oha ka tameke taka ehama, uuna ka li oombundufukwa. Nonando oke dhi lolo owala kashuushuuka, otaka vulu okusa.” Jessica oha shilipaleke kutya iikulya mbyoka ta landa itayi etele okamwana oshiponga. Okwa ti: “Tango ohandi lesha nuukeka uumbapila wuuyelele mboka wa tulwa kiikulya, opo ndi mone kutya iinima yini ya tulwa mo. Ohandi kongo uuyelele wa gwedhwa po nokukwatathana nofaabulika, opo ndi shilipaleke kutya miikulya mbyoka inamu ya sha sha nika oombundufukwa. Ohandi kongo wo uuyelele koonzo dhi shi okwiinekelwa, opo ndi kale ndi na uushili kutya oofaabulika ndhono ohadhi longekidha iikulya yadho momukalo gwa gamenwa.”
Otashi vulika momukalo moka ho kongo uuyelele woshili esiku kehe inaagu kitakana ngaashi gwaJessica. Ihe ngaashi ye, opo wu mone omayamukulo komapulo ngoka wu na, oto vulu okulongitha omikalo tadhi landula:
Konga uuyelele wi ihwapo.
Ninga omapekapeko ga gwedhwa po.
Shilipaleka kutya oonzo dhoye odhi li paushili.
Omukalo nguka otagu vulu wo oku ku kwathela wu mone omayamukulo gomapulo ga simanenena kombinga yonkalamwenyo. Ngiini mbela?
EMBO LYUUYELELE WASHILI LI IKALEKELWA
Uuna ta kongo oshili yomOmbiimbeli, Jessica oha longitha omukalo gwa faathana naangoka ha longitha uuna ta kongo uuyelele kombinga yiikulya yokamwanakadhona. Okwa ti: “Okulesha nuukeka nokuninga omapekapeko nuudhiginini, okwa kwathela ndje ndi mone oshili ndjoka yi li mOmbiimbeli.” Ngaashi Jessica, aantu oyendji oya mona omayamukulo mOmbiimbeli kombinga yomapulo taga landula:
Omolwashike tu li kombanda yevi?
Oshike hashi ningwa po peso?
Omolwashike tatu mono iihuna?
Kalunga ota ka ninga po shike, opo a hulithe po okumona iihuna?
Ongiini tatu vulu okukala tu na ombili megumbo?
Oto vulu okumona omayamukulo ge li paushili komapulo ngaka nokugalwe ga gwedhwa po mokulesha Ombiimbeli nomokuninga omapekapeko ga gwedhwa po kepandja lyetu lyokointaneta, www.jw.org.