Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
© 2024 Watch Tower Bible and Tract Society of Pennsylvania
6-12 MEI
OMALIKO OKUZA MOOHAPU DHAKALUNGA EPISALOMI 36–37
“Ino impwiyika molwaakolokoshi”
Oshike tashi ka hula po, ngele Uukwaniilwa waKalunga we ya?
4 Iilonga yaakolokoshi oye tu guma ngiini kunena? Manga omuyapostoli Paulus inaa popya kutya pethimbo lyetu otapu ka kala “omathimbo omadhigu,” okwa li a nwethwa mo a nyole ta ti: “Aakolokoshi naafudhime otaa tsikile okuza muuwanawa yu uka muuwinayi.” (2 Tim. 3:1-5, 13) Mbela owa mona nkene omahunganeko ngono taga gwanithwa? Oyendji yomutse otwa ninga iihakanwa yaalongithinkondo aakwanyanya, oohamutsemukukutu niipululu. Yamwe yomuyo aakolokoshi yi iwetikile; nayalwe aafudhime, ano haya holeke shoka ya ninga e tayi iningi ya fa aayuuki. Nokuli nonando inaye tu ningila uukolokoshi paumwene, iilonga yawo oye tu guma natango. Ohashi tu ehameke koomwenyo, uuna tatu uvu iilonga yawo iinyanyalithi. Omukalo moka aakolokoshi haya hepeke aanona, aakokele nosho wo aantu yalwe mboka kaaye na ngoka te ya gamene, ohagu tu ehameke. Aakolokoshi ohayu ulike ombepo ya fa yiinamwenyo noyoompwidhuli. (Jak. 3:15) Lago enene, Oohapu dhaJehova otadhi tu pe etegameno.
Jehova oha yambeke mboka haya dhimine po yalwe
10 Ohatu iyehameke tse yene, ngele otwa kala twa kwatela gumwe onkone. Jehova okwa hala tu ethe po onkone, opo tu kale tu na ombili. (Lesha Aaefeso 4:31, 32.) Ote tu lombwele ‘kaatu iyethele muugeyi.’ (Eps. 37:8) Ngele otwa landula omayele ngoka, otage ke tu kwathela lela. Okukala twa kwatela gumwe onkone, otashi vulu oku tu ehameka palutu nopamaiyuvo. (Omayel. 14:30) Ngele otwa kwatela omuntu gwontumba onkone ihashi mu ningi sha, ngaashi owala omuntu a nwa uuzigo, ihe okwa tegelela ngoka e mu ninga nayi a se. Ihe uuna twa dhimine po yalwe, ohashi tu etele uuwanawa. (Omayel. 11:17) Ohatu kala tu na ombili yopamadhiladhilo noyokomutima, nohatu vulu okutsikila okulongela Jehova.
w03 12/1 ep. 26, okat. 20
“Konga uulinawa pOmuwa”
20 Opo nduno, “aayifupipiki otaa ka thigulula evi.” (Episalomi 37:11a) Mbela “aayifupipiki” oyo oolye? Oshitya shoka sha tolokwa ‘aayifupipiki,’ osha za koshitya shopekota tashi ti “hepeka, ishonopeka, lyatela pevi.” Odhoshili kutya “aayifupipiki” oyo mboka ya tegelela Jehova neishonopeko, a ka kuthe po okwaa na uuyuuki hoka taku ya hepeke. “[Otaya] ka mona uulinawa nombili.” (Episalomi 37:11b) Nokuli nongashingeyi ohatu mono ombili onene moparadisa yopambepo, ndjoka yi li megongalo lyashili lyopaKriste.
Omaliko gomOmbiimbeli
it-2-E ep. 445
Ondundu
Okukola, okukalelela nenge okuyeluka. Oondundu odha popiwa dha kola notadhi kalelele. (Jes 54:10; Hab 3:6; yelekanitha Eps 46:2.) Onkee ano, sho omupisalomi a popi uuyuuki waJehova wa fa “oondundu” (Eps 36:6), otashi vulika a li ta ti kutya uuyuuki waJehova ihawu tenguka. Nenge, molwaashono oondundu odha yeluka, shika otashi vulika tashi ulike kutya uuyuuki waKalunga owu vule kokulekule wopantu. (Yelekanitha Jes 55:8, 9.) Shi na ko nasha noshiyaha oshitiheyali shondjahi yaKalunga, Ehololo 16:20 olya ti: “Noondundu inadhi monika we.” Shika otashi ulike kutya niinima mbyoka ya yeluka ngaashi pashiholelwa oondundu, itayi vulu okuya ontuku ondjahi yaKalunga. — Yelekanitha Jer 4:23-26.
13-19 MEI
OMALIKO OKUZA MOOHAPU DHAKALUNGA EPISALOMI 38–39
Ino tsikila okukala wu uvite unene wu na ondjo
Kala wa ‘tala komeho’
12 Lesha 1 Johannes 3:19, 20. Omathimbo gamwe, atuheni ohatu kala tu uvite tu na ondjo. Pashiholelwa, yamwe ohaya kala yu uvite unene ye na ondjo, omolwiinima mbyoka ya ninga manga inaaya tseya oshili. Yalwe ohaya kala yu uvite ye na ondjo, omolwomapuko ngoka ya ninga konima sho ya ninginithwa. Oshi li paunshitwe okukala wu uvite ngawo. (Rom. 3:23) Odhoshili kutya otwa hala okuninga shoka shi li mondjila. Ihe “atuheni ohatu puka olwindji.” (Jak. 3:2; Rom. 7:21-23) Nonando ihatu nyanyukilwa okukala tu uvite tu na ondjo, oshi na uuwanawa wontumba kutse. Omolwashike tatu tile ngawo? Omolwaashoka okukala tu uvite tu na ondjo, otaku vulu oku tu inyengitha tu ninge omalunduluko notu kale twa tokola toko kaatu endulule omapuko ngoka twa ninga. — Heb. 12:12, 13.
13 Shimwe ishewe, otashi vulika tu kale tu uvite unene tu na ondjo, nokuli nokonima sho twe iyela ombedhi naasho Jehova e tu dhimina po. Okukala wu uvite ngawo, okwa nika oshiponga. (Eps. 31:10; 38:3, 4) Omolwashike tatu tile ngawo? Natu taleni koshiholelwa shomumwameme gumwe ngoka a kala u uvite unene e na ondjo, omolwomapuko ge gomonakuziwa. Okwa ti: “Onda li ndu uvite itaashi kwatha sha okulongela Jehova nuudhiginini, molwaashoka otashi vulika itaandi ka hupithwa.” Oyendji yomutse otashi vulika tu kale tu uvite ngaashi omumwameme ngoka. Onkee ano, otwa pumbwa okukotokela okukala tu uvite unene tu na ondjo. Omolwashike? Omolwaashoka Satana ota ka kala a nyanyukwa noonkondo, ngele otwe etha po okulongela Jehova, nonando Jehova okwe tu dhimina po. — Yelekanitha 2 Aakorinto 2:5-7, 11.
w02-E 11/15 ep. 20, okat. 1-2
Ongiini tatu vulu okuningitha omasiku getu ga kale taga ti sha koshipala shaJehova?
OMASIKU gokukalamwenyo kwetu otaga monika omashona nomafupi. Omupisalomi David okwa li a tedhatedha kuufupi wonkalamenyo noshe mu inyengitha a galikane ta ti: “Omuwa, tseyithila ndje ehulilo lyandje, uule womasiku gandje, opo ndi pikule kutya ngame oshipipili. Omasiku gandje owe ga ningi omashona nokukalamwenyo kwandje momeho goye itaku ti sha.” David okwa li ti ipula unene nokukaleka onkalamwenyo ye momukalo ngoka tagu nyanyudha Kalunga, ano okupitila moohapu dhe nomiilonga ye. Okwa lombwele Kalunga a manguluka a ti: “Omungoye ndi na etegameno.” (Episalomi 39:4, 5, 7) Jehova okwa li a pulakene. Okwa li a yeleke iilonga yaDavid, e te mu pe ondjambi yi ikolelela kwaashoka.
Oshipu komuntu okukala i ipyakidhila esiku alihe nokweetha a nwethwe mo monkalamwenyo ndjika ya udha omaipyakidhilo. Shika otashi vulu oku tu gwilila po, unene tuu mokukala tu na iinima oyindji mbyoka twa pumbwa okulonga, nonando katu na ethimbo olindji lyoku yi ninga. Mbela shoka hatu ipula nasho osha faathana naashoka David a li hi ipula nasho, ano okukaleka onkalamwenyo yetu momukalo ngoka gwa hokiwa kuKalunga? Uushili owo kutya Jehova oha tala noha konakona nuukeka kehe gumwe gwomutse. Omimvo 3 600 lwaapono dha ka pita, Job, omulumentu ngoka a li ha tila Kalunga, okwa li e shi zimine kutya Jehova okwa mona oondjila dhe nokwa yalula oonkatu dhe adhihe. Job okwa li a pula epulo inaali tegelela eyamukulo a ti: “Otandi ka tya ngiini, Kalunga ngele ta pangula ndje?” (Job 31:4-6, 14) Otashi wapa okuningitha omasiku getu ga kale taga ti sha koshipala shaKalunga, mokupititha komeho iinima yopambepo, okuvulika komalombwelo ge nomokulongitha nawa ethimbo lyetu. Natu gandjeni eitulomo enene kiinima mbyoka.
Nkene to vulu okukala ishewe nekwatathano ewanawa naJehova
Kala ho galikana kuJehova. Oku shi kutya okukala kwoye wu uvite wu na ondjo, otaku vulu oku shi ninga oshidhigu wu mu galikane. (Rom. 8:26) Nonando ongawo, ‘dhiginina okugalikana’ Jehova noku mu lombwela kutya owa halelela okupanga uukuume naye. (Rom. 12:12) Andrej ota ti: “Onda li handi kala ndi uvite ndi na ondjo nonda sa ohoni. Ihe uuna nda galikana, onda li handi kala ndi uvite hwepo, nondi na ombili yopamadhiladhilo.” Ngele ku shi shoka wu na okugalikana kombinga yasho, oto vulu okutala komagalikano gomukwaniilwa David, ngoka taga adhika mEpisalomi 51 no 65.
Omaliko gomOmbiimbeli
Ulika kutya owu li omwiinekelwa
16 Eipangelo olya simana, ngele otwa hala yalwe yetu inekele. Uukwatya mboka ohawu tu kwathele tu kale twa mwena, uuna tatu makelwa tu holole uuyelele mboka twa lombwelwa tu wu kaleke oshiholekwa. (Lesha Omayeletumbulo 10:19.) Otashi vulika tu shi mone oshidhigu tu kale tu na eipangelo, uuna tatu longitha omakwatathano gopaintaneta. Ngele inatu kotoka, otashi vulika tu lombwele aantu oyendji uuyelele mboka twa li tu na okukaleka oshiholekwa kaashi shi oshiningilawina. Shimwe ishewe, ngele otwa taandeleke uuyelele mboka niikwaelektronika yetu, ihatu vulu okuninga po sha kombinga yankene yalwe taye ke wu longitha nenge kutya otawu ka eta uupyakadhi wu thike peni. Eipangelo ohali tu kwathele wo tu kale twa mwena, ngele aapataneki otaya kambadhala oku tu heka tu holole iinima mbyoka tayi vulu okweetela aamwatate naamwameme oshiponga. Shika ohashi vulu okuholoka, uuna tatu pulwa kopolisi miilongo moka iilonga yetu yi indikwa mo thiluthilu nenge inaatu manguluka oku yi longa. Otatu vulu okutula miilonga ekotampango “itandi ti sha,” monkalo ndjoka nosho wo mudhilwe. (Eps. 39:1) Kutya nduno otatu ungaunga naantu yaandjetu, nookuume ketu, naamwatate naamwameme, nenge nomuntu kehe i ili, otwa pumbwa okukala aainekelwa. Ihe opo tu kale aainekelwa, otwa pumbwa wo eipangelo.
20-26 MEI
OMALIKO OKUZA MOOHAPU DHAKALUNGA EPISALOMI 40–41
Omolwashike tu na okukwathela yalwe?
Aantu mboka haya gandja nehalo ewanawa, ohaya kala ya nyanyukwa
16 Odhoshili kutya aantu mboka haya gandja nehalo ewanawa, ihaya gandja shaashi ya hala okugalulilwa sha. Shoka osho Jesus a li e na momadhiladhilo, sho a longo aantu a ti: “Hiya oohepele, iitiningili, iilema naaposi. Nena oto kala wa yambekwa, oshoka mbaka kaye na sha shoku ku pa.” (Luk. 14:13, 14) Omunyoli gumwe gwOmbiimbeli okwa ti: “Omunamutimahenda ota yambekwa.” Ye gulwe okwa ti: “Aanelago oomboka ye na oshimpwiyu noohepele.” (Omayel. 22:9; Eps. 41:1) Eeno, otu na okukala hatu gandja, oshoka otatu ka mona enyanyu, uuna tatu kwathele yalwe.
17 Sho Paulus a totha oohapu dhaJesus ndhoka tadhi ti kutya “okugandja oku na elago ku vule okutaamba,” ka li owala ta popi kombinga yiinima yopamaliko, ihe okwa li ta popi wo kombinga yokutsa omukumo, yokupukulula nokukwathela yalwe. (Iil. 20:31-35) Shoka Paulus a popi nokwa ningi, otashi tu longo tu kale hatu iyamba, ano tu longithe ethimbo lyetu, oonkondo dhetu, olukeno lwetu nohole yetu.
18 Aapekapeki yuunongononi wopankalathano, nayo oye shi mona kutya okugandja ohaku etele omuntu enyanyu. Opu na oshitopolwa shimwe sha ti: “Aantu oya popya kutya ohaya kala ya nyanyukwa unene, konima ngele ya ningile yalwe uuwanawa.” Aapekapeki oya ti kutya okukwathela yalwe okwa simana, oshoka ohaku ningitha omuntu a kale e na onkalamwenyo “tayi ti sha noyi na elalakano, shaashi ohaku gwanitha po oompumbwe dhe dha simanenena.” Olundji aapekapeki ohaye shi popi kutya aantu ohaya kutha ombinga miilonga yokwiiyamba, opo ya kale ye na uukolele nenyanyu. Oshinima shoka oshoshili noitashi tu kumitha, shaashi Omushiti gwetu omunahole, Jehova, okwe shi popya nale kutya okugandja nehalo ewanawa ohaku eta enyanyu. — 2 Tim. 3:16, 17.
Jehova ote ku kwatha, uuna wu li muuvu
7 Ngele oto ehama, Jehova ote ku kwatha note ku hekeleke ngaashi a li e shi ningile aapiya ye yonale. Omukwaniilwa David okwa nyola a ti: “Aanelago oomboka ye na oshimpwiyu noohepele; Omuwa ote ya kwatha, uuna ye li muudhigu. Omuwa ote ya gamene e te ya shigi kiiponga; ote ya kaleke nawa moshilongo; ite ya ethele miikaha yaatondi yawo.” (Episalomi 41:1, 2) Ihe David ka li a hala okutya aantu yopethimbo lye mboka ya li ye na oshimpwiyu noohepele, itaya si nenge ya mone oshiponga. Ano nani Jehova oha kwathele ngiini aantu mboka? David okwa yelitha a ti: “Omuwa ote ya kwatha, uuna ye li muuvu note ya galulile uukolele wawo.” (Episalomi 41:3) Jehova oku shi uudhigu mboka aapiya ye ye na, noihe ya dhimbwa. Ota vulu oku ya tsa omukumo noku ya pa uunongo. Jehova okwa shita olutu lwomuntu momukalo moka talu vulu okwaaluka kulwo lwene.
Holela olukeno lwaJehova
17 Okutseya kutya olukeno uukwatya uuwanawa kungoye, hasho shi kale etompelo lyoye enene lyokukala wa hala okukala nuukwatya mboka. Etompelo enene nali kale okukala wa hala okuholela nokusimaneka Jehova Kalunga, ngoka e li Onzo yohole nolukeno. (Omayel. 14:31) Jehova okwe tu tulila po oshiholelwa dhingi sholukeno. Onkee ano, natu ninge ngaashi tatu vulu, opo tu mu holele mokuhumitha komeho ohole mokati kaamwatate nokukala tu na ekwatathano ewanawa nayalwe. — Gal. 6:10; 1 Joh. 4:16.
Omaliko gomOmbiimbeli
it-2-E ep. 16
Jehova
Ashihe shoka sha popiwa mOmbiimbeli, osha kwatathana nokuyukipalithwa kuunamapangelo waJehova, naashoka osha holola elalakano lya simanenena lyaJehova Kalunga: okuyapulithwa kwedhina lye. Okuyapulitha hoka otaku ulike kutya edhina lyaKalunga olya pumbwa okuyelekwa komalundilo agehe. Shimwe ishewe, edhina ndyoka eyapuki nolya pumbwa okusimanekwa kiishitwa ayihe iinandunge yomegulu noyokombanda yevi. Shika osha hala okutya oya zimina noya simaneka ondondo yaJehova e li omupangeli. Ohaya kala ye na ehalo lyoku mu longela, haye shi ningi nehalo ewanawa nohaya kala ya nyanyukwa okulonga ehalo lye, molwaashoka oye mu hole. Egalikano lyaDavid ndyoka li li mEpisalomi 40:5-10, olya holola nawa iikala mbyoka nosho wo okuyapulitha kwashili kwedhina lyaJehova. (Ndhindhilika oohapu dha longithwa komuyapostoli ndhoka a totha mepisalomi ndika, tadhi popi Jesus Kristus mAahebeli 10:5-10.)
27 MEI–2 JUNI
OMALIKO OKUZA MOOHAPU DHAKALUNGA EPISALOMI 42–44
Mona uuwanawa pakuudha melongo lyopakalunga
Omanenedhiladhilo okuza membo etiyali lyOmapisalomi
42:5, 6, 11; 43:3-5. Ngele otwa topoka ko kegongalo lyopaKriste pakathimbo, omolwetompelo lyontumba nenge lyongandi noitatu vulu okuninga po sha lela, otatu ka tsuwa omukumo, ngele otwa dhiladhila kombinga yeendathano ndyoka twa li hatu nyanyukilwa. Nonando petameko otashi vulika shi kale oshidhigu noonkondo omoluuwike, otashi ke tu dhimbulukitha kutya Kalunga oye oshiholameno shetu nonokutya otwa pumbwa okutegelela e tu hupithe.
Ekonakonombiimbeli lyoye nali kale tali pendutha ohokwe notali tungu
1 OKUGALIKANA: Tango galikana manga inoo tameka okukonakona. (Eps. 42:8) Omolwashike mbela? Omolwaashoka okukonakona Oohapu dhaKalunga oku li oshitopolwa shelongelokalunga lyetu. Onkee ano, otu na okugalikana kuJehova, opo u ukithe iikala yetu yopamadhiladhilo noku tu pe ombepo ye ondjapuki. (Luk. 11:13) Omumwameme Barbara ngoka a kala miilonga yuutumwa ethimbo ele, okwa ti: “Ohandi galikana aluhe omanga inaandi tameka ekonakonombiimbeli. Konima yaashono ohandi mono kutya Jehova oku li pamwe nangame nokwa hokwa shoka tandi ningi.” Uuna tatu galikana omanga inaatu tameka okukonakona, ohashi patulula omitima dhetu nomadhiladhilo getu tu uve ko nawa shoka tatu lesha.
“Ino etha, omaako goye ga yululuke!”
11 Ohatu nkondopalekwa wo kelongo lyopakalunga ndyoka hatu pewa pokugongala kwetu kwopaKriste, piigongi nopoosikola dhetu dhokudheula aauvithi. Edheulo ndyoka ohali tu kwathele tu kale tu na omukumo, tu itulile po omalalakano gopambepo notu gwanithe po iinakugwanithwa yetu yopaKriste. (Eps. 119:32) Mbela oho kambadhala ngaa wa mana mo, opo wu mone uuwanawa melongo lyoludhi ndoka?
12 Jehova okwa li a kwathele Aaisraeli ya sinde Aayamaleki nAaetiopia. Okwa li wo a pe Nehemia naatungi pamwe naye oonkondo, opo ya mane iilonga yokutungulula. Sha faathana, Kalunga ote ke tu nkondopaleka tu vule okukondjitha omapataneko, okwaanakonasha kwaantu muukalele nosho wo omaipulo, opo tu vule okutsikila niilonga yetu yokuuvitha. (1 Pet. 5:10) Inatu tegelela Jehova e tu longele iikumithalonga. Pehala lyaashono, natu longe ngaashi tatu vulu tu kale hatu lesha Oohapu dhaKalunga esiku kehe, hatu ilongekidhile okugongala nokukala puko oshiwike kehe. Natu kale hatu konakona Ombiimbeli paumwene, hatu ningi elongelokalunga lyuukwanegumbo nokukala aluhe hatu galikana Jehova. Inatu etha nando omalalakano galwe nenge sha shilwe shi ye moshipala omikalo ndhoka Jehova ha longitha, opo e tu nkondopaleke noku tu ladhipike. Ngele owa mono kutya omaako goye oga yululuka mudhimwe dhomomikalo ndhika, pula Jehova e ku kwathele. Opo nduno, tala nkene ombepo ye ‘ta yi longo mungoye yi ku pe ehalo noonkondo, opo mu tsakanithe elalakano lye ewanawa.’ (Fil. 2:13) Oshike to vulu okuninga wu nkondopaleke omaako gayalwe?
Omaliko gomOmbiimbeli
it-1-E ep. 1242
Kaandje, ombandje
MOmanyolo, kaandje okwa popiwa pathaneko lwiikando momathaneko gontumba. Job okwa li a popi kombinga yonkalo ye ombwiinayi kutya okwa ninga “mukwawo gwoombandje.” (Job 30:29) Omupisalomi okwa popi shi na ko nasha nonkalo tayi sitha ohoni yokusindikwa kwaantu yaKalunga, tashi vulika a ukitha kehala lyolugodhi hoka ookaandje ya li haya yi, ya ka lye omidhimba dhaamboka ya sila molugodhi (yelekanitha Eps 68:23), sho a lili ta ti: “Owe tu ethele mokati kiiyamakuti.” (Eps 44:19) Sho Aababilonia ya li ya kondeke Jerusalem momumvo 607 K.E.N. osha li sha etitha ondjala, ndjoka ya li ya ningitha aavalakadhi ya ungaunge noyana nonyanya. Onkee oshi li mondjila sho Jeremia a popi eyooloko pokati kolungwenye lwaakiintu “yoshigwana shandje” nesiloshimpwiyu ndyoka ookaandje haya sile nalyo uunimoma wawo. — Oontak 4:3, 10.
3-9 JUNI
OMALIKO OKUZA MOOHAPU DHAKALUNGA EPISALOMI 45–47
Ondjimbo kombinga yohango yOmukwaniilwa
Tu nyanyukweni omolwohango yOnzigona!
8 Lesha Episalomi 45:13, 14a. Omufuko ota popiwa kutya ‘okwo opala,’ omolwohango yomuuwa. MEhololo 21:2, omufuko ota yelekanithwa noshilando, Jerusalem Oshipe, ‘sha zalekelwa okutsakaneka omulumentu gwasho.’ Oshilando shika shomegulu oshi na “eadhimo lyaKalunga” notashi adhima “sha fa emanya lyondilo, ongojaspes, nosha yela sha fa okristali.” (Eh. 21:10, 11) Eopalo lyaJerusalem Oshipe olya popiwa nawa membo lyEhololo. (Eh. 21:18-21) Itashi kumitha sho omupisalomi ta popi omufuko ta ti: “Okwo opala ngiini!” Ihe shoka sha dhenga mbanda osho kutya ohango yomuuwa otayi ka ningilwa megulu.
9 Omufuko okwe etwa kOmbushiki ye, ano kOmukwaniilwa gwopaMesiasa. Okwa kala te mu longekidha, ‘te mu yelitha noku mu yoga momeya nohapu ye.’ Omufuko okwa ‘yogoka noke na onyata ya sha.’ (Ef. 5: 26, 27) Omufuko gwe oku na wo okukala a zala a opalela oshituthi shoka. Ye okwo opala tuu shili! Nokuli, “omuzalo gwe ogwa tungwa noondali dhoshingoli,” nota ‘ka falwa pomukwaniilwa a zala omuzalo guulenga.’ Pohango yOnzigona, “okwa pewa, a zale oonguwo oontokele dholiina dha yela notadhi adhima. Oonguwo ndhika dholiina odho iilonga yuuyuuki yaantu yaKalunga.” — Eh. 19:8.
Shoka embo lyEhololo lya popya kombinga yonakuyiwa yoye
10 Jehova ote ki inyenga ngiini keponokelo ndyoka? Ote tu lombwele ta ti: “Ondjahi yandje otayi tukuluka.” (Hes. 38:18, 21-23) Ehololo ontopolwa 19 otayi popi kutya oshike tashi ka ningwa po konima yaashoka. Jehova ota ka tuma Omwana a gamene oshigwana She noku sinde aatondi yasho. Jesus ota ka wayiminwa meponokelo ndika ‘komatanga gwaakwiita yomegulu,’ ano aayengeli aadhiginini pamwe naantu 144 000. (Eh. 17:14; 19:11-15) Iita mbyoka otayi ka hula ngiini? Aantu ayehe noongundu ndhoka dhi li ompinge naJehova, otaya ka hanagulwa po thiluthilu! — Lesha Ehololo 19:19-21.
11 Dhiladhila owala kutya aapiya yaJehova aadhiginini otaya ka kala yu uvite ngiini konima sho aatondi yaKalunga ayehe ya hanagulwa po! Itali ka kala tuu ethimbo linyanyudha! Nonando megulu otamu ka kala enyanyu enene sho Babilon Oshinene sha hanagulwa po, otapu ka ningwa oshinima shimwe ishewe shoka tashi ka eta enyanyu olindji noonkondo. (Eh. 19:1-3) Oshinima shoka osho oshiningwanima sha simana lela shoka sha popiwa membo lyEhololo kutya ‘ohango yOnzigona.’ — Eh. 19:6-9.
12 Ohango yOnzigona otayi ka ningwa uunake? Aagwayekwa ayehe 144 000 otaya ka adhika ye li megulu manga iita yaArmagedon inaayi tameka. Ihe pethimbo ndyoka hapo ohango yOnzigona tayi ka ningwa. (Lesha Ehololo 21:1, 2.) Ohango ndjoka otayi ka ningwa konima yiita yaArmagedon naasho aatondi yaKalunga ayehe ya hanagulwa po. — Eps. 45:3, 4, 13-17.
it-2-E ep. 1169
Iita
Sho iita mbika tayi ka hula, aantu kombanda yevi otaya ka nyanyukilwa ombili uule woomvula eyuvi. Omupisalomi okwa popi a ti: “[Jehova] ota hulitha po omalugodhi kombanda yevi alihe; ota teya omatati, ta ndonyona omagonga, niikandekitho ote yi fike po.” Ehunganeko ndyoka olya li lya gwanithilwa tango Aaisraeli, sho Kalunga a li e ya etele ombili, mokuhanagula po omatati gaatondi yawo. Konima ngele Kristus pu-Har–Magedon okwa sindi mboka haya humitha komeho iita, aantu ayehe kombanda yevi otaya ka nyanyukilwa ombili. (Eps 46:8-10) Aantu mboka taya ka kala nomwenyo sigo aluhe, oyo mboka ya hambula “omagonga gawo omatemo nomagongamwele gawo iimwitho” naamboka ihaaya “ilongekidhile we olugodhi.” Ombiimbeli otayi ti: “Omuwa Omunankondoawike oku uvaneke shika.” — Jes 2:4; Mika 4:3, 4.
Omaliko gomOmbiimbeli
Oshike tashi ka hula po, ngele Uukwaniilwa waKalunga we ya?
9 Oshike tashi ka pingena po omahangano guulingilingi? Mbela konima yaArmagedon otapu ka kala ngaa ehangano lyasha? Ombiimbeli otayi tu lombwele tayi ti: “Tse otwa tegelela shoka Kalunga e shi uvaneka: egulu epe nevi epe, moka tamu ka kala uuyuuki.” (2 Pet. 3:13) Egulu nevi ekulu, omahangano guulingilingi naantu mboka ye li kohi yago, otayi ka hanagulwa po. Oshike tashi ke ga pingena po? Uutumbulilo “egulu epe nevi epe” otawu ti kutya otapu ka kala epangelo epe nosho wo evi epe, mbyoka yi li kohi yepangelo lyaKalunga. Uukwaniilwa waKalunga mboka tawu pangelwa kuJesus Kristus otawu ka ulika thiluthilu uukwatya waJehova Kalunga, ngoka e li Kalunga kelandulathano. (1 Kor. 14:33) Onkee ano, ‘evi epe’ otali ka kala lyu unganekwa. Otapu ka kala aalumentu ye li nawa mboka taya tonatele iinima. (Eps. 45:16) Otaya ka wilikwa kuJesus naapangeli pamwe naye 144 000. Dhiladhila owala kethimbo ndyono sho omapangelo guulingilingi taga ka pingenwa po kepangelo limwe alike kaali na uulingilingi.
10-16 JUNI
OMALIKO OKUZA MOOHAPU DHAKALUNGA EPISALOMI 48–50
Aavali, kwatheleni aanegumbo lyeni ya kale ye na einekelo lya kola mehangano lyaJehova
Okulongela Kalunga momukalo ngoka a hokwa, ohaku eta enyanyu olindji
11 Ohatu longele Jehova, uuna tatu konakona Oohapu dhe, nongele tatu longo aanona yetu kombinga ye. Mesiku lyEsabati, Aaisraeli kaya li haya longo, opo ya gandje eitulomo kokukoleka ekwatathano lyawo naJehova. (Eks. 31:16, 17) Aaisraeli mboka ya li aadhiginini, oya li haya longo oyana kombinga yaJehova nosho wo yuuwanawa mboka e ya ningila. Natse kunena otwa pumbwa okwiitulila po ethimbo, opo tu kale hatu lesha nokukonakona Oohapu dhe. Ngoka ogu li omukalo gwokulongela Jehova nohagu tu kwathele tu hedhe popepi lela naye. (Eps. 73:28) Ngele ohatu konakona Ombiimbeli pamwe noyaandjetu, otashi ka kwathela oyana yetu nayo ya kokeke ekwatathano lyawo naTate yetu gwomegulu omunahole. — Lesha Episalomi 48:13.
w11-E 3/15 ep. 19, okat. 5-7
Owu na omatompelo gokukala wa nyanyukwa
“Aantu ne yaKalunga, dhingolokeni Sion, ne mu yalule ooshungo dhasho. Konekeni omakuma ne mu tale omapopilongulu, opo mu ka hokololele oluvalo lwokonakuyiwa.” (Eps. 48:12, 13) Omupisalomi okwa li ta lombwele Aaisraeli ya tale nawanawa oshilando Jerusalem. Dhiladhila owala kiinima iiwanawa mbyoka ya li ya monika komaukwanegumbo gAaisraeli, ngoka ga li haga yi kiituthi yokomumvo koshilando oshiyapuki, pashiholelwa ngaashi otempeli yasho ombwanawa. Shoka oshi na okukala sha li she ya inyengitha ya “hokololele oluvalo lwokonakuyiwa.”
Dhiladhila komukwaniilwakiintu gwokuSheba, ngoka petameko a li a limbililwa kwaashoka a uvu kombinga yokulela okuwanawa kwaSalomo nosho wo uunongo we. Mbela oshike she mu tompo a itaale kutya iinima mbyoka a uvu oyoshili? Okwa ti: “Kanda li te vulu oku shi itaala, sigo nde ya nonde shi mono ngame mwene.” (2 Ondjal. 9:6) Eeno, shoka hatu mono ‘nomeho getu yene,’ otashi vulu oku tu guma noonkondo.
Ongiini to vulu okukwathela aamwoye ya mone iilonga iikumithi yomehangano lyaJehova ‘nomeho gawo?’ Ngele opu na oshitayimbelewa shOonzapo dhaJehova shi li popepi nane, kambadhaleni oku shi talela po. Pashiholelwa, Mandy naBethany oya putukila megumbo li li ookilometa 1 500 kokule naBetel, moshilongo shawo. Nonando ongawo, aavali yawo oya li haya ningi omalongekidho ya ka talele po koBetel hoka, unene tuu sho oyanakadhona ye ende taya koko. Oya ti: “Manga inaatu ka talela po koBetel, otwa li tu shi ehala li na oompango oondhigu nolyaakokele owala. Ihe otwa li twa mono ko wo aagundjuka mboka ya li taya longele Jehova nuudhiginini nohaya tyapula okulonga kehala ndyoka! Otwa li twa mono kutya mehangano lyaJehova omu na iinima oyindji mbyoka tatu vulu okunyanyukilwa, noshikando kehe twa kala tatu talele po Betel, oshe tu tsa omukumo pambepo.” Sho Mandy naBethany ya kala nokutalela po oombelewa dhehangano lyaJehova, oshe ya inyengitha ya tameke okukokola ondjila, noya li nokuli ya hiywa ya ka longe koBetel ye li aaiyambi yopakathimbo.
Omikalo dheni nadhi kale ngaashi dhaalelwa yUukwaniilwa
5 Oshitegelelwa oshikwawo, okwiilonga ondjokonona yoshilongo. Omuntu ngoka a hala uukwashigwana woshilongo shontumba, ohashi vulika a pumbwa okwiilonga ondjokonona yepangelo lyasho. Osha faathana wo naamboka ya hala okukala aalelwa yUukwaniilwa waKalunga, oshi li nawa yi ilonge oshindji kombinga yawo. Oyanamati yaKora mboka ya li haya yakula muIsraeli shonale, oye tu tulila po oshiholelwa oshiwanawa. Oya li ye hole noonkondo okukala muJerusalem, mehala lyelongelokalunga, nokuhokolola ondjokonona yasho. Oya li haya kala ya fuuka kwaashoka shi lilwe po koshilando shoka nokehala ndyoka lyelongelokalunga, ihe hakoondhopi nomamanya ngoka sha tungithwa. Jerusalem osha li “oshilando shomukwaniilwa omunene,” Jehova, molwaashoka osho sha li ondingandinga yelongelokalunga lya yogoka. Omo mwa li hamu longelwa aantu Ompango yaJehova. Jehova okwa li hu ulukile aantu mboka taya lelwa kaakwaniilwa yomuJerusalem esilohenda lye. (Lesha Episalomi 48:1, 2, 9, 12, 13.) Mbela owu na ehalo lyokukonakona nokuhokolola ondjokonona yoshitopolwa shehangano lyaJehova shokombanda yevi we ya fa? Shi thike ngaa mpoka to ilongo kombinga yehangano lyaJehova nosho wo nkene ha ambidhidha aapiya ye, opo ngaa pu thike Uukwaniilwa we tawu ningi wolela kungoye. Ehalo lyoye lyokuuvitha elaka etoye lyUukwaniilwa, otali ka hwama noonkondo. — Jer. 9:24; Luk. 4:43, yelekanitha NW.
Omaliko gomOmbiimbeli
it-2-E ep. 805
Omaliko
Aaisraeli oya li oshigwana sha yambapala noya li haya tyapula okulya nokunwa (1Aak 4:20; Omuuv 5:18, 19), nomaliko gawo oga li hage ya gamene komaupyakadhi ngoka haga etwa koluhepo. (Omayel 10:15; Omuuv 7:12) Nonando Aaisraeli sho ya li taya tyapula uulinawa wiilonga yawo yuudhiginini osha li shi li metsokumwe nehalo lyaJehova, (yelekanitha Omayel 6:6-11; 20:13; 24:33, 34), Jehova okwa li wo a mono kutya oya pumbwa okulondodhwa kombinga yoshiponga shokudhimbwa kutya oye Onzo yomauyamba gawo nokutameka okwiinekela mugo. (Deut 8:7-17; Eps 49:6-9; Omayel 11:4; 18:10, 11; Jer 9:23, 24) Oya li wo ya dhimbulukithwa kutya omaliko ogopakathimbo (Omayel 23:4, 5), noyi taga vulu okupewa Kalunga ge li ongeyambo lyokukulila gumwe meso (Eps 49:6, 7) nomuntu ita vulu okuya nalyo, uuna a mana oondjenda (Eps 49:16, 17; Omuuv 5:15). Oya li ya dhimbulukithwa kutya ngele oya kala yi itula unene momaliko, otashi ke ya ningitha ya kale aakotokeli noinaya hokiwa kuJehova. (Omayel 28:20; yelekanitha Jer 5:26-28; 17:9-11.) Oya li wo ya ladhipikwa ya ‘simanekithe Omuwa niinima yawo. — Omayel 3:9.
17-23 JUNI
OMALIKO OKUZA MOOHAPU DHAKALUNGA EPISALOMI 51–53
Shoka to vulu okuninga wu yande omapuko ga kwata miiti
Ongiini to vulu okutonatela omutima gwoye?
4 Oshitya “omutima” shoka sha popiwa mOmayeletumbulo 4:23, osha ukitha ‘kuuntu womeni,’ NW. (Lesha Episalomi 51:6.) Niitya yimwe, “omutima” ogwa ukitha komadhiladhilo getu, kunkene hatu kala tu uvite, komainyengotompelo nokomahalo getu. Omutima otagu ulike kunkene twa tya meni, ihe hakeholokopo lyetu lyokombanda.
5 Tala nkene uukolele wetu wopalutu hawu ulike nkene twa tya meni. Oshinima shotango, opo tu kaleke omalutu getu ge na uukolele, natu lye iikulya tayi tungu nokuninga omadhewo pandjigilile. Sha faathana, ngele otwa hala okukaleka omutima gwetu gwopathaneko gu na uukolele, otu na okulesha pandjigilile Ombiimbeli, iileshomwa yopaMbiimbeli nokuulika aluhe kutya otu na eitaalo muJehova. Okuulika kutya otu na eitaalo muJehova, okwa kwatela mo okutula miilonga shoka tatu ilongo nokupopya kombinga yeitaalo lyetu. (Rom. 10:8-10; Jak. 2:26) Oshitiyali, shi ikolelela keholokopo lyetu, otashi vulika tu dhiladhile kutya otu na uukolele, nonando hasho tu li meni. Sha faathana, shi ikolelela kelandulathano lyetu lyokuninga iinima yopakalunga, otashi vulika tu dhiladhile kutya otu na eitaalo lya kola, ihe uuhalu uuwinayi otashi vulika tawu ende tawu koko mutse. (1 Kor. 10:12; Jak. 1:14, 15) Natu dhimbulukwe kutya Satana okwa hala okunyateka omadhiladhilo getu. Shoka ota vulu oku shi ninga ngiini? Ongiini tatu vulu okwiigamena?
Otatu vulu okukala twa yogoka
5 Ngele otwa kala hatu pula ekwatho lyaJehova okupitila megalikano, ote ke tu kwathela tu kondjithe omadhiladhilo ga nyata. Ohe tu pe ombepo ye ondjapuki, opo tu vule okukala twa yogoka. Otatu vulu okulombwela Jehova momagalikano getu kutya otwa hala a kale a hokwa shoka hatu dhiladhila. (Episalomi 19:14) Otu na okupula Jehova neifupipiko a tale ngele momitima dhetu omu na omahalo gontumba omawinayi, ngoka taga vulu oku tu ningitha tu yone. (Episalomi 139:23, 24) Natu tsikileni okupula Jehova e tu kwathele tu yande onyata yiipala nokulonga shoka shu uka, nonando oshi kale oshidhigu. — Mateus 6:13.
6 Manga inaatu tseya kombinga yaJehova, otashi vulika twa li tu hole okulonga iinima mbyoka inaa hokwa notashi vulika tatu kondjitha natango omahalo ga puka. Ihe Jehova ota vulu oku tu kwathela tu ninge omalunduluko, opo tu longe shoka a hokwa. Pashiholelwa, konima sho omukwaniilwa David a hondele naBatseba, okwi iyele ombedhi e ta pula Jehova e mu pe “omutima omuyogoki,” noku mu kwathela a kale omuvuliki. (Episalomi 51:10, 12) Ngele otwa li tu na omahalo ga puka ngoka ga hwama monakuziwa notatu kambadhala natango oku ga kondjitha, inatu teka omukumo. Jehova ota vulu oku tu kwathela, opo ehalo lyetu lyokuvulika kuye nolyokulonga shoka shu uka, li kale li vule ehalo lyetu lyokuninga shoka sha puka. Ota vulu wo oku tu kwathela tu pangele omadhiladhilo getu ngoka inaaga gwanenena. — Episalomi 119:133.
Omaliko gomOmbiimbeli
it-1-E ep. 644
Doeg
Omuedomi Doeg okwa li omukuluntu gwaasita yomukwaniilwa Saul. (1Sam 21:7; 22:9) Opu na uumbangi mboka tawu ulike kutya Doeg okwa li gumwe gwomwaamboka yi itedhululithwa e taya ningi yeitaalo lyOshijuda. Sho Doeg a li e ya kuNob nelalakano a ‘gwanithe po oshinakugwanithwa she shelongelokalunga,’ tashi vulika omolwegano ndyoka a li a ninga, okwaa na uuyogoki kwontumba nenge oshilundu, okwa li a mono omuyambi omukuluntu Ahimelek ta pe David iikwiila nosho wo egongamwele lyOmufilisti Goliat. Lwanima sho Saul a li ta popi naapiya ye te ya lombwele kutya oye mu li kohi, Doeg okwa li e mu lombwele shoka a mono kuNob. Konima sho Saul a ithana omuyambi omukuluntu Ahimelek nosho wo aayambi yalwe yokuNob, okwa pulapula Ahimelek nopo nduno okwa gandja elombwelo kaatonateli ya dhipage aayambi. Sho aatonateli ya tindi oku shi ninga, Saul okwa li a lombwele Doeg e ya dhipage, nokwa li a dhipaga aayambi 85 nopwaa na okukakadhala. Konima sho Doeg a longo iilonga mbyoka iiwinayi, okwi igandja a hanagule po Nob, nokwa li a dhipaga aakalimo yamo ayehe, aagundjuka naakuluntu nosho wo iimuna yawo ayihe. — 1Sam 22:6-20.
Ngaashi sha ulikwa moohapu dhopombanda dhEpisalomi 52, David okwa nyola shi na ko nasha naDoeg a ti: “Oto longekidha okuyona po yakweni; elaka lyoye olya tsa ngaashi okakululo. Aluhe oto toto omahokololo giifundja. Ou hole uukolokoshi peha lyuuwanawa nou hole iifundja peha lyoshili. Mufundja ngoye, ou hole okupopya nayi yakweni!” — Eps 52:2-4.
24-30 JUNI
OMALIKO OKUZA MOOHAPU DHAKALUNGA EPISALOMI 54–56
Kalunga okwa gama kombinga yoye
Tila Kalunga, opo wu kale omunandunge!
10 Pompito yimwe, David okwa li a kongo uuholameno kuAkish, omukwaniilwa gwaGat, oshilando shAafilisti moka mwa li hamu zi Goliat. (1 Samuel 21:10-15) Aapiya yomukwaniilwa ngoka oya li ya tala ko David e li omutondi gwAafilisti. David okwa li i inyenge ngiini, sho a li monkalo ndjoka ya nika oshiponga? Okwa li a galikana kuJehova a mana mo. (Episalomi 56:1-4, 11-13) Nonando David okwa li i ifethitha omuyanankwengu nelalakano lyokwiihupitha, okwa li e shi kutya Jehova oye lela a li a yambeke oonkambadhala dhe. Einekelo lye muJehova nomutima aguhe, oli li euliko kutya okwa li omutilikalunga shili. — Episalomi 34:4-6, 9-11.
11 Ngaashi David, natse otatu vulu okuulika etilokalunga, mokwiinekela omauvaneko gaKalunga ge na ko nasha noku tu kwathela tu ungaunge nomaupyakadhi nomupondo. David okwa ti: “Igandja kOmuwa; mu inekela, oye te ku kwatha.” (Episalomi 37:5) Shoka inashi hala okutya otu na owala okuundulila omaupyakadhi getu kuJehova nopwaa na okuninga po sha, tse tatu tegelele e ga kandule po. David ka li owala a pula ekwatho kuJehova megalikano e ta mwena, ihe pehela lyaashono, okwa li a longitha omadhiladhilo ngoka a pewa kuJehova nokukatuka oonkatu a ungaunge nuupyakadhi we. David okwa li e shi kutya ka li ta vulu okupondola koonkondo dhe mwene. Natse itatu vulu okupondola koonkondo dhetu yene. Otu na okuninga ngaashi tatu vulu, ihe mpoka tatu nyengwa, otu na okweethela iinima ayihe momake gaJehova. Olundji, otashi vulika tu kale itaatu vulu okuninga po sha nandonando, nomolwaashono tu na owala okweethela iinima momake gaJehova. Kungawo, otatu ka ulika kutya otu na etilokalunga lyashili. David okwa li a popya tashi zi komutima oohapu tadhi hekeleke, a ti: “Omuwa okuume kaamboka haa vulika kuye.” — Episalomi 25:14.
Kapu na shoka tashi vulu “oku tu topola kohole yaKalunga”
9 Jehova okwa lenga wo eidhidhimiko lyetu. (Mateus 24:13) Dhimbulukwa kutya Satana okwa hala wu pilamene Jehova. Esiku kehe to kala omudhiginini kuJehova oto ulike kutya Satana omufundja. (Omayeletumbulo 27:11) Ethimbo limwe ihashi kala oshipu okwiidhidhimika. Ohatu tsakaneke omashongo ngaashi okwaahenuukolele, okuhupa shokadhila nokukala twa gwililwa po kiimpwiyu nokiinima iikwawo mbyoka hayi dhigupaleke onkalamwenyo. Okutegelela ethimbo ele ohaku gombokitha omwenyo. (Omayeletumbulo 13:12) Okwiidhidhimikila omashongo ngoka okwa simana kuJehova. Shoka osho, nomolwaashoka omukwaniilwa David a pula Jehova a ‘pungule’ omahodhi ge nokwa popi wo nomukumo a ti: “Inaga nyolelwa nani membo lyoye?” (Episalomi 56:8) Eeno, Jehova ohe tu pandula noha dhimbulukwa omahodhi getu, omolwokumona iihuna hoka hatu idhidhimikile manga twa kakatela uudhiginini wetu kuye. Iinima mbyoka nayo okwe yi lenga.
Nkene ohole hayi tu kwathele tu sinde uumbanda
16 Satana oku shi kutya otwa lenga omwenyo. Ihe nonando ongawo, oha ti kutya otatu vulu okweetha po kehe shimwe, nokuli nekwatathano lyetu naJehova, opo tu kale tu na omwenyo. (Job 2:4, 5) Satana ina puka tuu! Ihe molwaashoka oye ha “eta eso,” oha kambadhala okulongitha uumbanda wetu wokutila eso, opo e tu ningithe tu ethe po okulongela Jehova. (Heb. 2:14, 15) Poompito dhimwe, Satana oha longitha aalanduli ye ya tilithe aalongeli yaJehova neso ngele inaya hala okweetha po eitaalo lyawo. Shimwe ishewe, oha vulu okulongitha ompumbwe yepango lyopaunamiti lye endelela e tu ningithe tu ethe po okuvulika kuJehova. Oondohotola dhopaunamiti nenge aakwanezimo yetu mboka kaaye shi Oonzapo, otashi vulika ye tu thiminike tu taambe ko okutulwa ombinzi, oshinima shoka shi li lela eyono lya kwata miiti kuKalunga. Nenge gumwe otashi vulika a kambadhale oku tu ladhipika tu taambe ko epango lyopaunamiti ndyoka kaali li metsokumwe nomithikampango dhOmbiimbeli.
17 Nonando ihatu kala twa hala okusa, otu shi kutya Jehova ota tsikile okukala e tu hole, nonando otu se. (Lesha Aaroma 8:37-39.) Uuna ookuume kaJehova ya si, ohe ya kaleke momadhiladhilo ya fa ye na omwenyo. (Luk. 20:37, 38) Okwa halelela okuyumudha oonakusa. (Job 14:15) Jehova okwa futa ofuto onene, opo tu ka ‘kale nomwenyo gwaaluhe.’ (Joh. 3:16) Otu shi kutya Jehova oku tu hole noonkondo noku na ko nasha natse. Onkee pehala lyoku mu etha po uuna tatu ehama nenge tatu tilithwa neso, ohatu kala tu ikolelela muye e tu hekeleke, e tu pe uunongo noku tu nkondopaleke. Shoka osho naanaa Valérie nomusamane gwe ya ningi. — Eps. 41:3.
Omaliko gomOmbiimbeli
it-1-E ep. 857-858
Okutseya oshinima manga inaashi ningwa, okuutha onakuyiwa
Mbela Kalunga okwa li a nuna Judas a kengelele Jesus, opo shoka sha hunganekwa shi gwanithwe? Iikala yokukengelela mbyoka Judas Iskariot a li e na, oya gwanitha po shoka sha li sha hunganekwa noshu ulike kutya Jehova nOmwana oya tseya shoka tashi ka ningwa monakuyiwa. (Eps 41:9; 55:12, 13; 109:8; Iil 1:16-20) Nonando ongawo, itatu vulu okutya Jehova okwa li u utha nale nenge a nuna Judas a ka kale niikala mbyoka. Osha li sha hunganekwa kutya Jesus ota ka gwaalekwa kugumwe gwomookuume ke, ihe ina popiwa kondandalunde. Natango omakotampango gOmbiimbeli itaga popile oshinima shoka kutya Kalunga okwa li u utha iilonga mbyoka Judas ta ka longa. Omuyapostoli Paulus okwa li a popi omuthikampango ngoka gwa tulwa po kuJehova, tagu ti: “Ino endelela okutenteka omuntu iikaha yoye omolwoshilonga shOmuwa. Ino kwatathana noondjo dhaantu yalwe; ikaleka wa yela.” (1Tim 5: 22; yelekanitha 3:6.) Jesus okwa li a galikana kuJehova uusiku awuhe manga inaa hogolola aayapostoli ye 12, oshoka okwa li a hala okuninga ehogololo lyopandunge nolyomondjila. (Luk 6:12-16) Ando Judas okwa li nale u uthwa a kale omugwaaleki, ando shoka oshe ku ulika kutya omalombwelo gaJehova newiliko lye, otaga kondjithathana. Natango ando osha ka kala sha fa Jehova naye a kutha ombinga meyono lyaJudas.
Onkee ano, otaku vulu okutiwa kutya Judas ka li natango a kokeka momutima gwe iikala yokukengelela, sho a hogololwa a ninge omuyapostoli. Okwe etha iikala iiwinayi ‘ya fa oshimeno oshilulu,’ yi koke muye noyi mu nyateke. Shoka oshe mu ningitha a pukithwe noku nwethwe mo kuSatana, pehala lyokulandula ewiliko lyaJehova. Oshizemo, okwa ningi omufuthi nomukengeleli. (Heb 12:14, 15; Joh 13:2; Iil 1:24, 25; Jak 1:14, 15; tala JUDAS No. 4.) Sho sha ka yela mo kutya Judas ke shi we omudhiginini, Jesus okwa li a mono shoka shi li momutima gwaJudas nokwa popi kutya ote ke mu gwaaleka. — Joh 13:10, 11.