Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
5-11 NOVOMBA
OMALIKO OKUZA MOOHAPU DHAKALUNGA | JOHANNES 20–21
“Owu hole ndje tuu u vule mbika?”
(Johannes 21:1-3) Konima yaambika Jesus okwi ihololele ishewe aalongwa ye pefuta lyaTiberias. Oye okwi iholola ngeyi. 2 Simon Petrus, Tomas, ngoka i ithanwa Mukwanambwiyu, Natanael gwomuKana shomuGalilea, aana yaSebedeus naalongwa ooyakwawo yaJesus yaali opo ya li ayehe. 3 Simon Petrus okwa ti kuyo: “Otandi yi, ndi ka yule oohi.” Oyo oye mu yamukula ya ti: “Natse wo otwa hala okuya nangoye.” Oyo oya thikama e taa yi mowato, ihe muusiku mbwiyaka auhe inaa kwata mo nando osha.
(Johannes 21:4-14) Ano ongula sho kwa shi, Jesus okwa thikama komunkulo, ihe aalongwa oya li inaaye mu dhimbulula. 5 Opo Jesus okwa ti kuyo: “Aamati yandje, inamu kwata mo nando osha?” Oyo oye mu yamukula ya ti: “Aawe!” 6 Jesus okwe ya lombwele: “Umbileni oshiyulitho sheni lwokolulyo lwowato, notamu ka mona sha.” Oyo oyu umbile mo oshiyulitho noya nyengwa oku shi hila mo, oshoka oya li ya yula oohi odhindji. 7 Omulongwa ngoka Jesus kwa li e hole, okwa lombwele Petrus a ti: “Omuwa oye ngo!” Simon Petrus sho u uvu kutya oye Omuwa, okwa zala ombaikitha ye, oshoka okwa li a zala oonguwo dhokohi adhike e ta nukile momeya. 8 Aalongwa ooyakwawo oye ya nowato komunkulo noya hili mo oshiyulitho, shoka shu udha oohi. Oyo kaya li unene kokule nevi, oya li poshikako shi thike poometa ethele. 9 Ano sho ya thiki komunkulo, oya mono eziko lyomulilo gwa teka ekala, nopeziko opwa li pu na oohi noshikwiila. 10 Nena Jesus okwe ya lombwele a ti: “Eteni oohi dhimwe nkuka, ndhoka mwe dhi kwata ngashingeyi.” 11 Simon Petrus okwa yi ihe mowato, e ta hilile oshiyulitho komunkulo. Sho osha li shu udha oohi oonene, ethele limwe nomilongo ntano nandatu. Ihe nando oohi odha li mo odhindji ngeyi, oshiyulitho inashi tomoka nando. 12 Jesus okwa ti kuyo: “Ileni, tu lyeni.” Kape na nando ogumwe gwomaalongwa ngoka a li e na omukumo oku mu pula kutya ongoye lye? Oshoka yo oya li ye shi shi kutya oye Omuwa. 13 Jesus okwe ya e ta kutha oshikwiila nokwe shi ya pe; noohi wo osho a ningi. 14 Nduka olutitatu, sho Jesus i ihololele aalongwa ye konima yeyumuko lye kuusi.
(Johannes 21:15-19) Ano sho ya mana okulya, Jesus okwa ti kuSimon Petrus: “Simon yaJohannes, ou hole ndje tuu u vule mbaka?” Oye okwe mu yamukula: “Eeno, Omuwa, ou shi shi kutya ondi ku hole.” Jesus okwa ti kuye: “Litha uunzigona wandje.” 16 Jesus okwa ti kuye olutiyali: “Simon yaJohannes, ou hole ndje?” Oye okwe mu yamukula: “Eeno, Omuwa, ou shi shi kutya ondi ku hole.” Jesus okwe mu lombwele: “Litha oonzi dhandje.” 17 Jesus okwa ti kuye olutitatu: “Simon yaJohannes, ou hole ndje?” Petrus okwa nika oluhodhi, Jesus sho e mu pula olutitatu: “Ou hole ndje?” e ta ti kuye: “Omuwa, owa tseya iinima ayihe; ou shi shi kutya ondi ku hole.” Jesus okwa ti kuye: “Litha oonzi dhandje. 18 Ngame otandi ku lombwele oshili: Sho wa li omunona, owa li ho imanga epaya mombunda, nowa yi shaa mpoka wa hala, ihe nge wa koko, nena oto yelutha omaako goye, gulwe note ku manga e te ku fala nkoka inoo hala okuya ko.” 19 Shika okwe shi popi, opo a holole kutya oneso lya tya ngiini Petrus e na oku ka simanekitha Kalunga. Nena Jesus okwa ti kuye: “Landula ndje.”
nwtsty uuyelele wokukonakonwa wa kankamena kuJoh 21:15, 17
Jesus okwa ti kuSimon Petrus: Shoka sha popiwa kuJesus naPetrus moovelise ndhika oya li ye shi kundathana konima owala yokathimbo sho Petrus i idhimbike Jesus lwiikando itatu. Jesus okwa li a pula Petrus omapulo gatatu a tseye nkene e mu uvitile, naashoka osha ningitha Petrus a kale ‘a nika oluhodhi.’ (Joh 21:17) Mehokololo ndyoka lya nyolwa muJohannes 21:15-17 omwa longithwa iityalonga iyali ya yoolokathana yOshigreka: agapao nosho wo phileo, mbyoka ya tolokwa ohole mOmbiimbeli yOshindonga. Jesus okwa li a pula Petrus lutatu a ti: “Ou hole ndje?” Iikando ayihe Petrus okwa li a popi a mana ta ti kutya ‘oku hole’ Jesus. Jesus okwa li e shi tsu omuthindo kutya ohole ndjoka oyi na okwiinyengitha Petrus a paluthe ‘noku lithe’ aalongwa yaJesus, mboka a popi ye li oonzigona, nenge “oonzi.” (Joh 21:16, 17; 1Pet 5:1-3) Jesus okwa li e etha Petrus u ulike lutatu kutya oku mu hole shili, opo nduno okwe mu pe oshilonga shokulitha oonzi dhe. Kungawo, Jesus okwa li u ulike sha yela kutya okwa dhimina po Petrus sho e mu idhimbikile lutatu.
ou hole ndje tuu u vule mbika?: Palaka, uutumbulilo ‘u vule mbika’ otawu vulu okuuviwa ko momikalo odhindji. Aalongwantu yamwe oye hole ngoka tagu ti “owu hole ndje tuu komeho yaalongwa yalwe?” nenge “owu hole ndje tuu shi vulithe paalongwa mbaka?” Ihe otashi vulika uutumbulilo mboka tawu ti “owu hole ndje tuu shi vulithe piinima mbika?” sha hala okutya, oohi ndhoka ya kwata nenge ongeshefa yokuyula oohi. Ano ovelise ndjoka otashi vulika tayi ti: ‘Owu hole ndje tuu shi vulithe piinima yopamaliko? Ngele osho, litha oonzigona dhandje.’ Epulo ndyoka olya li lyu ukila ko pakutala kwaashoka Petrus a ningile nale. Nonando Petrus naye okwa li gumwe gwomaalongwa yaJesus yotango (Joh 1:35-42), ka li a landula Jesus pethimbo mpoka. Pehala lyaashono, okwa shuna kiilonga ye yokuyula oohi. Konima yoomwedhi dhontumba, Jesus okwa lombwele Petrus e ethe po ongeshefa ndjoka ya li tayi mana po ethimbo lye, a ninge “omuyuli gwaantu.” (Mat 4:18-20; Luk 5:1-11) Konima owala nokuli yeso lyaJesus, Petrus okwa shuna ishewe a ka yule oohi, naalongwa yalwe oya yi pamwe naye. (Joh 21:2, 3) Onkee ano, otashi vulika Jesus a li ta kwathele Petrus a tokole a mana mo ngele ota ka pititha komeho iilonga ye yokuyula oohi nenge iilonga yokulonga oonzi nenge aalanduli yaJesus oshili. — Joh 21:4-8.
olutitatu: Petrus okwa li i idhimbike Omuwa gwe lutatu; onkene Jesus okwa li e mu pula iikando itatu u ulike kutya oku mu hole. Sho Petrus e shi ningi, Jesus okwe mu lombwele u ulike ohole ndjoka mokukala a pititha komeho iilonga iiyapuki. Petrus naayapostoli ooyakwawo yalwe oya li taya ka palutha, taya ka koleka notaya ka litha oshigunda shaalanduli yaKristus aadhiginini. Nonando aalanduli mboka oya li aagwayekwa, oya li ya pumbwa natango okulongwa oshili. — Luk 22:32.
Konga omaliko gopambepo
(Johannes 20:17) Jesus okwa ti kuye: “Ino guma ndje, oshoka inandi londa natango, ndi ye kuTate. Ihe inda kaamwameme e to ya lombwele kutya ngame otandi shuna kuTate, nokuKalunga kandje nokeni wo.”
nwtsty uuyelele wokukonakonwa wa kankamena kuJoh 20:17
Ino guma ndje: Oshityalonga shOshigreka haptomai otashi vulu okutya “okuguma” nenge “okudhamakatela” nenge “okupapatela.” Omatoloko gamwe oga toloka oohapu dhaJesus taga ti: “Ino guma ndje.” Ihe Jesus ka li ti indike Maria Magdalena e mu gume, oshoka naakiintu yalwe mboka ya li ye mu mono tango sho a yumuka ine yi indika ye mu “idhingile koompadhi.” (Mat 28:9) Osha fa shi li ngeyi kutya Maria Magdalena okwa li a tila kutya Jesus oku li pokuya megulu. Molwaashoka Maria okwa li a halelela okukala pamwe nOmuwa gwe, okwa papatele Jesus a dhiginina, inaa hala oku mu etha. Opo Jesus e mu shilipaleke kutya ita yi manga, okwe mu lombwele kee mu dhamakatele, ihe naye a ka thikithe onkundana kaalongwa ye kutya okwa yumuka.
(Johannes 20:28) Tomas okwe mu yamukula a ti: “Omuwa gwandje! Kalunga kandje!”
nwtsty uuyelele wokukonakonwa wa kankamena kuJoh 20:28
Omuwa gwandje! Kalunga kandje!: Aalongwantu yamwe oya tala ko uutumbulilo mbuka kutya, nonando owa popiwa wu ukithwa kuJesus, wo wene otawu popi Kalunga, He. Yalwe ohaya ti kutya uutumbulilo mboka owa li wu ukithwa kuJesus melaka lyOshigreka shopetameko. Nonando osho ye shi tala ko ngawo, uutumbulilo “Omuwa gwandje! Kalunga kandje!” ohawu uviwa ko nawa uuna wa lesha omanyolo agehe. Molwaashoka omanyolo otagu ulike kutya Jesus okwa tuminine aalongwa ye etumwalaka a ti: “Ngame otandi shuna kuTate, nOkuKalunga kandje nokeni wo.” Onkee ano, kapu na uumbangi tawu ulike kutya Tomas okwa li ta dhiladhila kutya Jesus oKalunga Omunankondoadhihe. (Tala uuyelele wokukonakonwa wa kankamena kuJoh 20:17.) Tomas okwa li uva nale Jesus ta galikana ‘kuHe’ te mu popi e li “Kalunga awike kashili.” (Joh 17:1-3) Onkee ano, otashi vulika a li i ithana Jesus “Kalunga kandje” molwomatompelo taga landula: Okwa li a tala ko Jesus e li ‘kalunga,’ ihe haKalunga Omunankondoadhihe. (Tala uuyelele wokukonakonwa wa kankamena kuJoh 1:1.) Nenge otashi vulika a li e mu ithana ngawo, momukalo gwa faathana naangoka aapiya yaKalunga ya li hayi ithana aayengeli mboka ya tumwa kuJehova, ngaashi sha nyolwa mOmanyolo gOshihebeli. Tomas otashi vulika a li e shi omahokololo moka oohandimwe nenge omunyoli gwehokololo lyOmbiimbeli a popya nenge a nyola kombinga yomuyengeli a tumwa kuKalunga, ongo oye Jehova Kalunga. (Yelekanitha Genesis 16:7-11, 13; 18:1-5, 22-33; 32:24-30; Aatokolihapu 6:11-15; 13:20-22.) Onkee ano, otashi vulika Tomas a li ithana Jesus “Kalunga kandje,” shono tashi ulike kutya okwa zimina kutya Jesus omukalelipo nomupopikalelipo gwaKalunga kashili.
Elesho lyOmbiimbeli
(Johannes 20:1-18) Ongula onene yesiku lyotango lyoshiwike, manga kwa luudha natango, Maria Magdalena okwa yi kombila nokwa mono kutya emanya olya kandulwa po posheelo. 2 Oye okwa matuka e ta yi kuSimon Petrus nokomulongwa mukwawo ngoka Jesus kwa li e hole nokwe ya lombwele a ti: “Oyo oya kutha mo Omuwa mombila, natse katu shi wo mpoka ye mu tula!” 3 Nena Petrus nomulongwa mukwawo oya yi ihe kombila. 4 Ayehe yaali oya ningi shanamutango, ihe omulongwa ngoka mukwawo okwa thigi po Petrus e ta thiki tango kombila. 5 Oye okwa ontamene mo e ta mono omalapi omatokele, ihe ina ya mo. 6 Simon Petrus okwe ya wo e mu landula nokwa thikile u ukilila mombila. [Oye] okwa mono mo omalapi omatokele ge li mo. 7 Nelapi ndyoka lya li lya manga omutse gwaJesus, lya gonywa li ikalela pehala lyalyo. 8 Nena nomulongwa mukwawo ngoka a thiki tango kombila, okwa yi wo mombila nokwa mono e ti itaale. 9 Oshoka natango tuu oya li kaa uvite ko enyolo ndyoka tali ti: “Oye okwa li e na okuyumudhwa kuusi.” 10 Nena aalongwa oya shuna kaandjawo. 11 Maria okwa kala a thikama pombila pondje ta lili. Ano sho ta lili ngeyi, okwa ontamene mo mombila 12 nokwa mono mo aayengeli yaali ya zala oonguwo oontokele ya kuutumba mpoka pwa li pwa lala omudhimba gwaJesus, gumwe okomutse nomukwawo okomagulu. 13 Oyo oye mu pula: “Nekulu, omolwashike to lili?” Maria okwe ya yamukula a ti: “Aantu oya kutha mo Omuwa gwandje mombila, ngame inandi tseya mpoka ye mu tula.” 14 Sho a popi ngeyi, okwa punguluka e ta tala lwanima nokwa mono Jesus a thikama mpoka. Ihe okwa li kee shi shi kutya oye Jesus. 15 Nena Jesus okwe mu pula: “Nekulu, omolwashike to lili? Oto kongo lye?” Maria okwa dhiladhila kutya ngiika omwene gweyana nokwa ti kuye: “Tatekulu, ngele ongoye we mu kutha mo, lombwela ndje nkoka we mu tula, ndi ke mu tale ko.” 16 Jesus okwa ti kuye: “Maria!” Maria okwa pungulukile kuye e ta popi mOshihebeli ta ti: “Rabbi,” otashi ti Muhongi. 17 Jesus okwa ti kuye: “Ino guma ndje, oshoka inandi londa natango, ndi ye kuTate. Ihe inda kaamwameme e to ya lombwele kutya ngame otandi shuna kuTate, nokuKalunga kandje nokeni wo.” 18 Nena Maria Magdalena okwa yi nokwa lombwele aalongwa kutya okwa mono Omuwa, ngoka e mu lombwele oohapu ndhoka.
12-18 NOVOMBA
OMALIKO OKUZA MOOHAPU DHAKALUNGA | IILONGA 1–3
“Egongalo lyopaKriste tali tililwa ombepo ondjapuki”
(Iilonga 2:1-8) Ano esiku lyaPentekoste sho lya thikana, ooitaali ayehe oya adhika ya gongala peha limwe. 2 Ombaadhilila aantu oyu uvu oshihomo oshinene tashi zi kegulu noshu udhitha ondjugo moka ya li ya kuutumba. 3 Oyo oya mono ihe omalaka ga fa gomulilo taga halakanene mokati kawo, nomuntu kehe ngoka a li mo, okwa lambelwa kulimwe. 4 Oyo ayehe oyu udhithwa ihe Ombepo Ondjapuki e taa tameke okupopya omalaka omakwiilongo, ngashika naanaa Ombepo [ye] ya pe owino oku ga popya. 5 MuJerusalem omwa li mu na aalumentu Aajuda haa simaneke Kalunga ya za kiilongo ayihe yokombanda yevi. 6 Oyo sho yu uvu oshihomo shika, oya gongala kumwe ongundu onene. Ayehe oya li ya kumwa, oshoka kehe gumwe gwomokati kawo oku uvu, ooitaali taa popi melaka lyaandjawo. 7 Oyo oya haluka noya kumwa e taa pulathana: “Aantu mbaka taa popi ngashingeyi, kaye shi ayehe Aagalilea? 8 Ongiini ano, sho kehe gumwe gwomutse e ya uvite taa popi elaka lyoshilongo shaandjawo moka a valelwa?
(Iilonga 2:14) Nena Petrus okwa thikama pamwe naayapostoli ooyakwawo omulongo nagumwe. Oye okwa tameke okupopitha ongundu yaantu newi enene a ti: “Aajuda ooyakwetu, nane yalwe amuhe mboka mwa kala muJerusalem, pulakenii ndje ndi mu lombwele:
(Iilonga 2:37, 38) Aantu sho yu uvu oohapu ndhoka, odhe ya dhenge pomutima. Oyo noya pula Petrus naayapostoli ooyakwawo ya ti: “Aamwameme, otu na okuninga shike?” 38 Petrus okwe ya yamukula a ti: “Itedhululeni, mu ethe uulunde, kehe gumwe gwomune polwe, mu [ninginithilwe, NW] medhina lyaJesus Kristus. Nena Kalunga ota dhimi po oondjo dheni note mu pe omagano gOmbepo Ondjapuki.
(Iilonga 2:41) Oyendji yomuyo oyi itaale oohapu dhe noya [ninginithwa, NW]. Esiku ndyoka Omuwa okwa gwedhele ko ongundu yooitaali, aantu ye thike pomayuvi gatatu.
(Iilonga 2:42-47) Oyo oya kala taa longwa kaayapostoli e taa topola shoka ye shi na naayapostoli noya lile pamwe e taa galikana Kalunga pamwe. 43 Iilongankondo niikumithalonga oyindji mbyoka Kalunga e yi longitha aayapostoli, oye etele kehe gumwe uumbanda netilo. 44 Ooitaali ayehe oya tsikile okukala muukumwe neliko lyawo alihe oye li tula mumwe. 45 Oyo oya landitha po omapya gawo niimuna yawo e taa topolelathana iimaliwa mbyoka, nakehe gumwe okwa pewa shoka e shi pumbwa. 46 Esiku kehe oya tsikile okugongala pamwe motempeli mombepo yimwe e taa li iikulya yawo pamwe momagumbo gawo noye yi li nenyanyu noneifupipiko. 47 Oyo oya kala nokuhambelela Kalunga noya li ya hokiwa kaantu ayehe. Esiku kehe Omuwa okwa gwedhele ko aahupithwa kongundu yawo.
w86-E 12/1 ep. 29, okat. 4-5, 7
Omayambidhidho ngoka haga nyanyudha omutima
Mesiku lyotango lyokutotwa kwegongalo lyopaKriste mo 33 E.N, aantu 3 000 mboka opo ya li ya ninginithwa oya “topola shoka ye shi na naayapostoli noya lile pamwe e taa galikana.” Oye shi ningi netompelo lini ewanawa? Opo ya koleke eitaalo lyawo ‘yo ya kale taya longwa kaayapostoli.’ — Iilonga 2:41, 42.
Aajuda naamboka kaaye shi Aajuda oye ya kuJerusalem nelalakano lyokukala poshituthi shoPentekoste. Ihe mboka ya ningi Aakriste oya li ya hala okukala ko ethimbo ele noyi ilonge oshindji, opo ya koleke eitaalo lyawo. Shika osha ningitha pu holoke ompumbwe yiikulya noyomahala gokukala. Aatalelipo yamwe kaya li ye na iimaliwa ya gwana, omanga yalwe ya li ye na oyindji. Onkee ano, opwa li pu na okugongelwa iipumbiwa e tayi topolelwa mboka ye na ompumbwe. — Iilonga 2:43-47.
Aantu oya li ya landitha po omapya gawo nokutopolelathana shoka ye shi na nehalo ewanawa. Kaya li ya tegelelwa ya landithe po nokugandja po iinima yawo. Shika itashi ti kutya aayamba oya landitha po iinima yawo ayihe e taya ningi oohepele. Pehala lyaashono, molwaashoka oya li ye etela ohenda ooitaali ooyakwawo mboka ya li mompumbwe pethimbo mpoka, oya landitha po omapya gawo, niimaliwa mbyoka ya mona mo, oye yi gandja yi ka lande shoka sha li sha pumbiwa. — Yelekanitha 2 Aakorinto 8:12-15.
Konga omaliko gopambepo
(Iilonga 3:15) Osho ngeyi mwa dhipagitha omugandji gwomwenyo. Ihe Kalunga okwe mu yumudha kuusi — natse oonzapo dhoshinima shika.
it-2-E ep. 61, okat. 1
Jesus Kristus
“Omugandji gwomwenyo.” Omolwohenda yaHe, Jesus okwa gandja omwenyo gwe gwa gwanenena gu li iikulila. Shika oshe shi ningitha tashi wapa, opo aalanduli yaKristus aahogololwa ya ka pangele pamwe naye megulu nosho wo aantu ya ka kale nomwenyo kombanda yevi kohi yUukwaniilwa we. (Mat 6:10; Joh 3:16; Ef 1:7; Heb 2:5; tala EKULILOYAMBO.) Kungawo okwa ningi “Omugandji gwomwenyo” gwaantu ayehe. (Iil 3:15) Uutumbulilo wOshigreka mboka wa longithwa mpaka otawu ti “omuwiliki omukuluntu.” Uutumbulilo wa pambathana naamboka owa li wa longithwa wu ukithwa kuMoses, (Iil 7:27, 35) e li “omupangeli” gwaIsraeli.
(Iilonga 3:19) Onkee ano itedhululeni, ne mu galukile kuKalunga, opo a dhime po oondjo dheni,
Kalunga oha “dhimine po”
14 Iilonga 3:19 otayi popi natango nkene Jehova ha dhimine po tayi ti: ‘Onkee ano itedhululeni, ne mu galukile kuKalunga, opo a dhime po oondjo dheni.’ Uutumbulilo ‘dhima po’ otawu ulike koshityalonga shOshigreka shoka tashi vulu okutolokwa “okutheta po . . . nenge okuhanagula po.” Aalongwantu yamwe otaya ti kutya uutumbulilo mboka otawu faathanithwa nokudhima po shoka sha nyolwa komuntu gulwe. Ongiini shika sha li tashi vulika? Ohinga ndjoka ya li hayi longithwa unene pethimbo lyonale oya li ya longwa muusila womaka, wa vundakanithwa mumwe nonka nomeya. Nziya konima ngele omuntu a nyola nohinga ndjoka okwa li ha vulu okututika efulafula nokudhima po shoka a nyola. Shoka otashi thaneke nawa ohenda yaJehova. Ngele ta dhimi po oondjo dhetu osha fa owala ta kutha efulafula noku dhi dhima po.
Elesho lyOmbiimbeli
(Iilonga 2:1-21) Ano esiku lyaPentekoste sho lya thikana, ooitaali ayehe oya adhika ya gongala peha limwe. 2 Ombaadhilila aantu oyu uvu oshihomo oshinene tashi zi kegulu noshu udhitha ondjugo moka ya li ya kuutumba. 3 Oyo oya mono ihe omalaka ga fa gomulilo taga halakanene mokati kawo, nomuntu kehe ngoka a li mo, okwa lambelwa kulimwe. 4 Oyo ayehe oyu udhithwa ihe Ombepo Ondjapuki e taa tameke okupopya omalaka omakwiilongo, ngashika naanaa Ombepo [ye] ya pe owino oku ga popya. 5 MuJerusalem omwa li mu na aalumentu Aajuda haa simaneke Kalunga ya za kiilongo ayihe yokombanda yevi. 6 Oyo sho yu uvu oshihomo shika, oya gongala kumwe ongundu onene. Ayehe oya li ya kumwa, oshoka kehe gumwe gwomokati kawo oku uvu, ooitaali taa popi melaka lyaandjawo. 7 Oyo oya haluka noya kumwa e taa pulathana: “Aantu mbaka taa popi ngashingeyi, kaye shi ayehe Aagalilea? 8 Ongiini ano, sho kehe gumwe gwomutse e ya uvite taa popi elaka lyoshilongo shaandjawo moka a valelwa? 9 Otse otwa za kuPartia kuMedia nokuElam, kuMesopotamia, muJudea nokuKappadokia, kuPontus nokuAsia, 10 kuFrigia naPamfilia, kuEgipiti nokomikunda dhaLibia ndhoka dhi li popepi naKireni. Yamwe yomutse oya za kuRoma, 11 Aajuda naapagani mboka yi itedhululila muujuda. Yamwe yomutse oya za kuKreta nokuArabia. Ihe tse atuhe otu ya uvite taa popi iilonga iinene yaKalunga melaka lyetu.” 12 Aantu ayehe oya haluka noya kumwa. Oyo oya ti: “Shika otashi ti ngiini ano?” 13 Ihe ooyakwawo yalwe oya sheke ooitaali ya ti: “Aantu mbaka oya kolwa.” 14 Nena Petrus okwa thikama pamwe naayapostoli ooyakwawo omulongo nagumwe. Oye okwa tameke okupopitha ongundu yaantu newi enene a ti: “Aajuda ooyakwetu, nane yalwe amuhe mboka mwa kala muJerusalem, pulakenii ndje, ndi mu lombwele: 15 One otamu dhiladhila kutya aantu mbaka oya kolwa, ihe hasho. Otundi oyo ngaa ontimugoyi yongula. 16 Shika osho shoka sha popiwa komuhunganeki Joel sho a ti: Kalunga ota ti: 17 ‘Pomasiku gahugunina otandi ka ninga ngeyi: Otandi ka tilila Ombepo yandje maantu ayehe; aana yeni aamati naakadhona otaa ka hunganeka, aamati aagundjuka otaa ka mona omamoniko, aasamane aakulupe otaa ka yaguma. 18 Eeno, maayakuli yandje ayehe, aalumentu naakiintu, otandi ka tilila mo Ombepo yandje pomasiku ngoka, oyo notaa ka hunganeka. 19 Otandi ka holola iilongankondo pombanda kegulu, niikumithalonga pevi, kombanda yevi. Otaku ka holoka ombinzi nomulilo nolwithi lwa gundakana. 20 Etango otali ka luudha, nomwedhi otagu ka tiligana gwa fa ombinzi, esiku ndyoka lyOmuwa enene nolya simana manga inaali thikana. 21 Ihe kehe ngoka ti ithana edhina lyOmuwa, ota hupithwa.’
19-25 NOVOMBA
OMALIKO OKUZA MOOHAPU DHAKALUNGA | IILONGA 4–5
“Oya tsikile okupopya nuulaadhi oohapu dhaKalunga”
(Iilonga 4:5-13) Esiku lya landula aawiliki yAajuda, aakuluntu naalongimpango oya gongala muJerusalem. 6 Oyo oya gongala pamwe nomuyambimukuluntu Hannas naKajafas naJohannes naAleksander nayalwe ayehe mboka yomezimo lyomuyambimukuluntu. 7 Oyo oya thikameke aayapostoli kiipala yawo noye ya pula ya ti: “Omwe shi ningi ngiini? Okoonkondo dhinipo mwa longo shino? Edhina olyalye mwa tumbula, sho mwa aludha oshilema?” 8 Petrus oku udha Ombepo Ondjapuki nokwe ya yamukula a ti: “Aawiliki naakuluntu yoshigwana, 9 omolwoshilonga oshiwanawa sha ningilwa omulumentu oshilema otu li mpaka nena tatu pulwa kutya okwa aludhwa koshike. 10 Onkee ano ne amuhe noshigwana ashihe shAaisraeli, kaleni mu shi shi kutya omulumentu nguka sho a thikama ngeyi komeho geni ondjolowele, okwa aludhwa koonkondo dhedhina lyaJesus Kristus Omunasareti. Jesus ngoka mwe mu alele [komuti gwomahepeko, NW], Kalunga okwe mu yumudha kuusi. 11 Oye ngoka ta popiwa kenyolo ndyoka tali ti: ‘Emanya ndyoka ne aatungi mwe li dhimi, olyo lya ningi emanya li na oshilonga li vule agehe.’ 12 Omuye awike tamu tu zile ehupitho, oshoka muuyuni auhe kamu na nando ogumwe gwedhina Kalunga e li hololela aantu, tatu vulu okuhupithilwa muye.” 13 Iilyo yoshigongi shaatokoli yAajuda sho ya mono, Petrus naJohannes taa popi nuulaadhi, oya kumwa sho ye ya dhimbulula kutya oyo aantu inaa longwa sha. Nena oyo oya dhimbulula ihe kutya aalumentu mbaka oya kala puJesus.
w08-E 9/1 ep. 15, oshimpungu
Tango omanyolo oga li haga popiwa pakana nokonima oga ka nyolwa — Okunyola nosho wo Aakriste yopetameko
Mbela aayapostoli oya li kaaye shi okunyola nokulesha?
Aawiliki naakuluntu yaJerusalem, “sho ya mono, Petrus naJohannes taa popi nuulaadhi, oya kumwa sho ye ya dhimbulula kutya oyo aantu inaa longwa sha.” (Iilonga 4:13) Mbela aayapostoli oya li shili inaaya longwa nenge kaaye shi okunyola nokulesha? O-The New Interpreter’s Bible oya popya kombinga yaashoka ya ti: “Uutumbulilo mbuka kawu na okuuviwa ko kutya otawu ti lelalela Petrus naJohannes kaya li ye shi okunyola nokulesha. Owa li owala tawu ulike keyooloko enene li na ko nasha noondondo ndyoka lya li pokati kaapanguli naayapostoli.”
Omanenedhiladhilo okuza membo lyIilonga
4:3 — Mbela Petrus naJohannes oya li inaaya longwa sha? Aawe, oya li ya longwa. Oya li yi ithanwa “aantu inaa longwa sha,” molwaashoka kaya li ya mona elongo lyopalongelokalunga ndyoka hali longwa koosikola dhoshirabbi.
(Iilonga 4:18-20) Nena oye ya ithana ishewe, ye ye meni, e taa ya indike, yaa longe noyaa popye we nando medhina lyaJesus. 19 Ihe Petrus naJohannes oye ya yamukula ya ti: “Tokoleni ne yene kutya [oshinipo] shu uka koshipala shaKalunga. Otu na okuvulika kune nenge otu na okuvulika kuKalunga? 20 Oshoka itatu vulu okumwena, tu kale ando itaatu hokolola shoka tse twe shi mono notwe shi uvu.”
(Iilonga 4:23-31) Petrus naJohannes sho ye ethiwa, oya shuna mbalambala kooyakwawo noye ya hokololele ashihe shoka aayambi aakuluntu naakuluntu yoshilongo ya ti. 24 Oyo sho ye shi uvu, oya galikana Kalunga ongomuntu gumwe ya ti: “Omuwa, Omushiti gwegulu nevi nefuta naashihe shoka sha kala muyo. 25 Ongoye wa pele omuntu gwoye, tatekulu David, koonkondo dhOmpepo Ondjapuki iitya yokupopya, sho a ti: ‘Omolwashike aapagani ya fulakata, omolwashike iigwana tayi pangele oompangela dhowala? 26 Aakwaniilwa yokombanda yeni otaa ilongekidha, naaleli otaa gongala, notaa tsu ondumbo okukondjitha Omuwa nOmugwayekwa gwe.’ 27 Oshoka Herodes naPontius Pilatus pamwe naapagani noshigwana shAaisraeli oya gongala moshilando shika okukondjitha Jesus, omuntu gwoye omuyapuki, ngoka we mu ningi Kristus. 28 Oyo oya gongala, opo ya kondjithe ashihe shoka ngoye mwene koonkondo dhoye nokehalo lyoye we shi utha nale, shi ningwe. 29 Ano ngashingeyi, Omuwa, pulakena, nkene taa popitha aamati yoye nomagandambadhi, ngoye u pe aamati yoye oohapu dhoye, tu popye nuulaadhi auhe twaa na uumbanda. 30 Yelutha oshikaha shoye pombanda, u aludhe aavu, ngoye u holole po iikumithalonga niilongankondo omedhina lyaJesus, Omuntu gwoye omayapuki.” 31 Ooitaali sho ya mana okugalikana, ehala mpoka ya li taa galikanene, olya kakama. Oyo ayehe oyu udhithwa Ombepo Ondjapuki e taa tameke okupopya nuulaadhi oohapu dhaKalunga.
it-1-E ep. 128, okat. 3
Aayapostoli
Iilonga megongalo lyopaKriste. Aayapostoli oya li ya nkondopalekwa sho ya tililwa ombepo ondjapuki yaKalunga poPentekoste. Oontopolwa ntano dhopetameko dhembo lyIilonga yAayapostoli otadhi ulike kutya aayapostoli oya li kaaye na uumbanda noya li aalaadhi sho tayu uvitha onkundana ombwanawa neyumuko lyaJesus, nonando aawiliki yawo oya li ye tulitha mokakuma, ye ya dhengitha noku ya tilitha kutya otaya dhipagwa. Pethimbo ndyoka konima yoPentekoste, omukalo gwa dhenga mbanda moka aayapostoli ya li ya kwatele komeho taya wilikwa kombepo ondjapuki, ogwa ningitha egongalo lyopaKriste li koke. (Iil 2:41; 4:4) Oya li ya tameke tango okuuvithila muJerusalem noya yi kuSamaria sigo omuuyuni awuhe. — Iil 5:42; 6:7; 8:5-17, 25; 1:8.
Konga omaliko gopambepo
(Iilonga 4:11) Oye ngoka ta popiwa kenyolo ndyoka tali ti: ‘Emanya ndyoka ne aatungi mwe li dhini, olyo lya ningi emanya li na oshilonga li vule agehe.’
it-1-E ep. 514, okat. 4
Emanya lyokolonela nenge li na oshilonga li vule agehe
Episalomi 118:22 otali popi kutya emanya ndyoka aatungi ye li ekelehi, olya li tali ka ninga “emanya li na esimano li vule agehe” (mOshihebeli roshpinnah). Jesus okwa li a popi ehunganeko ndyoka nokwe li ukitha kuye mwene kutya oye “emanya li na esimano li vule agehe” (mOshingreka, kephalegonias, emanya lyokolonela). (Mat 21:42; Mark 12:10, 11; Luk 20:17) Ngaashi owala emanya ndyoka hali kala pombandaelela yetungo hali kala li wetike nuupu, Jesus Kristus naye emanya lya simanenena lyegongalo lyopaKriste lyaagwayekwa, ndyoka tali faathanithwa notempeli. Petrus naye okwa li a popi kutya Kristus oye ta popiwa mEpisalomi 118:22, e li “emanya” ndyoka aantu ye ekelehi, ihe Kristus okwa li a hogololwa kuKalunga a ninge “emanya li na oshilonga li vule agehe.” — Iil 4:8-12; tala wo 1Pet 2:4-7.
(Iilonga 5:1) Ihe okwa li kuna omulumentu gumwe, edhina lye Ananias, nomukadhi Safira. Ananias okwa landitha po epya lyawo,
Petrus naAnanias oya li ya fundju — oshike tatu ilongo mehokololo ndika?
Ananias nomukulukadhi gwe oya landitha po epya lyawo, opo ya mone iimaliwa ya kwathele mboka opo ya ninginithwa. Sho Ananias e eta iimaliwa kaayapostoli, okwa ti kutya iimaliwa mbyoka oyo owala ya za mo. Ihe hasho shi li ngaaka. Iimaliwa yilwe okwe yi ningi po ye. Kalunga okwa tseyithile Petrus oshinima shika, onkee ano, Petrus okwa lombwele Ananias a ti: “Ongoye ino fundja aantu, ihe owa fundju Kalunga.” Ananias sho e shi uvu okwi ihata pevi nokwa si. Konima yoowili ndatu lwaampono, omukulukadhi gwe okwe ya mo. Ka li e shi shoka sha ningilwa omusamane gwe, naye okwa li wo a popi iifundja nokwi ihata po e ta si.
Elesho lyOmbiimbeli
(Iilonga 5:27-42) Oyo oye eta mo aayapostoli noye ya kaleke omuthika komeho goshigongi. Omuyambimukuluntu okwa ti kuyo: 28 “Otse otwe mu lombwele: Inamu longa we nando aantu medhina lyomulumentu nguka Jesus. Taleni ihe shoka mwa ningi. Jerusalem ashihe mwe shi udhitha elongo lyeni. One omwa hala nokuli oku tu tsika ondjo yeso lyomulumentu ngoka Jesus.” 29 Nena Petrus naayapostoli ooyakwawo oye ya yamukula ya ti: “Otse otu na okuvulika kuKalunga, hakaantu. 30 Kalunga ngoka ootate haye mu longele, oye ngoka a yumudha Jesus tuu ngoka mwe mu alele [komuti gwomahepeko, NW] nomwe mu dhipaga. 31 Kalunga okwe mu yeluthile pombanda kolulyo lwe, a kale Omuwiliki nOmuhupithi, nokwa pe Aaisraeli ompito yokwiitedhulula, ya dhiminwe po oondjo dhawo. 32 Mokuhokolola iinima mbika otse oonzapo pamwe nOmbepo Ondjapuki, ndjoka Kalunga he yi gandja omagano kumboka haa vulika kuye.” 33 Iilyo yoshigongi shaatokoli sho yu uvu oohapu dhika, odhe ya lulumike koomwenyo noya tokola okudhipaga aayapostoli. 34 Ihe moshigongi omwa thikama gumwe, omulongimpango nomufarisayi, edhina lye Gamaliel, ngoka a li ha simanekwa kaantu ayehe. Oye okwa gandja elombwelo, aayapostoli ya piithwe mo manga. 35 Opo ihe okwa lombwele oshigongi a ti: “Aaisraeli ne ooyakwetu, dhiladhileni nawa shoka mwa hala okuningila aalumentu mbaka. 36 Oshoka inapu pita ethimbo ele, sho Teudas a holokele nokwi iningi aniwa oye ashikeshalye, naalumentu ye thike lwopomathele gane oyi igameke kuye. Ihe oye okwa dhipagwa, naalanduli ye ayehe oya halakanithwa noya manwa po. 37 Konima yaanguka, pethimbo lyomayalulo gaantu, Judas Omugalilea okwa holoka po. Oye okwi ihilile ongundu, ihe naye wo okwa dhipagwa, naalanduli ye oya halakanithwa po. 38 Onkee ano ngashingeyi otandi mu lombwele, aalumentu mbaka inamu ya ningila nando uuwinayi washa. Ya etheni, ya tye ngaaka, oshoka oshilonga shika shawo ngele osha za momuntu, otashi ka hula po; 39 Ihe ngele osha za muKalunga, nena one itamu vulu nando oku ya sinda. Nokuli otamu ke shi mona kutya otamu kondjitha Kalunga.” Oshigongi shaatokoli osha taamba epukululo lyaGamaliel. 40 Oyo oyi ithanene mo ihe aayapostoli noya lombwele aalangeli, ye ya dhenge. Opo ihe oye indike, yaa popye we nando olumwe medhina lyaJesus, noye ya etha. 41 Aayapostoli oya zi mo moshigongi shaatokoli ya nyanyukwa noonkondo, sho Kalunga e ya tala ya gwana okuhepekelwa edhina lyaJesus. 42 Nokuli esiku kehe oya tsikile okulonga nokuuvitha motempeli nomomagumbo elaka ndyoka tali ti kutya Jesus oye Kristus.
26 NOVOMBA–2 DESEMBA
OMALIKO OKUZA MOOHAPU DHAKALUNGA | IILONGA 6–8
“Egongalo lyopaKriste epe tali makelwa”
(Iilonga 6:1) Pomasiku ngeyaka omwaalu gwooitaali sho gwa li tagu indjipala noonkondo, opwa tukuluka oontamanana pokati kAajuda mboka haa popi Oshigreka nAajuda aavalelwamo. Aajuda mboka haa popi Oshigreka, oya nyenyeta kutya mokutopola kwesiku kehe kwoompumbwe dhopalutu aaselekadhi yawo oya pangwa.
bt-KY ep. 41, okat. 17
“Otu na okuvulika kuKalunga, hakaantu”
17 Egongalo lyopaKriste ndyoka epe natango olya li lya taalela uupyakadhi wontumba. Mbela owa li washike? Oyendji yomaalongwa mboka ya li ya ninginithwa oya li taya talele po Jerusalem noya li ya hala okwiilonga oshindji manga inaaya shuna komagumbo gawo. Aalongwa yomuJerusalem oya li ya gandja omayambidhidho gopashimaliwa nehalo ewanawa, opo iikulya niinima yilwe mbyoka ya li ya pumbiwa, yi landwe. (Iil. 2:44-46; 4:34-37) Sho iikulya ya li tayi ‘topolwa esiku kehe,’ aaselekadhi Aagreka oya li taya “pangwa.” (Iil. 6:1) Ihe aaselekadhi Aahebeli kaya li taya pangwa. Onkee ano, uupyakadhi mboka wa li po, okatongotongo. Oshinima shika osha li tashi vulu okweeta etopoko.
(Iilonga 6:2-7) Nena aayapostoli oya hiya ongundu ayihe yooitaali e taye ya lombwele taa ti: “Inashi opala, ngele tse otatu etha po okuuvitha oohapu dhaKalunga, opo tu kale twi ipyakidhila noompumbwe dhopalutu. 3 Onkee ano, aamwameme, hogololii mo mokati keni aalumentu yaheyali mboka ye shi kwiinekelwa noye na Ombepo Ondjapuki noondunge. Otse otatu ya langeke moshilonga shika. 4 Tse yene polwetu otwa hala okwiitula lela megalikano nomoshilonga sheuvitho lyoohapu dhaKalunga.” 5 Egongalo alihe olya hokwa edhiladhilo ndika lyaayapostoli. Onkee oya hogolola mo Stefanus, omulumentu e na eitaalo nOmbepo Ondjapuki, naFilippus, Prokorus, Nikanor, Timon, Parmenas naNikolaus, nale omupagani gwokuAntiokia, a ninga Omujuda. 6 Egongalo olye ya tula ihe komeho gaayapostoli, naayapostoli oye ya galikanene noye ya tenteke iikaha. 7 Osho ngeyi oohapu dhaKalunga odha tsikile okutaandela. Omwaalu gwooitaali yomuJerusalem ogwi indjipala noonkondo, nongundu onene yaayambi oya ningi ooitaali.
bt-KY ep. 42, okat. 18
“Otu na okuvulika kuKalunga, hakaantu”
18 Aayapostoli mboka ya li olutuwiliki lwegongalo ndyoka lya li tali koko, oya mono kutya kasha li pandunge kuyo ye ‘ethe po okuuvitha oohapu dhaKalunga, opo ya kale yi ipyakidhila noompumbwe dhopalutu.’ (Iil. 6:2) Opo ya kandule po uupyakadhi mboka, aayapostoli mboka oya lombwele aalongwa ya konge aalumentu yaheyali ‘ye na Ombepo Ondjapuki noondunge,’ oyo ya pewe ‘oshilonga shika’ sha simana. (Iil. 6:3) Oya li ya pumbwa aalumentu ya pyokoka, oshoka oshilonga shoka kasha li owala sha kwatela mo okutopola iikulya, ihe osha li sha kwatela mo wo okuungaunga niimaliwa, okulanda iipumbiwa nokuninga omandhindhilikonyolo. Aalumentu ayehe mboka ya hogololwa oya li ye na omadhina gOshigreka, shoka tashi vulika sha li sha ningitha ya taambwe ko nuupu kaaselekadhi mboka ya li ya yemata. Konima sho aayapostoli ya galikana kombinga yaalumentu yaheyali mboka ya hogololwa, oye ya langeke po, opo ya longe ‘oshilonga shoka’ sha simana.
(Iilonga 7:58–8:1) Oye mu tidhile pondje yoshilando e taye mu umbu nomamanya. Oonzapo oya thigi oonguwo dhawo metonatelo lyomulumentu omugundjuka, edhina lye Saulus. 59 Ano manga ya li taa tsikile ngeyi okudhenga Stefanus okwa galikana a ti: “Omuwa Jesus, taamba omwenyo gwandje!” 60 Opo ihe Stefanus okwa tsu oongolo nokwiigidha mokulekule a ti: “Omuwa, ino ya yalulila ondjo ndjika.” Ano sho a popi ngeyi, okwa si.
8 Saulus naye wo okwa li a panda okudhipagwa huka kwaStefanus. Okuza kesiku tuu ndyoka egongalo lyomuJerusalem olya adhika komahepeko omanene. Onkee ooitaali ayehe, kakele kaayapostoli, oya halakanene omikunda adhihe dhaJudea naSamaria.
Konga omaliko gopambepo
(Iilonga 6:15) Ayehe mboka ya li ya kuutumba moshigongi, oya tongolola Stefanus noya dhimbulula, oshipala she osha fa oshipala shomuyengeli.
bt-KY ep. 45, okat. 2
Stefanus okwa li a ‘yambekwa unene noku udha oonkondo’
2 Pompito mpaka, eholokopo lyaStefanus olya li endhindhilikwedhi. Sho aapanguli ye mu tala, oshipala she osha li ‘sha fa oshipala shomuyengeli.’ (Iil. 6:15) Aayengeli ohaya fala omatumwalaka gaJehova Kalunga, nomolwaashono haya kala kaaye na uumbanda, ya ngungumana noye na ombili. Onkee ano, Stefanus naye osho a li ngaaka, naapanguli mboka oya li ye shi wete. Oshike sha li she mu kwathele a kale a ngungumana?
(Iilonga 8:26-30) Omuyengeli gwOmuwa okwa lombwele Filippus a ti: “Thikama, ilongekidha, u ye lwokuumbugantu kondjila ndjoka ya za muJerusalem tayi yi kuGaza.” Ondjila ndjoka ihayi endiwa we. 27 Filippus okwa thikama e ta yi. Ano omulumentu gumwe a simana gwokuEtiopia okwa adhika e li mondjila ta shuna kegumbo. Omulumentu nguka okwa li elenga enene nomudhiginini gweliko lyaKandake, omukwaniilwa omukiintu gwaEtiopia. Oye okwa yile kuJerusalem, a ka galikane Kalunga. 28 Ngashingeyi mokugaluka kwe okwa adhika a kuutumba metemba lye, te ende ta lesha membo lyomuhunganeki Jesaja. 29 Opo ihe Ombepo Ondjapuki oya lombwele Filippus ya ti: “Inda, u ka ende popepi netemba ndii.” 30 Nena Filippus okwa matukile ketemba noku uvu, elenga tali lesha membo lyomuhunganeki Jesaja. Onkee okwe li pula a ti: “Ou uvite ko tuu omadhiladhilo gaashoka to lesha?”
bt-KY ep. 58, okat. 16
Taya uvitha “elaka etoye tali popi Jesus”
16 Aakriste kunena nayo oye na uuthembahenda wokulonga iilonga ya fa yaFilippus. Olundji ohaya gandja uunzapo wontukuluka kombinga yetumwalaka lyUukwaniilwa, ngaashi uuna ye li momalweendo. Poompito odhindji ohaya tsakanene naantu mboka ye na ehalo lyokupulakena. Osho shi na okukala ngaaka, oshoka Ombiimbeli oya popya kutya aayengeli otaya wilike iilonga yokuuvitha, opo etumwalaka li uvithilwe “omihoko adhihe, omaludhi agehe, omalaka agehe niigwana ayihe.” (Eh. 14:6) Jesus okwa li a hunganeka kutya aayengeli otaya ka wilika iilonga yokuuvitha. Okwa popi meyele lye li na sha niilya nomawu a ti kutya pethimbo lyeteyo, ano pehulilo lyuuyuni mbuka, “aateyi oyo aayengeli.” Okwa li wo a gwedha ko a ti kutya aayengeli mboka oyo taya ka “gongolola mOshilongo she aahongololi ayehe naayehe mboka haa yono ompango.” (Mat. 13:37-41) Pethimbo opo tuu mpoka, aayengeli otaya ka gongela mboka ye na etegameno lyokuya mUukwaniilwa womegulu nokonima yethimbo “engathithi lyaantu,” mboka ye li ‘oonzi dhilwe,’ mboka Jehova a hala okunanena mehangano lye. — Eh. 7:9; Joh. 6:44, 65; 10:16.
Elesho lyOmbiimbeli
(Iilonga 6:1-15) Pomasiku ngeyaka omwaalu gwooitaali sho gwa li tagu indjipala noonkondo, opwa tukuluka oontamanana pokati kAajuda mboka haa popi Oshigreka nAajuda aavalelwamo. Aajuda mboka haa popi Oshigreka, oya nyenyeta kutya mokutopola kwesiku kehe kwoompumbwe dhopalutu aaselekadhi yawo oya pangwa. 2 Nena aayapostoli oya hiya ongundu ayihe yooitaali e taye ya lombwele taa ti: “Inashi opala, ngele tse otatu etha po okuuvitha oohapu dhaKalunga, opo tu kale twi ipyakidhila noompumbwe dhopalutu. 3 Onkee ano, aamwameme, hogololii mo mokati keni aalumentu yaheyali mboka ye shi kwiinekelwa noye na Ombepo Ondjapuki noondunge. Otse otatu ya langeke moshilonga shika. 4 Tse yene polwetu otwa hala okwiitula lela megalikano nomoshilonga sheuvitho lyoohapu dhaKalunga.” 5 Egongalo alihe olya hokwa edhiladhilo ndika lyaayapostoli. Onkee oya hogolola mo Stefanus, omulumentu e na eitaalo nOmbepo Ondjapuki, naFilippus, Prokorus, Nikanor, Timon, Parmenas naNikolaus, nale omupagani gwokuAntiokia, a ninga Omujuda. 6 Egongalo olye ya tula ihe komeho gaayapostoli, naayapostoli oye ya galikanene noye ya tenteke iikaha. 7 Osho ngeyi oohapu dhaKalunga odha tsikile okutaandela. Omwaalu gwooitaali yomuJerusalem ogwi indjipala noonkondo, nongundu onene yaayambi oya ningi ooitaali. 8 Stefanus okwa li a yambekwa unene kuKalunga noku udha oonkondo. Oye okwa longo iikumithalonga niilongankondo iinene mokati kaantu. 9 Ihe aalumentu yamwe oye mu tsile ondumbo. Oyo oya li iilyo yomosinagoga ndjoka hayi ithanwa “Osinagoga yaalumentu ya manguluka,” moka mwa li mu na Aajuda mboka ya za kuKirene nokuAleksandria. Aalumentu mboka pamwe nAajuda yalwe ooyakwawo mboka ya za kuKilikia, nokuAsia, oya tameke okuludhika naStefanus. 10 Ihe Ombepo oya pe Stefanus oondunge, onkee oya nyengwa oku mu yamukula nenge oku mu ludhikitha. 11 Onkee ano oya pe aalumentu yamwe yontumba oombumbo, opo ya lundile Stefanus ya tye: “Otse otwe mu uvu ta sheke Moses naKalunga.” 12 Pamukalo gwa tya ngeyi oya sikumudha aantu, aakuluntu yAajuda naalongimpango. Mboka oye ya kuStefanus noye mu kwata e taye mu fala moshigongi shaatokoli Aajuda. 13 Nena oyo oye eta po aalumentu yamwe taa popi iifundja nokulundila Stefanus taa ti: “Omulumentu nguka oha popi aluhe nokusheka otempeli yetu ondjapuki nompango yaMoses. 14 Nokuli tse otwe mu uvu ta popi ta ti: Jesus Omunasareti ota ka hanagula po otempeli ndjika nota lundulula omithigululwakalo ndhoka twe dhi thigilwa kuMoses.” 15 Ayehe mboka ya li ya kuutumba moshigongi, oya tongolola Stefanus noya dhimbulula, oshipala she osha fa oshipala shomuyengeli.