Ekonakonombiimbeli lyopaumwene nosho wo lyuukwanegumbo olya simanenena
1. Olutuwiliki olu na ko nasha unene nashike ngashingeyi pethimbo lyetu, nomolwashike shi li ngawo?
1 Ngaashi naanaa sha li methelemumvo lyotango, Olutuwiliki olu na ko nasha lela nonkalonawa yoshigwana shaJehova. (Iil. 15:6, 28) Sho uudhigu uunene tawu ende tawu hedha popepi, osha simanenena opo omuuvithi kehe gwUukwaniilwa a kale nekwatathano lya kola naJehova. Ongiini to ka longitha ethimbo ndyoka lya li lyEkonakono lyEmbo? Atuheni otatu ladhipikwa tu longithe ethimbo ndika mokulongela Kalunga tu li uukwanegumbo. Ngele tatu longitha ethimbo ndika nawa otatu ka vula okukonakona muule Oohapu dhaKalunga dha nwethwa mo nokumona uuwanawa mudho. — Eps. 1:1-3; Rom. 11:33, 34.
2. Ekonakono lyopaumwene nolyuukwanegumbo lyokongulohi oli na okuunganekwa ngiini?
2 Ekonakono lyuukwanegumbo lyokongulohi: Omitse dhomaukwanegumbo otadhi ladhipikwa dhi humbate oshinakugwanithwa shadho koshipala shaJehova mokukala hadhi ningi ekonakono lyuukwanegumbo ihaali faula notali tungu. (Deut. 6:6, 7) Aamwatate naamwameme mboka inaaya hokana nokaye na iinakugwanithwa yuukwanegumbo, ethimbo ndyoka otaya vulu oku li longitha mokukonakona paumwene nokukonga uuyelele. Osha simanenena atuheni tu ‘longithe nawa ethimbo’ ndyoka mokukonakona nokutedhatedha opo tu kale nuupambepo wa kola mboka wa pumbiwa mokutaalela “omasiku ngaka omawinayi.” — Ef. 5:15, 16.
3, 4. Iileshomwa yini tatu vulu okulongitha, notu na okukala nelalakano lyashike?
3 Shoka tamu vulu okukonakona: Otamu vulu okukonakona uuyelele mboka wu li miileshomwa mbyoka yi li mOshiwambo. Omaukwanegumbo otaga vulu okukonakona iitopolwa mbyoka hayi holoka mOshungonangelo ngaashi “Owe shi tseya tuu?,” “Aaleshi yoshifo shetu taya pula” nosho wo “Shoka tatu ilongo kuJesus.” Mboka hayu uvu Oshiingilisa nawa otaya vulu okukonakona iitopolwa mbyoka yi li mo-Awake! ngaashi “Young People Ask.” Otaya vulu wo okulongitha o-Watch Tower Publications Index nenge o-Watchtower Library CD-ROM.
4 Kehe gumwe muukwanegumbo ota ka kwathelwa a dhimbulukwe noku tule miilonga omakotampango gopakalunga monkalamwenyo ye mokulesha Ombiimbeli nethimbo. (Heb. 4:12) Poompito dhimwe otamu vulu okutala nokukundathana okavidio kamwe komwaamboka wehangano. Opu na iileshomwa oyindji mbyoka tayi vulu okukonakonwa. Omolwashike itoo pula iilyo yuukwanegumbo woye shoka ya hala okukonakona?
5. Omolwashike ekonakono lyopaumwene nolyuukwanegumbo lyOmbiimbeli lya simanenena monkalamwenyo yetu ngashingeyi?
5 Omolwashike sha simana ngashingeyi: Okukala tu na ekwatathano lya kola naJehova otashi ke tu kwathela tu kale ‘twi ikolelela tse tu tale ehupitho ndyoka OMUWA te tu hupitha nalyo.’ (Eks. 14:13) Aavali oya pumbwa ewiliko lyopakalunga mokuputudha oyana “muuyuni mbuka u na aantu ya pilaala noya goyoka.” (Fil. 2:15) Aanona oya pumbwa ekwatho opo ya vule okuungaunga nonkalo yokwaahe na omikalo ndjoka tayi nayipala kunena kosikola. (Omayel. 22:3, 6) Oshi li nawa aaihokani ya koleke ekwatathano lyawo naJehova opo ya kale ngaashi “ongodhi ya yogohwa oondali ndatu.” (Omuuv. 4:12) Onkee ano, natu longithe nawa ethimbo ndyoka lya hupa ko tu itungile kekankameno ‘lyeitaalo lyetu eyapuki.’ — Jud. 20.