PaMateus
7 “Hulithii po okupangula yalwe, opo nane kaamu ka pangulwe; 2 oshoka otamu ka pangulwa momukalo ngoka hamu pangula yalwe, notamu ka ungaungiwa nane momukalo moka hamu ungaunga nayalwe. 3 Omolwashike nduno wu wete okahozi hoka ke li meho lyomumwaho, ihe ku wete endangalati ndyoka li li meho lyoye? 4 Nenge ongiini to vulu okulombwela omumwaho, ‘Andiya ndi ku kuthe okahozi meho lyoye,’ omanga ngoye mwene wu na endangalati meho lyoye? 5 Mufudhime ngoye, kutha mo tango endangalati ndyoka li li meho lyoye, opo nawa wu vule okukutha mo okahozi hoka ke li meho lyomumwaho.
6 “Shoka oshiyapuki ino shi pa oombwa, nomagwe goye gondilo* ino ga umbila iingulu, opo kaayi ga lyatagule nomakondo gayo e tayi ku pilukile po, noku ku monitha oshiponga.
7 “Tsikileni okwiindila, notamu ka pewa; tsikileni okukonga, notamu ka mona; tsikileni okukonkola, notamu ka egululwa. 8 Oshoka kehe ngoka ta indile ota pewa, nakehe ngoka ta kongo ota mono, nakehe ngoka ta konkola ota egululwa. 9 Mbela olye gwomokati keni ta ka pa omwana emanya, ngele okwe mu pula oshikwiila? 10 Nenge ngele okwe mu indile ohi, mbela ote ke mu pa eyoka? 11 Ano ngele ne mboka aalunde omu shi okupa oyana yeni omagano omawanawa, Ho yeni gwomegulu ita ka pa tuu omagano omawanawa mboka taye mu indile!
12 “Onkee ano kehe shoka mwa hala aantu ye shi mu ningile, osho wo ya ningileni. Ndyoka olyo ekota lyaashoka sha popiwa kOmpango nokAahunganeki.
13 “Pitileni mosheelo shoka sha patekidha, oshoka osheelo shoka oshinene, nondjila ndjoka ya mbwalangandja otayi fala mehanagulo, noyendji otaye yi landula. 14 Ihe osheelo shoka oshishona, nondjila ndjoka ya thinana, otayi fala komwenyo, naamboka taye yi landula aashona yowala.
15 “Kaleni mwa kotokela aahunganeki aafundja mboka taye ya kune ye li miipa yoonzi, ihe meni lyawo omambungu haga lyana. 16 Otamu ke ya dhimbulula kiiyimati yawo. Ndishi aantu ihaya likola omandjembele komano, nenge oonkwiyu kiihangena? 17 Sha faathana, omuti kehe omwaanawa ohagu imi iiyimati iiwanawa, ihe omuti kehe omwiinayi ohagu imi iiyimati iiwinayi. 18 Omuti omwaanawa itagu vulu okwiima iiyimati iiwinayi, nomuti omwiinayi itagu vulu okwiima iiyimati iiwanawa. 19 Kehe omuti itaagu imi iiyimati iiwanawa, otagu tetwa po e tagu umbilwa momulilo. 20 Onkee ano aantu mboka otamu ke ya dhimbulula kiiyimati yawo.
21 “Hakehe ngoka ta ti kungame, ‘Omuwa, Omuwa,’ ta ka ya mUukwaniilwa womegulu, ihe oongoka owala ta longo ehalo lyaTate ngoka e li megulu. 22 Mesiku ndyoka, oyendji otaya ka lombwela ndje taya ti: ‘Omuwa, Omuwa, hatse tuu mboka twa li twa hunganeke medhina lyoye, twa tidha mo oondemoni medhina lyoye notwa longo iikumithalonga oyindji medhina lyoye?’ 23 Nena ngame otandi ke ya lombwela tandi ti: ‘Kandi mu shi nando onale. Zii po pungame, aalongi yuuwinayi ne!’
24 “Onkee ano kehe ngoka ta uvu oohapu dhandje ndhika nota vulika kudho, ota ka kala a fa omulumentu omunandunge ngoka a tungila egumbo lye kemanya. 25 Naasho omvula ya loko ya dhiginina, efundja e tali ya, nombepo yoshikungulu sho ya pepe yu uka megumbo ndyoka, inali teka po, oshoka olya tungilwa kemanya. 26 Niishewe, kehe ngoka ta uvu oohapu dhandje ndhika, ihe ita vulika kudho, okwa fa omulumentu omugoya, ngoka a tungila egumbo lye pehekevi. 27 Naasho omvula ya loko ya dhiginina, efundja e tali ya, nombepo yoshikungulu sho ya pepe yu uka megumbo ndyoka, olya kumuka po, nekumuko lyalyo olya li enene.”
28 Sho Jesus a mana okupopya oohapu ndhoka, oongundu dhaantu odha li dha kuminwa omukalo gwe gwokulonga, 29 oshoka okwa li te ya longo onga omuntu e na oonkondopangelo, ihe hangaashi aalongimpango yawo.