Ino kala ihoo ningi omakonakonombiimbeli, molwaashoka wu uvite inoo gwana
1. Omolwashike yamwe haya kala ya tila okutameka omakonakonombiimbeli?
1 Mbela oho kala wa tila okutameka omakonakonombiimbeli, molwaashoka wu wete itoo ke shi enditha nawa? Omathimbo gamwe aapiya yaKalunga aadhiginini yopethimbo lyonale, ngaashi Moses naJeremia, oya li yu uvite inaaya gwana okugwanitha po iinakugwanithwa yawo. (Eks. 3:10, 11; 4:10; Jer. 1:4-6) Onkee ano, oyendji nayo osho haya kala yu uvite ngaaka. Ongiini taya vulu okusinda eiyuvo lya tya ngeyi?
2. Omolwashike kaatu na okukala twa gwanenwa kokulonga owala egumbo negumbo omanga twe etha omakonakonombiimbeli ga ningwe kuyalwe?
2 Otu na okudhimbulukwa kutya Jehova ihe tu pula nando tu ninge shoka shi vule oonkondo dhetu. (Eps. 103:14) Onkee ano, otatu vulu okugwanitha po elombwelo ‘lyokuninga aantu aalongwa noku ya longa.’ (Mat. 28:19, 20) Uuthembahenda mbuka Jehova ine wu pa owala mboka ya pyokoka nenge ye na uunkulungu wokupopya. (1 Kor. 1:26, 27) Onkee ano, inatu kala twa gwanenwa kokulonga owala egumbo negumbo e tatu etha omakonakonombiimbeli ga ningwe kuyalwe.
3. Jehova okwe tu dheula ngiini tu kale twa gwana okuninga omakonakonombiimbeli?
3 Jehova ohe tu dheula tu kale twa gwana: Jehova oye he tu dheula tu kale twa gwana okuninga aantu aalongwa. (2 Kor. 3:5) Okwe tu longa oshili yOmbiimbeli ndjoka kaayi shiwike nokuli nokaalongwantu yomuuyuni mbuka okupitila mehangano lye. (1 Kor. 2:7, 8) Okwa hala tu landule oshiholelwa shOmulongi Omunene, Jesus, shokulonga aantu, shoka a nyolitha mOohapu dhe, nohe tu dheula aluhe okupitila megongalo. Ishewe, Jehova ine etha tu tote po omisindalongo dhetu yene dhokulonga Ombiimbeli. Okwe tu pa shoka twa pumbwa, ngaashi embo Omalongo gOmbiimbeli ndyoka lya fatulula oshili momukalo gwopandunge nomupu okuuviwa ko. Okuninga ekonakonombiimbeli kaku shi okudhigu ngaashi tashi vulika hatu dhiladhila.
4. Omolwashike tatu vulu okukala tu na einekelo kutya Jehova ote ke tu kwathela?
4 Jehova okwa li a kwathele Moses naJeremia ya vule okugwanitha po iinakugwanithwa yawo. (Ex. 4:11, 12; Jer. 1:7, 8) Natse otatu vulu okupula Jehova e tu kwathele. Uuna tatu ningi omakonakonombiimbeli, otatu longo yamwe oshili kombinga yaJehova, shoka hashi mu nyanyudha. (1 Joh. 3:22) Onkee ano, shi ninga elalakano lyoye okukutha ombinga mokuninga omakonakonombiimbeli, oshinima shoka hashi tu nyanyudha unene nohashi tu etele omayambeko muukalele.