Uvithila momahala goongeshefa waa na uumbanda
1. Omolwashike kaatu na okuteka omukumo ngele ohatu kala tu na uumbanda wokuuvithila momahala goongeshefa?
1 Mbela oho kala wu na uumbanda wokuuvithila momahala goongeshefa? Ngele osho, ino teka omukumo oshoka Paulus ngoka a li omuuvithi ependa noku na uulaadhi okwa li naye a pumbwa ‘omukumo’ opo u uvithe. (1 Tes. 2:2) Muutendo tawu landula otatu ka kundathana omashongo ngoka aauvithi yamwe haya kala ye na nankene taya vulu oku ga sinda.
2. Omolwashike kaatu na okudhiladhila kutya otatu piyaganeke aaniilonga ngele otwa popi nayo?
2 Mbela aanilonga otaya ka uva nayi ngele onda popi nayo? Moongeshefa odhindji, aaniilonga oye lile po aalandi nohaya kala ya tegelela oku ya yakula. Olundji ohaya ungaunga nomuntu nawa molwaashoka oye wete kutya otashi vulika a hala okulanda sha. Ngele owa zala nawa noto popi nayo nombili, otashi ke ya ningitha ya kale ye ku simaneka.
3. Otu na okuninga po shike opo kaatu piyaganeke aalandi?
3 Mbela ondi na okuuvithila aaniilonga komeho gaalandi oyendji? Ngele otashi vulika, kala ho uvithile momahala goongeshefa uuna kaamu na aantu oyendji, ngaashi ngele opo ya patulula. Tegelela wu popye nomukuluntu miilonga sho e li oye awike. Ngoye ino popya ethimbo ele.
4. Otatu vulu okupopya shike uuna tatu uvithile momahala goongeshefa?
4 Otandi ka popya shike? Ngele mongeshefa omu na aaniilonga oyendji, popya nomukuluntu miilonga. Oto vulu okutya: “Nena otatu talele po mboka haya longo moongeshefa molwaashoka ohatu nyengwa oku ya adha momagumbo. Molwaashoka owi ipyakidhila otandi ka popya owala pauhupi.” Opo kaaya dhiladhile kutya otatu landitha inatu popya kombinga yomayambidhidho, shila ongele ye tu pula kutya iilonga yetu ohayi ambidhidhwa ngiini pashimaliwa. Shi ikolelela koludhi lwongeshefa, otatu vulu okupula omukuluntu miilonga e tu pe epitikilo tu popye naaniilonga pauhupi. Sho to popi nayo, endulula shoka wa popi nomukuluntu miilonga. Ngele omuniilonga okwi ipyakidhila unene, popya naye pauhupi e to mu thigile okatraktate. Ngele itashi wapa wu popye naaniilonga, oto vulu okupula epitikilo wu thige iileshomwa mpoka haya thuwile.
5. Otu na omatompelo geni gokuuvithila momahala goongeshefa nomukumo?
5 Jesus nosho wo Paulus oya li haya uvithile aantu pomahala goongeshefa nomukumo, nangoye oto vulu oku shi ninga. (Mat. 4:18-21; 9:9; Iil. 17:17) Galikana kuJehova e ku kwathele wu kale wu na omutima gwa gundjila nowu kale wu na uulaadhi. (Iil. 4:29) Molwaashoka ito ka adha naanaa momahala goongeshefa kaamu na aantu, omolwashike itoo kambadhaala oku ka uvithila momahala ngoka?