Ontumwafo ya za kolutuwiliki

Kaalongeli yaJehova ooyakwetu

Otwa nyanyukwa oku mu nyolela amuhe aapiya yaJehova aadhiginini naaholike mu vule ngashingeyi poomiliyona heyali. Uuna wa tsakanene nomwiitaali omukweni a za koshilongo shilwe oho kala wu na ekwatathano lyi ikalekelwa ndyoka tashi vulika ihoo kala naanaa wu na naamboka kaaye shi ooitaali ooyakweni. (Joh. 13:34, 35) Sho to lesha mo-Yearbook omahokololo ngoka ge na ko nasha neitaalo nuudhiginini waamwatate naamwameme miilongo yi ili noyi ili osha yela kutya oto ka mona kutya otu na shili ekwatathano ndyoka li ikalekelwa.

Oolopota ndhoka hatu mono okuza muuyuni auhe otadhi ulike kutya oyendji yomune ohamu ningi Elongelokalunga lyUukwanegumbo nopwaahe na okufaula. Mboka mu na aanona aashona ohamu longitha omikalo dhi ili nodhi ili opo mu kwathele aanona yeni ya kale yi itula mo. (Ef. 6:4) Aaihokani otaya tsikile okukwathelwa ya kale ye na ekwatathano lyopothingo shi vulithe nale noondjokana dhawo odha nkondopalekwa molwaashoka haya konakona pamwe. (Ef. 5:28-33) Oohandimwe nosho wo mboka ye li momaukwanegumbo ohaya mono uuwanawa omolwelongekidho ndika hali ya pe ompito yokukonakona muule Oohapu dhaKalunga. — Jos. 1:8, 9.

Otwa hala oku mu lombwela amuhe mboka mwa gumwa kiiponga yopaunshitwe yi ili noyi ili kutya otu mu uvitile uukwawo wanankali. Pompito ndjika natu pandule ayehe mboka ya li ya kutha ombinga nopwaahe na okwoongaonga mokukwathela mboka ya dhengwa kiiponga yopaunshitwe. (Iil. 11:28-30; Gal. 6:9, 10) Megongalo kehe omu na oyendji yomune mboka hamu kwathele yalwe painiwe nohamu ya kwathele nopwaahe na oku shi itangela. Ngaashi Dorkas ngoka a popiwa mOmbiimbeli, otamu longo ‘uuwanawa notamu kwatha oohepele.’ (Iil. 9:36) Kaleni mu na uushili kutya Jehova oku wete shoka hamu ningi note ke mu pa naanaa shi thike piilonga yeni. — Mat. 6:3, 4.

Miilongo yimwe uuthemba weni inawu simanekwa kwaamboka haya longitha nayi oveta yoshilongo opo ya “popile aakolokoshi.” (Eps. 94:20-22) Shaashi omu shi shi kutya Jesus okwa li a hunganeke kutya shika otashi ka ningwa, ohamu idhidhimike nomukumo nokwiinekela Jehova oye a kale omugameni gweni. (Joh. 15:19, 20) Kaleni nuushili kutya ohatu mu galikanene aluhe opo mu tsikile “okuyamukula kehe ngoka te mú pula okufatulula etegameno ndyoka li li mune.” — 1 Pet. 3:13-15.

Otatu mu pandula nomutima aguhe sho mwa kala aayogoki pamikalo oomvula noomvula notamu tsikile oku shi ninga nonando Satana ota longitha omakoto opo e tu nwethe mo nomikalo dha nyata. Ne ‘ohamu mono omukumo moonkondo dhOmuwa oonene’ nonando omithikampango dhi na ko nasha nomikalo odha hutuka muuyuni auhe. (Ef. 6:10) Molwaashoka ‘omwi ihomateka iikondjitho ayihe mbyoka Kalunga te yi mú pe’ ohamu vulu okukondjitha “omakotokelo omawinayi gomuhindadhi.” (Ef. 6:11, 12) Kaleni mu shi shi kutya Jehova ota longitha iiholelwa yeni opo a yamukule omuhindadhi, Satana. — Omayel. 27:11.

Otwa li twa nyanyukwa noonkondo okukundana kutya momumvo 2011 pEdhimbuluko lyeso lyOmuwa gwetu opwa li aantu 19 374 737. Omwaalu gwaamboka ya li pedhimbuluko ogwa li omunene ngaaka molwaashoka sho twe mu ladhipike mu kuthe uukwathelikokolindjila muApilili oyendji yomune omwa li mwe shi ningi. Aantu omamiliyona kombanda yevi oya li yu uvu nkene Oonzapo ndhoka dha li dha longo nuudhiginini tadhi hambelele Jehova dha hangana. (Rom. 10:18) Kutya nduno owa li gumwe gwomaauvithi 2 657 377 mboka ya li ya kutha uukwathelikokolindjila momwedhi ngoka nenge pamwe owa li owala wa longo shi vulithe shito, amuhe omwa li mwe tu nyanyudha noonkondo omolwombepo yeni yeiyambo naasho mwa longo nuulaadhi. — Eps. 110:3; Kol. 3:23.

Omumvo gwa yi, aantu 263 131 oya li yi yu ulike kutya oyi iyapulila Jehova sho ya ninginithwa. Otatu pandula Jehova notatu mu pandula wo amuhe sho mwe ya tu hiyeni yalwe, tatu tyeni: “‘Ila!’ Kehe ngoka tu uvu ko, na tye: ‘Ila!’ Kehe ngoka a sa enota, ne ye; naangoka a hala, na taambe omeya gomwenyo omagano.” (Eh. 22:17) Ngashingeyi otatu indile twa mana mo shi vulithe nale tatu ti, “Uukwaniilwa waKalunga nawu ye!” unene tuu sho opo twa kundathana koshigongi shoshitopolwa shomo-2011 kombinga yUukwaniilwa waKalunga mboka ngashingeyi wa dhikwa po megulu. Molwaashoka otwa gumwa noonkondo keshilipaleko lyaJesus sho a ti: “Ngame otandi ya mbala!” natse otatu popi ngaashi omuyapostoli Johannes tashi zi komutima tatu ti: “Eewa ano. Ila, Omuwa Jesus!” — Eh. 22:20.

Sho mwa tegelela oshiningwanima shoka shituntula, kaleni mu na uushili kutya otu mu hole amuhe aamwatate naamwameme aaholike mboka tamu ulike kutya omu hole Jehova ‘nohole yashili, ndjoka tayi iholola yo yene miilonga.’ — 1 Joh. 3:18.

Aamwaho

Olutuwiliki lwOonzapo dhaJehova