Nkene tatu vulu okuhwepopaleka uunkulungu wetu muukalele — Okutula po ekankameno lyaashoka to ka popya peishunoko

Etompelo kutya omolwashike sha simana: Uuna twa mono omuntu tu ulike ohokwe, otwa hala tu mu galukile ethimbo ta ka kala megumbo, opo tu tekele oombuto dhoshili ndhoka twa kuna. (1 Kor. 3:6) Manga inaatu za po puye, olundji ohashi kala sha pumbiwa tu mu thigile sha shoka tatu ya tu kundathane uuna twa ningi eishunoko. Shimwe ishewe, oshi li nawa tu mu thigile epulo ndyoka tatu ya tu kundathane oshikando tashi landula uuna twe mu talele po. Shika otashi ka ningitha omunegumbo a kale a tegelela tu mu talele po, nongele epulo olya yamukulwa moshileshomwa shoka twe mu thigila, otashi vulika e shi leshe. Okutula po ekankameno lyaashoka tamu ka kundathana oshikando tashi landula ohashi shi ningitha oshipu wu mu galukile molwaashoka shoka tamu ka kundathana osha hogololwa nale nosho wo kutya omunegumbo oku shi shi shoka tamu ka kundathana. Ngele otwe ke mu mona ishewe, otatu vulu tu mu yelithile kutya otwe mu galukile tu yamukule epulo ndyoka twa li twe mu pula oshikando sha zi ko opo nduno tatu tsikile noonkundathana ndhoka.

Nkene tu na oku shi ninga:

Uuna to ilongekidhile efalomo lyaashoka to ka popya miilonga yegumbo negumbo, longekidha wo epulo ndyoka to ka thigila omunegumbo wu ye wu li yamukule oshikando tashi landula. Otashi vulika li kale li ikolelela kwaashoka tamu kundathana moshileshomwa shoka to mu pe esiku ndyoka, nenge otashi vulika li kale epulo ndyoka lya yamukulwa mushimwe shomiileshomwa yetu, shoka to ya wu mu pe ngele we mu galukile.
Uuna to hulitha oonkundathana nomuntu ngoka u ulika ohokwe, mu lombwela kutya owu na ehalo lyokupopya naye ishewe e to mu pula epulo ndyoka wi ilongekidha mu ye mu kundathane oshikando tashi landula. Miitopolwa yimwe aantu ohaya kala yi ipyakidhila noonkondo nohaya kala inaaya ya hala okuninga oshilage nangoye wu ya galukile. Moonkalo dha tya ngawo, otashi vulika wu tye: “Mbela ndika olyo aluhe ethimbo ewanawa lyoku ku adha megumbo? [Tegelela a yamukule.] Oshiwike tashi ya, onda hala ndi ye ndi pite pungoye ndi yamukule epulo ndika . . . Ngele oto ka kala wi ipyakidhila noonkondo ngele nde ya, oto vulu owala okulombwela ndje.”
Ngele owa lombwele omunegumbo kutya oto ke mu galukila pethimbo lyontumba, gwanitha po euvaneko lyoye. (Mat. 5:37) Pehulilo lyeishunoko, tula po ekankameno lyaashoka tamu ya mu kundathane oshikando tashi landula.

Kambadhala wu shi ninge momwedhi ngu:

Uuna to ilongedhile efalomo lyoye, ilongekidha wo epulo ndyoka to ka thigila omunegumbo wu ye wu li yamukule oshikando tashi landula. Li lombwela aauvithi yalwe mboka to longo nayo.