‘Elaka etoye oli na okuuvithwa!’
1. Otu shi shi ngiini kutya kapu na sha shoka tashi vulu okuya moshipala iilonga yokuuvitha?
1 Kapu na shoka tashi vulu okwiimba Jehova a gwanithe po ehalo lye. (Jes. 14:24) Nonando omutokolihapu Gideon naakwiita ye 300 oya li ya fa itaaya vulu okusinda etangakwiita lyAamidian 135 000, Jehova okwe mu lombwele a ti: ‘Mangulula Aaisraeli miikaha yAamidian, ongame tandi ku tumu.’ (Aatok. 6:14) Iilonga yini Jehova ha ambidhidha kunena? Jesus okwa ti: “Evaangeli ndika lyUukwaniilwa otali uvithilwa uuyuni auhe.” (Mat. 24:14, KB) Kapu na ngoka ta vulu okuya moshipala iilonga mbyoka.
2. Omolwashike tatu tile kutya Jehova ote ke tu kwathela pauhandimwe muukalele?
2 Jehova ohe tu kwathele pauhandimwe: Nonando otu na einekelo kutya Jehova ota ka kwathela oshigwana she shi li ongundu, otu shi wo kutya ote ke tu kwathela pauhandimwe. Paulus okwa li e shi mono kutya Jehova okwe mu ambidhidha okupitila mOmwana, Jesus. (2 Tim. 4:17) Otu na einekelo kutya Jehova ota ka yambeka pauhandimwe oonkambadhala dhetu ndhoka hatu ningi moku mu longela. — 1 Joh. 5:14.
3. Omomikalo dhini Jehova he tu kwathele?
3 Mbela iilonga mbyoka ho longo kehe siku ohayi ku vulitha e to kala itoo vulu we okuya muukalele? Ombiimbeli otayi ti: “Oye ta tsu omukumo oonakuvulwa.” (Jes. 40:29-31) Mbela oto hepekwa nenge to patanekwa? “Uudhigu woye u fala kOMUWA, oye te ku popile.” (Eps. 55:22) Opu na ethimbo limwe ho kala kuu na omukumo? Jehova ota ti: “Inda! Otandi ke ku popitha.” (Eks. 4:11, 12) Mbela owu na uunkundi wopalutu mboka hawu ku imbi wu kuthe aluhe ombinga muukalele? Jehova okwa lenga oonkambadhala ndhoka to ningi nomutima aguhe, kutya nduno oonshona shi thike peni. — 1 Kor. 3:6, 9.
4. Okukala neinekelo muJehova otashi tu inyengitha tu ninge shike?
4 Jehova okwa “taganeka okwooko kwe a geele, nokape na ngoka ta vulu oku mu kankeka.” (Jes. 14:27) Natu tsikile nopwaahe na okweetha okuuvitha “nuulaadhi oohapu dhOmuwa,” molwaashoka otu na einekelo kutya ota ka yambeka iilonga yetu yuukalele. — Iil. 14:3.