Natu tungathaneni manga tu li muukalele
1 Atuheni ohatu pandula eladhipiko ‘lyoohapu tadhi popiwa pethimbo lyo opala.’ (Omayel. 25:11) Ngele tatu longo nayalwe muukalele, ongiini tatu shilipaleke kutya oonkundathana dhetu otadhi ya ladhipike?
2 Oonkundathana tadhi tungu: Itashi tungu tuu uuna moonkundathana dhetu tatu kwatele mo iinima yopambepo manga tu li miilonga yokuuvitha! (Eps. 37:30) Otatu vulu okupopya kombinga yaashoka tatu ka popya nenge tu hokolole iimoniwa yomiilonga yomomapya mbyoka opo twa mono. (Iil. 15:3) Mbela otwa mona mo oshitsa tashi hokitha mekonakono lyOmbiimbeli lyopaumwene, miifo mbyoka opo ya piti nenge pokugongala kwegongalo? Otashi vulika tu kundathane iitsa mbyoka opo tu uvu moshipopiwa shomontaneho kOshinyanga shUukwaniilwa.
3 Otashi vulika twa teka omukumo sho omunegumbo e tu yamukula komukalo tagu uvitha nayi. Konima ngele twa zi po oshi li nawa okukundathana naangoka tatu longo pamwe naye nkene tatu vulu okuungaunga nonkalo ya tya ngaaka monakuyiwa, tashi vulika mokukonga uuyelele membo Reasoning. Ngele otwa pandula oonkundathana ndhoka dha ningwa kwaangoka tatu longo pamwe naye, otatu vulu oku mu ladhipika moku mu pandula tashi zi komutima.
4 Katuka onkatu: Mbela opu na gumwe mongundu yetu yekonakono lyembo twe etha nale okulonga pamwe naye? Oku mu pula tu ka longe pamwe naye muukalele otashi vulu okukala ‘etsaathano omukumo.’ (Rom. 1:12) Aakokolindjila yondjigilile naakwathelikokolindjila ohaya pandula ngele pu na gumwe ngoka ta longo pamwe nayo unene tuu ongula onene nenge kongulohi, ethimbo ndyoka hashi vulika pu kale aauvithi kaaye shi oyendji muukalele. Otatu vulu okuyambidhidha aakokolindjila mokuya pamwe nayo muukalele. Mbela opu na omuuvithi ngoka uukolele we tawu mu imbi a longe ngaashi ta vulu muukalele? Ngele otwa ningi elongekidho opo a ye pamwe natse komukonakonimbiimbeli otashi vulu oku tu kwathela atuhe. — Omayel. 27:17.
5 Okupandula gumwe nokuli nomuunima uushona, ohaku tsu aluhe omukumo. Otu na oku shi kaleka momadhiladhilo uuna tatu longo nayalwe muukalele, molwaashoka otwa hala ‘okutungathana.’ — 1 Tes. 5:11, OB-1954.