Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
© 2025 Watch Tower Bible and Tract Society of Pennsylvania
7-13 JULI
OMALIKO OKUZA MOOHAPU DHAKALUNGA OMAYELETUMBULO 21
Omakotampango gopandunge ngoka tage mu kwathele mu kale nondjokana tayi ende nawa
w03-E 10/15 ep. 4, okat. 5
Ongiini to vulu okuninga omatokolo gopandunge?
Omatokolo ngoka ga ningwa meendelelo, olundji ihaga kala pandunge. Omayeletumbulo 21:5 otage tu londodha taga ti: “Oompangela dhomunandjungu otadhi mu etele eliko, ihe ngoka a lungulukwa, ota yi moluhepo.” Pashiholelwa, aagundjuka yomimvo omulongo nasha, kaye na okukala ya pwila mohole nagumwe, ihe oye na okweenda kashona, omanga inaaya koleka ekwatathano ndyoka tali fala mondjokana nagumwe. Ngele hasho, otaya ka mona uushili woohapu dhaWilliam Congreve, omunyoli gwiinyandwa Omwiingilisa, ngoka a li ko petameko lyomimvo 300 nasha dha ka pita, ngoka a nyola a ti: “Ino tondokela mondjokana, opo kuu ka ilye ominwe.”
g-E 7/08 ep. 7, okat. 2
Nkene tamu vulu okukala nondjokana tayi pondola
Kala wu na eifupipiko. Ombiimbeli otayi ti: “Inamu longa nando osha mombepo yokwiihola nenge yokukonga esimano lyowala, ihe ifupipikeni kiipala yayakweni, ne mwaa dhiladhile kutya one aawanawa.” (Aafilippi 2:3) Omaupyakadhi ogendji ohaga holoka molwaashoka aaihokani ohaya kambadhala okupa ombedhi ookuume kawo kopandjokana omolwuupyakadhi, pehala lyokukonga omikalo ndhoka tadhi vulu oku ya kwathela ayehe. Okwiifupipika kiipala yayakwetu otaku vulu oku ku kwathela wu sinde egamo lyokukala wa hala okusindana po oontamanana.
w06-E 9/15 ep. 28, okat. 13
‘Nyanyukilwa omukulukadhi gwoye wa za naye kuufuko’
13 Ongiini ngele ondjokana itayi ende we nawa, omolwonkalo moka aaihokani haya ihumbatelathana? Okukandula po uupyakadhi ngaashi mboka, ohashi pula oonkambadhala. Pashiholelwa, otashi vulika ya igilila okulongitha nayi elaka mondjokana yawo, shoka hashi uvitha nayi. (Omayeletumbulo 12:18) Ngaashi sha popiwa moshitopolwa sha tetekele, iikala ya tya ngaka otayi vulu okuyona po ondjokana yawo. Eyeletumbulo limwe lyOmbiimbeli olya ti: “Okukala mevi lya mbugala shi vule okukala nomukulukadhi omupwidhi nomudhudhu.” (Omayeletumbulo 21:19) Ngele owu li omukiintu a hokanwa nomu na uupyakadhi mboka wa popiwa metetekelo, ipula kutya: ‘Mbela iikala yandje ohayi shi ningi oshidhigu komusamane gwandje okukala e uvite uugumbo ngele e li pu ngaye?’ Ombiimbeli otayi lombwele aasamane tayi ti: “Holeni aakiintu yeni, ne inamu kala mu na onyanya nayo.” (Aakolossa 3:19) Wu li omusamane, ipula kutya: ‘Mbela ondi na iikala yokukala kaandi na ko nasha nomukulukadhi gwandje, mbyoka tashi vulika hayi mu dhiladhilitha a konge ehekeleko palwe pwi ili?’ Kashi na nduno mbudhi kutya shoka osho shi li ngaaka, uupyakadhi mboka kawu na nando okukala eipopilo lyokuya moluhondelo. Uushili mboka kutya oshinima sha tya ngaaka otashi vulu okuningwa mondjokana, owu na okwiinyengitha aaihokani ya kundathane omaupyakadhi ya manguluka.
Omaliko gomOmbiimbeli
Ohatu longele Kalunga “u udha esilohenda”
16 Aakriste ayehe ohaya kambadhala okuholela Jehova mokuulika ohenda. Omolwashike mbela? Etompelo limwe olyo kutya Jehova iha pulakene komagalikano gaamboka ihaaya ulukile yalwe ohenda. (Lesha Omayeletumbulo 21:13.) Kapu na gumwe gwomutse a hala Jehova a kale ihaa pulakene komagalikano ge, onkene ohatu yanda okukala ihaatu ulike ohenda. Ihatu yanda okupulakena kOmukriste omukwetu ngoka e li monkalo ondhigu, ihe ohatu kala aluhe twi ilongekidha okupulakena ‘konkugo yohepele.’ Ohatu kambadhala wo okuvulika komayele gOmbiimbeli ngoka taga ti: “Uuna Kalunga ta pangula aantu mboka yaa na ohenda, ite ke ya sila ohenda.” (Jak. 2:13) Ngele otwa ndhindhilike nkene twa pumbwa okuulukilwa aluhe ohenda, otatu ka kala wo tu na ehalo okuulikila yalwe ohenda. Otwa hala unene okuulukila ohenda mboka yi iyela ombedhi e taya galulilwa megongalo.
14-20 JULI
OMALIKO OKUZA MOOHAPU DHAKALUNGA OMAYELETUMBULO 22
Omakotampango gopandunge ngoka tage tu kwathele tu putudhe aanona
Mbela aamwoye otaya ka longela ngaa Kalunga, uuna ya koko?
7 Ngele ne aaihokani, nomwa hala okumona aanona, ipuleni omapulo taga landula: ‘Mbela tse aantu aaifupipiki mboka ye hole Jehova nOohapu dhe? Mbela Jehova ote ke tu inekelela okutekula okanona?’ (Eps. 127:3, 4) Ngele owu li nale omuvali, ipula to ti: ‘Mbela ohandi longo ngaa aamwandje nkene okulonga nuudhiginini kwa simana?’ (Omuuv. 3:12, 13) ‘Mbela ohandi ningi ngaa ngaashi tandi vulu ndi gamene aamwandje kenwethomo ewinayi lyuuyuni waSatana?’ (Omayel. 22:3) Ito vulu okugamena aamwoye komashongo agehe ngoka tashi vulika tayi iyadha mugo. Ihe oto vulu oku ya dheula nkene ye na okutaalela omashongo monkalamwenyo, moku ya longa okukala haya kongo ewiliko lyaKalunga mOohapu dhe. (Lesha Omayeletumbulo 2:1-6.) Pashiholelwa, ngele omukwanezimo okwe etha po okulongela Jehova, kwathela aanona yoye yi ilonge okuza mOohapu dhaKalunga kutya omolwashike okukala omudhiginini kuJehova kwa simana. (Eps. 31:23) Nenge ngele owa silwa omuholike, ulukila aanona yoye nkene taya vulu okulongitha Oohapu dhaKalunga ya mone ehekeleko nombili. — 2 Kor. 1:3, 4; 2 Tim. 3:16.
Aavali, dheuleni aanona yeni ya kale ye hole Jehova
17 Tameka okudheula aamwoye manga kuyele ngaashi tashi vulika. Ngele aavali oya tameke okudheula oyana manga kuyele, otashi ka eta iizemo iiwanawa. (Omayel. 22:6) Natu taleni kuTimoteus, ngoka mokweendela ko kwethimbo a li a ningi omweendi pamwe nomuyapostoli Paulus. Okwa li a dheulwa kuyina Eunike nokuyinakulu Loide “okuza kuunona.” — 2 Tim. 1:5; 3:15.
18 Aaihokani yalwe moIvory coast, Jean-Claude naPeace, oya li ya vulu okuputudha oyana ayehe yahamano ya kale ye hole Jehova noku mu longela. Oshike she ya kwathele ya pondole? Oya landula oshiholelwa shaEunike naLoide. Oya ti: “Aanona yetu otwa li twe ya nongeke Oohapu dhaKalunga okuza sho aashona, konima owala sho ya valwa.” — Deut. 6:6, 7.
19 “Okunongeka” Oohapu dhaJehova maanona yoye, otashi ti shike? “Okunongeka” otashi ti “okulonga nokudhimbulukitha lwiikando.” Opo aavali ye shi ninge, oya pumbwa okukonga ethimbo ya kale noyana, taye shi ningi pandjigilile. Omathimbo gamwe, okulombwela aanona iinima yontumba lwiikando, ohaku teya aavali omukumo. Ihe aavali otaya vulu okutala ko oshinima shoka shi li omukalo moka taya vulu okukwathela oyana, ya uve ko Oohapu dhaKalunga noye dhi tule miilonga.
w06-E 4/1 ep. 9, okat. 4
Aavali, tulilii po oyana yeni oshiholelwa oshiwanawa
Odhoshili kutya aanona, aanona owala, nayalwe oye na nokuli egamo lyokukala aatangalali. (Genesis 8:21) Oshike aavali taya vulu okuninga? Ombiimbeli otayi ti: “Uugoya wa kanyatela momwenyo gwomumati, ihe olunwa otalu u tidha mo.” (Omayeletumbulo 22:15) Oshinima shoka yalwe otashi vulika ya kale ye shi tala ko kutya onyanya nosha kwisha. Uushili owo kutya Ombiimbeli oyi li ompinge nuukolokoshi nosho wo ehepeko lyoludhi kehe. Omathimbo gamwe, “olunwa” olu li le po lelalela uuthemba womuvali mboka a pewa wokugandja egeeloputudho sha ukilila, ihe ohe shi ningi pahole nomomukalo gu uka, molwaashoka oku na ko nasha nuulinawa woyana. — Aahebeli 12:7-11.
Omaliko gomOmbiimbeli
Nyanyukilwa shoka to vulu okulongela Jehova
11 Sha faathana, natse otatu vulu okukala twa nyanyukwa noonkondo ngele otwa kala hatu longo nuudhiginini mukehe shoka tatu longele Jehova. Natu kale twi “ipyakidhila ethimbo alihe” miilonga yokuuvitha, e tatu kala hatu longo nuudhiginini megongalo. (Iil. 18:5; Heb. 10:24, 25) Kala ho ilongekidhile nawa okugongala, opo wu ka gandje omayamukulo taga tungu. Kala wa tala ko iipopiwa mbyoka ho pewa pokugongala kwomokati koshiwike ya simana. Ngele owa pulwa wu ninge sha megongalo, kala ho shi ningi pethimbo nokuulika kutya owu shi okwiinekelwa. Ino kala wa dhina iinakugwanithwa mbyoka to pewa e to kala inoo yi ilongekidhila nawa nonethimbo. Kala ho ningi oonkambadhala wu hwepopale moshilonga kehe to pewa. (Omayel. 22:29) Ngele owa kala to gandja eitulomo kiinakugwanithwa mbyoka wu na ngashingeyi, otashi ke ku kwathela wu hume komeho nowu kale wa nyanyukwa shi vulithe nale. (Gal. 6:4) Otashi ka kala wo oshipu kungoye wu kale wa nyanyukwa uuna gumwe a pewa oshinakugwanithwa shoka wa li wa hala. — Rom. 12:15; Gal. 5:26.
21-27 JULI
OMALIKO OKUZA MOOHAPU DHAKALUNGA OMAYELETUMBULO 23
Omayele gopandunge ngoka tage tu kwathele tu longithe nawa omalovu
Aakriste oye na okutala ko ngiini omalovu?
2 Ombiimbeli oya gandja omayele geni kwaamboka haya nu omalovu?
Jehova okwi indika okunwa sha pitilila nosho wo uunkolwe. (Aagalati 5:21) Oohapu dhe otadhi ti: “Ino kala mokati kaanwi yomaviinu.” (Omayeletumbulo 23:20) Onkee ngele otwa tokola okunwa omalovu, kutya nduno otu li nayalwe nenge otu li otse atuke, inatu ipa mo unene e tatu kala itaatu vulu okudhiladhila nawa, okupopya oohapu dha yogoka nokwiihumbata nawa. Shimwe ishewe, katu na oku ga nwa sigo taga yono po uukolele wetu. Ngele ihatu vulu okupangela okunwa kwetu, oshihwepo tu ku ethe po thiluthilu.
Kala wu na etaloko lya fa lyaKalunga ngele tashi ya piikolitha
4 Ihe Aakriste ohaya wilikwa pandunge kOmushiti gwawo omunahole. Pashiholelwa, okwe tu lombwela iilanduliko iiwinayi mbyoka hayi zi mokunwa iikolitha sha pitilila. Otashi vulika twa lesha mOmayeletumbulo 23:29-35 uuyelele kombinga yomuntu onkolwe noyomaupyakadhi gamwe ngoka ha mono. Omukuluntugongalo gumwe, Daniel gwokoEuropa, ota dhimbulukwa nkene onkalamwenyo ye ya li manga inaa ninga Omukriste gwashili, a ti:“Uunkolwe owa ningitha ndje ndi ninge omatokolo omawinayi, nomolwago onda li nda mono iilanduliko iiwinayi monkalamwenyo yandje, nohandi kala natango tandi ipe uusama, uuna tandi yi dhiladhila.
Omaliko gomOmbiimbeli
Omapulo ga za kaaleshi
Pashiholelwa, okwoondoka nayi otaku vulu okuulika kutya omuntu omufukedhi, ihe haaluhe shi li ngawo. Okukala wo ondoka nayi otashi vulu okukala she etithwa komukithi gwontumba. Otashi vulika okwoondoka nayi ku li oshinima shono omuntu e shi thigulula kaavali ye. Otu na wo oku shi kaleka momadhiladhilo kutya okwoondoka nayi oko onkalo yopalutu, omanga uufukedhi u li iikala yopamadhiladhilo. Okwoondoka nayi okwa fatululwa ku li “okukala wo ondoka sha pitilila,” ihe uufukedhi owo “okulya nokunwa sha pitilila.” Onkee ano, uufukedhi ihau ulikwa kuunene wolutu lwomuntu ihe okiikala ye yi na ko nasha niikulya. Omuntu otashi vulika e na olutu lu li nawa nenge nokuli omushona molutu ihe omufukedhi. Natango, shoka sha talika ko shi li oshiviha shi li nawa nenge omutungilo gwolutu omwaanawa, pomahala agehe hasho sha talika ko ngawo.
28 JULI–3 AUGUSTE
OMALIKO OKUZA MOOHAPU DHAKALUNGA OMAYELETUMBULO 24
Kala wa kola wu vule okupita moonkalo oondhigu
Kaleni mwi ikolelela nomwaa tenguke
Konakona Oohapu dhaKalunga nokutedhatedha kudho. Ngaashi owala omuti tagu vulu okukala gwa kola ngele ogwa mena gwa ya muule, natse otatu ka vula okukala aadhiginini ngele otu na eitaalo lya kola. Ngele ohatu konakona nohatu tedhatedha, eitaalo lyetu otali kolo notatu kala twa tompwa lela kutya omithikampango dhaKalunga odha dhenga mbanda. (Kol. 2:6, 7) Dhimbulukwa nkene omalombwelo gaJehova, omayele ge negameno lye, ya li ya kwathele aapiya ye methimbo lyonale. Pashiholelwa, Hesekiel okwa li a gandja eitulomo komuyengeli sho ta mete otempeli ndjoka a li a mono memoniko. Emoniko ndyoka olya li lya nkondopaleke Hesekiel, notali tu longo sha kombinga yankene tatu vulu okukala aadhiginini komithikampango dhelongelokalunga lya yogoka. (Hes. 40:1-4; 43:10-12) Natse ohatu mono uuwanawa, uuna twa kongo ethimbo tu konakone Oohapu dhaKalunga nokutedhatedha kudho.
Kala wa nyanyukwa nonando owu li moonkalo oondhigu
12 Omayeletumbulo 24:10 otaga ti: “Ngele to tenguka pethimbo lyuudhigu, nena oonkondo dhoye oonshona ngiini!” Omayeletumbulo 15:13 otaga ti wo: “Uudhigu womomutima ohau nikitha omwenyo uuthigwa.” Aakriste yamwe oya teka omukumo sigo ye etha po okulesha Ombiimbeli paumwene nokutedhatedha kuyo. Omagalikano gawo ihaga zi we komutima notashi vulika yi itongole ko kooitaali ooyakwawo. Oshoshili kutya osha nika oshiponga okukala ethimbo ele wa teka omukumo. — Omayel. 18:1, 14.
13 Kombinga onkwawo, ngele otu na etaloko ewanawa otashi ke tu kwathela tu gandje eitulomo kiinima mbyoka hayi tu etele enyanyu nombili monkalamwenyo yetu. David okwa nyola a ti: “Kalunga kandje, ondi hole okugwanitha ehalo lyoye!” (Eps. 40:8) Katu na nando okweetha po elongelokalunga lyetu ngele iinima itayi tu endele nawa monkalamwenyo. Oshoshili kutya omukalo omwaanawa okukondjitha eyeme ogwo okukutha ombinga miilonga mbyoka hayi nyanyudha omuntu. Jehova okwe shi popya kutya otatu vulu okukala nenyanyu nombili ngele ohatu lesha Oohapu dhe noku dhi konakona aluhe. (Eps. 1:1, 2; Jak. 1:25) Ohatu mono “oohapu oontalala” ndhoka tadhi vulu oku tu ladhipika nokunyanyudha omitima dhetu okuza mOmanyolo Omayapuki nuuna tu li pokugongala kwopaKriste. — Omayel. 12:25; 16:24.
Omapulo ga za kaaleshi
Omayeletumbulo 24:16 otaga ti: “Omuyuuki nando ota gwile po luheyali, ota yambuka po.” Mbela shoka otashi popi kombinga yomuntu ngoka ha yono olundji, ihe Kalunga te mu dhimine po?
Ovelise ndjika hasho tayi ti ngawo. Pehala lyaashono, otayi popi kombinga yaangoka hi iyadha olundji momaupyakadhi nenge momashongo, ihe oha vulu oku gi idhidhimikila.
Onkee ano, Omayeletumbulo 24:16 itaga popi “okugwila po” pamukalo gwokuyona, ihe otaga popi kombinga yomaupyakadhi ngoka omuntu tashi vulika i iyadhe mugo lwiikando. Muuyuni mbuka wa kolokosha, omuyuuki otashi vulika a kale kee na uukolele nenge i iyadhe momaupyakadhi galwe. Otashi vulika nokuli a kale ta patanekwa kepangelo, omolweitaalo lye. Ihe ota vulu okukala neinekelo kutya Kalunga ote ke mu kwathela note ke mu ambidhidha i idhidhimike noku pondole. Ipula to ti: ‘Mbela olungapi nda mona aapiya yaKalunga ye li moonkalo oondhigu, ihe lwanima iinima oye ke ye endela nawa?’ Omolwashike wu na okwiipula ngawo? Omolwaashoka ohashi tu shilipaleke kutya “Omuwa ota yambula po aapunduki nota pendutha po mboka yi ihata po.” — Eps. 41:1-3; 145:14-19.
Omaliko gomOmbiimbeli
Omapulo ga za kaaleshi
Pethimbo lyOmbiimbeli, omulumentu ngoka a hala ‘okutunga egumbo’ lye, nenge okutota po uukwanegumbo we ngele a hokana, oku na okwiipula ta ti: ‘Ondi ilongekidha ngaa okusila oshimpwiyu omukulukadhi naanona mboka tatu ka kala tu na?’ Omanga inaa tameka uukwanegumbo, oku na okulonga epya lye tango. Onkee ano Ombiimbeli otayi ti: ‘Tula epya lyoye melandulathano; opo ihe oto ka tunga egumbo lyoye.’ Mbela ekotampango ndyoka otali longo nokunena?
Eeno, otali longo. Omulumentu ngoka a hala okuhokana okwa pumbwa okwiilongekidhila oshinakugwanithwa shoka. Ngele ina lemana, oku na okulonga a sile oshimpwiyu uukwanegumbo we. Ihe shika inashi kwatela mo owala oku wu sila oshimpwiyu palutu. Oohapu dhaKalunga otadhi ti kutya omulumentu ngoka iha sile oshimpwiyu uukwanegumbo we palutu, pamadhiladhilo nopambepo oku vulike komupagani. (1 Tim. 5:8) Onkee ano, uuna omulumentu a hala okuhokana nokukala e na uukwanegumbo, oku na okwiipula omapulo taga landula: ‘Mbela ondi ilongekidha okusila oshimpwiyu uukwanegumbo wandje palutu? Mbela ondi ilongekidha okukwatela komeho iinima yopambepo muukwanegumbo? Otandi ka vula ngaa aluhe okukwatela komeho ekonakonombiimbeli nomukulukadhi naanona?’ Oohapu dhaKalunga otadhi tsu omuthindo kutya okuninga ngaaka osha simanenena. — Deut. 6:6-8; Ef. 6:4.
Onkee ano, omumati ngoka a hala okuhokana oku na okwiipula nawa kombinga yekotampango ndyoka li li mOmayeletumbulo 24:27. Omukadhona naye oku na wo okwiipula ngele okwi ilongekidha tuu okukala omukulukadhi nokumona aanona. Aagundjuka mboka opo ya hokana otaya vulu okwiipula omapulo ga faathana ngele otaya dhiladhila okuputudha aanona. (Luk. 14:28) Uuna oshigwana shaKalunga tashi kala metsokumwe nomayele ngoka ga nwethwa mo otashi ka henuka oluhodhi nokunyanyukilwa onkalamwenyo yuukwanegumbo.
4-10 AUGUSTE
OMALIKO OKUZA MOOHAPU DHAKALUNGA OMAYELETUMBULO 25
Omakotampango gopandunge ngoka taga vulu oku tu kwathela mokupopya
Popya oohapu oombwanawa
6 Omolwashike sha simana okuhogolola ethimbo lyo opala okupopya? Omayeletumbulo 25:11 otayi ti: “Oohapu tadhi popiwa pethimbo lyo opala, odho iiyapula yoshingoli moshiyaha shoshisiliveli.” Iiyapula yoshingoli ohayi monika nawa, ihe ngele nokuli oya tulwa moshiyaha shoshisiliveli, kungawo we shi dhenge nee komutse. Sha faathana, otashi vulika tu kale twa hala okulombwela omuntu oshinima oshiwanawa. Ihe ngele otwa hogolola ethimbo lyo opala oku shi popya, otatu ka kwathela lela omuntu ngoka. Ongiini tatu vulu oku shi ninga?
7 Ngele otwa tameke okupopya pethimbo itaali opalele, otashi vulika aantu kaaye tu uve nenge kaaya taambe ko shoka tatu popi. (Lesha Omayeletumbulo 15:23.) Pashiholelwa, muMaalitsa 2011, ekakamo lyevi nosho wo otsunami oya yonagula po iilando oyindji muuzilo waJapani. Omwa sile aantu ye vulithe 15 000. Nonando Oonzapo dhaJehova odhindji odha kanitha iilyo yomaukwanegumbo nookuume, odha li dha hala okulongitha Ombiimbeli dhi kwathele yalwe mboka nayo ya li monkalo ya faathana. Ihe odha li dhi shi shi kutya oyendji yomaantu mboka Aabuddha noye shi owala kashona kombinga yOmbiimbeli. Onkee pehala lyoku ya lombwela pethimbo mpono kombinga yeyumuko, aamwatate oye ya hekeleke noku ya yelithila kutya omolwashike iinima iinyanyalithi hayi adha aantu aawanawa.
w15 12/15 ep. 20-21, okat. 15-16
Popya oohapu oombwanawa
15 Omukalo moka hatu popi naantu nagwo ogwa simana gwa fa shoka tatu popi. Aantu oya li ye hole okupulakena kuJesus, oshoka okwa li ha popi “oohapu oombwanawa,” dholukeno. (Lukas 4:22) Ngele otwa popi nolukeno, aantu otaya ka kala ya hala oku tu pulakena notaya ka taamba ko shoka tatu popi. (Omayeletumbulo 25:15) Ngele otwa simaneka aantu notu na ko nasha nankene yu uvite, otatu ka popya nayo nolukeno, ngaashi Jesus e shi ningile. Pashiholelwa, sho a mono ongundu yaantu ya hala oku mu pulakena, okwa li a nyanyukwa okuuhala nayo te ya longo. (Markus 6:34) Nokuli naasho aantu ye mu tuku, ine ya shunina. — 1 Petrus 2:23.
16 Nonando otu hole aantu yaandjetu nosho wo ookuume, omathimbo gamwe otashi vulika tu ya ule nayi, oshoka otu ya shi nawa. Ngele otwe ya yi meyego, otashi vulika tu dhiladhile kutya inatu pumbwa okukala twa kotoka sho tatu popi nayo. Ihe Jesus ka li ha popi nayi nookuume ke. Sho ookuume ke yamwe ya li taya patana kutya olye gwomuyo omunene e vule ooyakwawo, okwe ya pukulula nolukeno. Okwa longitha wo oshiholelwa shokanona e ya kwathele mokudhiladhila kwawo. (Markus 9:33-37) Aakuluntugongalo otaya vulu okuholela oshiholelwa shaJesus sholukeno, uuna taya pukulula omuntu. — Aagalati 6:1.
w95-E 4/1 ep. 17, okat. 8
Nkene hatu kwathathana mokuholathana nomokulongelathana uuwanawa
8 Sho tatu longele Kalunga ketu, atuhe ohatu vulu okutsaathana omukumo okupitila miiholelwa yetu. Kapu na omalimbililo kutya Jesus okwa li ha tsu omukumo aapulakeni ye. Okwa li e hole iilonga yokuuvitha nokwa li e yi simaneka. Okwa ti kutya oya li ya fa iikulya kuye. (Johannes 4:34: Aaroma 11:13) Uulaadhi mboka ohawu vulu okunwetha mo yalwe. Mbela nangoye ito vulu okukala wa nyanyukwa sho to longo iilonga mbyoka? Yanda okukala ho inomo e to lombwele yalwe iimoniwa yoye iiwanawa megongalo. Uuna to hiya yalwe ya longe pamwe nangoye, tala nkene to vulu okuya kwathela ya mone enyanyu lyashili ndyoka hali zi mokupopya nayalwe kombinga yOmushiti gwetu Omunenenene, Jehova. — Omayeletumbulo 25:25.
Omaliko gomOmbiimbeli
Ulika kutya owu na omwenyo omwaanawa
3 Uuna omuntu e na omwenyo omwaanawa itashi ti kutya ekatalume, ihe omulaadhi. Ohashi pula uulaadhi opo omuntu wu vule okukala wa ngungumana, uuna wa taalela onkalo ondhigu. Omwenyo omwaanawa, nenge engungumano olyo uukwatya wumwe ‘womiiyimati yombepo.’ (Gal. 5:22, 23) Oshitya “engungumano” mOshigreka osha li hashi longithwa sha ukithwa kokakambe okapwidhi ka dheulwa. Kala ando wa fa wu ka wete ka ngungumana. Nando okakambe hoka ngashingeyi ohaka kala ka ngungumana, oke na natango oonkondo. Tu li aantu, ongiini tatu vulu okukokeka uukwatya womwenyo omwaanawa, ihe natango otu li aalaadhi? Shoka itatu vulu oku shi ninga koonkondo dhetu yene. Otu na okupula ombepo ondjapuki yaKalunga megalikano yi tu kwathele tu kokeke uukwatya mbuka uuwanawa. Opu na aantu oyendji ya ilonga okukala aayifupipiki. Oonzapo odhindji ohadhi kala dhi ifupipika, uuna tadhi patanekwa, naashoka ohashi kwathele yalwe ya kale ye na etaloko ewanawa li na ko nasha nadho. (Lesha 2 Timoteus 2:24, 25.) Ongiini omwenyo omwaanawa tagu vulu okukala wumwe womuukwatya woye mboka wa tongomana?
11-17 AUGUSTE
OMALIKO OKUZA MOOHAPU DHAKALUNGA OMAYELETUMBULO 26
Kala kokule ‘negoya’
it-2 ep. 729, okat. 6
Omvula
Omathimbo gomumvo. Omathimbo gaali ga tongomana gomEvi lyEuvaneko, othinge nokufu, oshi shi okuuviwa ko sho ga li ga talika ko ga fa ethimbo lyoshikukuta nosho wo lyomvula. (Yelekanitha Eps 32:4 32:4; Ondjimbo 2:11.) Omvula kaya li naanaa hayi loko okuza lwopokati komwedhi Apilili sigo olwopokati kaKotoba. Omvula oya li hayi kala ya pumba pethimbo ndyoka lyeteyo. Omayeletumbulo 26:1 otaga ulike kutya pethimbo ndyoka lyeteyo, omvula oya li ya talika ko yi li oshinima sha pumba. (Yelekanitha 1Sam 12:17-19.) Pethimbo lyomvula, omvula kaya li hayi loko olundji, egulu olya li ha li kala lya yela. Molwaashoka ethimbo ndika olyo wo lyuutalala, okwa li haku kala kwa talala unene ngele kwa lokwa. (Esra 10:9, 13) Onkee ano ehala lyegameno pethimbo ndyoka olya li oshinima shi shi okupandulwa. — Jes 4:6; 25:4; 32:2; Job 24:8.
w87-E 10/1 ep. 19, okat. 12
Egeelopudho ohali etitha ombili
12 Ohashi kala sha pumbiwa aantu yamwe ya katukilwe oonkatu ngaashi tashi popiwa mOmayeletumbulo 26:3 taku ti: “Ongola oyi lile po okakambe, oshitomo oshi lile po okasino, nolunwa okombunda yegoya.” Omathimbo gamwe Jehova okwa li a etha oshigwana she shaIsraeli shi adhike komaupyakadhi ngoka sha li shi iyetele shoshene. Ombiimbeli oya ti: “Oya tsu ondumbo nelombwelo lyaKalunga noya dhini omalongo gaGwokombandambanda. Oya longithwa iilonga iidhigu tayi ya thindile pevi, nokakwa li ku na omukwathi. Ihe muudhigu wawo oyi ithana Omuwa; oye nokwe ya hupitha mo methiminiko.” (Episalomi 107:11-13) Yamwe mboka omagoya ohaye shi mono oshidhigu okutaamba ko egeeloputudho. Ombiimbeli otayi ti: “Omuntu ngoka a geelwa e ta kukutike aluhe othingo ye, ota teywa po pwaa na ehungo lyasha.” — Omayeletumbulo 29:1.
it-2-E ep. 191, okat. 4
Oshilema, Uulema
Eyeletumbulo ndyoka lya longithwa. Omukwaniilwa omunandunge Salomo okwa a ti: “Ngoka ta tumu egoya, oti indimbula oompadhi dhe [shoka tashi mu ningitha oshilema], e ta kongo omupya.” Uushili owo kutya omuntu ngoka a kuta egoya miilonga ye, oti iyetele ye mwene. Oha kala lela e wete sho iilonga ye itaayi longwa nawa, naashoka ohashi mu uvitha nayi. — Omayel 26:6.
Omaliko gomOmbiimbeli
w23 09 ep. 19, okat. 18
Ulika kutya owu na omwenyo omwaanawa
18 Nonando otu uvithile nawa yalwe momukalo tagu ya tompo, haayehe haya kala ya hala okutaamba ko shoka tatu popi. Ihe okupopya momukalo tagu ulike kutya otu na oondunge dhokuyoolola nosho wo omwenyo omwaanawa, otaku vulu ku tu kwathela. (Lesha Aakolossa 4:6.) Okupopya nagumwe kombinga yaashoka twa itaala otaku vulu okuyelekanithwa noku mu umbila etanga. Otatu vulu oku li mu umbila nuukeka, nenge tu li mu umbile twa nana. Ngele otwe li mu umbile nuukeka ota vulu oku li hakela nuupu e tamu tsikile okudhana. Ngele otwa kala hatu popi nondjaalela notwa ngungumana, omuntu otashi vulika a kale e na ehalo lyoku tu pulakena nokutsikila noonkundathana. Ihe ngele omuntu okwa hala owala okutsa oompata natse, nenge okusheka eitaalo lyetu katu na okutsikila noonkundathana. (Omayel. 26:4) Haantu ayehe taye ki inyenga ngawo, ihe oyendji otaya ka pulakena.
18-24 AUGUSTE
OMALIKO OKUZA MOOHAPU DHAKALUNGA OMAYELETUMBULO 27
Nkene hatu mono uuwanawa mokukala tu na ookuume yashili
Jehova okwa lenga aapiya ye aaifupipiki
12 Omuntu ngoka e na eifupipiko, oha pandula omayele ngoka ta pewa. Natu shi thaneke ngeyi: Natu tye ando owu li pokugongala kwopaKriste. Konima sho wa popi nooitaali ooyakweni yamwe, gumwe okwe ku ithana po, e te ku lombwele kutya owu na sha momayego. Osha yela kutya oto ka kala wa sa ohoni. Ihe mbela ito ka kala wa pandula sho e ku lombwela? Odhoshili kutya otashi vulika wu tye ando gumwe okwe ku lombwelele nale. Sha faathana, otu na okukala tu na eifupipiko nokupandula omwiitaali omukwetu ngoka te tu pe omayele, uuna twe ga pumbwa. Omuntu ngoka otu na oku mu tala ko e li kuume ketu, ihe hamutondi gwetu. — Lesha Omayeletumbulo 27:5, 6; Gal. 4:16.
it-2-E ep. 491, okat. 3
Omushiinda nenge mukwetu
Omayeletumbulo otage tu ladhipike tu kale twa itaala notwa inekela kuume ketu nokukonga ekwatho kuye uuna tu li mompumbwe, sho taga ti: “Ino thiga po kuume koye nakuume kaho; mesiku lyomupya gwoye ino ya kaandjamumwanyoko. Omushiinda [sha·khenʹ] ngoka e li popepi nangoye oku vule omumwanyoko ngoka e li kokule.” (Omayel 27:10) Mpaka omunyoli okwa fa a li ta ti kutya kuume koye kopothingo okwa simana nowa pumbwa okukonga ekwatho kuye, pehala lyoku li konga komukwanezimo ngoka e li omumwanyoko ngele oku li kokule, molwashoka otashi vulika a kale inaa ilongekidha oku ku kwathela, nenge itaa vulu oku ku kwathela ngaashi kuume koye.
Aagundjuka, omwa hala onkalamwenyo ya tya ngiini?
7 Shimwe shoka tatu ilongo ketokolo lyaJoas ndyoka inaali dhiladhilwa nawa, osho kutya otwa pumbwa okuhogolola ookuume mboka ye hole Jehova noya hala oku mu nyanyudha, nookuume mbono otaye ke tu kwathela tu longe shoka oshiwanawa. Otatu vulu okupanga uukuume naamboka aakuluntu kutse nenge aashona kutse. Dhimbulukwa kutya Joas okwa li omushona moomvula kukuume ke, Jehoiada. Ngele tashi ya pookuume mboka to hogolola ipula to ti: ‘Mbela otaya kwathele ndje ngaa ndi koleke eitaalo lyandje muJehova? Otaya ladhipike ndje ngaa ndi kale handi vulika komithikampango dhaKalunga? Ohaya popi ngaa kombinga yaJehova nokombinga yoshili ndjoka ya ilonga mOmbiimbeli? Oya simaneka ngaa omithikampango dhaKalunga? Mbela ohaya lombwele ndje shoka tashi nywitha omakutsi, nenge ohaya pukulula ndje nopwaa na okukakadhala?’ (Omayel. 27:5, 6, 17) Uushili owo mbono kutya, ngele ookuume koye kaye hole Jehova, nena inaye ku opalela. Ihe ngele owu na ookuume mboka ye hole Jehova, otaya ka kala aluhe taye ku kwathele. — Omayel. 13:20.
Omaliko gomOmbiimbeli
Omanenedhiladhilo okuza membo lyOmayeletumbulo
27:21. Okusimanekwa otaku vulu okuulika kutya otu li ngiini. Eifupipiko ohali ulikwa ngele okusimanekwa otaku tu inyengitha tu zimine kutya otu na ongunga kuJehova notaku tu ladhipike tu tsikile oku mu longela. Ngele okusimanekwa otaku tu ningitha tu kale tu uvite tu vule yalwe, otashi ulike kutya inatu ifupipika.
25-31 AUGUSTE
OMALIKO OKUZA MOOHAPU DHAKALUNGA OMAYELETUMBULO 28
Eyooloko ndyoka li li pokati komukeenakalunga nomuyuuki
w93-E 5/15 ep. 26, okat. 2
Mbela owa landula ngaa Jehova?
Ombiimbeli otayi ti: “Aayuuki oye na uulaadhi ya fa onime ongundjuka.” (Omayeletumbulo 28:1) Ohaya ulike eitaalo, haya inekele Oohapu dhaKalunga ye na omukumo nohaya humu komeho mokulongela Jehova nuulaadhi, nonando oya kale ya taalela oshiponga.
it-2-E ep. 1139, okat. 3
Euvoko
Mboka taya pilamene Onzo. Omuntu ngoka ha yonene owina oha tameke okukala kee na ko nasha naKalunga, noihe mu kwatele mo momatokolo ngoka ta ningi nosho wo moompangela dhe. (Job 34:27) Omuntu a tya ngaaka, oha etha omutima gwe gu mu posipaleke mokuninga iinima iiwinayi noha kanitha oondunge. (Eps 36:1-4) Nonando oha ti kutya oha longele Kalunga okwa pititha komeho omataloko gaantu, pehala lyaashoka Kalunga a hala. (Jes 29:13, 14) Oha ningi omaipopilo noha tala ko eihumbato lye ndyoka ewinayi lya fa uudhano. (Omayel 10:23) Iha dhiladhila pandunge nokutompathana kwe ohaku kala kwa nika uugoya, sigo oosho ta kala e uvite kutya Kalunga ngoka ihaa monika ke wete iinima iiwinayi mbyoka ta ningi, sha fa kutya Kalunga ke na euvoko lyasha. (Eps 94:4-10; Jes 29:15, 16; Jer 10:21) Okupitila miilonga nomoonkatu dhe okwa fa ta ti kutya, “Kaku na Kalunga” (Eps 14:1-3) noihe mu kaleke nokuli momadhiladhilo. Molwaashoka iha wilikwa komakotampango gopakalunga, iha tala ko iinima pauyuuki, iha kala e uvite ko shoka sha kwatelwa mo noiha tala kutya shoka ta ningi osha kwatela mo shike, opo a ninge omatokolo ge li mondjila. — Omayel 28:5.
it-1-E ep. 1211, okat. 4
Uudhiginini
Itatu vulu okukakatela uudhiginini wetu koonkondo dhetu yene, ihe otatu vulu owala oku wu kaleka po omolweitaalo lyetu lya kola neinekelo muJehova nosho wo moonkondo dhe dhoku tu hupitha. (Eps 25:21) Kalunga okwa uvaneka kutya ota ka “kwatha” nota ka kala “epopilo” lyaamboka haya ende muuyuuki nenge tu tye aadhiginini. (Omayel 2:6-8; 10:29; Eps 41:12) Ohaya kala taya ipula unene nokukala ya hokiwa kuJehova, shoka hashi ya etele uuwanawa mokukalamwenyo kwawo nohashi ya kwathele ya adhe omalalakano gawo. (Eps 26:1-3; Omayel 11:5; 28:18) Nonando aayuuki otaya vulu okumona iihuna omolwompango yaakolokoshi notaya vulu okusa pamwe naakolokoshi, ngaashi Job a li e shi kuminwa, Jehova okwa ulika kutya oku shi omwenyo gwomuyuuki, nokwe tu shilipaleka kutya ethigululo lyomuyuuki otali tsikile, ota ka kala nonakuyiwa yi na ombili nota ka thigulula elago. (Job 9:20-22; Eps 37:18, 19, 37; 84:11; Omayel 28:10) Ngaashi moshinima shi na sha naJob, uudhiginini owo hawu ningitha omuntu a kale e na ongushu nokwa simanekwa, ihe hawuyamba we. (Omayel 19:1; 28:6) Oshi li uuthembahenda kaanona okukala ye na omuvali a tya ngaaka, nohaya kala ya nyanyukwa (Omayel 20:7) sho ye na oshiholelwa shahe sha dhengambanda, notaya tsikile okukaleka po edhina lye ewanawa nesimano ndyoka i ilongela.
Omaliko gomOmbiimbeli
Kala wa kotokela omamakelo
Oshike tatu vulu okuninga, opo tu tsikile okukondjitha omaunkundi ngoka itaatu vulu okusinda thiluthilu? Omokulandula omayele gaJesus ge na ko nasha nomamakelo sho a ti: “Tonateni.” Nokuli nuuna wu uvite kutya owa kola pambepo, tsikila okuyanda oonkalo ndhoka tadhi vulu oku ku fala memakelo. (1 Kor. 10:12) Tsikila okuninga iinima mbyoka ye ku kwathela nale wu kondjithe uunkundi woye. Omayeletumbulo 28:14 oga ti: “Omunelago oye ngoka ta kala aluhe [a tonata, NW].” — 2 Pet. 3:14.