Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
© 2025 Watch Tower Bible and Tract Society of Pennsylvania
5-11 MEI
OMALIKO OKUZA MOOHAPU DHAKALUNGA OMAYELETUMBULO 12
Okulonga nuudhiginini oku na ondjambi
Uukwatya wopaKalunga wu na ondilo wu vulithe okawe
Otashi vulika shi kale oshidhigu kaapiya yaJehova yamwe, okumona oshimaliwa sha gwana oompumbwe dhawo dhakehe esiku. Ihe pehala lyokukambadhala okukandula po oompumbwe dhawo momikalo dhaa li pauyuuki, ohaya longo nuudhiginini ye dhi kandule po. Ngele taye shi ningi, nena otayu ulike kutya omaukwatya gaKalunga omawanawa, mwa kwatelwa okukala omunashili, oge na ondilo onene kuyo ge vulithe iinima yopamaliko. — Omayeletumbulo 12:24; Aaefeso 4:28.
w15-E 2/1 ep. 5, okat. 4-6
Nkene tatu vulu okunyanyukilwa iilonga yetu yuudhiginini
Oshiwanawa okudhilaadhila kepulo ndyoka lya hugunina, oshoka ohashi tu uvitha nawa ngele tu wete iilonga yetu tayi etele yalwe uuwanawa. Jesus okwa ti: “Okugandja oku na elago ku vule okutaamba.” (Iilonga 20:35) Shimwe ishewe, mboka haya mono mo uuwanawa miilonga yetu yuudhiginini ongaashi aalandi, aagandji yiilonga nosho wo yalwe. Shika osha kwatela mo aanegumbo yaandjetu nosho wo mboka ye li mompumbwe.
Aanegumbo yaandjetu. Uuna omutse gwegumbo hagu longo nuudhiginini opo gu sile oshimpwiyu iilyo yukwanegumbo, shoka ohashi ya etele uuwanawa momikalo mbali. Tango, ohagu shilipaleke kutya aanegumbo oya gwanithilwa po oompumbwe dhawo dhopalutu ngaashi iikulya, oonguwo nosho wo ehala lyokukala. Kungawo, oha gwanitha po oshinakugwanithwa shoka a pewa kuKalunga ‘shokusila aanezimo lye oshimpwiyu.’ (1 Timoteus 5:8) Oshitiyali, oshiholelwa shaa mboka haya longo nuukeka, ohashi tulongo nkene okulonga nuudhiginini kwa simana. Shane, ngoka a popiwa metetekelo okwa ti: “Tate oku li oshiholelwa oshiwanawa, ngele tashi ya pokukala netaloko li li pandjele lyiilonga. Oku li omusamane omunashili ngoka a longa nuudhiginini onkalamwenyo ye ayihe, nuunene okwa longa e li omuhongi gwiipilangi. Koshiholelwa she ondi i longo ko kutya osha simana okulonga niikaha yandje nokunduluka po iinima mbyoka tayi vulu okulongithwa kuyalwe.”
Mboka ye li mompumbwe. Omuyapostoli Paulus okwa kumagidha Aakriste ya ‘tameke okwiilongela sha, yoya vule ihe okukala yena sha shokukwatha oohepele.’ (Aaefeso 4:28) Odhoshili kutya ngele ohatu longo nuudhiginini tu isile oshimpwiyu nosho wo aanegumbo lyetu, otashi vulika wo tu kwathele yalwe mboka ye li mompumbwe. (Omayeletumbulo 3:27) Onkee okulonga nuudhiginini ohaku tu etele lela enyanyu, ndyoka hali zi mokugandja.
Omaliko gomOmbiimbeli
Enyanyu enene ndyoka hali zi mokugandja
10 Ino dhimbwa wo kutya shoka hatu popi oshi na oonkondo. Mbela owu shi gumwe ngoka ta ka kala a tsuwa omukumo ngele owe mu pandula, omolwiilonga ye yuudhiginini? Mbela owu shi gumwe ngoka a pumbwa ehekeleko? Ngele osho kambadhala wu mu tseyithile kutya owu na ko nasha naye. Oto vulu oku mu talela po oshipala noshipala, oku mu dhengela ongodhi nenge wu mu tumine okakalata, etumwalaka kongodhi nenge o-email. Ino ipula unene naashoka toka tya. Oohapu oofupi tadhi zi komutima otashi vulika odho naanaa omwiitaali omukweni a pumbwa, opo a kale omudhiginini esiku ndyoka nenge a kale e na omukumo noku uvite e li hwepo omolwonkalo moka e li. — Omayel. 12:25; Ef. 4:29.
12-18 MEI
OMALIKO OKUZA MOOHAPU DHAKALUNGA OMAYELETUMBULO 13
Ino fundjalekwa ‘kolamba yaakaanakalunga’
it-2-E ep. 196, okat. 2-3
Olamba
Omathaneko galwe ngoka haga longithwa. Ngele omuntu okwiikolelela kuyelele wu mu wilike, ondjila ye ohayi faathananithwa nolamba. Omupopyothano ngoka otagu yelekanitha omuyuuki nomukeenakalunga tagu ti: “Uuyelele waayuuki otau yeta nawa, ihe olamba yaakaanakalunga otayi dhimi.” (Omayel 13:9) Uuyelele womuyuuki otawu tsikile nokukala watsa, ihe uuyelele wo lamba yaakolokoshi ohawu monika wa fa watsa noha ya monika ya fa taye shi enditha nawa, ihe lwanima ohaya mono iilanduliko, nahugunina Kalunga oheya katukile onkatu ete ya ukitha momilema moka taaka punduka. Iizemo yoludhi ndoka ohayi kala ya fa yomuntu ngoka ta tuku he nayina. — Omayel 20:20.
Uuna ‘olamba ya gumwe ya dhimi’ osha hala wo kutya omuntu ngoka kena onakuyiwa. Eyeletumbulo limwe olya ti: “Omukolokoshi ke na elago konakuyiwa, olamba yaakaanakalunga otayi dhimi po.” — Omayel 24:20.
Longela Kalunga kemanguluko
3 Satana ota vulu wo oku tu pukitha kunena. Okwa pukitha nale aakuluntu yetu yotango ya gwanenena kaaya vulike kuunamapangelo waKalunga. Okwa pukitha wo aayengeli oyendji. Iineya ye inayi lunduluka nokunena. Oha kambadhala oku tu pukitha tu dhiladhile kutya omithikampango dhaKalunga omidhigu, dho itadhi tu etele enyanyu nombili. (1 Joh. 5:3) Shika otashi vulu oku tu vulitha ngele ohatu kala aluhe naantu mboka ye na etaloko ndyoka. Omumwameme gwoomvula 24, ngoka a li a yi moluhondelo, okwa ti: “Onda li nda nwethwa mo nayi koomakula, molwaashoka onda li nda tila okukala nda yooloka ko kuyo.” Otashi vulika nangoye she ku ningilwa.
w04-E 7/15 ep. 31, okat. 6
“Omunamayele ohe ende pandunge”
Omuntu omunawino nomuyuuki ngoka ha katuka lela pandunge, otaka yambekwa. Salomo okwe tu shilipaleka a ti: “Omuyuuki ota li sigo ta kuta, ihe ela lyomukeenakalunga olya nkololoka.” (Omayeletumbulo 13:25) Jehova oku shi shoka hashi tu etele uuwanawa monkalamwenyo ngaashi muukwanegumbo, ngele tashi ya pekwatathano lyetu nayalwe, miilonga yokuuvitha nenge uuna twa pewa eegeloputudho. Ngele ohatu tula miilonga omayele ngoka taga adhika mOohapu dhe, kapena omalimbililo kutya otatu ka kala nonkalamwenyo tayi tisha.
Omaliko gomOmbiimbeli
“Kristus oye omutse gwomulumentu kehe”
13 Oshiilongomwa kutse. Kehe shimwe shoka omutse gwegumbo tagwu ningi, nagwu shi ninge tagwu inyengithwa kohole. Omolwashike shoka sha simana? Omuyapostoli Johannes okwa yamukula a ti: Omuntu “ita vulu okukala e hole Kalunga, ngoka kee mu wete, ngele ke hole omuntu mukwawo ngoka e mu wete,” nenge aanegumbo lye. (1 Joh. 4:11, 20) Omusamane ngoka e hole yaandjawo ohe ya sile oshimpwiyu pambepo, pamaiyuvo nopalutu. Kungawo, ota holele Jehova naJesus. (1 Tim. 5:8) Oha longo oyana iilonga yokomake noihe ya putudha hedha huka. Omatokolo kehe ta ningi oge na wo okukala haga simanekitha Jehova notaga etele uuwanawa aanegumbo ye. Natu kundathaneni iinima mbyoka omutse gwegumbo gwu na okuninga, e tatu tala nkene tagwu vulu okuholela Jehova naJesus.
19-25 MEI
OMALIKO OKUZA MOOHAPU DHAKALUNGA OMAYELETUMBULO 14
Dhiladhila kwaashoka to vulu okuninga po, uuna pwa holoka oshiponga shopaunshitwe
Kala wa lenga omagano gaKalunga gomwenyo
10 Omathimbo gamwe, ihatu vulu okukeelela oonkalo dha nika oshiponga dhi holoke. Shoka osho hashi kala ngaaka unene tuu ngele tashi ya piiponga yopaunshitwe, omikithi dhekomba nosho wo iikolokosha. Ihe uuna iinima mbyoka ya holoka, otatu vulu okukambadhala tu ikaleke twa gamenwa ngaashi tashi vulika, notatu ka hupa muyo, uuna tatu vulika komalombwelo gokuza mo moshitopolwa shetu, nenge komalombwelo galwe ngoka tatu pewa kaakwanepangelo. (Rom. 13:1, 5-7) Iiponga yimwe ohayi vulu okwiilongekidhilwa, onkee otu na okukala hatu pulakene komalombwelo ngoka haga zi kaakwanepangelo getu kwathele tu kale twa ilongekidha, uuna ya holoka. Pashiholelwa, oshi li nawa tu shilipaleke kutya otu na omeya niikulya mbyoka ihaayi olo nosho wo iikwamiti yekwatho lyotango.
11 Oshike tu na okuninga ngele moshitopolwa moka tu li omu na omukithi gwontumba gwomukwawu tagu taandele? Otu na okuvulika komalombwelo ngoka tatu pewa kepangelo, ngaashi okwiiyoga kiikaha, okukaleka po oshinano pokati ketu nayalwe, okuzala okamaska nosho wo okwiikalekelwa. Ngele otwa kala hatu shi ningi, otatu ulike kutya otwa pandula lelalela omagano gomwenyo ngoka twa pewa kuKalunga.
12 Pethimbo lyoshiponga, omathimbo gamwe ohatu uvu iinima kaayi shi yoshili kookuume, kaashiinda nomoonkundana. Pehala lyokwiitaala “shaa ohapu,” otu na okupulakena kuuyelele mboka wu li mondjila tawu zi kaakwanepangelo nokoondohotola. (Lesha Omayeletumbulo 14:15.) Olutuwiliki niitayimbelewa ohayi ningi ngaashi tayi vulu, yi mone uuyelele mboka wu li mondjila, manga inaayi gandja omalombwelo komagongalo ge na ko nasha nokugongala nosho wo niilonga yokuuvitha. (Heb. 13:17) Ngele otwa landula omalombwelo ngoka tatu pewa, nena ohatu igamene tse yene nosho wo yalwe koshiponga. Shika ohashi vulika wo shi ningithe yalwe ya popile muuwanawa Oonzapo dhaJehova. — 1 Pet. 2:12.
Kala omulaadhi ngaashi Sadok
11 Ongiini tatu vulu okukala tu na uulaadhi ngaashi waSadok, moonkalo dha nika oshiponga, uuna twa pulwa tu ka kwathele aamwatate? (1) Landula omalombwelo. Moonkalo dha tya ngaaka, osha simana okukala twa hangana. Vulika komalombwelo ngoka to pewa okuza koshitayimbelewa sheni. (Heb. 13:17) Aakuluntugongalo oya pumbwa okukala aluhe haya talulula omalombwelo kombinga yiiponga mbyoka tashi vulika yi holeke moshitopolwa shawo nosho wo uuyelele mboka hawu zi kehangano, opo ya tseye shoka ye na okuninga, uuna pwa holoka oshiponga sha sha. (1 Kor. 14:33, 40) (2) Kala omulaadhi nowa kotoka. (Omayel. 22:3) Longitha oondunge dhokuyoolola. Yanda okutula omwenyo gwoye moshiponga inaashi pumbiwa. (3) Inekela Jehova. Dhimbulukwa kutya Jehova oku na ko nasha lela nonkalonawa yoye nosho wo yaamwaho. Ota vulu oku ku kwathela wu ambidhidhe aamwaho kaapu na okutula omwenyo gwoye moshiponga.
Omaliko gomOmbiimbeli
Nkene tatu vulu okuninga omatokolo omawanawa
Ombiimbeli otayi ti kutya omuntu “onkotoki ota ndhindhilike oonkatu dhe.” (Omayeletumbulo 14:15) Shika osha hala okutya manga inaatu ninga etokolo, otu na okudhiladhila nawa kombinga yalyo. Sho to dhiladhila kombinga yetokolo ndyoka, ipula to ti: ‘Omakotampango gOmbiimbeli geni tandi vulu okutula miilonga? Etokolo lini tali vulu okweetela ndje ombili yopamadhiladhilo? Etokolo lyandje otali ka guma ngiini yalwe? Shono sha simanenena, mbela otali ka nyanyudha ngaa Jehova?’ — Deuteronomium 32:29.
Jehova oku na uuthemba woku tu lombwela shoka oshiwanawa naashoka oshiwinayi. Uuna twa tseya nawa oompango nomakotampango ge, notwa tokola toko oku ga landula, ohatu kala tu na eiyuvo ewanawa. Eiyuvo olyo hali tu lombwele kutya oshinima shontumba oshi li mondjila nenge osha puka. (Aaroma 2:14, 15) Eiyuvo lya dheulwa ohali tu kwathele tu ninge omatokolo omawanawa.
26 MEI–1 JUNI
OMALIKO OKUZA MOOHAPU DHAKALUNGA OMAYELETUMBULO 15
Kwathela yalwe ya kale ye na omwenyo omunyanyukwi
w10 11/15 ep. 31, okat. 16
Tse otatu ende muudhiginini wetu
16 Job okwa li ha yakula aayenda. (Job 31:31, 32) Nonando katu shi aayamba, otatu vulu ‘okuyakula oondjendi momagumbo getu.’ (Rom. 12:13) Otatu vulu okutopola nayalwe okashona hoka tu na mokudhimbulukwa kutya “okulya ekaka lyomboga ko ku na ohole oku vule okulya ontselela yondumetana yo ondoka ko ku na uutondwe.” (Omayel. 15:17) Okulya pamwe naakakateli yuudhiginini ooyakwetu tu na ohole otaku ka ninga nokuli okulya okashona hoka tu na ku kale taku nyanyudha notaku tungu.
Tu tsaathaneni omukumo “unene sho tu wete esiku lyOmuwa tali hedha popepi”
16 Otashi ka kala sha puka, ngele otwa kala tu uvite kutya itatu vulu okutsa yalwe omukumo, molwaashoka katu shi naanaa okupopya naantu. Okutsa yalwe omukumo ihashi pula naanaa oshindji. Otashi vulika wa pumbwa owala okwiimemeha, uuna to popitha omuntu. Ngele ngoka wa popitha ini imemeha, otashi vulika e na uupyakadhi washa. Onkee ano, omukalo moka to vulu oku mu hekeleka, omokupulakena kuye. — Jak. 1:19.
17 Omumwatate omugundjuka gwedhina Henri, okwa li a gwililwa po noonkondo, sho aakwanezimo ye nosho wo he ngoka a kala omukuluntugongalo, ya thigi po oshili. Omutonatelishikandjo okwa mono kutya Henri okwa yemata. Onkee ano, okwe mu hiya ya ka nwe okoothiwa pehala lyontumba, e te mu lombwele a popye nkene u uvite. Henri okwe shi mono kutya omukalo moka ta vulu owala okukwathela aakwanezimo ye ya galukile moshili, ongele a kala omudhiginini. Okwa li a hekelekwa noonkondo, sho a lesha Episalomi 46; Sefanja 3:17 naMarkus 10:29, 30.
18 Iiholelwa yaMarthe naHenri, otayi ulike kutya otatu vulu okutsa omukumo omumwatate nenge omumwameme ngoka a pumbwa ekwatho. Omukwaniilwa Salomo okwa li a nyola a ti: “Nohapu oyo opala ngiini pethimbo lyu uka! Omeho haga adhima otaga nyanyudha, noonkundana oombwanawa otadhi ondokitha omasipa.” (Omayel. 15:23, 30) Oshikwawo, okuleshela omuntu ngoka a teka omukumo sha mOshungolangelo nenge kepandja lyetu kointaneta, otashi vulu oku mu kwathela. Paulus oku ulike kutya okwiimba pamwe eimbilo lyUukwaniilwa, nagwo omukalo gwokutsaathana omukumo. Okwa nyola a ti: “Longathaneni nokupukululathana noondunge adhihe. Imbeni omapisalomi, omaimbilo noondjimbo oondjapuki. Imbileni Kalunga omahambelelo taga zi meni moomwenyo dheni.” — Kol. 3:16; Iil. 16:25.
Omaliko gomOmbiimbeli
ijwbq-E oshitopolwa 39 okat. 3
Mbela omuKriste oha taamba ko ngaa epango lyopaunamiti?
2. Mbela onda pumbwa okupula omayele lwiikando ngele tashi ya pepango lyopaunamiti? Oshasimana lela okupula “aagandjindunge oyendji” unene tuu ngele onkalo yoye oya kwatamiiti. — Omayeletumbulo 15:22.
2-8 JUNI
OMALIKO OKUZA MOOHAPU DHAKALUNGA OMAYELETUMBULO 16
Omapulo gatatu ngoka tage tu kwathele tu ninge omatokolo omawanawa
Ninga omatokolo gopandunge manga wu li omugundjuka
11 Okulongela Jehova ohaku tu etele enyanyu kaali shi okuyelekwa nasha. (Omayel. 16:20) Baruk, amushanga gwaJeremia, okwa fa a li a dhimbwa oshinima shoka, shaashi opu na ethimbo limwe kaali we ta nyanyukilwa iilonga yaJehova. Jehova okwa li e mu lombwele, a ti: “Oto ikongele iinima iinene? Ino yi konga. Oshoka otandi ka undulila aantu ayehe oshiponga, . . . oto kala u na omwenyo, shaa mpoka to yi.” (Jer. 45:3, 5) Oto ti ngiini kwaashoka? Oshike sha li tashi ka nyanyudha Baruk, mbela okukonga iinima iinene nenge okuhupa mehanagulo lyaJerusalem e li omupiya gwaKalunga omudhiginini? — Jak. 1:12.
12 Omumwatate gumwe ngoka a mona enyanyu mokuyakula yalwe oRamiro. Ota ti: “Onda za muukwanegumbo wa hepa wa kala momukunda gu li koshitopolwa shoondundu dhaAndes. Onkee ano, ompito oya li ye egulukila ndje lela sho omumwamememati omukuluntu a ti kutya ota futile ndje ndi ki ilonge kouniveesiti. Ihe onda adhika opo nda ninginithwa ndi li gumwe gwomOonzapo dhaJehova, nonda li nda hiywa komukokolindjila gumwe tu ka uvithe naye kokandoolopa okashona. Onda yi hoka, nondi ilongo okukulula aantu nonda patulula okakululilo opo ndi vule okwiiyambidhidha. Sho twa tameke okulonga aantu Omanyolo, oyendji oya li ye ga taamba ko nenyanyu. Konima yethimbo, onda ka kala megongalo ndyoka opo lya totwa po moka hamu popiwa elaka lyevalelwamo. Ngashingeyi onda kala omukalele gwethimbo lyu udha oomvula omulongo. Kaku na eithano lilwe lya li tali vulu okweetela ndje enyanyu ndyoka handi mono mokukwathela aantu ya tseye onkundana ombwanawa melaka ndyoka ya yama.”
Mbela owa shituluka ngaa?
ATUHENI otwa nwethwa mo noonkondo kunkene twa putudhwa nokomudhingoloko gwetu. Ohatu zala momukalo gwontumba, otu hole iikulya yontumba nohatu ihumbata momukalo gwontumba. Omolwashike mbela? Oshinima shimwe, omolwaashoka ohatu nwethwa mo kaantu mboka ye tu dhingilila nokoonkalo dhetu monkalamwenyo.
2 Ihe nonando ongaaka, opu na iinima mbyoka ya simana yi vule iikulya mbyoka hatu hogolola nosho wo omukalo ngoka hatu zala. Pashiholelwa, otwa putudhwa tu kale tu shi kutya iinima yini yi li mondjila naambyoka ya taambiwa ko nokutinda mbyoka ya puka nosho wo inaayi taambiwa ko. Iinima oyindji ya tya ngaaka oyi li ehogololo lyopaumwene noya yooloka komuntu nomuntu. Shoka hatu hogolola otashi vulika nokuli tu shi ninge omolweiyuvo lyetu ndyoka hali tu nyenyetele. Ombiimbeli otayi ulike kutya olundji ‘aapagani kaye na ompango, ihe ohaya gwanitha shoka tashi pulwa kompango pandunge dhawo.’ (Rom. 2:14) Ihe ngele kapu na ompango ya yela yaKalunga, mbela otatu ka landula owala omikalo nomithikampango ndhoka twa putudhwa nadho naandhoka dhi li apuhe moshitopolwa shetu?
3 Konyala opu na omatompelo gaali ga simana kutya omolwashike Aakriste ihaaya landula omikalo nomithikampango ndhoka ya putudhwa nadho naandhoka dhi li moshitopolwa shawo. Lyotango, Ombiimbeli otayi tu dhimbulukitha tayi ti: “Oku na ondjila ndjoka ya yelekana momeho gomulumentu, ihe pehulilo oyo ondjila yeso.” (Omayel. 16:25) Molwaashoka inatu gwanenena, katu na naanaa oonkondo dhokutokola kutya oshike oshiwanawa lela kutse, opo tu wilike oonkatu dhetu nawa. (Omayel. 28:26; Jer. 10:23) Etiyali, Ombiimbeli otayi ulike kutya iikala nomithikampango dhomuuyuni odha nwethwa mo notadhi pangelwa kuSatana, ‘kalunga kuuyuni mbuka.’ (2 Kor. 4:4; 1 Joh. 5:19) Onkee ano, ngele otwa hala Jehova e tu yambeke ye a kale e tu hokwa, otwa pumbwa okupulakena komayele ngoka ge li mAaroma 12:2. — Lesha.
Omaliko gomOmbiimbeli
Ino pukithwa ‘kwaashoka sha talwa kuuyuni mbuka kutya osho oondunge’
13 Ombiimbeli otayi ti: “Omutima kehe gu hole uuntsa, ogwo iihuna koshipala shOmuwa.” (Omayel. 16:5) Omolwashike aantu mboka ye na uuntsa, ye li iihuna koshipala shaJehova? Etompelo limwe olyo ndyoka kutya mboka yi ihole yo yene nohaya humitha komeho ohole ndjoka, ohaya tameke okwiinenepeka ngaashi Satana. Dhiladhila owala kutya Satana okwa li a hala Jesus ngoka a li a longithwa kuKalunga a shite iinima ayihe, e mu tsile oongolo noku mu galikane. (Mat. 4:8, 9; Kol. 1:15, 16) Mboka ye na etaloko ndyoka lyokukala yi iwete ya simana, otaya ulike kutya uunongo wuuyuni owo uugoya koshipala shaKalunga.
9-15 JUNI
OMALIKO OKUZA MOOHAPU DHAKALUNGA OMAYELETUMBULO 17
Nyanyukilwa ombili mondjokana yeni
g 9/14-E ep. 11, okat. 2
Nkene to vulu okweetha po onkone
Ikonakona paushili. Ombiimbeli oya popya kutya aantu yamwe oye li ‘aageyintu’ ‘naakehuki.’ (Omayeletumbulo 29:22) Mbela nangoye osho wu li ngawo? Ipula ngeyi: ‘Mbela ondi na egamo lyo kukala nda geya? Mbela ohandi uvu nayi nuupu? Mbela ohandi geye kuunima uushona?’ Ombiimbeli otayi ti kutya “ngoka ta lafulula iinima, ota halakanitha ookuume.” (Omayeletumbulo 17:9; Omuuvithi 7:9) Shoka ohashi vulu okuningwa nomondjokana wo. Ngele owuna egamo lyokukala wa geya, ipula kutya ‘Mbela ohandi idhidhimikile ngaa kuume kandje kopandjokana shi vulithe nale?’ — Ekotampango lyOmbiimbeli: 1 Petrus 4:8.
w08-E 5/1 ep. 10, okat. 6–ep. 11, okat. 1
Nkene to vulu okukandula po uupyakadhi
1. Kutha ethimbo mu wu kundathane. Ombiimbeli otayi ti: “Ayihe oyi na otundi yayo, . . . ethimbo lyokumwena, nethimbo lyokupopya.” (Omuuvithi 3:1, 7) Ngaashi shuulikwa menyolo lyatetekele, omaupyakadhi gamwe ohaga pendutha omaiyuvo ge na oonkondo. Ngele shoka osha ningwa, kala wu na eipangelo nokukambadhala ‘wu kale wa mwena’ okathimbo okashona, opo ongeyo yoye yi lote. Oto vulu okukaleka po ekwatathano lyeni, ngele owa tula miilonga omayele gOmbiimbeli ngoka taga ti: “Okutameka ondokosho okwa fa okupanuna omeya; onkee ano loteka oontamanana, manga inaadhi tukuka.” — Omayeletumbulo 17:14.
Nonando ongawo, opena wo “ethimbo lyokupopya.” Omaupyakadhi ngoka ga fa iigwanga ohaga indjipala, ngele otwe ga ipwililikile. Onkee inatu ga yanda, nokudhilaadhila kutya otaga kana po. Ngele owa kaleke oonkundathana, ulika kutya owa simaneka kuume koye kopandjokana mokukonga ethimbo tali opalele mu popye kombinga yuupyakadhi mboka. Euvathano ndyoka otali vulu oku mu kwathela mu tule miilonga omayele gOmbiimbeli ngoka taga ti: “Inamu kala mwa geya esiku alihe.” (Aaefeso 4:26) Odhoshili kutya amuhe omwa pumbwa okugwanitha po euvathano ndyoka.
Omaliko gomOmbiimbeli
Omanenedhiladhilo okuza membo lyOmayeletumbulo
Katu na okukala ngaashi ‘egoya’ ndyoka omeho galyo nomadhiladhilo galyo haga falwafalwa pehala lyokukala gu ukithwa kiinima mbyoka ya simana, ihe otu na okulalakanena oondunge opo tu vule okukatuka nowino.
16-22 JUNI
OMALIKO OKUZA MOOHAPU DHAKALUNGA OMAYELETUMBULO 18
Tsa omukumo mboka taya ungaunga nuunkundi wopalutu
Owino otayi igidha muule
17 Dhiladhila manga ino popya. Ngele inatu kotoka otatu vulu okweehameka yalwe noohapu dhetu. Ombiimbeli oya popi ya ti: “Aanamalaka omadhigu otayu ulula ngegongamwele, ihe elaka lyaanawino olyo ealudho.” (Omayel. 12:18) Katu na okukala hatu popi kombinga yomapuko gayalwe, ngele otwa ningi ngawo otatu ka kaleka po ombili. (Omayel. 20:19) Ngele otwa hala oohapu dhetu dhi kale hadhi tsu yalwe omukumo, ihe haku ya ehameka, otu na okukala hatu lesha pandjigilile nokudhiladhila kOohapu dhaKalunga. (Luk. 6:45) Ngele ohatu tedhatedha kwaashoka Ombiimbeli tayi ti, oohapu dhetu otadhi ka kala dha fa ‘oluthithiya lwowino’ notadhi ka hekeleka nokutsa yalwe omukumo. — Omayel. 18:4.
mrt-E oshitopolwa 19, oshimpungu
Nkene tatu vulu okuungaunga nuunkundi wopalutu wombaadhilila
Kala omupulakeni omwaanawa. Omukalo gumwe to vulu okukwathela kuume koye omokupulakena kuye, uuna a hala okupopya. Ino kala wu uvite kutya owu na okuyamukula kehe oshinima ta popi. Olundji ohashi kala oshiwanawa okupulakena. Kambadhala oku mu uvako e to yanda oku mu tokola. Ino dhiladhila kutya owu shi nkene kuume koye e uvite, unene tuu ngele uuvu we kawu iwetikile. — Omayeletumbulo 11:2.
Popya shoka oshiwanawa. Otashi vulika wu kale kuu shi shoka wu na okutya, ihe oku tya sha owala pufupi wu ulike kutya owu uvite ko onkalo yakuume koye, shoka otashi ke mu hekeleka lela shi vulithe okukala inoo tya sha nando. Ngele kushi shoka wu na okutya, kambadhala okupopya oohapu dhanathangwa notadhi hekeleke ngaashi: “Kandi shi kutya nandi tye shike ihe onda hala wu tseye kutya ondi na ko nasha nangoye.” Yanda okupopya iinima ngaashi: “Osha li tashi vulu okunayipala” nenge “shalongo ngaa kuuna . . . “
Oto vulu okuulika kutya owu na ko nasha nakuume koye moku mu pula kombinga yuuwehame we. Kungawo ote ke ku pandula sho to kambadhala okuuvako onkalo ye, naashoka to popi otashi ka kala tashi ti sha kuye. (Omayeletumbulo 18:13) Onkee ano yanda okugandja omayele inaaga pumbiwa.
Mu pa ekwatho ndyoka a pumbwa. Pehala lyokudhiladhila kutya owu shi nkene wu na okukwathela kuume koye, mu pula shoka to vulu oku mu ningila. Dhimbulukwa kutya kuume koye otashi vulika kee ku lombwele kutya okwa pumbwa ekwatho, molwaashoka ina hala okukala omutengi. Ngele osho shili ngawo, kambadhala oku mu lombwela oshinima shoka tamu vulu okuninga naye ngaashi oku ka landa ko kiinima ye, okwoopaleka ko, nenge oku mu ningila sha shilwe shi ili. — Aagalati 6:2.
Ino teka omukumo. Sho kuume koye ta ungaunga nuuwehame mboka, omathimbo gamwe otashi vulika a kaleke omalongekidho ngoka mwa ninga naye nenge a kale inaa hala okupopya nangoye. Kala omwiidhidhimiki noho uvuko oonkalo. Tsikila oku mu pa ekwatho ndyoka a pumbwa. — Omayeletumbulo 18:24.
wp23.1 ep. 14, okat. 3–ep. 15, okat. 1
Nkene to vulu okukwathela mboka ye na uupyakadhi wopamadhiladhilo
‘Tsa aambanda omukumo.’ — 1 AATESSALONIKA 5:14.
Kuume koye otashi vulika a kale ti ipula unene, nenge a kale e uvite kee na oshilonga. Uuna we mu shilipaleke kutya owu na ko nasha naye, kungawo oto vulu oku mu hekeleka noku mu tsa omukumo, nonando ku shi kutya popya naanaa shike.
“Kuume oku na ohole aluhe.” — OMAYELETUMBULO 17:17.
Mu pa ekwatho ndyoka a pumbwa. Pehala lyokudhiladhila kutya owu shi nkene wu na okukwathela kuume koye, mu pula shoka to vulu oku mu ningila. Ngele oha mono oshidhigu okupopya kutya okwa pumbwa shike, kambadhala oku mu lombwela oshinima shoka tamu vulu okuninga pamwe naye, ngaashi oku ka iyutha momagulu. Nenge oto vulu oku mu kwathela mu ka lande ko kiinima ye, okwoopaleka ko, nenge oku mu ningila sha shilwe shi ili. — Aagalati 6:2.
‘Idhidhimika.’ — 1 AATESSALONIKA 5:14.
Kuume koye otashi vulika kaa kale aluhe i ilongekidha okupopya sha. Mu shilipaleka kutya oto ka kala wa nyanyukwa okupulakena kuye, nonando ina hala okupopya sha. Omolwuuvu we, kuume koye otashi vulika a popye nenge a ninge iinima mbyoka tayi ku uvitha nayi. Otashi vulika a kaleke omalongekidho ngoka mwa ninga naye, nenge a kale a lulilwa. Kala wu na eidhidhimiko nolukeno sho to mu pe ekwatho ndyoka a pumbwa. — Omayeletumbulo 18:24.
Omaliko gomOmbiimbeli
Jehova ote ke ku kwathela uuna wu li muudhigu
13 Shoka twa pumbwa okuninga. Ino kambadhala okwiikalela. Uuna twa ikalela, olundji ihatu kala we tatu gandja eitulomo kiinima yilwe, ihe ohatu tameke owala okugandja eitulomo kutse yene nokomaupyakadhi getu. Shoka otashi vulu okuguma omatokolo ngoka hatu ningi. (Omayel. 18:1) Odhoshili kutya omathimbo gamwe ohatu kala twa pumbwa okwiikalela, unene tuu ngele otwa taalela oonkalo oondhigu. Ihe ngele otwa kala twa ikalela ethimbo ele, otashi vulika tu hunuthe ompito yokukwathelwa kwaamboka Jehova ta longitha. Ano nando onkalo oyi kale ondhigu shi thike peni, taamba ko ekwatho ndyoka to pewa kuyaandjeni, kookuume nokaakuluntugongalo. Kala we ya tala ko kutya otaya longithwa kuJehova, ye ku kwathele. — Omayel. 17:17; Jes. 32:1, 2.
23-29 JUNI
OMALIKO OKUZA MOOHAPU DHAKALUNGA OMAYELETUMBULO 19
Kala kuume kashili kaamwaho
Nkene tatu vulu okukokeka ohole yetu yokuhola yalwe
16 Kala ho gandja eitulomo komaukwatya omawanawa gaamwatate naamwameme, ihe hakomaunkundi gawo. Natu shi yelekanithe ngeyi. Natu tye andola owu li pokatuthi kontumba nongundu yaamwatate naamwameme. Otamu tyapula nawa nopehulilo owe ya ithana mu ithaneke mu li pamwe. Owa thaneke omathano ga konda pugaali wa ningila ngele lyotango inali za mo nawa. Ngashingeyi owu na omathano gatatu, ihe mulimwe owa ndhindhilike kutya omumwatate gumwe ita imemeha. Oto ka ninga po shike nethano ndyono? Oto ke li dhima mo, oshoka owu na omathano gaali moka kehe gumwe ta imemeha, mwa kwatelwa nomumwatate ngoka.
17 Omathano ngoka hatu pungula otatu vulu oku ga yelekanitha niinima mbyoka hatu dhimbulukwa. Ohatu kala tu na oompito oombwanawa nokudhimbulukiwa, ndhoka twa li naamwatate naamwameme. Natu tye ihe pompito yimwe, omumwatate nenge omumwameme okwa popi nenge a ningi sha shoka kaashi li nawa. Mbela oto ka ninga po shike? Omolwashike mbela itoo dhimi mo oshinima shoka momadhiladhilo goye, ngaashi owala wa ningi nethano ndyoka wa thanekele? (Omayel. 19:11; Ef. 4:32) Odhoshili kutya otatu vulu okudhima mo momadhiladhilo getu uupuko uushona mboka ooitaali ooyakwetu haya ningi, molwaashoka otu na iinima oyindji iiwanawa mbyoka tatu vulu okudhimbulukwa kombinga yawo. Otwa hala okukala hatu dhimbulukwa iinima iiwanawa mbyoka ya ninga nokukala twe yi lenga.
Tsikila okukokeka ohole yoye
10 Natse wo ohatu kongo omikalo tu kwathele aamwatate naamwameme. (Heb. 13:16) Tala koshimoniwa shaAnna ngoka a tumbulwa moshitopolwa sha tetekele. Konima yoshikungulu oshinene, ye nomusamane gwe oya talele po uukwanegumbo wOnzapo yimwe, noya mono kutya iipeleki yokombanda yondunda yawo oya pepwa ko koshikungulu. Oshizemo, uukwanegumbo kawa li we wu na oonguwo dha yela. Anna okwa ti: “Otwa yi noonguwo dhawo tu ke dhi yoge e tatu dhi galula twe dhi kangula notwe dhi gonya nawa.” Shoka kasha li oshidhigu kutse okuninga, ihe molwaashoka otwe shi ningi, otwa panga uukuume uuwanawa nawo sigo okunena. Anna nomusamane gwe oyi inyengithwa kohole ya kwathele aamwatate naamwameme. — 1 Joh. 3:17, 18.
11 Uuna tatu ungaunga nohole nonombili nayalwe, olundji ohaya mono kutya otatu kambadhala okuholela Jehova. Otashi vulika ye tu pandule noonkondo omolwolukeno ndoka twe ya ulukila. Khanh ngoka a tumbulwa metetekelo ota dhimbulukwa mboka ya li ye mu kwathele. Okwa ti: “Onda pandula noonkondo aamwameme ayehe mboka ya li haya yi pamwe nangame miilonga yokuvitha. Oya li haya ile ndje pegumbo, ndi ka lye omwiha pamwe nayo nohaya shilipaleke kutya onda thika ngaa kegumbo nawa. Ngashingeyi ondi wete kutya osha li sha pula iilonga oyindji. Shoka oya li ye shi ningi omolwohole.” Odhoshili kutya haantu ayehe taye ke tu pandula omolwiinima mbyoka twe ya ningila. Khanh okwa popi shi na ko nasha naamboka ye mu kwathela a ti: “Ohandi kala nda hala oku ya futa omolwiinima mbyoka ya ningila ndje, ihe kandi shi kutya aantu mboka oya kala peni. Nonando ongawo, Jehova oku shi kutya oya kala peni note ke ya futa pehala lyandje.” Khanh oku li mondjila. Jehova oha ndhindhilike nokuli nuunima uushona mboka hatu ningile yalwe tatu inyengithwa kolukeno. Ohe shi tala ko shi li eyambo li na ongushu noli li oondjo ndhoka ta ka futila po. — Lesha Omayeletumbulo 19:17.
Tsikileni okuulukilathana ohole ihaayi hulu po
6 Kunena, omuntu ngoka a longela ehangano lyontumba uule womimvo oha kala a talika ko e li omudhiginini kehangano ndyoka. Nonando okwa kala te li longele ethimbo ele, ina tsakanena nando olumwe naakuluntu yehangano ndyoka. Otashi vulika wo ihaa tsu kumwe aluhe nomatokolo gawo. Nonando ke hole ehangano ndyoka, okwa pandula sho e na iilonga. Ota ka tsikila oku li longela sigo a penzelwa, nenge sigo a mono po iilonga yilwe hayi futu nawa.
7 Eyooloko ndyoka li li pokati kuudhiginini mboka twa zi nokukundathana mokatendo 6 nosho wo nohole ihaayi hulu po, einyengotompelo lyomuntu. Pethimbo lyOmbiimbeli, omolwashike aapiya yaJehova ya li ya ulike ohole ihaayi hulu po? Mboka ya li ye yi ulike kaya li ye shi ningi molwaashoka taya thininikwa, ihe omolwaashoka ya li ya hala oku shi ninga. Natu taleni koshiholelwa shaDavid. Omutima gwe ogwa li gwe mu inyengitha a ulukile Jonatan ohole ihaayi hulu po, nonando he yaJonatan okwa li a hala okudhipaga David. Konima yomimvo dhontumba sho Jonatan a si, David okwa tsikile okuulukila ohole ihaayi hulu po omwanamati gwaJonatan, Mefiboshet. — 1 Sam. 20:9, 14, 15; 2 Sam. 4:4; 8:15; 9:1, 6, 7.
Omaliko gomOmbiimbeli
it-1-E ep. 515
Omayele, Omugandjimayele
Jehova oku na lela uunongo owundji. Ina pumbwa nando omuntu e mu pe omayele. (Jes 40:13; Rom 11:34) Omwana oye owala ta vulu okukala “Omupukululi omukumithi” noha gandja ewiliko, oshoka oku na ombepo ondjapuki yaKalunga. Oha pewa wo ewiliko kuhe noku li landula. (Jes 9:6; 11:2; Joh 5:19, 30) Shika osha hala okutya opo omayele ge tu etele uuwanawa, oge na okukala ga za kuJehova. Omayele kehe ngoka geli mpinge nOmukombandambanda kage na ongushu yasha. Itatu vulu nokuli okutya ngoka omayele. — Omayel 19:21; 21:30.
30 JUNI–6 JULI
OMALIKO OKUZA MOOHAPU DHAKALUNGA OMAYELETUMBULO 20
Shoka tashi vulu okukwathela okweendelathana ku pondole
Nkene mu na oku shi pondola mokweendelathana
3 Nonando okweendelathana otaku vulu okukala oshinima shinyanyudha, oku li wo onkatu ya kwata miiti, ndjoka tayi vulu okufala mondjokana. Esiku lyohango yawo, aaihokani ohaya gana kuJehova kutya otaya kala ye holathane noya simanekathana onkalamwenyo yawo ayihe. Manga inaaya ninga egano, oya pumbwa okutala nawa iinima ayihe nuukeka. (Lesha Omayeletumbulo 20:25.) Shoka oshi li oshinima shoshili shi na ko nasha negano lyondjokana. Okweendelathana ohaku pe oonakwiikonga ompito ya tseyathane noya ninge etokolo lyomondjila. Omathimbo gamwe etokolo ndyoka ohali fala sigo omondjokana; go omathimbo gamwe ohali hulitha po okweendelathana. Ngele oonakwiikonga oya ethathana po, shoka itashi ti kutya oya ninga epuko. Pehala lyaashono, oya ninga shono shi na okuningwa, noshe ya kwathela ya ninge etokolo li li mondjila.
4 Omolwashike sha simana okukala tu na etaloko li li nawa li na ko nasha nokweendelathana? Ngele mboka inaaya ya mondjokana natango oya kala ye na etaloko li li nawa, itaya ka endelathana nagumwe ngoka kee na edhiladhilo lyokuya mondjokana nayo. Ihe nando ongawo, mboka inaaya ya mondjokana hayo awike ya pumbwa okukala ye na etaloko li li mondjila. Atuheni otwa pumbwa okukala tu li na. Pashiholelwa, yamwe ohaya dhiladhila kutya ngele aantu otaya endelathana, oye na okuhokanathana po. Mbela iikala ya tya ngawo ohayi gumu ngiini Aakriste mboka inaaya ya mondjokana? Melissa, omumwameme inaa hokanwa gwokoAmerika, okwa ti: “Oonzapo odhindji ndhoka tadhi endelathana, ohadhi piti momathininiko ogendji. Oshizemo, yamwe mboka taya endelathana ohaya yanda okuhulitha po ekwatathano lyawo, nonando inaya opalelathana. Yalwe mboka inaaya ya natango mondjokana ohaya yanda okweendelathana nagumwe. Oshinima shoka ohashi vulu oku ya etela omaipulo ogendji.”
Nkene to vulu okumona kuume kopandjokana omwaanawa
8 Ongiini to vulu okutala nawa noondunge omuntu ngoka wa hala okuya naye mondjokana? Pokugongala kwegongalo nenge pokatuthi kontumba, otashi vulika wu ndhindhilike kutya omuntu ngoka uupambepo we, uukwatya we neihumbato lye olya tya ngiini. Ookuume ke oolye noha popi kombinga yashike? (Luk. 6:45) Mbela omalalakano ge oga faathana nogoye? Oto vulu okupula aakuluntugongalo yomegongalo lyawo nenge Aakriste yamwe ya pyokoka, mboka ye mu shi nawa. (Omayel. 20:18) Oto vulu okupula ngele oku na ngaa edhina ewanawa nosho wo omaukwatya omawanawa. (Rut 2:11) Sho to mu konakona, yanda oku mu ningitha a kale uvite inaa manguluka. Kala wa simaneka omaiyuvo ge, ino idhopa miinima ye noino kala aluhe we mu kalela.
Nkene mu na oku shi pondola mokweendelathana
7 Ongiini to vulu okutseyathana naangoka to endelathana naye kutya omuntu naanaa a tya ngiini? Omukalo gumwe gwomomikalo dha dhenga mbanda tamu vulu okukala hamu popi mwa mangulukilathana nokulombwelathana oshili, ogwo okupulathana omapulo nokupulakena nawa sho mukweni ta yamukula. (Omayel. 20:5; Jak. 1:19) Otamu vulu okutokola okukala hamu ningi iinima pamwe, shoka tashi ke shi ninga oshipu okupopya sho tamu li pamwe, tamu ende momahala gaayehe nuuna tamu uvitha. Shimwe ishewe, longekidhii po omaipyakidhilo ngoka taga ka ulika kutya ngoka wa hala okuya naye mondjokana oha inyenge ngiini moonkalo dha yoolokathana nongele e li naantu ya yoolokathana. Tala shoka Aschwin, ngoka a za koHolanda, a kambadhala okuninga. Okwa li a popi kombinga yokweendelathana kwawo naAlicia, a ti: “Otwa li hatu kongo omaipyakidhilo ngoka tage ke tu kwathela tu tseyathane. Olundji otwa li hatu ningi iinima ya nathangwa, ngaashi okwiilongekidhila okugongala pamwe, nenge okwiimba pamwe. Pethimbo ndyoka, kehe gumwe okwa li ha mono omaukwatya omawanawa gamukwawo nosho wo okwaagwanenena kwe.”
8 Otamu vulu wo okutseyathana mokukala hamu konakona pamwe iitopolwa ya kankamena kOmbiimbeli. Ngele mwa hokana, otamu ka pumbwa okukonga ethimbo lyokuninga elongelokalunga lyuukwanegumbo, opo Kalunga a kale oshitopolwa sha simanenena mondjokana yeni. (Omuuv. 4:12) Onkee ano omolwashike itaamu kongo ethimbo mu kale hamu konakona pamwe sho tamu endelathana? Odhoshili kutya sho tamu endelathana inamu ninga natango uukwanegumbo, nomumwatate ke shi natango omutse gwomumwameme. Ihe nando ongawo, sho tamu konakona pandjigilile pamwe, otamu vulu okwiilonga nkene kehe gumwe e uvite shi na ko nasha naJehova. Oonakweendelathana Max naLaysa, ya za koAmerika, oya li ya mono uuwanawa wulwe muko. Max okwa ti: “Petameko lyokweendelathana kwetu, otwa li hatu konakona iileshomwa tayi popi kombinga yokweendelathana, yondjokana noyonkalamwenyo yuukwanegumbo. Iileshomwa mbyoka oya li ye tu egululile ompito yokukundathana kombinga yiinima oyindji ya simana mbyoka sha li oshidhigu okutameka okukundathana kombinga yayo.”
Omaliko gomOmbiimbeli
it-2-E ep. 196, okat. 7
Onyeka
Omayeletumbulo 20:27 otaga ti: “Ombepo yomuntu oyo onyeka yOmuwa, otayi konakona oondjugo adhihe dhomeni.” Shoka omuntu ha ‘fudha mo’ nenge shoka ha popi kutya nduno oshiwanawa nenge oshiwinayi, ohashi holola nenge hashi ulike omaukwatya ge nenge kuuntu we womeni. — Yelekanitha Iil 9:1.