Omikalo ntano dhokumona omukonakoni
1. Ngele oho mono oshidhigu okumona omukonakonimbiimbeli moshitopolwa sheni, owu na okuninga shike, nomolwashike?
1 Mbela ohashi kala oshidhigu kungoye okumona omukonakoni? Ino etha po okukonga. Jehova oha yambeke mboka ihaaya teka omukumo okulonga ehalo lye. (Gal. 6:9) Mpaka otapu landula omaetopo gatano ngoka taga vulu oku ku kwathela.
2. Ongiini tatu vulu okulongitha omukalo gwokupula aantu kondandalunde tu konakone nayo Ombiimbeli?
2 Ya pula ngele oya hala okukonakona Ombiimbeli: Aantu oyendji oye shi kutya ohatu gandja Oshungolangelo no-Awake!, ihe otashi vulika kaaye shi shi kutya ohatu konakona naantu Ombiimbeli. Sho to longo egumbo negumbo, omolwashike itoo pula aanegumbo wu konakone nayo Ombiimbeli? Oto vulu wo okupula aantu mboka ho ningi omaishunoko kuyo ngele oya hala okukonakona Ombiimbeli. Ngele inaya hala okukonakona Ombiimbeli, oto vulu okutsikila okukala ho ya faalele iileshomwa nokukokeka ohokwe yawo. Omumwatate gumwe okwa kala ha faalele aaihokani yamwe iifo oomvula noomvula. Esiku limwe sho e ya faalele iifo iipe, manga ta yi okwa tanauka e te ya pula, ta ti: “Inamu hala tu kaleni hatu konakona Ombiimbeli?” Ka li nando e shi tegelela, ihe oya zimine. Ngashingeyi oya ninginithwa.
3. Mbela otu na okudhiladhila kutya mbono haye ya kokugongala ohaya konakona nale Ombiimbeli? Shi yelitha.
3 Pula mboka haye ya kokugongala: Ino kala ho dhiladhila kutya mboka haye ya kokugongala ohaya konakona nale Ombiimbeli. Omumwatate gumwe okwa ti: “Konyala etata lyaakonakonimbiimbeli mboka nda lesha nayo onde ya monena pokugongala.” Omumwameme gumwe okwa tokola a pule omukulukadhi gumwe e na ohoni ngoka e na oyanakadhona ya ninginithwa megongalo. Omukulukadhi nguka okwa kala he ya kokugongala oomvula 15 lwaampono, he ya mo sho taku tameke e ta yi nziya konima ngele kwa piti mo. Omukulukadhi okwa zimine okukonakona e te ke ya moshili. Omumwameme okwa nyola ngeyi: “Onda li owala ndi ipa ombedhi sho nde etha pu pite oomvula 15 inaandi mu pula ngele okwa hala okukonakona.”
4. Ongiini tatu vulu okumona omukonakoni okupitila mokulombwela yalwe kutya otwa hala omukonakoni?
4 Lombwela yalwe kutya owa hala omukonakoni: Omumwameme gumwe oha kambadhala okuya nayalwe komakonakonombiimbeli gawo. Pehulilo lyekonakono oha pula ngoka ta konakona ngele oku shi aantu yalwe mboka nayo tashi vulika ya kale ya hala okukonakona Ombiimbeli. Uuna to pe omuntu ngoka wa kala ho ningi omaishunoko kuye okambo Omalongo gOmbiimbeli, otashi vulika wu mu pule to ti: “Mbela owu shi gumwe ngoka ta ka kala e ka hala?” Omathimbo gamwe, oonkalo ihadhi pitika aauvithi nosho wo aakokolindjila ya konakone nagumwe ngoka a hala okukonakona. Onkee ano, tseyithila yalwe kutya owa hala omukonakoni.
5. Omolwashike tu na okupula tu konakone nakuume kopandjokana gwomumwameme nenge gwomumwatate?
5 Ookuume kopandjokana mboka kaaye shi ooitaali: Mbela megongalo lyeni omu na yamwe mboka ye na ookuume kopandjokana kaaye li moshili? Ookuume kopandjokana mboka kaaye li moshili kaye hole okupopya kombinga yOmbiimbeli nookuume kawo kopandjokana mboka ye li moshili, ihe otashi vulika ya zimine okukonakona nomuntu gulwe. Oshi li nawa wu pule tango kuume kopandjokana ngoka e li moshili manga inoo pula wu konakone nakuume ke kopandjokana ngoka kee li moshili.
6. Ongiini egalikano lya simana uuna wa pumbwa omukonakonimbiimbeli?
6 Egalikano: Otu na okukala tu shi kutya egalikano oli na oonkondo. (Jak. 5:16) Jehova oku uvaneka kutya ota ka pulakena komagalikano getu ngele otwe mu indile metsokumwe nehalo lye. (1 Joh. 5:14) Omumwatate gumwe ngoka a li ha kala i ipyakidhila okwa li a galikana a mone omukonakoni. Omukulukadhi gwe okwa li a limbililwa ngele omusamane gwe ota ka kala ngaa e na ethimbo lyokusila omukonakoni oshimpwiyu, unene tuu ngele omukonakoni okwa ka kala e na uupyakadhi owundji. Onkee ano, okwa galikana kuJehova, opo omusamane gwe a mone omukonakoni. Omagalikano gawo ogu uvika konima yiiwike iyali lwaampono sho omukokolindjila gumwe megongalo lyawo a li a mono omulumentu ngoka a li a hala okukonakona e te mu pe po omumwatate ngoka. Omukulukadhi gwomumwatate okwa nyola a ti: “Kehe gumwe ngoka ta dhiladhila kutya oshidhigu okumona omukonakonimbiimbeli, otandi mu lombwele kutya: Kala ho galikana to shi popi kondandalunde noino etha okugalikana kombinga yasho. Tse sho twe shi ningi, otwa ka kala twa nyanyukwa noonkondo shi vulithe shoka twa li twa tegelela.” Ngele oto galikana nuudhiginini, nangoye wo otashi vulika wu ka mone omukonakoni noto ka kala wa nyanyukwa oku mu kwathela e ende ‘nondjila ndjoka ya thinana tayi fala komwenyo.’ — Mat. 7:13, 14.