Mbela otamu vulu okuuvitha kongulohi?
1. Omulongwantu gumwe okwa ti omuyapostoli Paulus okwa li hu uvitha uunake egumbo negumbo?
1 Embo Daily Life in Bible Times olya ti kutya omuyapostoli Paulus okwa li he ku uvitha egumbo negumbo okuza po “4 yokomatango sigo omokati kuusiku.” Katu shi ngele Paulus osho a li ha ningi ngaaka esiku kehe, ihe otu shi shi kutya okwa li e na ehalo ‘okuninga ayihe omolwevaangeli.’ (1 Kor. 9:19-23) Shika osha li sha kwatela mo okuya egumbo negumbo pethimbo aantu oyendji taya adhika momagumbo.
2. Omolwashike shi li nawa okuuvitha kongulohi?
2 Aauvithi miitopolwa oyindji oye na omukalondjigilile gwokulonga egumbo negumbo ongula kehe mokati koshiwike. Mbela nomoshitopolwa sheni ethimbo ndika ewanawa okulonga egumbo negumbo? Omukokolindjila gumwe okwa hokolola kombinga yoshitopolwa she a ti: “Aantu ihaya kala mo naanaa momagumbo ethimbo lyomutenya. Ihe kongulohi aantu oyendji omo haya kala.” Okuuvitha kongulohi otashi ka kala ompito ombwanawa okuuvithila aalumentu onkundana ombwanawa. Olundji aanegumbo kongulohi ohaya kala ya thuwa nawa nohaya kala ya hala okukundathana. Ngele oshi li nawa oku shi ninga, aakuluntugongalo naya longekidhe pu kale elongekidho lyiilonga yomomapya lyokongulohi.
3. Ongiini tatu vulu okulongitha oondunge dhokuyoolola uuna tatu uvitha kongulohi?
3 Longitha oondunge dhokuyoolola: Osha simana okulongitha oondunge dhokuyoolola uuna tamu uvitha kongulohi. Pashiholelwa, ngele omwa dhimbulula kutya kali shi ethimbo ewanawa komunegumbo, tashi vulika ethimbo lye lyokulya, oshi li nawa mu pule mu galuke konima yethimbo. Ngele oku na omilema, thikama mpoka omunegumbo ta vulu oku ku mona e to ipopi nziya naashoka we endela. Oshi li wo nawa mu longe ooyaali nenge mongundu, ihe sho yaali taya yi megumbo ongundu nayi kale ye mu tegelela mepandaanda moka mu na oolamba dha tema nawa. Inamu uvitha kwa toka unene opo kaamu piyaganeke aanegumbo ngele oya hala oku ka lala. (2 Kor. 6:3) Ngele momudhingoloko ohamu kala mwa nika oshiponga konima ngele etango lya yi mo, kaleni hamu uvitha komatango manga inaali ya mo. — Omayel. 22:3.
4. Omalaleko nuuyamba geni tatu vulu okumona ngele ohatu uvitha kongulohi?
4 Omalaleko nuuyamba: Ohatu nyanyukilwa uukalele, unene tuu ngele ohatu popi naantu. Nongele ohatu popi naantu oyendji, otatu ka mona wo ompito oyindji okukwathela aantu oyendji “ya hupithwe noya tseye oshili.” (1 Tim. 2:3, 4) Mbela oto ka vula okukala ho uvitha kongulohi?