Omapulo ga za kaaleshi

Egongalo lyopaKriste olya tala ko ngiini uufukedhi?

Oohapu dhaKalunga otadhi ti kutya uunkolwe nuufukedhi oyi li iikala mbyoka itaayi tsu kumwe nokulongela Kalunga. Onkee ano, egongalo lyopaKriste ohali tala ko omufukedhi ye mwenemwene ngaashi naanaa hali tala ko ngoka e na ondjigilile yokukolwa. Onkolwe nomufukedhi itaya vulu okukala megongalo lyopaKriste.

Omayeletumbulo 23:20, 21 (OB-1986) otaga ti: “Ino kala mokati kaanwi yomaviinu nokaamboka ya vuka okulya onyama. Oshoka onkolwi nomufukedhi otaa adhika koluhepo, nokwoogama oomposi otaku zalitha omuntu oonguwo dhiinyanyu.” Otatu lesha muDeuteronomium 21:20 (NW) kombinga ‘yomutangalali nomunashipotha,’ ngoka kohi yOmpango yaMoses i ilongela okudhipagwa. Pavelise ndjoka, omaukwatya gaali gomutangalali naangoka ini iyela ombedhi ogo kutya oku li “omufukedhi nonkolwi.” Osha yela kutya muIsrael shonale mboka ya hala okulongela Kalunga kaya li ye na okukala aafukedhi.

Ihe uufukedhi oshike, nOmanyolo gopaKriste gOshigreka otaga ti shike kombinga yoshinima shoka? Omufukedhi okwa fatululwa e li “omuntu ngoka e na iikala yokulya nokunwa nolwiho nosho wo nuufukulume.” Onkee ano, tango uufukedhi owa kwatela mo olwiho, nOohapu dhaKalunga otadhi tu lombwele kutya ‘aanalwiho’ oyo aantu mboka itaaya ka thigulula Uukwaniilwa waKalunga. (1 Aakorinto 6:9, 10; Aafilippi 3:18, 19; 1 Petrus 4:3) Kakele kaashono, sho omuyapostoli Paulus a londodha Aakriste yi iyageke okulonga “iilonga yonyama,” okwa tumbula “uunkolwi, iituthi yuusiku niikwawo ya fa mbika.” (Aagalati 5:19-21) Okulya sha pitilila olundji ohaku endele pamwe nuunkolwi niituthi yuusiku. Kakele kaashono, osha yela kutya uufukedhi owa kwatelwa muutumbulilo waPaulus sho a ti kutya “niikwawo ya fa mbika.” Ngaashi shi na ko nasha ‘niilonga yilwe yonyama,’ Omukriste ngoka a tseyika nawa kutya oku li omufukedhi noha tindi netangalalo okulundulula omikalo dhe dholwiho oku na okukondwa mo megongalo.—1 Aakorinto 5:11, 13.a

Nonando Oohapu dhaKalunga odha tala ko onkolwi ya faathana nomufukedhi, oshi li oshipu okudhimbulula onkolwi shi vulithe okudhimbulula omufukedhi. Shoka tashi ndhindhilikitha omuntu kutya onkolwi, olwindji ohashi kala shi iwetikile. Ihe okumona kutya omuntu okwa ninga omufukedhi ye mwenemwene oshidhigu noonkondo molwaashoka itashi vulu okumonika owala moku mu tala kombanda. Onkee ano aakuluntugongalo oye na okukala ya kotoka lela nokukala noondunge dhokuyoolola ngele taya ungaunga niikoya ya tya ngaaka.

Pashiholelwa, okwoondoka nayi otaku vulu okuulika kutya omuntu omufukedhi, ihe haaluhe shi li ngawo. Okukala wo ondoka nayi otashi vulu okukala she etithwa komukithi gwontumba. Otashi vulika okwoondoka nayi ku li oshinima shono omuntu e shi thigulula kaavali ye. Otu na wo oku shi kaleka momadhiladhilo kutya okwoondoka nayi oko onkalo yopalutu, omanga uufukedhi u li iikala yopamadhiladhilo. Okwoondoka nayi okwa fatululwa ku li “okukala wo ondoka sha pitilila,” ihe uufukedhi owo “okulya nokunwa sha pitilila.” Onkee ano, uufukedhi ihau ulikwa kuunene wolutu lwomuntu ihe okiikala ye yi na ko nasha niikulya. Omuntu otashi vulika e na olutu lu li nawa nenge nokuli omushona molutu ihe omufukedhi. Natango, shoka sha talika ko shi li oshiviha shi li nawa nenge omutungilo gwolutu omwaanawa, pomahala agehe hasho sha talika ko ngawo.

Oshike mbela shi li omandhindhiliko guufukedhi? Omufukedhi olundji ihi ipangele shi na ko nasha niikulya, nokuli ohi ihwele iikulya sigo ta kala kee uvite nando nawa nenge e ehame. Okwaaipangela kwe ohaku ulike kutya ke na ko nasha shili nondhino ndjoka te etele Jehova nosho wo edhina ewanawa lyoshigwana She. (1 Aakorinto 10:31) Mepingathano naashika, omuntu ngoka ha li sha pitilila omalupita ita ka talika ko owala ngeya kutya oku li ‘omunalwiho.’ (Aaefeso 5:5) Nonando ongaaka, pAagalati 6:1, Omukriste a tya ngaaka otashi vulika a pumbwa ekwatho. Paulus ota ti: “Aamwameme, omuntu ngele ta adhika a yono, nena one mboka yopambepo mu pukululeni nomwenyo omunenguni.”

Omolwashike mbela omayele gOmbimbeli ku yandwe okulya sha pitilila ga simana unene tuu monena? Omolwaashoka unene tuu shi na ko nasha nethimbo lyetu, Jesus okwa londodha a ti: “Itonateleni ihe, oomwenyo dheni dhaa vulithwe kiituthi nokuunkolwi nokoshimpwiyu shiipalutha, esiku [ndyoka] lyaaye mú akele ngomwigo.” (Lukas 21:34, 35) Okuhenuka okulya sha pitilila oku li omukalo gumwe gwa simana okuyanda onkalamwenyo ndjoka tayi etele uupambepo wetu oshiponga.

Okukala nondjele oku li uukwatya uuwanawa wopaKriste. (1 Timoteus 3:2, 11) Onkee ano, Jehova ota ka kwathela shili ayehe mboka ye na ehalo enene okutula miilonga omayele gOmbimbeli ge na ko nasha nokukala nondjele mokulya nomokunwa.—Aaheberi 4:16.

[Enyolo lyopevi]