Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
© 2025 Watch Tower Bible and Tract Society of Pennsylvania
3-9 NOVOMBA
OMALIKO OKUZA MOOHAPU DHAKALUNGA ONDJIMBOLELA 1–2
Ehokololo lyohole ihaayi hulu po
Mbela aanandjokana otaya vulu ngaa okukala ye holathane sigo aluhe?
9 Komusamane nomukulukadhi mboka haya longele Jehova nena, ondjokana kayi shi owala okondalaka nenge euvathanotsokumwe. Aaihokani mbaka oye holathane shili nohaya ulukilathana ohole. Ihe ohole ndjika oyoludhi luni? Mbela ohole yokwaaihola mwene ndjoka Ombiimbeli tayi tu longo tu kale tu hole nayo aantu ayehe? (1 Joh. 4:8) Mbela oondjoka hatu kala tu hole nayo aakwanezimo yetu? Nenge oondjoka hayi kala pokati kookuume yashili? (Joh. 11:3) Nenge pamwe oondjoka hayi kala pokati komulumentu nomukiintu? (Omayel. 5:15-20) Ohole ndjoka omusamane nomukulukadhi haya kala ye ninathane oya kwatela mo ayihe mbyoka. Iinima iiwanawa mbyoka hamu lombwelathana nohamu ningilathana otayi ulukile mukweni kutya owu mu hole, notayi mu kwathele amuhe mu kale mwa nyanyukwa mondjokana yeni. Osha pumbiwa lela mu kale hamu shi ningi, kutya nduno ohamu kala mwi ipyakidhila shi thike peni. Miilongo yimwe moka aantu haya kongelwa ookuume kopandjokana kaakwanezimo, aaihokani otashi vulika ya tseyathane owala esiku lyohango. Sho taya ende taya tseyathana naasho ohole yawo tayi koko, oya pumbwa okulombwelathana kutya oye holathane. Shika ohashi koleke ekwatathano lyawo nosho wo ondjokana yawo.
10 Ngele aanandjokana ohaya lombwelathana kutya oye holathane nohaye shi ulike, shika ohashi koleke wo ondjokana momukalo gulwe. Omukwaniilwa Salomo okwa li a lombwele okakadhona kutya ote ke ka pa “omagola goshingoli ge na oombandi dhoshisiliveli.” Okwa li e ka tanga ta ti, ko ‘okawanawalela ka fa omwedhi gwa toka, okashekesheke ka fa etango.’ (Ondjimb. 1:9-11; 6:10) Ihe okakadhona oka adhika nale ka mona po omuholike gwako ngoka ke hole shili. Oshike sha li she ka kwathele ka dhiginine ohole yako yokuhola omumati gwako, noshike she ka hekeleke pethimbo ya li ye lyaathane kokule? (Lesha Ondjimbolela 1:2, 3.) Okakadhona oka ti kutya oka dhimbulukwa oohapu ‘dhohole’ ndhoka omumati gwako e ka lombwelele. Kuko, ohole ye oya li “ontoye yi vule omaviinu” ngoka taga nyanyudha omuntu, nedhina lye olya li ewanawa ‘lya fa omugwayo gwa pimpilwa’ komutse. (Eps. 23:5; 104:15) Osha simana omusamane nomukulukadhi yu ulukilathane ohole aluhe, oshoka shika otashi ka kokeka ohole yawo yokuholathana. Nuuna taya dhimbulukwa omathimbo ngono yu ulukilathana ohole, ohole yawo otayi kala ya kola!
Omaliko gomOmbiimbeli
Mbela aanandjokana otaya vulu ngaa okukala ye holathane sigo aluhe?
11 Aakriste mboka taya kongo kuume kopandjokana otaya ilongo oshindji mOndjimbolela yaSalomo. Okakadhona kaka li nando ke hole Salomo. Oka lombwele nokuli aakadhona muJerusalem ka ti: “Inamu pendutha ohole nenge mu yi kudhile, manga inaayi shi yuulukwa.” (Ondjimb. 2:7; 3:5) Omolwashike ka tile ngawo? Omolwaashoka osha puka omuntu wu kale wu hole kehe omulumentu nenge kehe omukiintu wa mono. Nena otashi ka kala pandunge ngele Omukriste ngoka a hala okuhokana nenge okuhokanwa a tegelele sigo a mono omukiintu nenge omulumentu ngoka e hole shili.
10-16 NOVOMBA
OMALIKO OKUZA MOOHAPU DHAKALUNGA Ondjimbolela 3–5
Esimano lyeopalo lyomeni
Mbela aanandjokana otaya vulu ngaa okukala ye holathane sigo aluhe?
8 Oohapu ndhoka dha popiwa mokatewondjimbo haka itadhi popi owala uuwanawa wokoshipala. Tala kwaashoka omumati a ti kombinga yokupopya kwokakadhona ke. (Lesha Ondjimbolela 4:7, 11.) Okwa ti omilungu dhako ‘ohadhi ndonda omagadhi goonyushi. Omagadhi goonyushi nomahini oge li kohi yelaka lyako.’ Omolwashike a tile ngawo? Omolwaashoka kuye oohapu dhako odha li oombwanawa ngaashi omahini, noontoye ngaashi omagadhi goonyushi. Sho omumati a lombwele okakadhona kutya “ayihe oye ku opala; ino pumbwa sha,” ka li owala ta popi uuwanawa wako wokoshipala, ihe okwa li ta popi wo kombinga yuukwatya wako uuwanawa.
w00-E 11/1 ep. 11, okat. 17
Nkene Kalunga a tala ko uuyogoki wopamikalo
17 Omuntu omutitatu ngoka a kakatela uudhiginini we, okakadhona Okashulami. Oka li okagundjuka noke na ondjelo ombwanawa. Ka ka li owala ka fuula omusita gwiimuna, ihe nomukwaniilwa wo gwaIsraeli Salomo, ngoka a li omuyamba. Ehokololo ewanawa ndyoka li li mOndjimbolela olya ti kutya okakadhona Okashulami oka kala ka yogoka pamikalo, shoka she ka ningitha ka kale ka simanekwa kaantu yomomudhingoloko gwako. Nonando oka li ka tindi Salomo, Kalunga okwa li e mu nwethamo a nyole ehokololo lyako. Omusita gwiimuna ngoka ka li ke hole, naye okwa li a simaneka eihumbato lyako lya yogoka. Oshikando shimwe omusita gwiimuna okwa li a ti kutya okakadhona Okashulami oka li ka fa“oshikunino shokuvululukilwa.” (Ondjimbolela 4:12) MuIsraeli shonale, oshikunino oshiwanawa osha li hashi kala shi na omaludhi omahokithi giikwambonga, oongala dhezimba ewanawa nomiti omiwanawa. Oshikunino shoka osha li hashi tulwa molugumbo nenge mongandjo yekuma, nomwa li owala hamu vulu okuyiwa to pitile kosheelo hoka haku patwa. (Jesaja 5:5) Komusita gwiimuna, uuyogoki wopamikalo wokakadhona Okashulami owa li wa fa oshikunino shoka shi na uuwanawa wa pumba. Oka li ka yogoka thiluthilu. Omaiyuvo gako gopahole oka li owala ta ke ke ga ulukila ngoka ta ka ninga omusamane gwako, monakuyiwa.
g-E 04 12/22 ep. 9, okat. 2-5
Eopalo ndyoka lya simana unene
Mbela eopalo lyomuntu lyomeni ohali vulu ngaa okunana yalwe? Georgina ngoka a kala mondjokana uule woomvula omulongo lwaampono, okwa ti: “Omimvo adhihe ndhoka onda kala ndi na ekwatathano ewanawa nomusamane gwandje, molwashoka oku li omunashili. Oshinima shoka sha simanenena monkalamwenyo ye okusimaneka Kalunga. Shoka oshe mu kwathela a kale e na ko nasha nangame nokwa kala omunahole. Uuna ta ningi omatokolo oha kwatele ndje mo noha pandula ndje. Ondi shi kutya oku hole ndje lela.”
Daniel, ngoka a hokana mo 1987 okwa ti: “Omukulukadhi gwandje omwaanawa. Kandi hole owala eholokopo lye, ihe omaukwatya ge ogo haga ningitha ndje ndi kale ndi mu hole unene. Oha kala aluhe e na ko nasha nayalwe nokuya ningitha ya kale yu uvite nawa. Oku na omaukwatya omawanawa gopaKriste. Shika osha ningitha ndje ndi kale aluhe nda hala okukala naye.”
Muuyuni mbuka mu na aantu mboka haya gandja eitulomo keholokopo lyokombanda, otwa pumbwa lela okukala hatu gandja eitulomo keholokopo lyomeni. Otwa pumbwa okutseya kutya okukala tu na eholokopo ewanawa unene oshidhigu nenge nokuli itaashi wapa, noitashi tu etele uuwanawa washa. Nonando ongawo, otatu vulu okukokeka omaukwatya omawanawa, ngoka haga gwedha ko keopalo lyomeni. Ombiimbeli otayi ti: “Oshuuluko shomukiintu kashi shi kwiinekelwa nuumbweshukile ohau yonuka; omukulukadhi ngoka ha tila Omuwa, oku na okutangwa.” Mepingathano naashono, Ombiimbeli oya londodha ya ti: “Omukiintu omwaanawa moshipala ye kee na owino okwa fa okalinga koshingoli ke li keyulu lyoshingulu.” — Omayeletumbulo 11:22; 31:30.
Oohapu dhaKalunga odhe tu kwathela tu simaneke “eopalo itaali hulu po lyombepo yi na ombili noya ngungumana, olyo ndyoka li na oshilonga oshinene koshipala shaKalunga.” (1 Petrus 3:4) Odhoshili kutya eopalo ndyoka lyomeni olya simanenena li vule eopalo lyokombanda. Nakehe gumwe ota vulu oku kala e li na.
Omaliko gomOmbiimbeli
w06-E 11/15 ep. 18, okat. 4
Omanenedhiladhilo okuza membo lyOndjimbolela
2:7; 3:5 — Omolwashike “aafuko Aajerusalem” ya ganithwa “poomenye nopoompalala dhokomalundu”? Ngele to tala oomenye nuupundja sho tawu ende, owu na eholokopo ewanawa nota li hokitha. Onkee ano, okakadhona Okashulami oka li ka ganitha aakadhona yokombala pakankameno lyiinima iiwanawa noya opala, opo yaa pendule ohole yako.
17-23 NOVOMBA
OMALIKO OKUZA MOOHAPU DHAKALUNGA ONDJIMBOLELA 6-8
Kala wa yogoka pamikalo
Mbela aanandjokana otaya vulu ngaa okukala ye holathane sigo aluhe?
15 Lesha Ondjimbolela 4:12. Omolwashike omusita gwoonzi a ti kutya omuholike gwe “oshikunino shokuvululukilwa sha pateka”? Ngele oshikunino oshi na olugumbo otashi ti kutya hakehe gumwe ta vulu okuya mo. Ngoka ta yi mo oku na owala okupitila pomweelo hagu patwa. Okakadhona Okashulami osho wo ka li ka fa oshikunino shoka, oshoka oka li owala ke hole omumati ngoka a li te ke ka hokana, ano omusita gwoonzi. Oka li ka fa “ekuma,” ‘hamweelo’ ngoka gwe ekama owala, nomolwaashono inaaki iyethela momukwaniilwa. (Ondjimb. 8:8-10) Sha faathana, Aakriste aalumentu naakiintu mboka taya dhiladhila ya hokane, ohaya kala owala ye hole mboka taya ka ya nayo mondjokana, hamuntu gulwe.
16 Sho omusita gwoonzi a pula okakadhona Okashulami ya ye ye ke endaende pamwe, aamwayina yako aalumentu oye ka indike ko. Pehala lyaashono, aamwayina oye ka tumu ka ka langele iitsambe yomiviinu. Omolwashike? Mbela kaya li ye ka inekela? Mbela oya li taya dhiladhila kutya oka hala oku ka ninga sha shapuka? Aawe, oya li owala ya hala okugamena omumwayinakadhona, opo kaa falwe memakelo. (Ondjimb. 1:6; 2:10-15) Oshiholelwa shika otashi longo Aakriste mboka inaaya hokana nenge inaaya hokanwa kutya, uuna taya endelathana, naya kotoke ya kaleke ekwatathano lyawo lya yogoka. Inamu kala one amuke pehala mpoka kaapu na aantu. Nonando otamu vulu okuulukilathana ohole momukalo gwa yogoka, omu na okukotoka kaamu yone.
yp-E ep. 188, okat. 2
Etaloko li na ko nasha nomilalo manga inoo ya mondjokana
Okukala wa yogoka ohashi kwathele lela omugundjuka a yande iilanduliko yinikitha oluhodhi. Ombiimbeli otayi popi okakadhona Okashulami hoka kali ka yogoka pamikalo, nonando oka li ke hole omumati gwako. Oshizemo, shoka osha li she ka ningitha ka popye ta ka ti: “Ngame mwene ekuma, nomagundji gandje oga fa ooshungo.” Ka ka li ka fa ‘omweelo’ ngoka hagu ‘eguluka’ nuupu, uuna ta ka thiminikwa ka ye momilalo. Oka li ka thikama ka fa ekuma ndyoka ihaali vulu okulondwa ndyoka li li epopilongulu no li na ooshungo ndhoka ihaadhi vulu okuyiwa nuupu. Oki ilongela okwiithanwa “omushekesheke” noka li ka popi kombinga yaangoka ta ka ninga omusamane gwako, ka ti: “Momeho ge onda ningi nda fa ngoka te eta egwaneneno.” Ombili yako yopamadhiladhilo oya li ye ya ningitha ayehe yaali ya kale ya gwanenwa. — Ondjimbolela 6:9, 10; 8:9, 10.
yp2-E ep. 33
Oshiholelwa shokakadhona Okashulami
Okakadhona Okashulami oka li ke shi kutya oka pumbwa okukala ka yogoka, ngele tashi pokweendelathana. Oka lombwele ooyakwawo ka ti: “Ne aafuko Aajerusalem, otandi mu ganitha: Inamu pendutha ohole nenge mu yi kudhile, manga inaayi shi yuulukwa.” Okakadhona Okashulami oka li ke shi kutya omaiyuvo ohaga vulu okuningitha omuntu kaa dhiladhile pandunge. Pashiholelwa, oka li ka ndhindhilike kutya yalwe otaya vulu oku ka thiminika ka kale ke hole ngoka itee ka opalele. Omaiyuvo gako oga li wo taga vulu ge ka ningithe kaa ka ninge etokolo li li pandunge. Onkee okakadhona Okashulami oka kala ka fa “ekuma.” — Ondjimbolela 8:4, 10.
Mbela etaloko lyoye li na ko nasha nohole, ewanawa ngaa lya fa lyokakadhona Okashulami? Mbela ito vulu oku pulakena komadhiladhilo goye pehala lyomutima gwoye? (Omayeletumbulo 2:10, 11) Omathimbo gamwe, yamwe otashi vulika ya kambadhale oku ku thiminika wu konge kuume kopaihole, nonando ethimbo lyoye inaa li adha. Nangoye otashi vulika nokuli wi iyetele omathiminiko ngoka. Pashiholelwa, ngele owa mono omumati nomukadhona taya ende yi ikwata moonyala, mbela oho kala wu uvite wa halelela okukala nekwatathano lyopaihole lya tya ngaaka? Mbela oto ka kala ngaa wa hala okukala nomuntu ngoka kee shi gweitaalo lyoye? Okakadhona Okashulami oka li ka koka, ngele tashi ya piinima yopaihole. Nangoye oto vulu oku kala ngaaka.
Omaliko gomOmbiimbeli
Mbela aanandjokana otaya vulu ngaa okukala ye holathane sigo aluhe?
3 Lesha Ondjimbolela 8:6. Ohole otayi popiwa kutya oyo “oohandje dhOmuwa.” Omolwashike mbela? Omolwashoka ohole oyo uukwatya dhingi waJehova. Ye Jehova okwe tu shita oshifetha she notatu vulu okuholela ohole ye. (Gen. 1:26, 27) Sho Kalunga e eta omukiintu gwotango, Eva, kuAdam, Adam okwa li a nyanyukwa shili e ta popi nokuli nkene a li u uvitile omukiintu gwe. Eva “okwa kuthwa momulumentu,” nomolwaashono a li a hokwa omulumentu gwe Adam. (Gen. 2:21-23) Shaashi Jehova okwa shita aantu momukalo moka taya vulu okuulika ohole, omulumentu nomukiintu otaya vulu okuulukilathana aluhe ohole yashili ndjoka ihaayi hulu.
24-30 NOVOMBA
OMALIKO OKUZA MOOHAPU DHAKALUNGA JESAJA 1–2
Etegameno lyaamboka ya “yona nayi”
ip-1-E ep. 14, okat. 8
Omusamane omuvali noyanamati aanashipotha
8 Jesaja okwa tsikile ko netumwalaka lye ta lombwele oshigwana shaJuda ta ti: “Yaye ngoye, oshigwana shuulunde, ne aantu mwa yona nayi, oluvalo lwaakolokoshi, aana yaatangalali! Omwi iteka Omuwa, omwa sheke Kalunga kalsrael omuyapuki nomwe mu pilamene.” (Jesaja 1:4) Iilonga iiwinayi ohayi vulu okundumbala nohayi vulu okukala lela iidhigu. Pethimbo lyaAbraham, Jehova okwa li a popi kombinga yuulunde waSodom naGomorra kutya “owa lunda pombanda.” (Genesis 18:20) Oshinima sha faathana osha li shi li moshigwana shaJuda, nomolwaashono Jesaja a li a e shi popi kutya osha “yona nayi.” Shimwe ishewe, okwe shi ithana a ti kutya ‘oluvalo lwaakolokoshi naana yaatangalali.’ Odhoshili kutya Aajuda oya li ya fa aanona mboka ihaaya vulika. Oya li ye “mu pilamene.”
Jehova okwa hala aantu ayehe ya itedhulule
6 Jehova okwa li a longitha aahunganeki ye lwiikando, ya londodhe nokupukulula oshigwana she. Pashiholelwa, Kalunga okwa li a popi okupitila muJeremia a ti: “Israel ngoka wi iteka ndje, galukila kungame. Ngame omunamutimahenda noihandi geye osima. Itandi ku geele we sigo aluhe. Zimina owala kutya ngoye omunandjo, nowa tsu ondumbo nOmuwa, Kalunga koye.” (Jer. 3:12, 13) Okupitila muJoel, Jehova okwa ti: ‘Galukileni kungame.’ (Joel 2:12, 13) Okwa longitha Jesaja a nyole ta ti: “Iyogeni, mu yele. Etheni uuwinayi mbuka ndi wete tamu u ningi. Eeno, etheni okulonga iihuna.” (Jes. 1:16-19) Okupitila muHesekiel, Jehova okwa li a pula a ti: “Ondi nyanyukilwe ando eso lyomukeenakalunga? . . . Aawe, ihe onda hala, i itedhulule, opo a kale e na omwenyo. Ngame itandi nyanyukilwa eso lyomuntu. Itedhululeni, opo mu kale mu na omwenyo.” (Hes. 18:23, 32) Ohashi nyanyudha Jehova uuna e wete aantu taya itedhulula, molwaashoka okwa hala ya kale ye na omwenyo sigo aluhe. Onkene Jehova iha tegelele aayoni ya lundulule iikala yawo, opo e ya kwathele? Natu ka taleni kiiholelwa yimwe po kombinga yaashoka.
Omaliko gomOmbiimbeli
ip-1-E ep. 39, okat. 9
Egumbo lyaJehova olya yeluka po
9 Odhoshili kutya kunena oshigwana shaJehova ihashi gongalele kondundu yo yeneyene, ndjoka yi na otempeli ya tungwa nomamanya. Otempeli yaJehova ndjoka ya li muJerusalem oya li ya hanagulwa po ketangakwiita lyaRoma mo 70 E.N. Shimwe ishewe, omuyapostoli Paulus okwa li e shi yelitha kutya otempeli ndjoka ya li muJerusalem nosho wo etsalihangano ndyoka lye li tetekele oya li omuzizimba. Ayihe oya li tayi thaneke oshinima oshinene shopambepo, ano ‘otempeli yashili ndjoka ya tungwa kOmuwa, hakomuntu.’ (Aahebeli 8:2) Otempeli ndjoka yopambepo oyi li elongekidho lyokulongela Jehova pakankameno lyekuliloyambo lyaJesus Kristus. (Aahebeli 9:2-10, 23) Metsokumwe naashoka, “ondundu hoka kwa tungilwa otempeli” ndjoka ya popiwa muJesaja 2:2, otayi thaneke elongelokalunga lya yogoka lyaJehova, lyopethimbo lyetu. Mboka ye li melongelokalunga lya yogoka ayehe ihaya gongalele mehala limwe opo ya longele Kalunga, ihe ohaye mu longele ya hangana shaampoka ye li.
1-7 DESEMBA
OMALIKO OKUZA MOOHAPU DHAKALUNGA JESAJA 3–5
Jehova okwa tegelela aapiya ye ya kale haya vulika kuye
ip-1-E ep. 73-74, okat. 3-5
Yayee! oshitsambe shomiviinu shoka kaashi shi oshidhiginini
3 Kutya nduno Jesaja okwa imbile aapulakeni ye eyele ndika nenge hasho, osha yela kutya olya li lye ya ningitha ya gandje eitulomo. Oyendji yomuyo otashi vulika ya li ye shi iilonga yokutsika oshitsambe shomuviinu, neyelitho lyaJesaja olya li lya yela noli shi oku uviwa ko. Ngaashi aalongi yomiviinu yokunena, mwene gwoshitsambe iha kunu oombuto dhomandjembele, ihe oha tete okatayi nenge oshitutuma komuviinu omukwawo e te shi tsike. Onkee osha uka sho ha tsike oshitsambe shomuviinu shoka ‘koshikulundundu mevi lyo ondoka,’ hoka iimeno hayi vulu okukokela nawa.
4 Opo oshitsambe shomuviinu shi vule okutula ko, ohashi pula okulonga nuudhiginini. Jesaja okwa popi mwene gwasho a ti: “Okwe shi papula e ta fulu mo omamanya.” Mbyoka oya li lela iilonga yi lolodha! Otashi vulika a li a longitha omamanya omanene e shi “tungile oshungo.” Pethimbo lyonale, ooshungo ndhoka odha li hadhi longithwa kaalangeli mboka ya li haya tonatele iikunomwa, opo kaayi yakwe po kaafuthi nosho wo nokaayi like po kiinamwenyo. Shimwe ishewe, okwa li e shi tungile enkolo nomamanya, opo a tsike iitsambe yomiviinu momikweyo dha ukilila. (Jesaja 5:5) Shika olundji osha li hashi ningwa, opo evi kaali kungululwe po.
5 Mwene gwasho oha longo nuudhiginini, opo a gamene oshitsambe she shomuviinu, noha kala e na etegameno kutya otashi ka ima iiyimati. Molwashoka oha kala e na etegameno ndyoka, oha hongo oshikolelo. Ihe mbela okwa li ngaa ta ka teya shili? Hasho nando, oshoka oshitsambe shomuviinu osha imi omandjembele omalulu.
ip-1-E ep. 76, okat. 8-9
Yayee! oshitsambe shomiviinu shoka kaashi shi oshidhiginini
8 Jesaja okwa ti kutya Jehova, mwene goshitsambe shomiviinu, ‘omuholike gwe.’ (Jesaja 5:1) Jesaja okwa li owala a vulu okupopya kombinga yaKalunga momukalo gwa tya ngaaka, oshoka okwa li e na ekwatathano lyopothingo naYe. (Yelekanitha Job 29:4; Episalomi 25:14.) Nonando ongawo, ohole ndjoka omuhunganeki a li e hole nayo Kalunga, oyi vulike kwaandjoka Kalunga a li a ulukile ‘oshitsambe she shomuviinu,’ ano oshigwana shoka a ‘tsika.’ — Yelekanitha Eksodus 15:17; Episalomi 80:8, 9.
9 Jehova okwa “tsike” oshigwana she mevi lyaKaanana nokwa li e shi pe oompango nomauthompango, ngoka ga li ga fa ekuma ndyoka tali ke shi gamena komanwethomo giigwana yilwe. (Eksodus 19:5, 6; Episalomi 147:19, 20; Aaefeso 2:14) Shimwe ishewe, Jehova okwa li e ya pe aatokolihapu, aayambi nosho wo aahunganeki, opo ye ya longe. (2 Aakwaniilwa 17:13; Maleaki 2:7; Iilonga 13:20) Sho Aaisraeli ya li ya ningilwa omatilitho komatangakwiita omanankondo, Jehova okwa li e ya tumine mboka taye ke ya hupitha. (Aahebeli 11:32, 33) Nomolwashoka Jehova a li a pula a ti: “Oshitsambe shandje ondi na oku shi ningila shike natango?”
w06-E 6/15 ep. 18, okat. 1
“Ila, u hupithe aantu yoye”
Jesaja okwa faathanitha “oshigwana shaIsraeli” noshitsambe shoka mokweendela ko kwethimbo shi imi omandjembele “omalulu.” (Jesaja 5:2, 7) Omandjembele omalulu nenge gomiihwa ohaga kala omashona okuyelekanitha naangoka ga za mevi lya longwa nawa, noihaga kala omawanawa, noonkenya dhago odho hadhi kala oonene dhi vule oontumba. Omandjembele omalulu nenge gomiihwa ihaga longithwa okuninga omaviinu noihaga liwa. Onkee otashi opalele sho ga popiwa taga thaneke uushunimonima woshigwana shaIsraeli, shoka sha li hashi teya oompango, pehala lyokulonga uuyuuki. Sho oshitsambe shomuviinu inaashi ima iiyimati iiwanawa, ombedhi itayi pewa Mwene gwasho. Jehova okwa li a ninga ngaashi ta vulu a kwathele oshigwana she, shi imike iiyimati. Okwa pula a ti: “Oshitsambe shandje ondi na oku shi ningila shike natango?” — Jesaja 5:4.
w06-E 6/15 ep. 18, okat. 2
“Ila, u hupithe aantu yoye”
Molwaashoka oshigwana shaIsraeli, shoka shi li onga omuviinu, kasha li shi imike iiyimati iiwanawa, Jehova okwe shi londodha kutya ota ka kumuna po ekuma ndyoka lya li lye shi gamena. Ita ka thona omuviinu gwasho gwopathaneko nenge a helele evi lyago. Omvula yontemuna ndjoka hayi kokeke nawa iimeno itayi ka loka, naapuhe otapu ka mena oondjoho nomano. — Jesaja 5:5, 6.
Omaliko gomOmbiimbeli
Yanda okweenda momilema, tsikila okweenda muuyelele
10 Uuyuni waSatana ohawu kambadhala oku tu pukitha, opo tu itaale kutya shoka Jehova a tala ko sha nyata, nenge inaashi yogoka, inashi puka. (2 Pet. 2:19) Shoka itashi tu kumitha. Omukalo gumwe Ondiyapoli ya kala nokulongitha, ogwo okungwangwaneka aantu, kaaya kale ye shi shoka shi li mondjila naashoka sha puka. (Jes. 5:20; 2 Kor. 4:4) Onkee itashi kumitha sho oomuvi odhindji naashoka hashi ulikwa kotiivii nosho wo komapandja gopaintaneta, hashi humitha komeho omadhiladhilo ngoka ge li ompinge nomithikampango dhaKalunga dhi li pauyuuki. Satana okwa hala tu dhiladhile kutya okuninga iinima ya nyata inaku taambiwa ko owala, ihe ohaku nyanyudha wo noinaku nika oshiponga. — Lesha Aaefeso 5:6.
8-14 DESEMBA
OMALIKO OKUZA MOOHAPU DHAKALUNGA Jesaja 6–8
“Otandi yi! Tuma ndje!”
Ombepo yoye yokwiiyamba nayi hambelelithe Jehova!
5 Jehova okwa li a hiya omuhunganeki Jesaja a popye peha Lye, opo u ulike kutya okwa hala aantu aadhiginini ya kuthe ombinga miilonga yokugwanitha po elalakano Lye. (Jes. 6:8-10) Jesaja okwa taamba ko ehiyo ndyoka nehalo ewanawa. Kunena, aantu omayovi otayu ulike ombepo ndjoka yokutya “otandi yi! Tuma ndje!” mokutaamba ko iinakugwanithwa iidhigu miilonga yaJehova. Natango, otashi vulika gumwe i ipule ta ti: ‘Mbela oonkambadhala dhandje odhi na ngaa oshilonga? Nonando Jehova okwa pitika ndje ndi iyambe nondi kuthe ombinga miilonga ye, mbela ita ka gandja ashihe shoka sha pumbiwa a gwanithe po elalakano lye kutya nduno ondi longe shi thike peni miilonga ye?’ Iiningwanima mbyoka ya li ya ningwa pethimbo lyaDebora naBarak, otayi tu kwathele tu yamukule omapulo ngoka.
ip-1-E ep. 95, okat. 15-16
Jehova Kalunga oku li motempeli ye ondjapuki
15 Jehova okwa lombwele Jesaja paufupi shoka e na oku ka popya nosho wo nkene aantu taya ka inyenga, sho a ti: “Osho ngaaka a lombwele ndje ndi ye ko ndi ka lombwele aantu elaka tali ti: ‘Okuuva ohamu uvu [iikando niikando, NW], ihe kamu uvite ko. Okumona ohamu mono [iikando niikando, NW], ihe kamu wete ko. Kukutika oomwenyo dhaantu yoshigwana shika, thitika omakutsi gawo, thithikilitha omeho gawo, opo yaa mone ko yo yaa uve ko. Ngele otaa uvu ko notaa galukile kungame, otaa aludhwa.’” (Jesaja 6:9, 10) Mbela shika osha li sha hala kutya Jesaja ota ka kala kee na ondjaalela, ta ka shunitha ko Aajuda, nokuya ningitha ya tamanane naJehova? Hasho nando. Mbaka aantu yoshigwana she nokwa li e ya shi noku ya uvite ko. Ihe oohapu dhaJehova otadhi ulike nkene aantu mboka ya li taya ka inyenga ketumwalaka lye, kashi na nduno mbudhi kutya Jesaja ota gwanitha po oshilonga she nuudhiginini shi thike peni.
16 Aantu oyo ya li ye na uupyakadhi. Jesaja okwa li a popi nayo “iikando niikando,” ihe kaya li ya taamba ko etumwalaka lye nenge ye li uve ko. Oyendji oya li taya ka kala aatangalali noya kukutika oomwenyo dhawo, ya fa owala ihaaya mono ko noyi haya uvu ko. Sho a kala ta shuna ko kuyo lwiikando, Jesaja okwa li a etha ‘oshigwana shika’ shi ulike kutya inashi hala okuuva ko. Oya li taya ka ulika kutya itaya ka pulakena ketumwalaka lyaJesaja, ano etumwalaka lyaKalunga. Shika osha faathana naantu yopethimbo lyetu kunena. Aantu oyendji kunena ohaya tindi okupulakena kOombangi dhaJehova, sho tadhi uvitha kombinga yonkundana ombwanawa yUukwaniilwa waKalunga.
ip-1-E ep. 99, okat. 23
Jehova Kalunga oku li motempeli ye ondjapuki
23 Sho Jesus a totha membo lyaJesaja, okwa ulika kutya ehunganeko ndyoka olya li tali ka gwanithwa pethimbo lye. Aantu ayehe oya li ye na iikala ya fa yAajuda mboka ya li ko pethimbo lyaJesaja. Kaya li ya hala okupulakena ketumwalaka lye, naashoka osha li sha fala mehanagulo. (Mateus 23:35-38; 24:1, 2) Shika osha li sha ningwa pethimbo sho etangakwiita lyaRoma ndyoka lya li kohi yewiliko lyondjayi Titus, lya ponokele Jerusalem mo 70 E.N., nokuhanagula po oshilando notempeli yasho. Nonando ongawo, yamwe oya li ya pulakene kuJesus noya li ya ningi aalongwa ye. Jesus okwa popi kutya aantu mboka oya ‘nyanyukwa.’ (Mateus 13:16-23, 51) Okwa li e ya lombwele kutya ‘uuna ya mono Jerusalem sha kondekwa ketangakwiita lya yunga ontanda, naya tameke okuya ontuku koondundu.’ (Lukas 21:20-22) Kungawo, “ombuto ondjapuki” ndjoka ya li yi na eitaalo tali longo, noya ninga oshigwana shopambepo, ano “Israeli shaKalunga” oya li ya hupithwa. — Aagalati 6:16.
Omaliko gomOmbiimbeli
Ooitaali mboka opo mwa yi mondjokana, kaleni mwa pititha komeho okulongela Jehova
9 Omuhunganeki Jesaja nomukulukadhi gwe oya li ya pititha komeho okulongela Jehova. Jesaja okwa li omuhunganeki, notashi vulika omukulukadhi gwe naye a li ha hunganeke, oshoka okwa li hi ithanwa ‘omuprofeti omukiintu.’ (OB-1954) (Jes. 8:1-4) Ye li aaihokani, Jesaja nomukadhi oya li ya pititha komeho okulongela Jehova. Oye li oshiholelwa oshiwanawa kaaihokani kunena!
10 Aaihokani kunena otaya vulu okupititha komeho okulongela Jehova, mokuninga ashihe shoka taya vulu miilonga ye. Otaya vulu okukoleka einekelo lyawo muJehova, mokukonakona pamwe omahunganeko gomoMbiimbeli nokumona nkene aluhe haga gwanithwa. (Tit. 1:2) Otaya vulu wo okwiipula kombinga yonkandangala ndjoka taya vulu okudhana mokugwanithwa po kwomahunganeko gamwe gomoMbiimbeli. Pashiholelwa, otaya vulu okudhana onkandangala mokugwanithwa po kwehunganeko lyaJesus kombinga yonkundana ombwanawa ndjoka yi na okuuvithilwa iigwana ayihe manga ehulilo inaali ya. (Mat. 24:14) Ngele aaihokani oya kala ya tompwa kutya omahunganeko gomoMbiimbeli otaga gwanithwa, otaya ka kala ya tokola toko ya ninge ashihe shoka taya vulu miilonga yaJehova.
15-21 DESEMBA
OMALIKO OKUZA MOOHAPU DHAKALUNGA JESAJA 9–10
“Uuyelele owindji” mboka wa hunganekwa
ip-1-E ep. 125-126, okat. 16-17
Euvaneko lyOmuwa gwombili
16 ‘Onakuyiwa’ ndjoka ya hunganekwa kuJesaja, oya li tayi popi kombinga yethimbo lyuukalele waKristus kombanda yevi. Jesus sho a li kombanda yevi okwa li unene a kala ethimbo muGalilea. Okwa li a tamekele uukalele we moshitopolwa shaGalilea nokwa li a tameke okutseyitha ta ti: “Uukwaniilwa womegulu owa hedha popepi.” (Mateus 4:17) MuGalilea omo a li a popile Euvitho lye lyOkondundu ndyoka lya tseyika nawa apuhe, a hogololele aayapostoli ye, a longele oshikumithalonga she shotango, nomo a li a ihololele aalanduli ye yamwe ye li 500, konima yeyumuko lye. (Mateus 5:1–7:27; 28:16-20; Markus 3:13, 14; Johannes 2:8-11; 1 Aakorinto 15:6) Kungawo, Jesus okwa li a gwanitha po ehunganeko lyaJesaja sho a gandja esimano ‘mevi lyomazimo gaSebulon nogaNaftali.’ Odhoshili kutya Jesus ka li owala a uvithile aantu yomuGalilea. Sho a li a uvitha onkundana ombwanawa moshilongo ashihe, Jesus okwa li ta ka ‘eta esimano’ moshigwana ashihe shaIsraeli, mwa kwatelwa noshaJuda.
17 Ihe ongiini kombinga “uuyelele owindji” mboka Mateus a popi tawu ka kala muGalilea? Oohapu ndhika nadho odha li dha tothwa membo lyaJesaja. Jesaja okwa nyola a ti: “Oshigwana she ende momilema, otashi mono uuyelele owindji. Oomboka ya kala momilema thokothoko, uuyelele otau ya minikile.” (Jesaja 9:2) Okuza methelemumvo lyotango, uuyelele woshili owa kala wa holekwa kaapagani aaniifundja. Aawiliki yomalongelokalunga gOshijuda oya li ya eta po uupyakadhi sho ya kala ya kakatela koonkuluhedhi dhelongelokalunga lyawo, shoka she ya ningitha ya ‘kuthe oohapu dhaKalunga oonkondo.’ (Mateus 15:6) Mboka aaifupipiki oya li ya thiminikwa noya li ya ngwangwanekwa ya landule “aakwatiketi aaposi.” (Mateus 23:2-4, 16) Sho Jesus ngoka e li Mesiasa a holoka, omeho goyendji mboka aaifupipiki oga li ga tonata momukalo omukumithi. (Johannes 1:9, 12) Iilonga yaJesus sho a li kombanda yevi nosho wo omalaleko nuuyamba ngoka ga etithwa keyambo lye, oga hololwa mehunganeko lyaJesaja ge li “uuyelele owundji.” — Johannes 8:12.
ip-1-E ep. 126-128, okat. 18-19
Euvaneko lyOmuwa gwombili
18 Mboka ya taamba ko uuyelele oye na etompelo lyokukala ya nyanyukwa. Jesaja okwa tsikile ko a ti: “Aantu oto ya shambudha noonkondo, Omuwa, oto ya pe enyanyu enene. Otaa nyanyukilwa koshipala shoye, ngaashi aantu haa nyanyukwa, uuna taa teya iilya nenge taa topola oshihakanwa.” (Jesaja 9:3) Oshizemo, iilonga yaJesus yokuuvitha pamwe naalanduli ye, oya li ya ningitha aanamitima omiwanawa ya ulike kutya oya halelela okulongela Jehova mombepo nomoshili. (Johannes 4:24) Meni lyomimvo ne, aantu oyendji oya li ya ningi Aakriste. Aantu omayovi gatatu oya li ya ninginithwa mesiku lyaPentekoste 33 E.N. Konima yaashoka, ‘omwaalu gwaalumentu mboka ya itaale, ogwa adha pomayovi gatano lwaampono.’ (Iilonga 2:41; 4:4) Sho aalongwa ye ya longo nuulaadhi nokudhiladhila muule kuuyelele mboka ‘omwaalu gwaalongwa ogwa kala nokwiindjipala noonkondo muJerusalem, nongundu onene yaayambi oya ningi ooitaali.’ — Iilonga 6:7.
19 Ngaashi owala mboka haya kala ya nyanyukwa uuna ya teya oshindji nenge mboka haya kala ya nyanyukwa ngele ya topola iihakanwa uuna etangakwiita enene lya sindana, aalanduli yaJesus nayo ohaya kala ya nyanyukwa, ngele omwaalu gwaauvithi tagu ende tagu indjipala. (Iilonga 2:46, 47) Mokweendela ko kwethimbo, Jehova okwa li a ningitha uuyelele wu yele mokati kiigwana. (Iilonga 14:27) Onkee aantu yomihoko adhihe oya li ya nyanyukwa, omolwompito ndjoka ya egululilwa yokulongela Jehova. — Iilonga 13:48.
ip-1-E ep. 128-129, okat. 20-21
Euvaneko lyOmuwa gwombili
20 Iizemo yiilonga yaMesiasa otayi kalelele, naashoka otu shi iwetele moohapu dhaJesaja tadhi landula sho a ti: “Ondjoko yawo ndjoka ya li ye yi uvitile uudhigu, nowa tokola ongola ndjoka ye ya dhenge komapepe. Omuwa, owa dhenge iigwana mbyoka ya hepeke aantu yoye, naanaa ngaashi wa dhengele Aamidiana nale ndjiyaka.” (Jesaja 9:4) Omimvo omathele manga Jesaja inaa valwa, Aamidiana nAamoab oya li ya hangene Aaisraeli, opo ya ningithe ya yone. (Numeri 25:1-9, 14-18; 31:15, 16) Lwanima, Aamidiana oya li ya tilitha Aaisraeli, moku ya yuga omikunda dhawo noofaalama, uule womimvo heyali. (Aatokolihapu 6:1-6) Ihe Jehova okwa li a longitha omupiya gwe Gideon, nokwa li a sindi etangakwiita lyAamidiana. Okuza tuu pethimbo ndyoka a dhengele “Aamidiana,” kapu na uumbangi tawu ulike kutya oshigwana shaJehova osha ka monithwa ishewe iihuna kAamidiana. (Aatokolihapu 6:7-16; 8:28) Monakuyiwa yi li popepi, Jesus Kristus e li onga Gideon omunene, ota ka hupitha oshigwana shaJehova kaatondi yasho yokunena. (Ehololo 17:14; 19:11-21) Okuza mpoka, ‘ngaashi Aamidiana ya dhengelwe’ oshigwana shaJehova otashi ka sindana thiluthilu, ano esindano lyaaluhe, hakoonkondo dhasho shene, ihe okoonkondo dhaJehova. (Aatokolihapu 7:2-22) Oshigwana shaKalunga itashi ka mona we iihuna omolwomathiminiko.
21 Uuna Kalunga a yamo olunyala miita hasho hashi ningitha iita yi kale ya simana. Jesus omuyumudhwa oye Omuwa gwOmbili nota ka hanagula po aatondi ye, nokungawo ota ka eta ombili yaaluhe. Jesaja okwa popi wo kombinga yiinima mbyoka hayi longithwa kaakwiita kutya otayi ka fikwa po thiluthilu nomulilo, sho a ti: “Oongaku dhaahomoni noonguwo dhawo dha yaywa mombinzi otadhi fikwa po.” (Jesaja 9:5) Uumbanda mboka hatu kala tu na, uuna tu uvite oongaku dhaakwiita sho taya ende yu uka kolugodhi, itatu ka kala we tu wu na. Omizalo dhaakwiita ndhoka hadhi kala dhi na ombinzi itadhi ka monika we. Iita itayi ka kala po we! — Episalomi 46:9.
Omaliko gomOmbiimbeli
Tsikila okukala wa pandula ekuliloyambo
SHO Adam ngoka a li omulumentu a gwanenena a yono, kungawo ye nosho wo oyana mboka a li ta ka mona oya kanitha uuthembahenda wokukala nomwenyo sigo aluhe. Adam ka li ta vulu okwiipopila omolwoshinima shoka a ningi. Okwa li a yonene owina. Ihe ongiini kombinga yoyana? Yo inaya kutha ombinga mokuyona kwaAdam. (Rom. 5:12, 14) Mbela opwa li ngaa tapu vulu okuningwa sha ya hupithwe meso ndyoka hekulululwa i ilongela? Eeno! Nziya konima sho Adam a yono, Jehova okwa tameke okutula po elongekidho lyankene ta ka hupitha oyana yaAdam muulunde neso. (Gen. 3:15) Peuthwathimbo lye, Jehova okwa li ta ka tuma Omwana okuza megulu ‘a gandje omwenyo gwe, a hupithe oyendji.’ — Mark. 10:45; Joh. 6:51.
2 Ekulilo oshike? MOmanyolo gopaKriste gOshigreka, ekulilo olyo ofuto ndjoka Jesus a gandja, opo a futile po shoka sha kanithwa kuAdam. (1 Kor. 15:22) Omolwashike twa li twa pumbwa ekulilo? Otwa li twe li pumbwa, molwaashoka omithikampango dhaJehova dhi na ko nasha nuuyuuki mOmpango ye otadhi ti kutya omwenyo ogu na okufutwa nomwenyo. (Eks. 21:23, 24) Adam ka li we a gwanenena. Omolwuuyuuki waKalunga, Jesus okwa yamba po omwenyo gwe gwa gwanenena. (Rom. 5:17) Kungawo Jesus okwa ningi “He yomuukwaaluhe” yaayehe mboka ye na eitaalo mekuliloyambo. — Jes. 9:6; Rom. 3:23, 24.
22-28 DESEMBA
OMALIKO OKUZA MOOHAPU DHAKALUNGA JESAJA 11–13
Mesiasa okwa li ta ka kala a tya ngiini?
ip-1-E ep. 159, okat. 4-5
Ehupitho nenyanyu kohi yelelo lyaMesiasa
4 Omimvo omathele manga Jesaja inaa valwa, aanyoli yamwe yomanyolo gOshihebeli oya li ya popi kombinga yokuya kwa Mesiasa, omuleli gwashili ngoka Jehova a li ta ka tuma kuIsraeli. (Genesis 49:10; Deuteronomium 18:18; Episalomi 118:22, 26) Jehova okwa li a popi uuyelele wa gwedhwa po okupitila muJesaja, sho a nyola a ti: “Oshitutuma otashi tsapuka moshithindi shalsai; noshitayi omomidhi dhasho e tashi imi iiyimati.” (Jesaja 11:1; yelekanitha Episalomi 132:11.) “Oshitutuma” “noshitayi” ayihe otayi ulike kutya Mesiasa okwa li ta ka za moluvalo lwaIsai, he yaDavid, ngoka a li a gwayekwa nomagadhi a ninge omukwaniilwa gwaIsraeli. (1 Samuel 16:13; Jeremia 23:5; Ehololo 22:16) Sho Mesiasa gwoshili a thiki, ‘oshitayi’ shika shomegumbo lyaDavid osha li tashi ka ima oshiyimati oshiwanawa.
5 Mesiasa ngoka a uvanekwa oJesus. Omunyoli gwEvaangeli lyaMateus okwa ukitha koohapu ndhoka dhi li muJesaja 11:1 sho a ti kutya Jesus sho a ithanwa “Omunasareti” osha li sha gwanitha po oohapu dhaahunganeki. Molwaashoka Jesus okwa putukila muNasaret okwa li a ithanwa Omunasareti, edhina ndyoka lya pambathana noshitya shOshihebeli shoka sha longithwa muJesaja 11:1, ano ‘oshitayi’ nenge ‘oshitutuma’. — Mateus 2:23, enyolo lyopevi; Lukas 2:39, 40.
ip-1-E ep. 159, okat. 6
Ehupitho nenyanyu kohi yelelo lyaMesiasa
6 Mesiasa ota ka kala omuleli a tya ngiini? Mbela ota ka kala omukwanyanya noha tuwalala a fa Aayassur mboka ya li ya hanagula po omazimo omulongo guukwaniilwa wokuumbugantu waIsraeli? Hasho nando. Jesaja okwa popi kombinga yaMesiasa a ti: “Ombepo yOmuwa otayi mu lambele, ombepo yowino noyoondunge, ombepo yomayele noyoonkondo, ombepo yuunongo noyokutila Omuwa oye nota ka nyanyukilwa etilo okutila Omuwa.” (Jesaja 11:2, 3a) Mesiasa ina gwayekwa nomagadhi, ihe onombepo ondjapuki yaKalunga. Shika osha li sha ningwa pethimbo Jesus a li ta ninginithwa, sho Johannes Omuninginithi a li a mono ombepo ondjapuki yaKalunga tayi kulukile kuJesus, yi li molupe lwonguti. (Lukas 3:22) Ombepo ondjapuki yaJehova oya li ‘ya kulukile’ kuJesus nokwa li a gandja uumbangi mboka, sho a li e shi ulike miilonga kutya oku na uunongo, euvoko, omayele, oonkondo nosho wo ontseyo. Mbela ngoka kage shi tuu omaukwatya omawanawa gomupangeli!
ip-1-E ep. 160, okat. 8
Ehupitho nenyanyu kohi yelelo lyaMesiasa
8 Mesiasa okwa li a ulike ngiini kutya oha tila Jehova? Odhoshili kutya Jesus ka li a tila kutya Kalunga ote ke mu pangula. Pehala lyaashono, Mesiasa okwa li a simaneka Kalunga noonkondo nokwa li e mu hole. Omuntu ngoka ha tila Kalunga oha kala aluhe e na ehalo ‘lyokulonga shoka tashi mu nyanyudha,’ ngaashi Jesus a li a ningi. (Johannes 8:29) Okupitila moohapu nomoshiholelwa she, Jesus okwa longa kutya enyanyu ohali zi owala mokutsikila okuulika kutya ohatu tila Jehova esiku kehe.
ip-1-E ep. 160, okat. 9
Ehupitho nenyanyu kohi yelelo lyaMesiasa
9 Jesaja okwa hunganeka oshindji kombinga yuukwatya waMesiasa a ti: “Iha pangula pakutala kwomeho, ye iha tokola pakuuva omauvila.” (Jesaja 11:3b) Mbela ngele owa yi kompangu, ito ka kala wa pandula ngele owa pangulwa komupanguli a tya ngaaka? Mesiasa, e li Omupanguli gwaantu ayehe, iha nwethwa mo kokutompathana kwa puka, komikalo dhiineya ndhoka hadhi longithwa koohahende, komitotolombo nenge kiinima, ngaashi uuyamba womuntu. Oha vulu okukwata mo aanamakoto, noiha tala keholokopo lyokombanda, ihe oha tala ‘keopalo’ lyomeni lyomomutima. (1 Petrus 3:4) Jesus okwa tulila po ayehe oshiholelwa dhingi mboka haya ungaunga niinima yopampangu megongalo lyopaKriste. — 1 Aakorinto 6:1-4.
ip-1-E ep. 161, okat. 11
Ehupitho nenyanyu kohi yelelo lyaMesiasa
11 Uuna aalanduli ye ya pumbwa epukululo, Jesus ohe li gandja momukalo ngoka tagu ya kwathele lela. Shoka oshili oshiholelwa sha dhenga mbanda kaakuluntugongalo. Shimwe ishewe, mboka haya longo uuwinayi otaya ka pangulwa epangulo enyanyalithi. Sho Kalunga ta ka katukila onkatu onkalelo yuuyuni mbuka, Mesiasa ota ka ‘sinda iigwana’ newi lye li na oonkondo, nokungawo ota ka hanagula po aakolokoshi ayehe. (Episalomi 2:9; yelekanitha Ehololo 19:15.) Hugunina, itapu ka kala we aakolokoshi mboka taya ka yona po ombili yaantu. (Episalomi 37:10, 11) Jesus, e li omuyuuki nomudhiginini, oku na oonkondo dhokugwanitha po iinima mbyoka. — Episalomi 45:3-7.
Omaliko gomOmbiimbeli
‘Taya nongeke aantu oyendji okuninga shoka shu uka’
2 Aantu ayehe mboka taya ka yumudhwa otaya ka kala ya pumbwa okulongwa. (Jes. 26:9; 61:11) Onkee opolohalama onene yelongo ndjoka inaayi ningwa nando onale mondjokonona, otayi ka pumbwa okuya miilonga. (Lesha Jesaja 11:9, 10.) Omolwashike mbela? Etompelo limwe olyo kutya aantu aawinayi mboka taya ka yumudhwa otaya ka pumbwa okulongwa kombinga yaJesus Kristus, yUukwaniilwa, yekuliloyambo nosho wo tuu kombinga yompata ndjoka ya kwatela mo edhina lyaJehova nosho wo uuthemba we wokupangela. Kakele kaashono, aantu aawanawa mboka taya ka yumudhwa nayo otaya ka pumbwa okupewa uuyelele wu li pethimbo waashoka Jehova a kala nokulonga oshigwana she kombinga yelalakano lye li na ko nasha nevi. Aapiya yamwe mboka aadhiginini oomboka ya adhika ya sa nalenale nokuli manga oohapu dhaJehova, Ombiimbeli, inaadhi pwa okunyolwa. Onkee aantu aawinayi nosho wo mboka aawanawa otaya ka kala ye na oshindji okwiilonga.
29 DESEMBA–4 JANUALI
OMALIKO OKUZA MOOHAPU DHAKALUNGA JESAJA 14–16
Aatondi yoshigwana shaKalunga otaya ka geelwa
ip-1-E ep. 180, okat. 16
Jehova ta fupipike oshilando oshiinenepeki
16 Shika ka sha li sha ningwa meendelelo momumvo 539 K.E.N. Sigo okunena, oshi iwetikile nosha yela kutya ashihe shoka Jesaja a hunganeka shi na sha naBabilon osha gwanithwa. Omutseyi gwOmbiimbeli gumwe, okwa ti: ‘Uule womimvo omayovi, Babilon oshi li nosha kala sha mbugala sha ninga ondumba yomakulukuma.’ Okwa gwedha ko a ti: “Oshidhigu okumona omathano ngoka e to kala inoo dhimbulukwa nkene shoka Jesaja naJeremia ya uvaneka sha gwanithwa po.” Osha yela kutya pethimbo lyaJesaja kapu na omuntu a li ta vulu okuhunganeka kombinga yokuteka po kwaBabilon, nembugalo lyasho. Hugunina, Babilon okwa sindwa kAamedia nAapersia konima yomimvo 200, sho Jesaja a mana nale okunyola embo lye. Ehanagulo lyasho lyahugunina olye ke ya konima yomimvo omayuvi. Mbela shika itashi koleke tuu eitaalo lyetu mOmbiimbeli, ndjoka yi li Oohapu dhaKalunga dha nwethwa mo? (2 Timoteus 3:16) Kakele kaashono, Jehova oha gwanitha po omahunganeko ge pethimbo, notatu vulu okukala tu na einekelo kutya omahunganeko ngoka ge li mOmbiimbeli inaaga gwanithwa po natango, ote ke ga gwanithwa po pethimbo lye lya opala.
ip-1-E ep. 184, okat, 24
Jehova ta fupipike oshilando oshiinenepeki
24 MOmbiimbeli aakwaniilwa yomezimo lyaDavid, oya faathanithwa noonyothi. (Numeri 24:17) Okuza ngaa kuDavid, ‘oonyothi’ ndhika odha lele okuza kondundu yaSion. Konima sho Salomo a tungu otempeli muJerusalem, edhina Sion olya tseyikila oshilando ashihe. Kohi yehangano lyOmpango, aalumentu ayehe Aaisraeli oya li ya tegelelwa ya ye kuSion lutatu, omumvo kehe. Kungawo, Sion okwa ningi ‘ondundu yokugongalela.’ Nebukadnezzar sho a tokola okupangela aakwaniilwa Aajuda noku ya kutha ko kondundu ndjoka, osha li tashi ulike kutya okwa hala okwiininga omunene, e vule ‘oonyothi’ ndhoka. Ka li a gandja esimano kuJehova sho e ya sindi. Pehala lyaashono okwi inenepeke e ti itula pondondo yaJehova.
ip-1-E ep. 189, okat. 1
Omalondodho ngoka Jehova a li a pe iigwana
JEHOVA okwa li a longitha iigwana yilwe a geele oshigwana she, omolwuuwinayi washo. Nonando ongawo, iha ipwililikile onyanya, uuntsa nosho wo uutondwe mboka iigwana mbyoka hayi kala yi nine elongelokalunga lyashili. Onkee okwa adhika nale a nwetha mo Jesaja a nyole kombinga ‘yoohapu dhomahunganeko tadhi popi Babilon.’ (Jesaja 13:1) Ihe Babilon okwa li te ke shi ningila omatilitho monakwiiwa. Pethimbo lyaJesaja, Aayassur oya li taya hepeke oshigwana shoka sha ninga ehangano naKalunga. Aayassur oya hanagula po oshitopolwa shuukwaniilwa waIsraeli wokuumbangalantu nosho wo ombinga onene yaJuda. Ihe esindano lyAayassur olya li lyopakathimbo. Jesaja okwa nyola a ti: “Omuwa Omunankondoawike okwa gana ta ti: ‘Shoka nda nuna, otashi ka ningwa, . . . . Aayassur otandi ke ya dhipaga mo moshilongo shandje shalsrael e tandi ya lyatagulile koondundu dhandje. Aantu yandje otandi ke ya mangulula mondjoko yAayassur nokomutenge ngoka ya li ye na oku gu humbata.’” (Jesaja 14:24, 25) Konima yethimbo efupi okuza sho Jesaja a popi ehunganeko ndika, Aayassur kaya li we ya tilitha Juda.
ip-1-E ep. 194, okat. 12
Omalondodho ngoka Jehova a li a pe iigwana
12 Ehunganeko ndika otali ka gwanithwa po uunake? Otali ka gwanithwa masiku. Ombiimbeli otayi ti: “Elaka olyo ndika Omuwa e li gandja nale tali popi Moab. Ngashingeyi Omuwa ota ti: ‘Moomvula ndatu, ngaashi omupiya e li kondhalate te dhi yalula, eliko enene lyaMoab otali ka kana po. Maantu ye oyendji aashonashona yowala taa ka hupa ko ye na omwenyo, ihe kaye na omwago.’” (Jesaja 16:13, 14) Metsokumwe naashika, opu na uuyelele wopandjokonona mboka tawu ulike kutya methelemumvo etihetatu K.E.N., Moab okwa li a mono iihuna noonkondo, nomahala ge ogendji kaga li we haga kala aantu oyendji. Tiglath-pileser omu-3, omuleli gwaAssur, okwa popi kombinga yaSalmanu gwaMoab, e li gumwe gwomaaleli mboka ya li ya futu iifendela kuye. Sennakerib okwa li a pewa iifendela kuKammusunadbi, omukwaniilwa gwaMoab. Aakwaniilwa yAayassur, Esar-haddon naAshurbanipal, oya ti kutya aakwaniilwa yaMoab, Masuri naKamashaltu, oye li aalelwa yawo. Aamoabi oya li ya hulu po, omimvo omathele dha ka pita. Okwa monika iikulukuma mbyoka taku dhiladhilwa kutya oyiilando yaMoab, ihe opu na uumbangi uushona mboka tawu koleke kutya oshilongo shoka oshinankondo oko sha li shili.
Omaliko gomOmbiimbeli
Omanenedhiladhilo okuza membo lyaJesaja ontopolwa 1:1–35:10
14:1, 2 (OB-1954) — Ongiini oshigwana shaJehova sha li sha ‘kwata po aakwati yasho nosha pangele aapangeli yasho’? Oshinima shika osha li sha gwanithilwa oohandimwe ngaashi Daniel ngoka a li a pewa ondondo yopombanda muBabilonia kohi yepangelo lyAamedia nAapersia, naEster ngoka a li a ningi omunyekadhi gwomukwaniilwa gwaPersia nosho wo Mordekai ngoka a li a pewa ondondo a ninge elenga ekuluntu lyomombala yAapersia.