Uunake tu na okushuna kwaamboka yu ulika ohokwe?
1. Okuninga aantu aalongwa osha kwatela mo shike?
1 Opo tu ninge aantu aalongwa otu na okukala hatu shuna kwaamboka ye na ehalo okwiilonga kombinga yUukwaniilwa waJehova. (Mat. 28:19, 20) Olundji ethimbo ewanawa okuninga eishunoko olyo ethimbo ndyoka tali tu opalele notali opalele wo ngoka e na ohokwe. Omolwashike tu na okuninga eishunoko nziya konima yetalelopo lyotango?
2, 3. Omolwashike tu na okuninga oonkambadhala tu shune ko nziya ngaashi tashi vulika?
2 Omolwashike tu na okushuna ko nziya? Iilonga yokuuvitha “onkundana ndjika ombwanawa yUukwaniilwa” oyi li pokuhula, nehulilo lyonkalelo ndjika oli li popepi. (Mat. 24:14, NW; 1 Pet. 4:7) “Esiku lyehupitho” olye egulukila mboka ye na ohokwe, onkee ano otu na okuvulika kelombwelo ‘lyokuuvitha oohapu neendelelo’ shoka sha kwatela mo okuninga eishunoko nziya ngaashi tashi vulika, opo tu kokeke ohokwe yomuntu. — 2 Kor. 6:1, 2; 2 Tim. 4:2, NW.
3 Satana okwa hala okukutha mo oombuto dhUukwaniilwa ndhoka twa kuna momitima dhaantu mboka tayu ulike ohokwe. (Mark. 4:14, 15) Olundji mboka yu ulika ohokwe ohaya shekwa kiilyo yuukwanegumbo, kaaniilonga pamwe nayo nokuyalwe. Uuna tatu shuna ko nziya, otashi tu kwathele tu humithe komeho ohokwe yomunegumbo manga yalwe inaaye mu hongolola.
4. Oshike tatu vulu okuninga petalelopo lyotango shoka tashi pala ondjila opo tu shune ko?
4 Ninga oshilage: Oshi li nawa okuninga oshilage wu shune ko konima yoonkundathana dhotango. Thigila omuntu epulo ndyoka to ya wu yamukule sho to galuka. Osha simana okunyola shoka mwa kundathana metalelopo lyotango nesiku ndyoka wu na okushuna ko. Ngele ethimbo lyoye otali shi pitike, galuka esiku lya landula ko nenge omasiku omashona konima yaashoka. Ngele etalelopo owe li ningi mehuliloshiwike, ye omuntu ngoka u ulika ohokwe oha longo mokati koshiwike, otashi vulika a zimine wu galuke mehuliloshiwike tali landula. Ino kala inoo galuka mesiku ndyoka wa ninga oshilage. — Mat. 5:37.
5. Okuninga omaishunoko nziya otashi ke tu kwathela ngiini tu gwanithe po oshilonga shoka Jesus e tu pa shokuninga aantu aalongwa?
5 Otu na omatompelo omawanawa okushuna nziya ngaashi tashi vulika kwaamboka yu ulika ohokwe. Onkee ano, ninga elongekidho wu shune ko nziya, molwaashoka ethimbo lya hupa ko “olyo efupi.” (1 Kor. 7:29) Oonkambadhala dhetu otadhi ka pondola ngele tatu shuna nziya kwaamboka yu ulika ohokwe metumwalaka lyUukwaniilwa.