Okuninga omakonakonombiimbeli momukalo tagu pondola
1. Aauvithi mboka haya konakona Ombiimbeli nayalwe oye na oshinakugwanithwa shini?
1 Kapu na ngoka ta vulu okulongela Kalunga ngele haye ‘e mu eta’ kuye. (Joh. 6:44) Aauvithi mboka haya konakona naantu Ombiimbeli oye na okulonga ngaashi taya vulu moku ya kwathela ya hedhe kuTate yetu gwomegulu. (Jak. 4:8) Shika ohashi pula eilongekidho. Okulesha owala okatendo kehe, nokupula epulo ndyoka lye e twa mo inaku gwana okukwathela aakonakoni yu uve ko, noya ninge ehumo komeho.
2. Okuninga ekonakonombiimbeli momukalo tagu pondola ohaku e ta iizemo yini?
2 Opo ya ninge omakonakonombiimbeli momukalo tagu pondola, aauvithi oye na okukwathela aakonakoni yawo yu (1) uve ko shoka Ombiimbeli tayi longo, (2) ya taambe ko shoka Ombiimbeli tayi ti noya (3) tule miilonga shoka Ombiimbeli tayi longo. (Joh. 3:16; 17:3; Jak. 2:26) Ohashi vulika shi kuthe oomwedhi okukwathela omukonakoni moonkatu ndhika. Ihe onkatu kehe otayi mu kwathele a kokeke ekwatathano lye naJehova noku mu iyapulile.
3. Omolwashike aalongi mboka haya pondola haya pula omapulo ngoka taga ningitha omuntu a popye etaloko lye?
3 Omukonakonimbiimbeli ota dhiladhila shike?: Opo wu mone ngele omukonakonimbiimbeli gwoye oku uvite ko nokwa taamba ko shoka ti ilongo, yanda okukala ongoye to popi. Mu ladhipika a holole omaiyuvo ge. (Jak. 1:19) Mbela oku uvite ko ngaa shoka Ombiimbeli tayi ti koshikundathanwa shoka ti ilongo? Mbela ota vulu ngaa okuyelitha niitya ye mwene shoka i ilongo? Oku uvite ngiini kombinga yaashoka i ilongo? Mbela okwi itaala ngaa kutya shoka Ombiimbeli tayi ti oshi li mondjila? (1 Tes. 2:13) Mbela oku uvite ko ngaa kutya shoka ti ilongo oshi na okweeta elunduluko monkalamwenyo ye? (Kol. 3:10) Opo tu mone omayamukulo komapulo ngono, otwa pumbwa okupula nuukeka omapulo ngoka taga ningitha omuntu a popye etaloko lye, opo nduno tatu pulakene kuye. — Mat. 16:13-16.
4. Oshike tu na okuninga ngele oshidhigu komukononimbiimbeli okutula miilonga shoka a longwa okuza mOmbiimbeli?
4 Iikala nosho wo okudhiladhila ohayi kala ya mena omidhi momuntu nohayi pula ethimbo oku yi dhima mo momadhiladhilo ge. (2 Kor. 10:5) Ongiini nduno ngele omukonakoni gwetu iha taamba ko shoka ti ilongo, nenge a tule miilonga shoka a longwa? Eidhidhimiko olya pumbiwa opo omukonakoni a mone ethimbo lya gwana, opo Oohapu dhaKalunga nosho wo ombepo ondjapuki yi longe momutima gwe. (1 Kor. 3:6, 7; Heb. 4:12) Pehala lyoku mu thiminika, oshi li nawa aluhe mu tsikile noshiilongomwa sha landula ko ngele kashi shi oshipu komukonakonimbiimbeli u uve ko nenge a tule miilonga shoka Ombiimbeli tayi ti. Sho tatu tsikile oku mu longa Ombiimbeli neidhidhimiko nonopahole, mokweendelako kwethimbo otashi vulika ta ka ninga omalunduluko ngoka ga pumbiwa.