Taamba ko aayenda nombili
1. Uunake hatu kala tu na ompito ombwanawa lela yokugandja uunzapo, nomolwashike?
1 Kapu na ompito yilwe ombwanawa nokugandja uunzapo yi vule ndjoka hatu kala tu na poomwedhi dhEdhimbuluko ndyoka hali ningwa omumvo kehe. Dhiladhila kwaashika: Nuumvo otwa tegelela pEdhimbuluko pu ka kale aatalelipo ye vulithe pomamiliyona omulongo mboka taya ka pulakena kombinga yohole onenenene yopaali ndjoka yu ulikwa okupitila mekuliloyambo. (Joh. 3:16; 15:13) Otaye ku uva kombinga yomayambeko ngoka taya vulu okumona omolwomagano ngoka Jehova a gandja. (Jes. 65:21-23) Ihe nonando ongaaka, omupopi haye owala ta ka gandja uunzapo poshiningwanima shika. Aakalipo ayehe otaya ka mona ompito okugandja uunzapo wa kola mokutaamba ko aayenda tashi zi komutima. — Rom. 15:7.
2. Aayenda mboka ye ya kEdhimbuluko otatu ke ya taamba ko ngiini?
2 Pehala lyokukonga owala ehala mpoka to kuutumba e to mwena wa tegelela omutumba gu tameke, omolwashike itoo popitha mboka ye li popepi nangoye e tamu tseyathana? Aayenda otashi vulika ya kale ye na okaumbanda, molwaashoka kaye shi shoka hashi ningwa po. Ngele tatu ya popitha tatu imemeha notu na ombili, otashi ke ya kwathela ya kale yu uvite ya manguluka noya taambwa ko. Opo wu mone ngele omuntu okwe ya sho a pewa okafo kehiyo, oto vulu oku mu pula ngele osho oshikando she shotango ta kala pokugongala kwetu nenge ngele oku shi mo omuntu megongalo. Oto vulu oku mu lombwela e ye a kuutumbe pungoye e tamu lesha pamwe mOmbiimbeli yoye nokwiimba pamwe meimbilo lyoye. Ngele Edhimbuluko otali ningilwa mOshinyanga shUukwaniilwa, oshi li nawa wu mu ulukile mo paufupi. Konima yoshipopiwa, yamukula omapulo ge ngele oku na. Ngele egongalo lyeni oli na okupita mo nziya mOshinyanga, opo mu gandje ompito kegongalo lilwe, oto vulu oku mu pula to ti: “Onda li ngaa nda hala okuuva kutya oto ti ngiini kombinga yoshipopiwa. Otandi ku mono ngiini ishewe?” Opo nduno ninga elongekidho oku mu mona ishewe esiku lilwe ngele oku na ohokwe. Aakuluntugongalo otaya ka kala ya hala ya mone aauvithi mboka inaayi ipyakidhila we, opo ye ya ladhipike.
3. Omolwashike sha simana tu ninge oonkambadhala dhokupopitha aayenda pEdhimbuluko?
3 Kaayenda oyendji, shika otashi ka kala oshikando shawo shotango okumona oshigwana shaKalunga oshinyanyukwi, oshinambili nosha hangana. (Eps. 29:11; Jes. 11:6-9; 65:13, 14) Mboka ya li pEdhimbuluko oshike taya ka dhimbulukwa uuna ya shuna komahala gawo? Otashi ki ikolelela kwaashoka tatu ningi moku ya taamba ko.