Uunzapo wepandaanda mboka tawu pondola
1. Omomukalo gumwe guni tatu vulu okuholela Jesus?
1 Pethimbo lyuukalele we kombanda yevi, Jesus okwa li a popi nondjungu naantu mboka a tsakaneke mondjila nopomahala gaayehe. (Luk. 9:57-61; Joh. 4:7) Okwa li a hala okulombwela aantu oyendji ngaashi tashi vulika etumwalaka lye lya simana. Kunena, uunzapo wepandaanda owu li omukalo dhingi okukwathela aantu ya mone uunongo wopakalunga. (Omayel. 1:20) Ngele otwa katuka oonkatu tu thike kaantu, nokulongitha oondunge dhokuyoolola, nena otatu ke shi pondola.
2. Ongiini tatu vulu okukatuka oonkatu uuna tu li miilonga yepandaanda?
2 Katuka oonkatu: Olundji oshi li nawa okuya kaantu pehala lyokukala wa thikama nenge wa kuutumba pehala limwe wa tegelela ye ye kungoye. Kala to imemeha, to popi wa tala komuntu, wa ngungumana nomomukalo gombili. Ngele otamu longo pamwe naauvithi ooyakweni, oshi li nawa kaamu ye komuntu gumwe amuhe. Natango owa pumbwa okuninga oonkambadhala wu shune ko kwaamboka yu ulika ohokwe. Ngele otashi vulika, konima yoonkundathana dheni, mu pula nombili nkene to vulu oku mu mona ishewe. Aauvithi yamwe opo ya popye naantu ya faathana lwiikando noya kokeke ohokwe yaantu mboka, ohaya kala aluhe pehala limwe uuna taya gandja uunzapo wepandaanda.
3. Ongiini tatu vulu okulongitha oondunge dhokuyoolola uuna tatu gandja uunzapo wepandaanda?
3 Longitha oondunge dhokuyoolola: Shika osha kwatela mo okuhogolola mpoka wa hala okukala wa thikama mepandaanda noolye wu na okupopya nayo. Inashi pumbiwa wu popye nomuntu kehe ngoka te ende po. Kala wu shi okutongolola aantu. Pashiholelwa, ngele owu wete kutya omuntu okwe endelela, oshi li nawa wu ethe a pite po. Ngele owa thikama komeho gongeshefa yontumba, kala wa kotoka opo waaha ninge sha tashi limbililike menindjela. Olundji oshi li nawa tu popye naantu mboka taya zi mongeshefa, pehala lyokupopya nayo sho taya yi mo. Popya naantu momukalo ngoka itaagu ya tilitha noku ya halutha. Natango longitha oondunge dhokuyoolola uuna to gandja iileshomwa. Ngele omuntu itu ulike ohokwe mu pa okatraktate, pehala lyoku mu pa iifo.
4. Omolwashike okugandja uunzapo wepandaanda ku nyanyudha nohaku pondola?
4 Ohatu taandelithe oombutu odhindji dhoshili muule wethimbo efupi uuna tu li miilonga yepandaanda. (Omuuv. 11:6) Otashi vulika aantu mboka hatu tsakaneke oyo mboka ihaatu adha momagumbo uuna tatu longo egumbo negumbo. Omolwashike ito kala ho kutha ombinga miilonga yepandaanda, mbyoka yi li omukalo gwokuuvitha gu nyanyudha notagu pondola?